പാലക്കാട് ജില്ലാ ആശുപത്രിയില്‍ സ്റ്റാഫ് നഴ്‌സ് തസ്തികയില്‍ താത്കാലിക ഒഴിവിലേക്ക് വാക് ഇന്‍ ഇന്റര്‍വ്യു നടത്തുന്നു. ഏപ്രില്‍ 28 ന് രാവിലെ 10.30ന് ജില്ലാ ആശുപത്രി സൂപ്രണ്ട് ഓഫീസിലാണ് അഭിമുഖം. താത്കാലികാടിസ്ഥാനത്തിലാണ് നിയമനം. ജി.എന്‍.എം അല്ലെങ്കില്‍ ബി.എസ്.സി നഴ്‌സിങ് പാസ്സായ, കേരള നഴ്‌സിങ് കൗണ്‍സില്‍ രജിസ്‌ട്രേഷന്‍ ഉള്ളവര്‍ക്ക് അഭിമുഖത്തില്‍ പങ്കെടുക്കാം. 2025 ഏപ്രില്‍ ഒന്നിന് 40 വയസിനുള്ളില്‍ പ്രായപരിധിയുള്ളവര്‍ക്കാണ് അവസരം. താത്പര്യമുള്ളവര്‍ പ്രായം, യോഗ്യത, പ്രവര്‍ത്തി പരിചയം തെളിയിക്കുന്ന അസ്സല്‍ സര്‍ട്ടിഫിക്കറ്റുകള്‍ സഹിതം ഹാജരാവണമെന്ന് ജില്ലാ ആശുപത്രി സൂപ്രണ്ട് അറിയിച്ചു.

പാലക്കാട് പുതുനഗരം പൊലീസ് സ്റ്റേഷന്‍ വളപ്പില്‍ നില്‍ക്കുന്ന് രണ്ട് കുമ്പിള്‍ മരങ്ങള്‍ മുറിച്ച് മാറ്റുന്നതിനുള്ള ലേലം ഏപ്രില്‍ 21 പകല്‍ 11 മണിക്ക് നടക്കും. നിരതദ്രവ്യ തുക അടച്ച് ലേലത്തില്‍ പങ്കെടുക്കാം. താത്പര്യമുള്ളവര്‍ അന്നേദിവസം പുതുനഗരം പൊലീസ് സ്റ്റേഷനില്‍ എത്തണമെന്ന് ജില്ലാ പൊലീസ് മേധാവി അറിയിച്ചു. ഫോണ്‍: 0491 2536700

ജില്ലയിലെ മനുഷ്യ- വന്യജീവി സംഘര്‍ഷം സംബന്ധിച്ച് ചര്‍ച്ച ചെയ്യുന്നതിനായി മന്ത്രിമാരായ എം.ബി രാജേഷ്, കെ. കൃഷ്ണന്‍ കുട്ടി എന്നിവരുടെ നേതൃത്വത്തില്‍ ഏപ്രില്‍ 21 ന് ജില്ലാ പഞ്ചായത്ത് ഹാളില്‍ ചേരാന്‍ നിശ്ചയിച്ചിരുന്ന യോഗം ഏപ്രില്‍ 22 ലേക്ക് മാറ്റി വെച്ചു.  ഏപ്രില്‍ 22 ന് ഉച്ചയ്ക്ക് രണ്ടു മണിക്ക് യോഗം നടക്കുമെന്ന് ജില്ലാ ദുരന്ത നിവാരണ അതോറിറ്റി ചെയര്‍പേഴ്‌സണ്‍ കൂടിയായ ജില്ലാ കളക്ടര്‍ അറിയിച്ചു.

വടക്കഞ്ചേരി ഗ്രാമപഞ്ചായത്തിലെ നാലു സെന്റ് നഗറില്‍ (16-ാം വാര്‍ഡ്) കെ. രാധാകൃഷ്ണന്‍ എം.പിയുടെ പ്രാദേശിക വികസന പദ്ധതിയിലുള്‍പ്പെടുത്തി മിനി മാസ്റ്റ് ലൈറ്റ് സ്ഥാപിക്കുന്നതിന് രണ്ടു ലക്ഷം രൂപയുടെ ഭരണാനുമതി നല്‍കി ജില്ലാ കളക്ടര്‍ ഉത്തരവിട്ടു.

എംപിഎല്‍എഡിഎസ് പദ്ധതി പ്രകാരം ഷാഫി പറമ്പില്‍ എംപിയുടെ പ്രാദേശിക വികസന നിധിയില്‍ നിന്നും ഭിന്നശേഷിക്കാര്‍ക്ക് ഇലക്ട്രോണിക് വീല്‍ചെയറുകള്‍ വിതരണം ചെയ്യുന്നു. ചൊക്ലി ഗ്രാമപഞ്ചായത്തിലെ 12-ാം വാര്‍ഡ്, കതിരൂര്‍ ഗ്രാമപഞ്ചായത്തിലെ 10-ാം വാര്‍ഡ്, കൂത്തുപറമ്പ് മുന്‍സിപ്പാലിറ്റിയിലെ 22-ാം വാര്‍ഡ് എന്നിവിടങ്ങളിലെ 40 ശതമാനമോ അതില്‍ കൂടുതലോ വൈകല്യമുള്ളവര്‍ക്ക് അപേക്ഷിക്കാം.

ഇരിണാവ് വിവേഴ്സ് ഇൻഡസ്ട്രിയൽ കോപ്പറേറ്റീവ് സൊസൈറ്റിയുടെ സുവർണ്ണ ജൂബിലി ആഘോഷവും പുതുതായി പുറത്തിറക്കുന്ന ആയുർവേദ മാറ്റിന്റെ ലോഞ്ചിങ്ങും വ്യവസായ നിയമ വകുപ്പ് മന്ത്രി പി രാജീവ് നിർവഹിച്ചു. എം വിജിൻ എംഎൽഎ അധ്യക്ഷനായി. രാസവസ്തുക്കൾ ഒന്നും ഉപയോഗിക്കാതെ തികച്ചും പ്രകൃതിദത്തമായ ആയുർവേദ കൂട്ടുകൾ ഉപയോഗിച്ച് ചായം പൂശിയ നൂറ് ശതമാനം പരുത്തി നൂൽ ഉപയോഗിച്ചാണ് ആയുർ മാറ്റ് തയ്യാറാ ക്കിയിരിക്കുന്നത്. കസ്റ്റമൈസ് ചെയ്ത ഫാബ്രിക് പെയിന്റ് സാരിയും മറ്റ് റെഡിവെയർ വസ്ത്രങ്ങളും സംഘം നിർമ്മിക്കാൻ ആരംഭിച്ചിട്ടുണ്ട്. 10 തറികളിൽ പ്രവർത്തനം ആരംഭിച്ച സംഘം ഇന്ന് 150 ലേറെ തറികളുള്ള വ്യവസായ സംഘമണ്.

പൂവളപ്പ്തെരു അങ്കണവാടി കം ക്രഷിലെ ഹെല്‍പ്പര്‍ തസ്തികയിലേക്ക് തലശ്ശേരി മുനിസിപ്പാലിറ്റി 44-ാം വാര്‍ഡിലെ വനിതകളില്‍ നിന്നും അപേക്ഷ ക്ഷണിച്ചു. ഏഴാം ക്ലാസ് യോഗ്യതയുള്ള 18 നും 35 നുമിടയില്‍ പ്രായമുള്ളവര്‍ക്ക് അപേക്ഷിക്കാം. എസ് സി / എസ്ടി വിഭാഗക്കാര്‍ക്ക് മൂന്നു വര്‍ഷ വയസ്സിളവ് ലഭിക്കും. 44-ാം വാര്‍ഡിലെ സ്ഥിര താമസക്കാരിയാണെന്ന് തെളിയിക്കുന്ന വില്ലേജ് ഓഫീസറുടെ സര്‍ട്ടിഫിക്കറ്റ് സഹിതമാണ് അപേക്ഷിക്കേണ്ടത്. അപേക്ഷകള്‍ മെയ് 16 ന് വൈകുന്നേരം അഞ്ചിനകം തലശ്ശേരി ഐ.സി.ഡി.എസ് ഓഫീസില്‍ എത്തിക്കണം.

ഫോണ്‍: 04902344488

ജില്ലാ റീജിയണല്‍ ട്രാന്‍സ്‌പോര്‍ട്ട് അതോറിറ്റി യോഗം മെയ് ആറിന് രാവിലെ 10.30 മുതല്‍ കലക്ട്രേറ്റ് ഓഡിറ്റോറിയത്തില്‍ നടക്കുമെന്ന് റീജിയണല്‍ ട്രാന്‍സ്‌പോര്‍ട്ട് ഓഫീസര്‍ അറിയിച്ചു.

ഇരിക്കൂര്‍ ബ്ലോക്ക് പഞ്ചായത്തിന്റെ നേതൃത്വത്തില്‍ മലപ്പട്ടത്ത് ആരംഭിച്ച വനിതാ ഇന്‍ഡസ്ട്രിയല്‍ പാര്‍ക്ക് വ്യവസായ വകുപ്പ് മന്ത്രി പി രാജീവ് ഉദ്ഘാടനം ചെയ്തു. വികസനത്തിന്റെ രാഷ്ട്രീയത്തില്‍ കക്ഷി രാഷ്ട്രീയത്തിനതീതമായി യോജിപ്പുണ്ടാവണമെന്നും കൂടുതല്‍ സംരംഭങ്ങള്‍ ഉയര്‍ന്നുവരണമെന്നും മന്ത്രി പറഞ്ഞു. കേരളത്തില്‍ നിലവില്‍ 31 ശതമാനവും വനിതാ സംരംഭങ്ങളാണ്. കേരളത്തില്‍ സംരംഭങ്ങള്‍ക്ക് സാധ്യതകള്‍ ഏറെയാണെന്നും മന്ത്രി പറഞ്ഞു. 

ചിറക്കല്‍ - കാട്ടാമ്പള്ളി - മയ്യില്‍ - കൊളോളം റോഡില്‍ ടാറിങ്ങ് പ്രവര്‍ത്തി നടക്കുന്നതിനാല്‍ കമ്പില്‍ മുതല്‍ ചെക്കിയാട്ടു കടവ് വരെ ഏപ്രില്‍ 23 മുതല്‍ മെയ് മൂന്ന് വരെ ഗതാഗതം പൂര്‍ണമായും നിരോധിക്കുമെന്ന് അസിസ്റ്റന്റ് എക്‌സിക്യൂട്ടീവ് എഞ്ചിനീയര്‍ അറിയിച്ചു.