മലബാർ ദേവസ്വം ബോർഡ്, മലബാർ ക്ഷേത്ര ജീവനക്കാരുടെയും എക്സിക്യൂട്ടീവ് ഓഫീസർമാരുടെയും ക്ഷേമനിധി ഫണ്ടിൽ നിന്നും ബാങ്ക് മുഖേന പെൻഷൻ/കുടുംബ പെൻഷൻ കൈപ്പറ്റുന്ന എല്ലാ ഗുണഭോക്താക്കളും ബാങ്ക് അക്കൗണ്ട് നമ്പർ, ആധാർ നമ്പർ, മേൽവിലാസം, ടെലഫോൺ നമ്പർ എന്നിവ വ്യക്തമാക്കിയുള്ള വില്ലേജ് ഓഫീസർ/ ഗസറ്റഡ് ഓഫീസർ/ബാങ്ക് മാനേജർ/ ക്ഷേമനിധി ബോർഡ് മെമ്പർ ഒപ്പിട്ട ലൈഫ് സർട്ടിഫിക്കറ്റ് നവംബർ 15 നകം സമർപ്പിക്കണം.

മഞ്ചേരി ഗവ. മെഡിക്കൽ കോളേജിൽ ജൂനിയർ ടെക്നിക്കൽ അസിസ്റ്റന്റ് എഞ്ചിനീയർ തസ്തികയിലേക്ക് കരാർ അടിസ്ഥാനത്തിൽ നിയമനം നടത്തുന്നു. ബി -ടെക് ബയോമെഡിക്കൽ എഞ്ചിനീയറിങ് ബിരുദധാരികളായ ഉദ്യോഗാർത്ഥികൾക്ക് അപേക്ഷിക്കാം. ഉദ്യോഗാർത്ഥികൾ അവരുടെ യോഗ്യത, പ്രവർത്തിപരിചയം, വയസ്സ് എന്നിവ തെളിയിക്കുന്നതിന് ആവശ്യമായ സർട്ടിഫിക്കറ്റുകൾ ഒക്ടോബർ അഞ്ചിന് വൈകീട്ട് 5 നകം careerbiomed2021@gmail.com എന്ന ഇ - മെയിൽ വിലാസത്തിലേക്ക് അപേക്ഷ അയക്കണം. മൊബൈൽ നമ്പർ നിർബന്ധമായും ഉൾപ്പെടുത്തണം. അധിക യോഗ്യതയുള്ളവർക്കും പ്രവർത്തിപരിചയം ഉള്ളവർക്കും മുൻഗണന ലഭിക്കും. ഫോൺ: 0483 2764056, 0483 2765056.

ഒല്ലൂക്കര ബ്ലോക്ക് പഞ്ചായത്തിലെ വെള്ളാനിക്കര സാമൂഹിക ആരോഗ്യ കേന്ദ്രത്തിലേക്ക് ലബോറട്ടറി റിയേജന്റ് വാങ്ങുന്നതിന് അംഗീകൃത മരുന്നു കമ്പനികൾ, വിതരണക്കാർ എന്നിവരിൽ നിന്നും ടെണ്ടർ ക്ഷണിച്ചു. വെള്ളാനിക്കര സാമൂഹിക ആരോഗ്യ കേന്ദ്രത്തിൽ നിന്നും ഒക്ടോബർ 3 മുതൽ 16 വരെ ടെണ്ടർ ഫോം ലഭിക്കും. ടെണ്ടർ സ്വീകരിക്കുന്ന അവസാന തീയതി ഒക്ടോബർ 16ന് ഉച്ചയ്ക്ക് ഒരു മണി വരെ. ഫോൺ: 0487 2966800.

കേരള സംസ്ഥാന വനിതാ വികസന കോർപ്പറേഷൻ ലളിതമായ നടപടിക്രമങ്ങളിലൂടെ അതിവേഗ വ്യക്തിഗത, ഗ്രൂപ്പ് വായ്പകൾ നൽകുന്നു. നിശ്ചിത വരുമാന പദ്ധതിയിലുള്ള 18 നും 55 നും മദ്ധ്യേ പ്രായമുള്ള തൊഴിൽരഹിതരായ വനിതകൾക്ക് 5 വർഷ തിരിച്ചടവ് കാലാവധിയിൽ 6 ശതമാനം പലിശ നിരക്കിൽ ഉദ്യോഗസ്ഥ / വസ്തു ജാമ്യത്തിന്റെ അടിസ്ഥാനത്തിലാണ് വ്യക്തിഗത വായ്പ നൽകുന്നത്. www.kswdc.org എന്ന വെബ്സൈറ്റിൽ നിന്നും ലഭിക്കുന്ന വായ്പ അപേക്ഷാ ഫോറം തൃശ്ശൂർ ജില്ലാ ഓഫീസിൽ സമർപ്പിക്കണം.

തൃശ്ശൂർ സിവിൽ സ്റ്റേഷനിൽ എടിഎം സ്ഥാപിക്കുന്നതിന് ബാങ്കുകളിൽ നിന്നും ബിഡ് ക്ഷണിച്ചു. ഒക്ടോബർ 10 ന് വൈകീട്ട് 4 നകം ബിഡുകൾ ഫിനാൻസ് ഓഫീസർക്ക് സമർപ്പിക്കണം. അപേക്ഷ സമർപ്പിക്കേണ്ട അവസാന തീയതി, അവധി ആണെങ്കിൽ അടുത്ത ദിവസവും അപേക്ഷ പരിഗണിക്കും. ബിഡുകൾ സമർപ്പിക്കേണ്ട അവസാന ദിവസത്തിനു ശേഷമുള്ള പ്രവർത്തി ദിവസം രാവിലെ 11 ന് ജില്ലാ കളക്ടറുടെയോ ഡെപ്യൂട്ടി കളക്ടറുടെയോ സാന്നിധ്യത്തിൽ തുറന്നു പരിശോധിക്കും. ബിഡുകൾ തുറന്നു പരിശോധിക്കുന്ന അവസരത്തിൽ ബിഡുകൾ സമർപ്പിച്ച ബാങ്കുകളുടെ പ്രതിനിധികൾക്ക് പങ്കെടുക്കാം. ഫോൺ: 0487 2360777.

2023 - 24 വർഷത്തേക്ക് സഹായഹസ്തം പദ്ധതിക്കായി അപേക്ഷ ക്ഷണിച്ചു. സാമ്പത്തികമായി പിന്നോക്കം നിൽക്കുന്ന 55 വയസ്സിന് താഴെ പ്രായമുള്ള വിധവകളായ സ്ത്രീകൾക്ക് സ്വയംതൊഴിൽ ചെയ്ത് വരുമാനമാർഗ്ഗം കണ്ടെത്തുന്നതിന് ഒറ്റത്തവണ സഹായമായി മുപ്പതിനായിരം രൂപ അനുവദിക്കുന്ന പദ്ധതിയാണ് സഹായഹസ്തം. അപേക്ഷകയുടെ വാർഷിക വരുമാനം ഒരു ലക്ഷം രൂപയിൽ താഴെയായിരിക്കണം. പദ്ധതിക്കായി www.schemes.wcd.kerala.gov.in എന്ന വെബ്സൈറ്റിലൂടെ ഡിസംബർ 15 വരെ അപേക്ഷിക്കാം. ഫോൺ: 0487 2361500.

ത്രിശ്ശൂർ ഗവ. എഞ്ചിനീയറിങ് കോളേജിൽ സ്മാേൾ ഇൻഡസ്ട്രീസ് ഡെവലപ്മെന്റ് ബാങ്ക് ഓഫ് ഇന്ത്യയുടെ ( സിഡ്ബി) പിന്തുണയോടെ നടപ്പിലാക്കുന്ന സ്വാവാലംബൻ ചെയർ ഫോർ എംഎസ്എംഇ സൊല്യൂഷൻസ് രണ്ടു ദിവസത്തെ സൗജന്യ സംരംഭകത്വ ശില്പശാല സംഘടിപ്പിക്കുന്നു. ഒക്ടോബർ 4, 5 തീയതികളിൽ രാവിലെ 9.30 മുതൽ വൈകീട്ട് 4 വരെ ഹോട്ടൽ അശോക ഇൻ - ലാണ് ശില്പശാല നടത്തുക. ബിസിനസ് ഡെവലപ്മെന്റ്, ബ്രാൻഡിംഗ്, മാർക്കറ്റിംഗ്, ലീഡർഷിപ്പ് ലൈസൻസിംഗ്, വിവിധ ഫണ്ടിങ് സ്കീമുകൾ, സംരംഭങ്ങൾ രജിസ്റ്റർ ചെയ്യുന്നതിന്റെ വിവിധ ഘട്ടങ്ങൾ തുടങ്ങി നിരവധി മേഖലകളെ ആസ്പദമാക്കി വിദഗ്ധർ നടത്തുന്ന ക്ലാസുകൾ ഉണ്ടായിരിക്കും.

സാമ്പത്തിക ക്രമക്കേട് കണ്ടെത്തിയതിനെ തുടര്‍ന്ന് ചടയമംഗലം ബ്ലോക്കിലെ മഹിളാ പ്രധാന്‍ ഏജന്റ് ബിന്ദു ബാലചന്ദ്രന്റെ ഏജന്‍സി റദ്ദ് ചെയ്തതായി ചടയമംഗലം ബ്ലോക്ക് ഓഫീസര്‍ അറിയിച്ചു.

മനയില്‍കുളങ്ങര സര്‍ക്കാര്‍ വനിത ഐടിഐയില്‍ ഒഴിവുള്ള സീറ്റുകളിലേക്ക് അപേക്ഷ ക്ഷണിച്ചു. ഒക്ടോബര്‍ 10 നകം ഐ ടി ഐയില്‍ അപേക്ഷ സമര്‍പ്പിച്ച് പ്രവേശനം നേടാം. ഫോണ്‍ 0474 2793714, 9995006932, 9895559445.

കേരള കര്‍ഷക തൊഴിലാളി ക്ഷേമനിധി ബോര്‍ഡ് അംഗങ്ങളായവര്‍ക്ക് കുടിശിക നിവാരണ അദാലത്ത് ഒക്‌ടോബര്‍ അഞ്ചിന് രാവിലെ 10 മുതല്‍ നിലമേല്‍ ഗ്രാമപഞ്ചായത്തില്‍ നടത്തും. രണ്ടു കൊല്ലത്തില്‍ കൂടുതല്‍ കുടിശിക വരുത്തി അംഗത്വം റദ്ദായിപോയവര്‍ക്ക് പുന:സ്ഥാപിക്കുന്നതിനും, നിലവില്‍ അംശദായം അടയ്ക്കാനും പുതിയ അംഗങ്ങളെ ചേര്‍ക്കാനും അവസരമുണ്ട്. കുടിശിക അടയ്ക്കാന്‍ ബാങ്ക് പാസ്ബുക്കും ആധാറിന്റെ പകര്‍പ്പും കൊണ്ടുവരണം. ഫോണ്‍ 9746822396, 7025491386, 0474 2766843, 2950183.