താനൂർ ഐ.സി.ഡി.എസ് പ്രൊജക്ട് ഓഫീസിലേക്ക് 2023-24 സാമ്പത്തിക വർഷത്തേക്ക് ഔദ്യോഗിക ആവശ്യങ്ങൾക്കായി ജീപ്പ്/കാർ എന്നീ വാഹനങ്ങൾ വാടകയ്ക്ക് നൽകാൻ താത്പര്യമുള്ള വ്യക്തികളിൽ നിന്നും ടെൻഡർ ക്ഷണിച്ചു. ഒക്ടോബർ 26ന് ഉച്ചയ്ക്ക് 12 വരെ താനൂർ ഐ.സി.ഡി.എസ് ഓഫീസിൽ വെച്ച് ടെൻഡർ ഫോറം വിൽക്കപ്പെടും. അന്നേദിവസം ഉച്ചയ്ക്ക് ഒരു മണിക്കകം ടെൻഡറുകൾ സമർപ്പിക്കണം. ഉച്ചയ്ക്ക് രണ്ടിന് ടെൻഡർ തുറന്ന് പരിശോധിക്കും. കൂടുതൽ വിവരങ്ങൾക്ക് ഐ.സി.ഡി.എസ് പ്രൊജക്ട് ഓഫീസ്, താനൂർ ബ്ലോക്ക് ഓഫീസ് കോമ്പൗണ്ട്, പിൻ: 676302 എന്ന വിലാസത്തിൽ ബന്ധപ്പെടാം. ഫോൺ: 04942442981.

മൂർക്കനാട് സ്‌കീമിലെ പൈപ്പ് ലൈനുകളിൽ അറ്റകുറ്റപ്പണി നടത്തേണ്ടതിനാൽ ഈ സ്‌കീമിൽ നിന്നും ജലവിതരണം നടത്തുന്ന കൂട്ടിലങ്ങാടി, മക്കരപ്പറമ്പ് പഞ്ചായത്തുകളിലെ വിവിധ ഭാഗങ്ങളിൽ മൂന്ന് ദിവസം (ഒക്ടോബർ ഒമ്പത് മുതൽ 11 വരെ) ജലവിതരണം തടസ്സപ്പെടുമെന്ന് അസിസ്റ്റൻറ് എൻജിനീയർ അറിയിച്ചു.

ട്രാർസ്‌ഫോർമർ കത്തി നശിച്ച സംഭവത്തിൽ വിലയും നഷ്ടപരിഹാരവും നൽകണമെന്ന് ഉപഭോക്തൃ കമ്മീഷന്റെ വിധി. നിലമ്പൂർ പോത്തുകല്ല് സ്വദേശി അലവിക്കുട്ടി സമർപ്പിച്ച പരാതിയിലാണ് ജില്ലാ ഉപഭോക്തൃ കമ്മീഷന്റെ വിധി. 2018 സെപ്റ്റംബർ ഒമ്പതിനാണ് പരാതിക്കാരൻ ആലുവയിലുള്ള എസ്.എസ് ട്രാൻസ്‌ഫോർമേഴ്‌സ് എന്ന സ്ഥാപനത്തിൽ നിന്നും പോത്തുകല്ലിലുള്ള തന്റെ കെട്ടിടത്തിന്റെ ആവശ്യത്തിലേക്ക് ട്രാൻസ്‌ഫോർമർ വാങ്ങിയത്. 2019 ആഗസ്റ്റ് 31ന് രാത്രി 8.30ന് ട്രാൻസ്‌ഫോർമർ കത്തിനശിച്ചു. വിവരം എതിർകക്ഷികളെ അറിയിച്ചെങ്കിലും ട്രാൻസ്‌ഫോർമർ നന്നാക്കുന്നതിനോ മാറ്റിസ്ഥാപിക്കുന്നതിനോ തയ്യാറായില്ല.

പൊന്നാനി ഹാർബറിലെ പുനർഗേഹം ഭവന സമുച്ചയത്തിലെ ഖര-ദ്രവ്യ ട്രീറ്റ്മെന്റ് പ്ലാന്റിന്റെ നിർമാണ പ്രവർത്തനങ്ങൾ പുരോഗമിക്കുന്നു. പ്രധാന ടാങ്ക്, കൺട്രോൾ റൂം, കളക്ഷൻ ടാങ്കുകൾ ഉൾപ്പെടെ പദ്ധതിയുടെ 75 ശതമാനത്തോളം നിർമാണം പൂർത്തിയായി. ടാങ്കിലേക്കുള്ള പൈപ്പ് ലൈൻ പ്രവൃത്തികളാണ് നിലവിൽ പൂർത്തീകരിക്കാനുള്ളത്.

തിരൂരങ്ങാടി താലൂക്ക് ആശുപത്രിയിൽ ഇലക്ട്രീഷ്യൻ തസ്തികയിൽ താത്കാലിക നിയമനം നടത്തുന്നു. ഐ.ടി.ഐ ഇലക്ട്രീഷ്യൻ, തത്തുല്ല്യ കോഴ്‌സ് എന്നിവയാണ് യോഗ്യത. താത്പര്യമുള്ള ഉദ്യോഗാർഥികൾ ഒക്ടോബർ പത്തിന് രാവിലെ 11ന് മുമ്പായി ആശുപത്രി ഓഫീസിൽ അസ്സൽ രേഖകൾ സഹിതം രജിസ്‌ട്രേഷൻ പൂർത്തീകരിച്ച് അഭിമുഖത്തിന് പങ്കെടുക്കണം.

മലപ്പുറം ജില്ലയിൽ റോഡ് നിർമാണ പ്രവൃത്തികൾക്കും വികസനത്തിന പ്രവർത്തനങ്ങൾക്കുമായി എംപാനൽ ലിസ്റ്റ് തയ്യാറാക്കുന്നതിന് കോൺട്രാക്ടർമാരിൽ നിന്നും ക്വട്ടേഷൻ ക്ഷണിച്ചു. പൂരിപ്പിച്ച ക്വട്ടേഷനുകൾ ഒക്ടോബർ 13ന് വൈകീട്ട് 4.30 വരെ സംസ്ഥാന ഭവന നിർമാണ ബോർഡിന്റെ മലപ്പുറം ഡിവിഷൻ ഓഫീസിൽ സ്വീകരിക്കും. ഫോൺ: 04832735003.