തദ്ദേശ ഭരണ സ്ഥാപനങ്ങളുടെ 2019-20 വര്‍ഷത്തെ പരിഷ്‌ക്കരിച്ച സാമ്പത്തിക പദ്ധതികള്‍ക്ക് അംഗീകാരം നല്‍കുന്നതിനുള്ള ജില്ലാ ആസൂത്രണ സമിതി യോഗം ജൂണ്‍ 15 ന് നടക്കും. ജില്ലാ പഞ്ചായത്ത് കോണ്‍ഫറന്‍സ് ഹാളില്‍ വൈകീട്ട് മൂന്നിന് നടക്കുന്ന യോഗത്തില്‍ ബന്ധപ്പെട്ടവര്‍ പങ്കെടുക്കണമെന്ന് ജില്ലാ കലക്ടര്‍ അറിയിച്ചു.

ജില്ലാ സ്‌പോര്‍ട്‌സ് കൗണ്‍സിലിന്റെയും ചെമ്പലോട് കൈരളി കലാസംഘത്തിന്റെയും അവധിക്കാല കളരി പരിശീലന ക്യാമ്പ് സമാപിച്ചു. പരിപാടി ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്റ് അഡ്വ. കെ പ്രേമചന്ദ്രന്‍ ഉദ്ഘാടനം ചെയ്തു. സംസ്ഥാന സ്‌പോര്‍ട്‌സ് കൗണ്‍സില്‍ അംഗം എം.രാമചന്ദ്രന്‍ സര്‍ട്ടിഫിക്കറ്റ് വിതരണം ചെയ്തു. ശെല്‍വന്‍ ഗുരുക്കള്‍ അധ്യക്ഷനായ യോഗത്തില്‍ ജയപാലന്‍, വിജയന്‍, മാധവന്‍, ഉദയകുമാര്‍, ശരണ്‍ സംസാരിച്ചു

പട്ടാമ്പി കൃഷി വിജ്ഞാന്‍ കേന്ദ്രത്തില്‍ പയര്‍, തക്കാളി, വെണ്ട, വഴുതന, മുളക്, വെള്ളക്കാന്താരി തൈകള്‍ വില്‍പനയ്ക്ക്. തൈ ഒന്നിന് രണ്ട് രൂപയാണ് വില. അസോള കിലോയ്ക്ക് 50 രൂപ നിരക്കിലും ലഭിക്കും. ഫോണ്‍: 0466-2212279.

മൃഗസംരക്ഷണ വകുപ്പിന്റെ അംഗീകൃത എഗ്ഗ് നഴ്‌സറിയില്‍ നിന്നും 45 ദിവസം പ്രായമുള്ള മുട്ടക്കോഴി കുഞ്ഞുങ്ങളെ തരൂര്‍, കിഴക്കഞ്ചേരി, വണ്ടാഴി, കാവശ്ശേരി, പുതുക്കോട്, മേലാര്‍ക്കോട് ഗ്രാമപഞ്ചായത്തുകളില്‍ വിതരണം ചെയ്യുന്നു. ഒരെണ്ണം 100 രൂപ നിരക്കിലാണ് നല്‍കുക. ആവശ്യമുള്ളവര്‍ അതത് മൃഗാശുപത്രിയില്‍ ജൂണ്‍ ഏഴിനകം പേര് രജിസ്റ്റര്‍ ചെയ്യണമെന്ന് ജില്ലാ മൃഗസംരക്ഷണ ഓഫീസര്‍ അറിയിച്ചു. 

പോലീസ് വകുപ്പില്‍ 2018 മാര്‍ച്ച് 21 ന് നിലവില്‍ വന്ന സിവില്‍ പോലീസ് ഓഫീസര്‍ (വനിതാ പോലീസ് കോണ്‍സ്റ്റബിള്‍- എസ്.ടി സ്‌പെഷ്യല്‍ ഡ്രൈവ്്) തസ്തികയുടെ റാങ്ക് ലിസ്റ്റ് കാലാവധി പൂര്‍ത്തിയായതിനാല്‍ 2019 മാര്‍ച്ച് 20 മുതല്‍ ലിസ്റ്റ് റദ്ദാക്കിയതായി പി.എസ്.സി ജില്ലാ ഓഫീസര്‍ അറിയിച്ചു.

പാലക്കാട് താലൂക്കിലെ ജൂണ്‍ മാസത്തെ വികസന സമിതി യോഗം ജൂണ്‍ ഒന്ന് രാവിലെ 10.30ന് പാലക്കാട് താലൂക്ക് കോണ്‍ഫറന്‍സ് ഹാളില്‍ ചേരും

അങ്കണവാടി പ്രവേശനോല്‍സവത്തിന്റെ ജില്ലാതല ഉദ്ഘാടനം ഇന്ന് (മെയ് 30) രാവിലെ 10.30 ന് പുതുശ്ശേരി പഞ്ചായത്ത് കമ്മ്യൂണിറ്റി ഹാളില്‍ നടക്കും. അങ്കണവാടികളുടെ പ്രാധാന്യം സമൂഹത്തില്‍ വര്‍ധിപ്പിക്കുക, പ്രീ - സ്‌കൂള്‍ കുട്ടികളുടെ എണ്ണം വര്‍ദ്ധിപ്പിക്കുക ലക്ഷ്യമിട്ട് നടത്തുന്ന പരിപാടി ജില്ലാപഞ്ചായത്ത് ക്ഷേമകാര്യ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ ബിന്ദു സുരേഷ് ഉദ്ഘാടനം ചെയ്യും. ആദിവാസി മേഖലയ്ക്ക് പ്രാധാന്യം കൊടുക്കുന്നതിന്റെ ഭാഗമായാണ് മലമ്പുഴ ഐ.സി.ഡി.എസ്. പ്രോജക്ടിലെ പുതുശ്ശേരി ഗ്രാമപഞ്ചായത്തിലെ അങ്കണവാടികളെ പ്രവേശനോല്‍സവത്തിനായി തിരഞ്ഞെടുത്തത്.