പൊതു തിരഞ്ഞെടുപ്പ് മാതൃകാ പെരുമാറ്റച്ചട്ടം നടപ്പാക്കുന്നതിന്‍റെ ഭാഗമായി രൂപീകരിച്ച ആന്‍റി ഡീഫെയ്സ്മെന്‍റ് സ്ക്വാഡ് ഇന്നലെ (മാര്‍ച്ച് 21) മാത്രം 1123 പ്രചരണ സാമഗ്രികള്‍ നീക്കി. ഇതില്‍ പൊതുയിടങ്ങളില്‍ നിന്നും 898 പോസ്റ്റര്‍, 70 ബാനറുകള്‍, 142 കൊടികള്‍ 13 ചുവരെഴുത്ത് എന്നിവയാണ് നീക്കിയത്. ഇതോടെ സ്ക്വാഡ് രൂപീകരിച്ചതിന് ശേഷം കേന്ദ്ര- സംസ്ഥാന സര്‍ക്കാരുകളുടെ അധീനതയിലുള്ള സ്ഥലങ്ങളിലെ 4254 സാമഗ്രികളാണ് നീക്കം ചെയ്തത്.

    തെരഞ്ഞെടുപ്പ് പെരുമാറ്റചട്ടം നിലവില്‍വന്നതിനാല്‍ മാര്‍ച്ച് മാസത്തെ ജില്ലാ വികസന സമിതി യോഗം ഉണ്ടായിരിക്കില്ല. എന്നാല്‍ മാര്‍ച്ച് 26 ന് രാവിലെ 11.30 ന് കലക്ടറേറ്റ് സമ്മേളന ഹാളില്‍  ജില്ലാതല ഉദ്യോഗസ്ഥരുടെ പ്രത്യേക യോഗം ചേരുമെന്ന് ജില്ലാ കലക്ടര്‍ ഡി.ബാലമുരളി അറിയിച്ചു.

    മങ്കര ഗ്രാമപഞ്ചായത്തിലെ തൊഴില്‍ രഹിത ഗുണഭോക്താക്കള്‍ക്കുള്ള വേതനം നാളെ മുതല്‍ (മാര്‍ച്ച് 22) മുതല്‍ മാര്‍ച്ച് 25 വരെ തുടങ്ങും. തിയതികളില്‍  രാവിലെ 11 മുതല്‍ വൈകിട്ട് മൂന്ന് വരെയാണ് വിതരണം നടക്കുക. അര്‍ഹരായ ഗുണഭോക്താക്കള്‍ എംപ്ലോയ്മെന്‍റ് കാര്‍ഡ്, എസ്.എസ്.എല്‍.സി ബുക്ക്, ടി.സി എന്നിവയുടെ അസലുമായി എത്തി വേതനം കൈപ്പറ്റണമെന്ന് സെക്രട്ടറി അറിയിച്ചു. ഫോണ്‍: 0491-2872320