മാനന്തവാടി ബ്ലോക്ക്‌ പഞ്ചായത്തിന്റെ സഞ്ചരിക്കുന്ന മൃഗാശുപത്രിയുടെ സേവനം ഇന്ന് (ബുധൻ) പേരിയ ഡിവിഷനിൽ ലഭ്യമാകും. തോളക്കര (രാവിലെ 10 ന്),വാളാട് എച്ച്.എസ് (10:40 ന്), ഇരുമനുത്തൂർ (11.10 ന്), ആലാറ്റിൽ ക്ഷീരസംഘം ഓഫീസ് (11.40 ന്), അയിനിക്കൽ( ഉച്ചയ്ക്ക് 1 ന്), പേരിയ 36 (2.30 ന്) എന്നിവിടങ്ങളിൽ ലഭ്യമാകും.

 കല്‍പ്പറ്റ എസ്.കെ.എം.ജെ ഹൈസ്‌കൂളില്‍ നടന്ന സ്വാതന്ത്ര്യ ദിന ചടങ്ങിനോടനുബന്ധിച്ച് മൂന്നുറോളം പേര്‍ അണിനിരന്ന മെഗാ തിരുവാതിര അരങ്ങേറി. 'കരുത്തുറ്റ ജനാധിപത്യത്തിന് വിപുലമായ പകാളിത്തം' എന്ന സന്ദേശവുമായി യുവാക്കളില്‍ തെരഞ്ഞെടുപ്പ് അവബോധം വളര്‍ത്തുന്നതിനായാണ് മെഗാ തിരുവാതിര നടത്തിയത്. തെരഞ്ഞെടുപ്പ് കമ്മീഷന്റെ കീഴില്‍ സ്‌കൂള്‍ കോളേജ് തലങ്ങളില്‍ രൂപീകരിച്ചിട്ടുള്ള ഇലക്ടറല്‍ ലിറ്ററസി ക്ലബ്ബ്, സ്വീപ്, ജില്ലാ ഭരണകൂടം എന്നിവരുടെ സംയുക്താഭിമുഖ്യത്തിലാണ് മെഗാ തിരുവാതിര നടന്നത്.

പത്തിരിപ്പാല ഗവ ആര്‍ട്‌സ് ആന്‍ഡ് സയന്‍സ് കോളെജില്‍ പൊളിറ്റിക്കല്‍ സയന്‍സില്‍ ഗസ്റ്റ് അധ്യാപക നിയമത്തിന് ആഗസ്റ്റ് 16 ന് രാവിലെ 10 ന് കൂടിക്കാഴ്ച നടക്കും. ഉദ്യോഗാര്‍ത്ഥികള്‍ യു.ജി.സി-നെറ്റ് യോഗ്യത ഉള്ളവരും കോളെജ് വിദ്യാഭ്യാസ വകുപ്പ് ഡെപ്യൂട്ടി ഡയറക്ടറേറ്റില്‍ രജിസ്റ്റര്‍ ചെയ്തവരുമായിരിക്കണം. യു.ജി.സി-നെറ്റ്  യോഗ്യത ഉള്ളവരുടെ അഭാവത്തില്‍ ബിരുദാനന്തര ബിരുദം ഉള്ളവരെയും പരിഗണിക്കും. നിശ്ചിത യോഗ്യതയുള്ളവര്‍ അസല്‍ സര്‍ട്ടിഫിക്കറ്റുകളും പകര്‍പ്പുകളും സഹിതം കോളെജില്‍ എത്തണമെന്ന് പ്രിന്‍സിപ്പാള്‍ അറിയിച്ചു. ഫോണ്‍: 0491 2873999.
 

ജില്ലയിലെ ഗവ/സ്വാശ്രയ/ഐ.എച്ച്.ആര്‍.ഡി പോളിടെക്‌നിക് കോളെജുകളിലേക്ക് ഏതാനും സീറ്റുകളിലേക്കുള്ള സ്‌പോട്ട് അഡ്മിഷന്‍ 17 മുതല്‍ 22 വരെ പാലക്കാട് ഗവ പോളിടെക്‌നിക് കോളെജിലെ അഡ്മിനിസ്‌ട്രേറ്റീവ് ബ്ലോക്കില്‍ നടക്കും. അഡ്മിഷന്‍ ഷെഡ്യൂളുകളും ഒഴിവുകളും അറിയുന്നതിനായി www.polyadmission.org ലെ സ്‌പോട്ട് അഡ്മിഷന്‍ ഷെഡ്യൂള്‍ ആഗസ്റ്റ് 16 ന് സന്ദര്‍ശിക്കുക. സ്‌പോട്ട് അഡ്മിഷന്‍ രജിസ്‌ട്രേഷന്‍ നടത്തി സ്ലിപ് സഹിതം എത്തണം. അഡ്മിഷന്‍ ലഭിക്കുന്ന വിദ്യാര്‍ത്ഥികള്‍ അസല്‍ സര്‍ട്ടിഫിക്കറ്റുകളും പ്രോസ്‌പെക്ടസിലുള്ള ഫീസും ഉള്‍പ്പെടെ കരുതണം.

പൊതുജനങ്ങള്‍ക്ക് ക്ഷയരോഗബോധവത്ക്കരണം നല്‍കുന്നതിന്റെ ഭാഗമായി ജില്ലയിലെ 20 കെ.എസ്.ആര്‍.ടി.സി ബസുകളില്‍ ബോധവത്ക്കരണ സന്ദേശം ബ്രാന്‍ഡിങ് നടത്തി. ബ്രാന്‍ഡ് ചെയ്ത ബസുകള്‍ ജില്ലാ മെഡിക്കല്‍ ഓഫീസര്‍ (ആരോഗ്യം) ഡോ. കെ.പി റീത്ത കെ.എസ്.ആര്‍.ടി.സി ബസ് സ്റ്റാന്‍ഡ് പരിസരത്ത്‌നിന്നും ഫ്‌ളാഗ് ഓഫ് ചെയ്തു. ഡെപ്യൂട്ടി ജില്ലാ എഡ്യുക്കേഷന്‍ ഓഫീസര്‍ ടി.എസ് സുബ്രമണ്യന്‍, കെ.എസ്.ആര്‍.ടി.സി ക്ലസ്റ്റര്‍ ഓഫീസര്‍ ജോഷി ജോണ്‍, മാര്‍ക്കറ്റിങ് എക്‌സിക്യൂട്ടീവ് ഓഫീസര്‍ പ്രതീഷ്, കെ.എസ്.ആര്‍.ടി.സി ഇന്‍സ്‌പെക്ടര്‍ പി.എസ് മഹേഷ്, ജില്ലാ ടി.ബി സെന്ററിലെ ജീവനക്കാര്‍ എന്നിവര്‍ പങ്കെടുത്തു.

ഡിസ്ട്രിക്ട് കൗണ്‍സില്‍ ഫോര്‍ ചൈല്‍ഡ് വെല്‍ഫയര്‍ ജനസംഖ്യാദിനത്തോടനുബന്ധിച്ച് നടത്താന്‍ നിശ്ചയിച്ച ജില്ലാ മത്സരം സെപ്റ്റംബര്‍ രണ്ടിലേക്ക് മാറ്റിവെച്ചതായി സെക്രട്ടറി അറിയിച്ചു. പാലക്കാട് പി.എം.ജി ഹൈസ്‌കൂളില്‍ നടക്കുന്ന പരിപാടിയില്‍ വിദ്യാലയങ്ങളില്‍ നിന്നും രജിസ്ട്രര്‍ ചെയ്തവര്‍ അന്നേദിവസം രാവിലെ ഒന്‍പതിന് കുട്ടികളുമായി എത്തണം. ഫോണ്‍: 9447376974

ജില്ലയില്‍ അഞ്ച് വയസ് വരെയുളള കുട്ടികളുടെ ആധാര്‍ എന്റോള്‍മെന്റ് പുരോഗമിക്കുന്നു. ജൂലൈ പകുതി മുതല്‍ ഇതുവരെ 1900 കുട്ടികളുടെ ആധാര്‍ എന്റോള്‍മെന്റ് പൂര്‍ത്തിയായി. ഇതോടോപ്പം അഞ്ചിനും 15 മധ്യേ പ്രായമുള്ള 1200 കുട്ടികളുടെയും 20000ത്തോളം മുതിര്‍ന്നവരുടെയും ആധാര്‍ പുതുക്കലും ഇതുവരെ നടന്നു. ആധാര്‍ പുതുക്കലിനായി ജൂലൈ മുതല്‍ ഇതുവരെ വിവിധയിടങ്ങളിലായി 75 ക്യാമ്പുകള്‍ നടന്നു.

ഇതര സംസ്ഥാന വിദ്യാര്‍ത്ഥികളുടെ രക്ഷിതാക്കള്‍ക്കായി കഞ്ചിക്കോട് ഗവ ഹയര്‍ സെക്കന്‍ഡറി സ്‌കൂളില്‍ നടത്തിയ ചങ്ങാതി പദ്ധതി ശില്‍പശാല ജില്ലാ പഞ്ചായത്തംഗം എം. പത്മിനി ഉദ്ഘാടനം ചെയ്തു. സാക്ഷരതാ മിഷന്‍ ജില്ലാ കോ-ഓര്‍ഡിനേറ്റര്‍ ഡോ. മനോജ് സെബാസ്റ്റ്യന്‍ പദ്ധതി വിശദീകരിച്ചു. പഞ്ചായത്ത് അംഗങ്ങളായ നിഷ, സുഭാഷ്, അസിസ്റ്റന്റ് കോ-ഓര്‍ഡിനേറ്റര്‍ പി.വി പാര്‍വതി, ജില്ലാ റിസോഴ്‌സ് പേഴ്‌സണ്‍മാരായ രാഘവന്‍, ജയരാജന്‍, സ്‌കൂള്‍ പ്രധാനധ്യാപകര്‍, കുട്ടികളുടെ രക്ഷിതാക്കള്‍ എന്നിവര്‍ സംസാരിച്ചു.

വിനായക ചതുര്‍ത്ഥിയോടനുബന്ധിച്ചുള്ള ഗണേശോത്സവം പ്രകൃതി സൗഹൃദ തോരണങ്ങളും അലങ്കാരവസ്തുക്കളും ഉപയോഗിച്ചുകൊണ്ടാവണമെന്ന് എ.ഡി.എം കെ. മണികണ്ഠന്‍ നിര്‍ദേശിച്ചു. ഇതുമായി ബന്ധപ്പെട്ട് എം.ഡി.എം കെ. മണികണ്ഠന്റെ നേതൃത്വത്തില്‍ ഓണ്‍ലൈനായി യോഗം ചേര്‍ന്നു. ഭക്ഷണത്തിനും കുടിവെള്ളത്തിനും സ്റ്റീല്‍ പ്ലേറ്റുകളും ഗ്ലാസുകളും ഉപയോഗിക്കണം. ഒറ്റ തവണ ഉപയോഗിക്കുന്ന നിരോധിത വസ്തുക്കള്‍ ഉപയോഗിക്കരുതെന്നും പൊതുചടങ്ങുകളിലും പരിപാടികളിലും ഹരിത ചട്ടം കര്‍ശനമായി പാലിക്കണമെന്നും ശുചിത്വമിഷന്‍ ജില്ലാ കോ-ഓര്‍ഡിനേറ്റര്‍ ടി.ജി അഭിജിത്ത് അറിയിച്ചു.