ജനകീയ സര്‍ക്കാര്‍  ആയിരം ദിനം പിന്നിടുന്നതിന്റെ ഭാഗമായി മികവ്- 1000ദിനങ്ങള്‍ എന്ന പേരില്‍ ഫെബ്രുവരി 20 മുതല്‍ സംഘടിപ്പിക്കുന്ന ആയിരം ദിനാഘോഷങ്ങളുടെ സാംസ്‌കാരിക പ്രകാശനം പ്രശസ്ത ചലച്ചിത്ര താരം കൈലാഷിന് കൈമാറികൊണ്ട് നഗരസഭ ചെയര്‍മാന്‍ കെ.ബാവഹാജി നിര്‍വ്വഹിച്ചു. തിരൂര്‍ നഗരസഭ ചെയര്‍മാന്‍ കെ. ബാവഹാജി, തിരൂര്‍ ആര്‍.ഡി.ഒ മെഹറലി എന്‍.എം, തഹസില്‍ദാര്‍ പി.വി സുരേഷ്,  അഡ്വ. പി. ഹംസക്കുട്ടി, പി. കുഞ്ഞിമുസ്സ, മുജീബ് താനാളൂര്‍, പിമ്പുറത്ത് ശ്രീനിവാസന്‍ ഡെപ്യൂട്ടി തഹസില്‍ദാര്‍ പി. ഉണ്ണി, ജില്ലാ ഇന്‍ഫര്‍മേഷന്‍ ഓഫീസര്‍ സി.അയ്യപ്പന്‍ തുടങ്ങിയവര്‍ പങ്കെടുത്തു.

സംസ്ഥാന സര്‍ക്കാറിന്റെ ആയിരം ദിനാഘോഷങ്ങളുടെ ഭാഗമായി ജില്ലയിലെ നാല് സബ് രജിസ്ട്രാര്‍ ഓഫീസുകളുടെ നിര്‍മ്മാണോദ്ഘാടനം മുഖ്യമന്ത്രി പിണറായി വിജയന്‍ വീഡിയോ കോണ്‍ഫറന്‍സിങ്ങിലൂടെ നിര്‍വ്വഹിച്ചു. താനൂര്‍, തേഞ്ഞിപ്പലം, കുറ്റിപ്പുറം, കല്‍പകഞ്ചേരി തുടങ്ങിയ സബ് രജിസ്ട്രാര്‍ ഓഫീസുകളുടെ നിര്‍മ്മാണോദ്ഘാടനമാണ് ഒരേസമയം മുഖ്യമന്ത്രി നിര്‍വഹിച്ചത്.

എംപ്ലോയബിലിറ്റിസെന്റര്‍ മുഖേന പ്രമുഖസ്ഥാപനങ്ങളിലേക്ക് എച്ച്.ആര്‍ മാനേജര്‍, ഓഫീസ് സ്റ്റാഫ്, അക്കൗണ്ട്‌സ് ട്രെയിനീ, സൂപ്പര്‍വൈസര്‍(പമ്പ്), മാര്‍ക്കറ്റിങ് സെയില്‍സ് എക്‌സിക്യൂട്ടീവ്‌സ്, കാര്‍വാഷര്‍, സെക്യൂരിറ്റി, മെക്കാനിക്ക്, സ്‌പെയര്‍ പാര്‍ട്‌സ് സ്‌പെഷ്യലിസ്റ്റ്, സര്‍വീസ് അഡൈ്വസര്‍, ഓട്ടോമൊബൈല്‍ ഇലക്ട്രിഷ്യന്‍ തുടങ്ങിയ തസ്തികകളില്‍ നിയമനം നടത്തുന്നു. ഡിപ്ലോമ, ഐ,ടി.ഐ(മെക്കാനിക്ക്, ഓട്ടോമൊബൈല്‍),ഡിഗ്രി, ബി.കോം, എം.ബി.എ യോഗ്യതയുള്ളവര്‍ക്ക് അപേക്ഷിക്കാം. താത്പര്യമുള്ളവര്‍ ബയോഡാറ്റ സഹിതം ഫെബ്രുവരി 21 രാവിലെ 10ന്  എംപ്ലോയബിലിറ്റി സെന്ററില്‍ നടക്കുന്ന കൂടിക്കാഴ്ചയില്‍ പങ്കെടുക്കും.

കടുങ്ങല്ലൂര്‍ - വിളയില്‍ - ചാലിയപ്പുറം റോഡില്‍ പ്രവൃത്തി നടക്കുന്നതിനാല്‍ ഇന്നു (ഫെബ്രുവരി 20) മുതല്‍ ഇതിലൂടെയുള്ള വാഹന ഗതാഗം നിരോധിച്ചു.  കിഴിശ്ശേരിയില്‍ നിന്നും എടവണ്ണപ്പാറ ഭാഗത്തേക്കുള്ള വാഹനങ്ങള്‍ മുണ്ടംപറമ്പ -പാറമ്മല്‍ - വിളയില്‍ / കിഴിശ്ശേരി - ചുളിയോട് - വിളയില്‍ വഴിയും പോകണം.  എടവണ്ണപാറയില്‍ നിന്ന് കിഴിശ്ശേരി ഭാഗത്തേക്കുള്ള വാഹനങ്ങള്‍ വിളയില്‍ - കടുങ്ങല്ലൂര്‍ /വിളയില്‍ - എളങ്കാവ് -പൂങ്കുടി വഴിയും പോകണം.

സംസ്ഥാന വനിതാ കമ്മീഷന്‍ ഫെബ്രുവരി 25ന് ജില്ലാ പഞ്ചായത്ത് ഹാളില്‍ രാവിലെ 10.30 മുതല്‍ മെഗാ അദാലത്ത് നടത്തും.  

മഞ്ചേരി ഗവ. മെഡിക്കല്‍ കോളേജ് ആശുപത്രിയിലേക്ക് കാര്‍ഡിയാക് കത്തീറ്ററൈസേഷന്‍ ലാബിലേക്ക് ഉപയോഗിക്കേണ്ടി വരുന്ന വിവിധ തരം ആഞ്ജിയോ ഗ്രാഫിക്ക് ഷീത്തുകള്‍, കത്തീറ്ററുകള്‍, ബലൂണുകള്‍, സ്റ്റെന്റുകള്‍, പേസ്‌മേക്കറുകള്‍ മുതലായ കണ്‍സ്യൂമബിള്‍സ് വിതരണം ചെയ്യുന്നതിന് ഡി.സി.ജി.ഐ/സി.ഇ/ എഫ്.ഡി.എ ലൈസന്‍സുള്ള സ്ഥാപനങ്ങള്‍ / വിതരണക്കാര്‍ എന്നിവരില്‍ നിന്നും അപേക്ഷ ക്ഷണിച്ചു.  അപേക്ഷയില്‍ ഉല്‍പന്നങ്ങളുടെ വിലയും മറ്റു വിവരങ്ങളും ലൈസന്‍സിന്റെ പകര്‍പ്പും സമര്‍പ്പിക്കണം.  അപേക്ഷ ഫെബ്രുവരി 28ന് വൈകുന്നേരം അഞ്ചിനകം മെഡിക്കല്‍ കോളേജ് ആശുപത്രി സൂപ്രണ്ടിന്റെ ഓഫീസില്‍ ലഭിക്കണം. ഫോണ്‍ 0483 2762037.

ന്യൂനപക്ഷക്ഷേമ വകുപ്പിന്റെ ആഭിമുഖ്യത്തില്‍ ഭിന്നശേഷിക്കാരായ യുവതയ്ക്കായി വിവാഹപൂര്‍വ്വ കൗണ്‍സിലിങ്ങ് നടത്തുന്നു.  പരിപാടിയുടെ സംസ്ഥാനതല ഉദ്ഘാടനം കാലിക്കറ്റ് സര്‍വ്വകലാശാല ക്യാമ്പസിലെ ആര്യഭട്ട ഹാളില്‍ ഫെബ്രുവരി 20ന് ഉച്ചക്ക് 12ന് ഉന്നത വിദ്യാഭ്യാസ - ന്യൂനപക്ഷ വകുപ്പ് മന്ത്രി ഡോ. കെ.ടി ജലീല്‍ നിര്‍വ്വഹിക്കും.  ആദ്യമായാണ് സംസ്ഥാനത്ത് ഇത്തരത്തിലുള്ള പരിപാടി നടത്തുന്നത്.

തിരൂര്‍ താലൂക്കിലെ ശ്രീ വൈരംകോട് ഭഗവതി ക്ഷേത്രത്തിലെ തിയ്യാട്ടുത്സവം പ്രമാണിച്ച് ഫെബ്രുവരി 22ന് തിരൂര്‍ ഡി.ഇ.ഒ, തിരൂര്‍, കുറ്റിപ്പുറം എ.ഇ.ഒ എന്നിവരുടെ കീഴിലുള്ള തിരുനാവായ, കല്‍പ്പകഞ്ചേരി, ആതവനാട്, വളവനൂര്‍, തലക്കാട്, കുറ്റിപ്പുറം, മാറാക്കര, തൃപ്രങ്ങോട് എന്നീ  ഗ്രാമ പഞ്ചായത്തുകളിലെയും തിരൂര്‍ മുന്‍സിപ്പാലിറ്റിയിലെയും വിദ്യാഭ്യാസ സ്ഥാപനങ്ങള്‍ക്ക് ഒരു ദിവസവും സര്‍ക്കാര്‍ ഓഫീസുകള്‍ക്ക് ഉച്ചക്ക് ശേഷവും (അര ദിവസം) ജില്ലാ കലക്ടര്‍ പ്രദേശിക അവധി പ്രഖ്യാപിച്ചു.