വിശപ്പുരഹിത സമൂഹമെന്ന സര്‍ക്കാരിന്റെ ലക്ഷ്യത്തിന് പിന്നില്‍ അണിനിരക്കുകയാണ് ചെറിയവെളിനല്ലൂര്‍ സര്‍ക്കാര്‍ എല്‍ പി സ്‌കൂളിലെ വിദ്യാര്‍ഥികള്‍. പാഥേയം പദ്ധതിക്ക് തുടക്കമിട്ടാണ് കൊച്ചുകൂട്ടുകാര്‍ സമൂഹത്തിന് മാതൃകയാകുന്നത്. വിദ്യാര്‍ഥികള്‍ കൊണ്ടുവരുന്ന പൊതിച്ചോര്‍ റോഡുവിള വെയിറ്റിങ് ഷെഡ്ഡില്‍ സ്ഥാപിച്ചിരിക്കുന്ന പാഥേയം പെട്ടിയില്‍ ക്രമീകരിക്കും. ആവശ്യക്കാര്‍ക്ക് ഭക്ഷണം സ്വന്തമാക്കാനുള്ള അവസരമാണ് ഇതുവഴി ലഭ്യമാക്കുന്നത്. എല്ലാ പ്രവര്‍ത്തിദിവസവും പൊതിച്ചോര്‍ ഉറപ്പാക്കുംവിധമാണ് സംവിധാനം പ്രവര്‍ത്തിക്കുക.

ചിതറ വഞ്ചിയോട് പട്ടികവര്‍ഗ ഊരില്‍ പുനലൂര്‍ ട്രൈബല്‍ ഓഫീസിന്റെ നേതൃത്വത്തില്‍ മെഡിക്കല്‍ ക്യാമ്പ് സംഘടിപ്പിച്ചു. സാമൂഹ്യഐക്യദാര്‍ഢ്യ പക്ഷാചരണത്തിന്റെ ഭാഗമായാണ് പരിപാടി. ആയുര്‍വേദ, അലോപ്പതി മെഡിക്കല്‍ ക്യാമ്പുകള്‍ അരിപ്പ വാര്‍ഡ് മെമ്പര്‍ പ്രിജിത്ത് പി അരളീവനം ഉദ്ഘാടനം ചെയ്തു. സദാനന്ദന്‍ കാണി അധ്യക്ഷനായി

കരുനാഗപ്പള്ളി ലാലാജി ജംഗ്ഷന്‍ കന്നേറ്റി പഴയ ദേശിയപാത പുനരുദ്ധാണ പദ്ധതിക്ക് ഭരണാനുമതി. 1.25 കോടിയാണ് അനുവദിച്ചത്. ബി എം ബി സി മാതൃകയില്‍ 900 മീറ്റര്‍ നീളത്തില്‍ പ്രധാന വ്യാപാരമേഖല, സ്‌കൂളുകള്‍ എന്നിവ ബന്ധിപ്പിച്ചാണ് റോഡ് നിര്‍മിക്കുക.

സംസ്ഥാന യുവജനക്ഷേമബോര്‍ഡും പൂതക്കുളം ഗ്രാമപഞ്ചായത്തും സംയുക്തമായി സംഘടിപ്പിക്കുന്ന 'കേരളോത്സവം 2023'ന്റെ വിവിധ മത്സരങ്ങളിലേക്ക് രജിസ്ട്രേഷന്‍ ആരംഭിച്ചു. പൂതക്കുളം ഗ്രാമപഞ്ചായത്തില്‍ സ്ഥിരതാമസക്കാരായവര്‍ക്കും 2023 നവംബര്‍ ഒന്നിന് 15നും 45നും മദ്ധ്യേ പ്രായമുള്ളവര്‍ക്കും മത്സരങ്ങളില്‍ പങ്കെടുക്കാം. അത്‌ലറ്റിക്സ്, ഫുട്ബോള്‍, ക്രിക്കറ്റ്, വോളിബോള്‍, വടംവലി, ഷട്ടില്‍ ബാഡ്മിന്റണ്‍, കബഡി, ചെസ്സ്, സാഹിത്യ രചന തുടങ്ങി ഇനങ്ങളിലാണ് മത്സരങ്ങള്‍.

ജില്ലാ ഭരണകൂടത്തിന്റെയും ജില്ല ഇന്‍ഫര്‍മേഷന്‍ ഓഫീസിന്റെയും ആഭിമുഖ്യത്തില്‍ സംഘടിപ്പിച്ച ഗാന്ധി വേഷധാരിമത്സരം 2023-ന്റെ വിജയികളെ പ്രഖ്യാപിച്ചു. ഒന്നാം സ്ഥാനം ആരവ് എം പി, സര്‍ക്കാര്‍ എല്‍ പി എസ്, കൂട്ടിക്കട, രണ്ടാം സ്ഥാനം മിഥില്‍ രാജ് സര്‍ക്കാര്‍ എല്‍ വി എല്‍ പി എസ്, ചവറ സൗത്ത്, മൂന്നാം സ്ഥാനം ഇഷാന്‍ മുഹമ്മദ് ജെ എഫ് കെ എം വി എച്ച് എസ് എസ്, അയണിവേലിക്കുളങ്ങര.

ഗാന്ധിജയന്തി വാരാഘോഷത്തിന്റെ സമാപനം നാളെ (ഒക്‌ടോബര്‍ 5). ജില്ലാ ഇന്‍ഫര്‍മേഷന്‍ ഓഫീസ്, ഫാത്തിമ മാതാ നാഷനല്‍ കോളജ്, ഗാന്ധി പീസ് ഫൗണ്ടേഷന്‍ എന്നിവയുടെ ആഭിമുഖ്യത്തില്‍ നടത്തുന്ന പരിപാടി ഫാത്തിമ മാതാ നാഷനല്‍ കോളജ് ഓഡിറ്റോറിയത്തില്‍ ജില്ലാ കലക്ടര്‍ അഫ്‌സാന പര്‍വീണ്‍ രാവിലെ 10 30ന് ഉദ്ഘാടനം ചെയ്യും.

ഹ്രസ്വകാല, ഫിക്സഡ് ട്രഷറി നിക്ഷേപങ്ങളുടെ പലിശ നിരക്ക് വർധിപ്പിച്ച് സർക്കാർ ഉത്തരവായി. 181 മുതൽ 365 ദിവസം വരെയുള്ള നിക്ഷേപങ്ങളുടെ പലിശ 5.90 ശതമാനത്തിൽ നിന്ന് ആറ് ശതമാനമായി വർധിപ്പിച്ചു.

ഒഡെപെക്കുമായി ചേർന്ന് നവീകരിച്ച് നടപ്പാക്കുന്ന പട്ടികവിഭാഗം വിദ്യാർഥികൾക്കുള്ള വിദേശ പഠന സ്‌കോളർഷിപ്പ് പദ്ധതി 4ന് രാവിലെ 11ന് അയ്യങ്കാളി ഹാളിൽ മന്ത്രി കെ. രാധാകൃഷ്ണൻ ഉദ്ഘാടനം ചെയ്യും. മന്ത്രി വി ശിവൻകുട്ടി അധ്യക്ഷത വഹിക്കും.

പൂര്‍ണ്ണമായും അതിദാരിദ്ര്യം ഇല്ലാതാക്കിയ സംസ്ഥാനമാക്കി കേരളത്തെ മാറ്റുകയാണ് സര്‍ക്കാരിന്റെ ലക്ഷ്യമെന്ന് മുഖ്യമന്ത്രി പിണറായി വിജയന്‍. 2025 നവംബര്‍ ഒന്നിന് ഈ ലക്ഷ്യം കൈവരിക്കുമെന്നും മുഖ്യമന്ത്രി പറഞ്ഞു. എറണാകുളം ബോള്‍ഗാട്ടി പാലസ് കണ്‍വന്‍ഷന്‍ സെന്ററില്‍ എറണാകുളം, ആലപ്പുഴ, കോട്ടയം, ഇടുക്കി ജില്ലകളുടെ മേഖലാതല അവലോകന യോഗത്തിനു ശേഷം സംസാരിക്കുകയായിരുന്നു മുഖ്യമന്ത്രി.

സംസ്ഥാനത്ത് ഇതിനകം പ്രഖ്യാപിച്ച പദ്ധതികളില്‍ വലിയ നേട്ടമുണ്ടാക്കാനാകുമെന്നാണ് അവലോകനയോഗത്തിനു ശേഷം വ്യക്തമാകുന്നതെന്നും മുഖ്യമന്ത്രി പറഞ്ഞു.

ഇടുക്കി ജില്ലയില്‍ കുട്ടികള്‍ക്കായി ഹിന്ദി, ഇംഗ്ലീഷ്, തമിഴ്, ബംഗാളി, കന്നട, അസ്സാമീസ്, ഒറിയ, തെലുങ്ക്, മറ്റ് ഇതര ഭാഷകള്‍ കൈകാര്യം ചെയ്യുന്നതില്‍ പ്രാവീണ്യമുളള ട്രാന്‍സിലേറ്റര്‍മാരെ ആവശ്യമുണ്ട്. താല്‍പര്യമുളളവര്‍ പൈനാവില്‍ സ്ഥിതി ചെയ്യുന്ന ജില്ലാ ശിശുസംരക്ഷണ ഓഫീസറുടെ കാര്യാലയവുമായി ബന്ധപ്പെടുക. ഫോണ്‍: 04862 235532, 6282406053.