ഏറനാട് താലൂക്കിലെ പെരകമണ്ണ വില്ലേജില്‍പെട്ട 217/2 റീ സര്‍വേ നമ്പറിലും, എടവണ്ണ വില്ലേജില്‍പെട്ട 111/1/4, 113/1/2  റീ സര്‍വേ നമ്പറുകളിലും സ്ഥിതി ചെയ്യുന്ന 7.2505 ഹെക്ടര്‍ സ്ഥലത്ത് ആരംഭിക്കാനുദ്ദേശിക്കുന്ന കരിങ്കല്‍ ധാതുഖനന പദ്ധതിയുമായി ബന്ധപ്പെട്ട പൊതുതെളിവെടുപ്പ്  ഇന്ന് (ഫെബ്രുവരി 13) രാവിലെ 11.30ന് എടവണ്ണ പഞ്ചായത്തിലെ പത്തപ്പിരിയം വി.എ മാള്‍ വായനശാലയില്‍ നടക്കും.

അരിമ്പ്ര ഗവ. വൊക്കേഷണല്‍ ഹയര്‍ സെക്കന്‍ഡറി സ്‌കൂളിലെ നൈപുണി വികസന കേന്ദ്രത്തില്‍ മാര്‍ച്ച് ഒന്നുമുതല്‍ ആരംഭിക്കുന്ന ജുവലറി ഡിസൈനര്‍, എ.ഐ ഡിവൈസസ് ഇന്‍സ്റ്റലേഷന്‍ ഓപറേറ്റര്‍ കേഴ്‌സുകളിലേക്ക് പ്രവേശനത്തിന് അപേക്ഷ ക്ഷണിച്ചു. 12ാം ക്ലാസ് പാസായവര്‍ക്ക് ജുവലറി ഡിസൈനര്‍ കോഴ്‌സിലേക്കും പത്താം ക്ലാസ് യോഗ്യതയുള്ളവര്‍ക്ക് എ.ഐ കോഴ്‌സിലേക്കും അപേക്ഷിക്കാം. പ്രായം 15നും 23നും ഇടയില്‍. പ്രവേശനം സൗജന്യമാണ്. ശനി, ഞായര്‍, പൊതു അവധി ദിവസങ്ങളിലായിരിക്കും ക്ലാസുകളുണ്ടാവുക. കോഴ്‌സ് കാലാവധി പരമാവധി ഒരുവര്‍ഷം. അപേക്ഷാ ഫോറം സ്‌കൂളില്‍നിന്ന് ലഭിക്കും. പൂരിപ്പിച്ച അപേക്ഷ ഫെബ്രുവരി 19നുള്ളില്‍ സ്‌കൂളില്‍ നല്‍കണം.

സംസ്ഥാന വിവരാവകാശ കമ്മീഷണർ ഡോ.കെ.എം ദീലീപ് ഫെബ്രുവരി 15ന് രാവിലെ പത്ത് മുതൽ വൈകീട്ട് അഞ്ച് വരെ മലപ്പുറം ഗവ.ഗസ്റ്റ് ഹൗസ് കോൺഫറൻസ് ഹാളിൽ സിറ്റിങ് നടത്തും.

മലപ്പുറം ജില്ലാതല വിജിലൻസ് സമിതി യോഗം ഫെബ്രുവരി 15 ന് രാവിലെ 11ന്  ജില്ലാ കളക്ടറുടെ ചേംബറിൽ ചേരും. പൊതുസേവകരുടെ അഴിമതി സംബന്ധിച്ച പരാതികൾ സമിതിയിൽ നൽകാം.

മലപ്പുറം ജില്ലാ ശുചിത്വ മിഷനിൽ ഐ.ഇ.സി ഇന്റേണിനെ നിയമിക്കുന്നു. ഒരു വർഷക്കാലയളവിലേക്കാണ് നിയമനം. 10000 രൂപയാണ് പ്രതിമാസ സ്‌റ്റൈപന്റ്. ഏതെങ്കിലും വിഷയത്തിൽ ബിരുദത്തോടൊപ്പം ജേണലിസം, മാസ് കമ്മ്യൂണിക്കേഷൻ, പബ്ലിക് റിലേഷൻസ്, സോഷ്യൽ വർക്ക് എന്നീ ഏതെങ്കിലും വിഷയങ്ങളിൽ ഡിപ്ലോമ അല്ലെങ്കിൽ ജേണലിസം, മാസ് കമ്മ്യൂണിക്കേഷൻ, പബ്ലിക് റിലേഷൻസ്, സോഷ്യൽ വർക്ക് എന്നീ വിഷയങ്ങളിൽ ബിരുദമോ ബിരുദാനന്തര ബിരുദമോ നേടിയവരായിരിക്കണം. ഫെബ്രുവരി 17നുള്ളിൽ അപേക്ഷ സമർപ്പിക്കണം. ഫോൺ: 04832738001.

അരീക്കോട് ബ്ലോക്ക് പഞ്ചായത്ത് പരിധിയില്‍ എം.പി ലാഡ്‌സ്, എം.എല്‍.എ എസ്.ഡി.എഫ്, 2023-24 വാര്‍ഷിക പദ്ധതി എന്നിവയില്‍ നടപ്പാക്കുന്ന നാല് പ്രവൃത്തികള്‍ ഏറ്റെത്ത് നടപ്പാക്കുന്നതിനുള്ള ടെന്‍ഡര്‍ പരസ്യം/ റീ ടെന്‍ഡര്‍ പരസ്യം എന്നിവ https://etenders.kerala.gov.in എന്ന വെബ്‌സൈറ്റില്‍ പ്രസിദ്ധീകരിച്ചു. ഫോണ്‍: 04832850047

മലപ്പുറം നഗരസഭ ബസ് സ്റ്റാൻഡിനോട് ചേർന്ന് കോരങ്ങോട് പള്ളിയാളി ശ്മശാനത്തിന് സമീപം റവന്യു ഭൂമിയിൽ സ്ഥിതി ചെയ്യുന്ന ചീനിമരം/മഴമരം ഫെബ്രുവരി 23ന് രാവിലെ 10.30ന് മലപ്പുറം വില്ലേജ് ഓഫീസ് പരിസരത്ത് പരസ്യമായി ലേലം ചെയ്യുമെന്ന് ഏറനാട് തഹസിൽദാർ അറിയിച്ചു. ഫോൺ: 04832766121.

മലപ്പുറം ഡി.ഡി.ഇ ഓഫീസ് വളപ്പിൽ നിൽക്കുന്നതും മലപ്പുറം താലൂക്ക് ആശുപത്രി കെട്ടിടത്തിനും ജീവനക്കാർക്കും അപകടഭീഷണിയായി നിൽക്കുന്നതുമായ മഴമരത്തിന്റെ ആശുപത്രി കെട്ടിടത്തിന് മുകളിലേക്ക് ചാഞ്ഞ് നിൽക്കുന്ന മൂന്ന് ശാഖകൾ ഫെബ്രുവരി 21ന് രാവിലെ 11ന് മലപ്പുറം വില്ലേജ് ഓഫീസ് പരിസരത്ത് വച്ച് പരസ്യമായി ലേലം ചെയ്യുമെന്ന് ഏറനാട് തഹസിൽദാർ അറിയിച്ചു.

മലപ്പുറം ജില്ലയുടെ വിവിധ ഭാഗങ്ങളിൽ നിന്നും മുണ്ടിവീക്കം റിപ്പോർട്ട് ചെയ്യപ്പെടുന്നതായും ഈ  അസുഖത്തിനെതിരെ കരുതിയിരിക്കണമെന്നും ജില്ലാ മെഡിക്കല്‍ ഓഫീസര്‍ ഡോ . ആർ . രേണുക അറിയിച്ചു.  മുണ്ടി നീര്, മുണ്ടിവീക്കം എന്നീ പേരുകളില്‍ അറിയപ്പെടുന്ന ഈ രോഗം മിക്‌സോ വൈറസ് പരൊറ്റിഡൈറ്റിസ്  എന്ന വൈറസ് മൂലം ആണ് ഉണ്ടാകുന്നത് . വായുവിലൂടെ പകരുന്ന ഈ രോഗം ഉമിനീര്‍ ഗ്രന്ഥികളെ ആണ് ബാധിക്കുന്നത്. രോഗം ബാധിച്ചവരില്‍ അണുബാധ ഉണ്ടായ ശേഷം ഗ്രന്ഥികളില്‍ വീക്കം കണ്ടുതുടങ്ങുന്നതിനു തൊട്ടു മുമ്പും വീക്കം കണ്ടു തുടങ്ങിയ ശേഷം നാലു മുതല്‍ ആറു ദിവസം വരെയുമാണ് സാധാരണയായി പകരുന്നത്.