മത്സ്യമേഖലയുടെ സംരക്ഷണത്തിനും അഭിവൃദ്ധിക്കുമായി സംസ്ഥാന സർക്കാർ നടപ്പാക്കുന്ന ട്രോളിംഗ് നിരോധനം ജൂൺ ഒമ്പതിന് ആരംഭിക്കുമെന്ന് മത്സ്യബന്ധന-ഹാർബർ എൻജിനിയറിംഗ്- കശുവണ്ടി വ്യവസായ വകുപ്പ് മന്ത്രി ജെ. മേഴ്‌സിക്കുട്ടി അമ്മ അറിയിച്ചു. ട്രോളിംഗ് സംബന്ധിച്ച് സർക്കാർ വിളിച്ചു ചേർത്ത മത്സ്യത്തൊഴിലാളി പ്രതിനിധികളുടെ യോഗത്തിൽ സംസാരിക്കുകയായിരുന്നു മന്ത്രി.

എം.ജി സർവകലാശാല വൈസ് ചാൻസലറായി എം.ജിയിലെ സ്‌കൂൾ ഓഫ് കെമിക്കൽ സയൻസസ് പ്രൊഫസർ ഡോ. സാബു തോമസിനെ ചാൻസലർ കൂടിയായ ഗവർണർ പി. സദാശിവം നിയമിച്ചു.  നാലു വർഷത്തേക്കാണ് നിയമനം.  ഹരിയാന ഭഗത്ഫൂൽ സിംഗ് മഹിള വിദ്യാലയ വൈസ് ചാൻസലർ പ്രൊഫ. സുഷമ യാദവ്, സംസ്ഥാന ആസൂത്രണ ബോർഡ് വൈസ് ചെയർപേഴ്‌സൺ പ്രൊഫ. വി.കെ രാമചന്ദ്രൻ, ചീഫ് സെക്രട്ടറി ടോം ജോസ് എന്നിവരടങ്ങിയ സെർച്ച് കമ്മിറ്റിയാണ് ഡോ. സാബു തോമസിനെ ശുപാർശ ചെയ്തത്.
പി.എൻ.എക്സ്. 1496/19

ജൂൺ ഒന്നുമുതൽ പ്രളയ സെസ് ഏർപ്പെടുത്തി സർക്കാർ ഉത്തരവായി. പ്രളയാനന്തര കേരളത്തിന്റെ പുനർനിർമാണത്തിനു വേണ്ടി സംസ്ഥാനത്തിനകത്തുള്ള  സേവനങ്ങളുടെയും ചരക്കുകളുടെയും വിതരണത്തിന് ഒരു ശതമാനം സെസ് ചുമത്തുന്നതിനു ജി.എസ്.ടി കൗൺസിൽ നേരത്തെ അനുവാദം നൽകിയിരുന്നു. 
സ്വർണം ഒഴികെ അഞ്ചു ശതമാനമോ അതിൽ താഴെയുള്ള സ്ലാബിൽപെട്ട ചരക്കുകളുടെ മേൽ സെസ് ഏർപ്പെടുത്തിയിട്ടില്ല. കോമ്പോസിഷൻ രീതി തിരഞ്ഞെടുത്തിട്ടുള്ള വ്യാപാരികളെയും സെസിൽനിന്ന് ഒഴിവാക്കിയിട്ടുണ്ട്. 

ജൂൺ ഒന്ന് മുതൽ ഏഴ് വരെ ഭക്ഷ്യസുരക്ഷാ വാരം ആചരിക്കുന്നതിന്റെ ഭാഗമായി ഭക്ഷ്യസുരക്ഷാ വകുപ്പ് ഈറ്റ് റൈറ്റ് മേളകൾ, റാലി, ഫ്‌ളാഷ് മോബ്, പോസ്റ്റർ രചനാ മത്സരം, ലഘുലേഖ വിതരണം, ബോധവത്കരണ ക്ലാസ്, ക്വിസ് മത്സരം എന്നിവ സംഘടിപ്പിക്കുന്നു.

തിരുവനന്തപുരം സർക്കാർ സംസ്‌കൃത കോളേജിൽ സാഹിത്യവിഭാഗത്തിൽ (സംസ്‌കൃതം സ്‌പെഷ്യൽ) ഗസ്റ്റ് ലക്ചററിന്റെ ഒഴിവിലേക്കുള്ള അഭിമുഖം മേയ് 31ന് രാവിലെ 11ന് പ്രിൻസിപ്പാളിന്റെ ഓഫീസിൽ നടത്തും. കോളേജ് വിദ്യാഭ്യാസ വകുപ്പിന്റെ കൊല്ലം മേഖലാ ഓഫീസിൽ ഗസ്റ്റ് അധ്യാപകരുടെ പാനലിൽ പേര് രജിസ്റ്റർ ചെയ്തിട്ടുള്ള ഉദ്യോഗാർഥികൾ യോഗ്യത, ജനനത്തീയതി, മുൻപരിചയം എന്നിവ തെളിയിക്കുന്നതിനുള്ള അസ്സൽ സർട്ടിഫിക്കറ്റുകൾ സഹിതം അഭിമുഖത്തിന് ഹാജരാകണം.
പി.എൻ.എക്സ്. 1492/19

* 13 ജില്ലകളിൽ പരിശീലനം പൂർത്തീകരിച്ചു
* 3000 ഭിന്നശേഷിക്കാർക്ക് പരിശീലനം നൽകി
സംസ്ഥാന ദുരന്തനിവാരണ അതോറിറ്റി മഹാത്മാഗാന്ധി സർവകലാശാല ഇന്റർ യൂണിവേഴ്സിറ്റി സെന്റർ ഫോർ ഡിസബിലിറ്റി സ്റ്റഡീസിന്റെ സഹകരണത്തോടെ ഭിന്നശേഷിക്കാർക്കായി ദുരന്തനിവാരണവും, പ്രഥമശുശ്രൂഷയും എന്ന വിഷയത്തിൽ സംഘടിപ്പിക്കുന്ന ദുരന്തനിവാരണപരിശീലനം ഇന്നും(മേയ് 28) നാളെ(മേയ് 29)യുമായി തിരുവനന്തപുരത്ത് നടക്കും. 

ട്രാൻസ്‌ജെൻഡറുകൾ അഭിമുഖീകരിക്കുന്ന വിവിധ വിഷയങ്ങൾ ഉൾപ്പെടെ കേരള നിയമസഭയുടെ സ്ത്രീകളുടെയും കുട്ടികളുടെയും ട്രാൻസ്‌ജെൻഡറുകളുടെയും ഭിന്നശേഷിക്കാരുടെയും ക്ഷേമം സംബന്ധിച്ച സമിതിയുടെ പരിഗണനാവിഷയങ്ങളുമായി ബന്ധപ്പെട്ട് വ്യക്തികൾക്കും സംഘടനകൾക്കും ഹർജികളും നിർദേശങ്ങളും സമർപ്പിക്കാം. ചെയർപേഴ്‌സൺ, സ്ത്രീകളുടെയും ട്രാൻസ്‌ജെൻഡറുകളുടെയും കുട്ടികളുടെയും ഭിന്നശേഷിക്കാരുടെയും ക്ഷേമം സംബന്ധിച്ച സമിതി, നിയമസഭാ സെക്രട്ടേറിയറ്റ്, വികാസ് ഭവൻ പി.ഒ, തിരുവനന്തപുരം-33 എന്ന മേൽവിലാസത്തിൽ നൽകണം.
പി.എൻ.എക്സ്. 1489/19