കോട്ടയം: വനിത-ശിശുവികസന വകുപ്പിന്റെ കീഴിൽ തിരുവഞ്ചൂരിൽ പ്രവർത്തിക്കുന്ന ഗവൺമെന്റ് ചിൽഡ്രൻസ് ഹോം അങ്കണത്തിലെ അഞ്ചു മരങ്ങൾ ഒക്ടോബർ 26 ന് രാവിലെ 11 ന് ലേലം ചെയ്യും. വിശദവിവരത്തിന് ഫോൺ: 0481 2770530.

കോട്ടയം: കോട്ടയം ജനറൽ ആശുപത്രിയിലെ ആർ.എം.ഒ. ക്വാട്ടേഴ്സ് പൊളിച്ച് മാറ്റി സാധനസാമഗ്രികൾ കൈമാറ്റം ചെയ്യുന്നതിന് താത്പര്യമുള്ള വ്യക്തികൾ/സ്ഥാപനങ്ങളിൽ നിന്ന് ദർഘാസ് ക്ഷണിച്ചു. ഒക്ടോബർ 16ന് ഉച്ചയ്ക്ക് 12 വരെ ദർഘാസ് സ്വീകരിക്കും. വിശദവിവരത്തിന് ഫോൺ: 0481 2563611

കോട്ടയം: പട്ടികജാതിവികസനവകുപ്പിന്റെ മാടപ്പള്ളി ഗവൺമെന്റ് ഐ.ടി.ഐയിൽ എൻ.സി.വി.ടി. ഏകവത്സര കോഴ്‌സായ വുഡ് വർക്ക് ടെക്‌നീഷ്യൻ ട്രേഡിൽ പട്ടികജാതി വിഭാഗത്തിൽ സീറ്റൊഴിവുണ്ട്. സൗജന്യപഠനം, പോഷകാഹാരം, പാഠപുസ്തകങ്ങൾ, ഉച്ചഭക്ഷണം, യൂണിഫോം അലവൻസ്, സ്റ്റഡിടൂർ അലവൻസ്, പ്രതിമാസ സ്‌റ്റൈപ്പന്റ്, ലംസം ഗ്രാന്റ് എന്നിവ നൽകുന്നു. താത്പര്യമുള്ളവർ എസ്.എസ്.എൽ.സി., ടി.സി., ജാതിതെളിയിക്കുന്ന സർട്ടിഫിക്കറ്റ്, സ്വഭാവ സർട്ടിഫിക്കറ്റ് എന്നിവ സഹിതം ഓഫീസിൽ നേരിട്ട് ഹാജരാകണം. വിശദവിവരത്തിന് ഫോൺ:    0481-2473190, 8075222520.

കോട്ടയം: കാടുകയറുന്ന പാതയോരങ്ങൾ വൃത്തിയാക്കി പൊതുജനങ്ങളുടെ സഞ്ചാരസ്വാതന്ത്ര്യം സുരക്ഷിതമാക്കാൻ  പദ്ധതിയുമായി പുതുപ്പള്ളി ഗ്രാമപഞ്ചായത്ത്. പഞ്ചായത്തിന്റെ 2023-24 സാമ്പത്തിക പദ്ധതിയിൽ ഉൾപ്പെടുത്തി 'ക്ലീൻ പുതുപ്പള്ളി' എന്ന പേരിലാണ് പദ്ധതി നടപ്പാക്കുന്നത്. കാടുകയറുന്ന പാതയോരങ്ങൾ യന്ത്രത്തിന്റെ സഹായത്തോടെ വെട്ടി വൃത്തിയാക്കുന്ന തരത്തിലാണ് പദ്ധതി ആസൂത്രണം ചെയ്തിരിക്കുന്നത്. ഇതിനായി കരാർ വ്യവസ്ഥയിൽ രണ്ടു തൊഴിലാളികളെയും പഞ്ചായത്ത് നിയോഗിച്ചിട്ടുണ്ട്. 730 രൂപ ദിവസവേതനാടിസ്ഥാനത്തിലാണ് തൊഴിലാളികളെ നിയോഗിച്ചിട്ടുള്ളത്. ഇതിനായി മൂന്നുലക്ഷം രൂപയാണ് പദ്ധതിയിൽ നീക്കിവച്ചിരിക്കുന്നത്.

തിരുവനന്തപുരം താലൂക്കിൽ ദുരിതാശ്വാസ ക്യാമ്പുകൾ പ്രവർത്തിക്കുന്ന കൊഞ്ചിറവിള യു. പി. എസ്,വെട്ടുകാട് എൽ. പി എസ്,ഗവണ്മെന്റ് എം. എൻ. എൽ. പി. എസ് വെള്ളായണി എന്നീ സ്‌കൂളുകൾക്ക് നാളെ(ഒക്ടോബർ അഞ്ച് )ജില്ലാ കളക്ടർ ജെറോമിക് ജോർജ് അവധി പ്രഖ്യാപിച്ചു.

സമസ്ത മേഖലകളിലും കേരളത്തിന്റെ നേട്ടങ്ങളുടെ പ്രദര്‍ശനവുമായി നവംബര്‍ ഒന്നുമുതല്‍ ഏഴുവരെ തിരുവനന്തപുരത്ത് സംസ്ഥാന സര്‍ക്കാര്‍ ഒരുക്കുന്ന കേരളീയം 2023ന്റെ പ്രചരണത്തിനായി ഒക്ടോബര്‍ എട്ടിന് രാവിലെ തിരുവനന്തപുരം നഗരത്തില്‍ സൈക്കിള്‍ റാലി സംഘടിപ്പിക്കുന്നു. എന്‍.സി.സി കെ (1) ഗേള്‍സ് ബറ്റാലിയന്‍, ഇന്‍ഡസ് സൈക്ലിങ് എംബസി എന്നിവയുടെ സഹകരണത്തോടെ എട്ടിന് രാവിലെ 7.30 മുതല്‍ 8.30 വരെയാണ് റാലി.

കേരളത്തിന്റെ നേട്ടങ്ങളുടെ വിളംബരവുമായി നവംബര്‍ ഒന്നുമുതല്‍ ഏഴുവരെ തിരുവനന്തപുരം നഗരത്തില്‍ സംസ്ഥാനസര്‍ക്കാര്‍ ഒരുക്കുന്ന കേരളീയം 2023 പരിപാടിയുടെ ഭാഗമായി ലോകമെങ്ങുമുള്ള മലയാളികള്‍ക്കായി ഫോട്ടോ ചലഞ്ച് സംഘടിപ്പിക്കുന്നു. 'എന്റെ കേരളം എന്റെ അഭിമാനം' എന്ന പേരില്‍ സംഘടിപ്പിക്കുന്ന ഫോട്ടോചലഞ്ചില്‍ നവംബര്‍ ഒന്നുവരെ പങ്കെടുക്കാം.  കേരളത്തിന്റെ തനതുസംസ്‌കാരവും പാരമ്പര്യവും വിളിച്ചോതുന്ന, കേരളത്തെക്കുറിച്ച് അഭിമാനം തോന്നുന്ന എന്തും ഫോട്ടോ ചലഞ്ചിന്റെ ഭാഗമായി ഉള്‍പ്പെടുത്താം.

അസാപ്പ് കേരള സംസ്ഥാനത്തെ പോളിടെക്‌നിക്ക് കോളേജുകളുമായി സഹകരിച്ച് നടത്തുന്ന മറൈന്‍ സ്ട്രക്ച്ചറല്‍ ഫിറ്റര്‍ കോഴ്‌സിന്റെ ജില്ലാതല ഉദ്ഘാടനം വി.കെ പ്രശാന്ത് എം.എല്‍.എ നിര്‍വഹിച്ചു. തിരുവനന്തപുരം, എറണാകുളം, കോഴിക്കോട് എന്നിങ്ങനെ മൂന്ന് സോണുകളായി തിരിച്ചാണ് കോഴ്‌സ് സംഘടിപ്പിച്ചിരിക്കുന്നത്. തിരുവനന്തപുരം സോണില്‍  വട്ടിയൂര്‍ക്കാവ് സെന്‍ട്രല്‍ പോളിടെക്‌നിക്കിലാണ് കോഴ്‌സ് നടക്കുക. തുടര്‍ന്ന്  കൊച്ചിന്‍ ഷിപ്പ് യാര്‍ഡില്‍ മൂന്നു മാസത്തോളം നീണ്ടു നില്‍ക്കുന്ന പരിശീലനവും ലഭിക്കും. എന്‍.സി.വി.ടിയും അസാപും കൊച്ചിന്‍ ഷിപ്പ് യാര്‍ഡും നല്‍കുന്ന സര്‍ട്ടിഫിക്കറ്റുകളും ഇവര്‍ക്ക് ലഭിക്കും.

ശരിയായ മാലിന്യ സംസ്‌കരണത്തിനായി സ്‌കൂള്‍ ചുമരുകള്‍ ക്യാന്‍വാസാക്കി വെള്ളനാട് പഞ്ചായത്തിലെ വെളിയന്നൂര്‍ പി.എസ്.എന്‍.എം യു.പി. സ്‌കൂള്‍ വിദ്യാര്‍ത്ഥികള്‍. സ്വച്ഛത ഹി സേവ, മാലിന്യ മുക്തം നവകേരളം ക്യാമ്പയിനുകളുടെ ഭാഗമായി ജില്ലാ ശുചിത്വ മിഷന്റെ നേതൃത്വത്തില്‍ സ്‌കൂള്‍ വിദ്യാര്‍ത്ഥികള്‍ക്കായി മാലിന്യ സംസ്‌കരണ ബോധവല്‍ക്കരണ ക്ലാസും ശുചിത്വ ക്ലബ്ബ് രൂപീകരണവും സംഘടിപ്പിച്ചിരുന്നു. ശുചിത്വ ക്ലബ് അംഗങ്ങളില്‍ നിന്നും പോസ്റ്റര്‍ രചന മത്സരത്തിലൂടെ തെരഞ്ഞെടുത്ത കുട്ടികളാണ് സ്‌കൂള്‍ ചുമരില്‍ മാലിന്യ സംസ്‌കരണ സന്ദേശങ്ങള്‍ വരച്ചിട്ടത്.