തിരൂര്‍ താലൂക്ക് സപ്ലൈ ഓഫീസില്‍ ഉപയോഗിച്ചിരുന്ന കെ.എല്‍ 01 ഇ 7556 നമ്പര്‍ മഹീന്ദ്ര ജീപ്പ് ജൂണ്‍ 11ന് രാവിലെ 11ന് സപ്ലൈ ഓഫീസില്‍ ലേലം ചെയ്യും.

പ്രകൃതിക്ഷോഭം മൂലം ഉണ്ടാകാന്‍ സാധ്യതയുള്ള ദുരന്തങ്ങള്‍ ഫലപ്രദമായി നേരിടുന്നതിനും ദുരന്തനിവാരണ പ്രവൃത്തികള്‍ നടത്തുന്നതിനുമായി ജെ.സി.ബി, ക്രെയിന്‍ തുടങ്ങിയവയുടെ ഉടമസ്ഥരില്‍ നിന്നും ക്വട്ടേഷന്‍ ക്ഷണിച്ചു. ക്വട്ടേഷന്‍ മെയ് 29ന് വൈകുന്നേരം മൂന്നിനകം ഏറനാട് താലൂക്ക് തഹസില്‍ദാര്‍ക്ക് ലഭിക്കണം.

അന്താരാഷ്ട്ര പുകയില വിരുദ്ധ വാരാചരണവും വിമുക്തി ലഹരിമോചന ചികിത്സ - ആശയ സമന്വയവും ഇന്ന് (മേയ് 29) രാവിലെ 10. 30 ന് മലപ്പുറം മുനിസിപ്പല്‍ ടൗണ്‍ ഹാളില്‍ എക്‌സൈസ് കമ്മീഷണര്‍ ഋഷിരാജ് സിംഗ് ഉദ്ഘാടനം ചെയ്യും. മലപ്പുറം നഗരസഭ ചെയര്‍പേഴ്‌സണ്‍ സി.എച്ച് ജമീല അധ്യക്ഷത  വഹിക്കും. എക്‌സൈസ്, ആരോഗ്യം, വിദ്യാഭ്യാസം, സാമൂഹ്യനീതി വകുപ്പുകളുടെ നേതൃത്വത്തിലാണ് പരിപാടി.

കുഴിമണ്ണ ഗവ. ഹയര്‍ സെക്കന്‍ഡറി സ്‌കൂളില്‍ മാത്‌സ്, ബോട്ടണി, ഇംഗ്ലീഷ്, പൊളിറ്റിക്കല്‍ സയന്‍സ്, ജ്യോഗ്രഫി, ഹിസ്റ്ററി എന്നീ വിഷയങ്ങളില്‍ ദിവസ വേതന അടിസ്ഥാനത്തില്‍ അധ്യാപകരെ നിയമിക്കുന്നു. താത്പര്യമുള്ളവര്‍ സര്‍ട്ടിഫിക്കറ്റുകളോടു കൂടി മെയ് 30ന് നടക്കുന്ന ഇന്റര്‍വ്യൂവിനു ഹാജരാകണം.

ആകാശവാണി മഞ്ചേരി എഫ്.എംല്‍ ജൂണ്‍ രണ്ടു മുതല്‍ രാവിലെ 5.53 മുതല്‍ രാത്രി 11.06 വരെ തുടര്‍ച്ചയായ പ്രക്ഷേപണ പരിപാടികള്‍ക്ക് തുടക്കമാവും.  

ജില്ലാതല ബാങ്കിന് അവലോകന യോഗം മെയ് 30ന് രാവിലെ 10ന് മലപ്പുറം ഹോട്ടല്‍ മഹേന്ദ്രപുരിയില്‍ നടക്കും.

ഗവ/എയ്ഡഡ്/സ്വാശ്രയം (മെറിറ്റ്) ഡി.എല്‍.എഡ് (ടിടിസി) കോഴ്‌സിലേക്ക് പ്ലസ്ടു/പ്രീഡിഗ്രി പരീക്ഷയില്‍ 50 ശതമാനം മാര്‍ക്ക് ലഭിച്ചവരില്‍ നിന്നും അപേക്ഷ ക്ഷണിച്ചു.  സംവരണ വിഭാഗങ്ങള്‍ക്ക് നിയമാനുസൃത ഇളവ് ലഭിക്കും.  കൂടുതല്‍ വിവരങ്ങള്‍ www.education.kerala.gov.inലഭിക്കും.  അപേക്ഷ ജൂണ്‍ 12നകം വിദ്യാഭ്യാസ ഉപഡയറക്ടറുടെ കാര്യാലയത്തില്‍ ലഭിക്കണം.

ഏറനാട് താലൂക്ക് വികസന സമിതി യോഗം ജൂണ്‍ ഒന്നിന് രാവിലെ 10.30ന് താലൂക്ക് ഓഫീസില്‍ ചേരും.