തൃശൂർ ജില്ലയിൽ വെളളിയാഴ്ച (13/11/2020) 677 പേർക്ക് കൂടി കോവിഡ്-19 സ്ഥീരികരിച്ചു. 866 പേർ രോഗമുക്തരായി. ജില്ലയിൽ രോഗബാധിതരായി ചികിത്സയിൽ കഴിയുന്നവരുടെ എണ്ണം 8536 ആണ്. തൃശൂർ സ്വദേശികളായ 91 പേർ മറ്റു ജില്ലകളിൽ ചികിത്സയിൽ കഴിയുന്നു. ജില്ലയിൽ ഇതുവരെ കോവിഡ് സ്ഥീരികരിച്ചവരുടെ എണ്ണം 49,984 ആണ്. 41,073 പേരെയാണ് ആകെ രോഗമുക്തരായി ആശുപത്രിയിൽ നിന്നും ഡിസ്ചാർജ്ജ് ചെയ്തത്.
ജില്ലയിൽ വെളളിയാഴ്ച്ച സമ്പർക്കം വഴി 658 പേർക്കാണ് രോഗം സ്ഥീരികരിച്ചത്. കൂടാതെ 3 ആരോഗ്യ പ്രവർത്തകർക്കും സംസ്ഥാനത്തിന് പുറത്തുനിന്ന് എത്തിയ 7 പേർക്കും, രോഗ ഉറവിടം അറിയാത്ത 9 പേർക്കും രോഗബാധ ഉണ്ടായി.

*ചികിത്സയിലുള്ളവർ 77,390; 11 പുതിയ ഹോട്ട് സ്‌പോട്ടുകൾ
കേരളത്തിൽ വെള്ളിയാഴ്ച 5804 പേർക്ക് കോവിഡ്-19 സ്ഥിരീകരിച്ചു. കോഴിക്കോട് 799, എറണാകുളം 756, തൃശൂർ 677, മലപ്പുറം 588, കൊല്ലം 489, ആലപ്പുഴ 468, തിരുവനന്തപുരം 439, പാലക്കാട് 438, കോട്ടയം 347, കണ്ണൂർ 240, പത്തനംതിട്ട 189, ഇടുക്കി 187, വയനാട് 106, കാസർഗോഡ് 81 എന്നിങ്ങനേയാണ് ജില്ലകളിൽ രോഗബാധ സ്ഥിരീകരിച്ചത്.

മനുഷ്യത്വത്തിന്റെ പ്രകാശന വേളയാക്കി ദീപാവലിയെ  മാറ്റാൻ സാധിക്കട്ടെ എന്ന് മുഖ്യമന്ത്രി പിണറായി വിജയൻ ആശംസിച്ചു. നൻമയുടെ സന്ദേശമാണ് ദീപാവലിയുടേത്. എല്ലാ വിധത്തിലുമുള്ള വേർതിരിവുകൾക്കതീതമായി മതസാഹോദര്യവും സമത്വവും ജനാധിപത്യമൂല്യങ്ങളും ഉയർത്തിപ്പിടിച്ചു കൊണ്ട് ദീപാവലി ആഘോഷിക്കാം. എല്ലാവർക്കും ഹൃദയംഗമമായ ആശംസകൾ നേരുന്നതായി മുഖ്യമന്ത്രി പറഞ്ഞു.
പി.എൻ.എക്‌സ്.4013/2020

കോഴിക്കോട് ഇംഹാൻസിൽ പോസ്റ്റ് ബേസിക് ഡിപ്ലോമ ഇൻ സൈക്യാട്രിക് നഴ്‌സിംഗ് 2020-21 കോഴ്‌സിലേക്ക് അപേക്ഷ ക്ഷണിച്ചു. യോഗ്യത ജനറൽ നഴ്‌സിംഗ്/ബി.എസ്‌സി നഴ്‌സിംഗ്/പോസ്റ്റ് ബേസിക് ബി.എസ്‌സി നഴ്‌സിംഗ് ബിരുദം. അപേക്ഷിക്കേണ്ട അവസാന തീയതി നവംബർ 30. അപേക്ഷ ഫോം ഇംഹാൻസ് ഓഫീസിൽ നിന്ന് നേരിട്ടും www.imhans.ac.in എന്ന വെബ്‌സൈറ്റ് വഴിയും ലഭിക്കും. ഫോൺ: 9745156700, 9605770068.

തദ്ദേശ തിരഞ്ഞെടുപ്പിനോടനുബന്ധിച്ച് ബ്ലോക്ക് തല പരിശീലനം നൽകുന്ന ഉദ്യോഗസ്ഥർക്കുള്ള ഏകദിന പരിശീലനം കളക്ട്രേറ്റിലെ ജില്ലാ ആസൂത്രണ സമിതി ഹാളിൽ നടന്നു. ബൂത്ത് തലത്തിൽ സ്വീകരിക്കേണ്ട നടപടികൾ, വോട്ടിംഗ് യന്ത്രങ്ങളുടെ ക്രമീകരണങ്ങൾ, പോളിംഗ് ദിവസത്തെ മറ്റ് അനുബന്ധ പ്രവർത്തനങ്ങൾ തുടങ്ങിയവയാണ് ജില്ലാതല പരിശീലകർ ബ്ലോക്ക്തല പരിശീലകരെ പരിചയപ്പെടുത്തിയത്. ജില്ലയിലെ 16 ബ്ലോക്ക് പഞ്ചായത്തുകളിൽ നിന്നും 63 ഉദ്യോഗസ്ഥർ പരിശീലന പരിപാടിയിൽ പങ്കെടുത്തു.

ഇൻഫർമേഷൻ പബ്ലിക് റിലേഷൻസ് വകുപ്പിനു കീഴിലുള്ള ഡിജിറ്റൽ ആർകൈവ്സ് വിപുലീകരണത്തിന്റെ ഭാഗമായി സംസ്ഥാന ചരിത്രം, സംസ്‌കാരം എന്നിവയുമായി ബന്ധപ്പെട്ട അപൂർവ ദൃശ്യങ്ങൾ ശേഖരിക്കുന്നു.
കേരളത്തിന്റെ വികാസ പരിണാമവുമായി ബന്ധപ്പെട്ട അപൂർവവും അമൂല്യവുമായ ദൃശ്യങ്ങൾ കൈവശമുള്ളവർ ഇതുസംബന്ധിച്ച വിശദാംശങ്ങൾ നവംബർ 25 നകം ഡയറക്ടർ, ഇൻഫർമേഷൻ പബ്ലിക് റിലേഷൻസ് വകുപ്പ്, ഗവ. സെക്രട്ടറിയേറ്റ്, തിരുവനന്തപുരം എന്ന വിലാസത്തിൽ രേഖാമൂലം അറിയിക്കണം. കൈവശമുള്ള ദൃശ്യങ്ങൾ ഏത് ഫോർമാറ്റിൽ (ഫിലിം/ടേപ്പ്/ഡിജിറ്റൽ) ആണെന്നുള്ള വിവരവും അപേക്ഷയിലുണ്ടാവണം.
പി.എൻ.എക്‌സ്.4012/2020

കേരള സംസ്ഥാന വിവരാവകാശ കമ്മീഷനിൽ ഒഴിവുവരുന്ന ചീഫ് ഇൻഫർമേഷൻ കമ്മീഷണറുടെ ഒഴിവിലേയ്ക്ക് അപേക്ഷ ക്ഷണിച്ചു. വിവരാവകാശ നിയമം 2005, വിവരാവകാശ നിയമം ഭേദഗതി ആക്ട് 2019 എന്നിവയിൽ നിഷ്‌കർഷിച്ചിട്ടുള്ള പ്രവൃത്തി പരിചയം, കഴിവ് തെളിയിച്ചിട്ടുള്ള മേഖലകൾ എന്നീ വിവരങ്ങൾ സഹിതം ഡിസംബർ 28ന് വൈകിട്ട് അഞ്ചിന് മുൻപായി പ്രിൻസിപ്പൽ സെക്രട്ടറി, പൊതുഭരണ(ഏകോപനം)വകുപ്പ്, ഗവൺമെന്റ് സെക്രട്ടേറിയറ്റ്, തിരുവനന്തപുരം-695 001 എന്ന വിലാസത്തിലെ അല്ലെങ്കിൽ  gadcdn6@gmail.com എന്ന ഇ-മെയിൽ വിലാസത്തിലോ അപേക്ഷിക്കണം. വൈകിക്കിട്ടുന്ന അപേക്ഷ പരിഗണിക്കുന്നതല്ല.

തദ്ദേശസ്വയംഭരണ സ്ഥാപനങ്ങളുടെ ഭരണകാലാവധി അവസാനിച്ചതിനെ തുടർന്ന് ജില്ലാ പഞ്ചായത്തിന്റെ ഭരണചുമതല ജില്ലാ കളക്ടർ എസ് ഷാനവാസ് ഏറ്റെടുത്തു. ചുമതല ഏറ്റെടുത്തതിനെ തുടർന്ന് മൂന്ന് പേരടങ്ങിയ ഭരണ നിർവഹണ സമിതി രൂപീകരിച്ചു. ജില്ലാ കളക്ടർ, ജില്ലാ പഞ്ചായത്ത് സെക്രട്ടറി, ദാരിദ്ര്യ ലഘൂകരണ വിഭാഗം പ്രൊജക്ട് ഡയറക്ടർ എന്നിവർ ഉൾപ്പെടുന്നതാണ് ഭരണ നിർവ്വഹണ സമിതി. ജില്ലാ പഞ്ചായത്തിൽ നടന്ന ചുമതല ഏറ്റെടുക്കൽ ചടങ്ങിൽ ജില്ലാ പഞ്ചായത്ത് സെക്രട്ടറി കെ ജി തിലകൻ, ദാരിദ്ര്യ ലഘൂകരണ വിഭാഗം പ്രൊജക്ട് ഡയറക്ടർ സറീന എ റഹ്മാൻ, മറ്റ് ജില്ലാ പഞ്ചായത്ത് ഉദ്യോഗസ്ഥർ എന്നിവർ പങ്കെടുത്തു.

നാമനിർദേശ പത്രികാസമർപ്പണത്തിന്റെ രണ്ടാം ദിവസമായ വെള്ളിയാഴ്ച തൃശൂർ ജില്ലയിൽ ലഭിച്ചത് 33 നാമനിർദേശ പത്രികകൾ. തൃശൂർ കോർപറേഷൻ, ഇരിങ്ങാലക്കുട, ചാലക്കുടി നഗരസഭകൾ എന്നിവിടങ്ങളിലും 13 ഗ്രാമപഞ്ചായത്തുകളിലുമാണ് നാമനിർദേശ പത്രിക സമർപ്പണം നടന്നത്.