ജില്ലാ എംപ്ലോയ്മെന്റ് എക്‌സ്‌ചേഞ്ചിന്റെ കീഴിലുള്ള എംപ്ലോയബിലിറ്റി സെന്ററിന്റെ ആഭിമുഖ്യത്തില്‍ ഏപ്രില്‍ 25 ന് രാവിലെ 10 മുതല്‍ ഉച്ചയ്ക്ക് ഒന്ന് വരെ മിനി ജോബ് ഫെയര്‍ സംഘടിപ്പിക്കും.

നാഷണൽ ഇൻസ്റ്റിറ്റ്യൂട്ട് ഓഫ് സ്പീച് ആൻഡ് ഹിയറിങ്ങും (നിഷ്) സംസ്ഥാന സാമൂഹ്യ നീതി വകുപ്പും സംയുക്തമായി നടത്തുന്ന നിഡാസ് വെബ്ബിനാറിന്റെ ഭാഗമായി  കുട്ടികളിലെ പെരുമാറ്റ വൈകല്യം: മാതാപിതാക്കൾക്കും അധ്യാപകർക്കുമുള്ള മാർഗ്ഗനിർദ്ദേശങ്ങൾ എന്ന വിഷയത്തിൽ ഓൺലൈൻ സെമിനാർ നടത്തും.

ഭിന്നശേഷി വിദ്യാര്‍ഥികളുടെ കഴിവുകളെ പരിപോഷിപ്പിക്കുന്നതിനും അവരിലെ ന്യൂനതകളെ വിദഗ്ധ പരിചരണത്തിലൂടെ മേന്മകളായി ഉയര്‍ത്താനും പുനരധിവാസത്തിനുമായി കേരള സാമൂഹ്യ സുരക്ഷാ മിഷന്റെ നേതൃത്വത്തില്‍ മട്ടന്നൂരില്‍ ആരംഭിച്ച മോഡല്‍ ചൈല്‍ഡ് റീ ഹാബിലിറ്റേഷന്‍ സെന്റര്‍ ഭിന്നശേഷി കുട്ടികള്‍ക്ക് പുതുവെളിച്ചമേകുന്നു. ആധുനിക സൗകര്യങ്ങളുള്ള കെട്ടിടത്തില്‍ പ്രവര്‍ത്തിക്കുന്ന എംസിആര്‍സിയുടെ മൂന്ന് നിലകളിലേക്കും റാമ്പുകള്‍, ശാരീരിക വെല്ലുവിളി നേരിടുന്ന കുട്ടികള്‍ക്കുള്ള അടിസ്ഥാന സൗകര്യങ്ങള്‍ എന്നിവ ഉള്‍പ്പെടുന്നു.

പഹൽഗാം  ഭീകരാക്രമണത്തിന്റെ പശ്ചാത്തലത്തിൽ വിനോദയാത്രികർക്കായി ജമ്മു കാശ്മീർ സർക്കാർ അടിയന്തര ഹെൽപ് ഡെസ്‌ക്കുകൾ ഒരുക്കി.

കേരളത്തില്‍ മൈക്രോ വ്യവസായങ്ങള്‍ക്ക് വന്‍ സാധ്യതയാണുള്ളതെന്നും പ്രായഭേദമന്യേ ആര്‍ക്കും സംരംഭകരാകാന്‍ കഴിയുന്ന അനുകൂല സാഹചര്യമാണ് സംസ്ഥാനത്തുള്ളതെന്നും വ്യവസായ വകുപ്പ് മന്ത്രി പി രാജീവ് പറഞ്ഞു. മയ്യില്‍ റൈസ് പ്രൊഡ്യൂസര്‍ കമ്പനി ലിമിറ്റഡ് പുതുതായി വിപണിയിലിറക്കുന്ന ഗാബ റൈസ് പ്രൊഡക്ട് വിപണിയിൽ ഇറക്കുന്നതിന്റെയും ജില്ലാപഞ്ചായത്ത് കെട്ടിടത്തിലെ വിപുലീകരിച്ച കേരളാ ഗ്രോ വിപണന കേന്ദ്രത്തിന്റെയും ഉദ്ഘാടനം നിര്‍വഹിച്ച് സംസാരിക്കുകയായിരുന്നു മന്ത്രി. കാര്‍ഷിക മേഖലയുടെ പുനരുജ്ജീവനത്തിന് കൃഷി വകുപ്പിനൊപ്പം മറ്റ് വകുപ്പുകളുടെയും ഏകോപനം സാധ്യമാകണം.

വ്യവസായ വകുപ്പിന്റെ സ്കെയിൽ അപ്പ് മിഷൻ 1000 പദ്ധതി പ്രകാരം സ്റ്റേറ്റ് ലെവൽ കമ്മിറ്റി അംഗീകാരം നൽകിയ അഞ്ചു സംരംഭങ്ങളുടെ പദ്ധതി രേഖ (ഡി.പി.ആർ) പരിശോധിച്ച് ജില്ലാതല കമ്മിറ്റി അംഗീകാരം നൽകി.സംസ്ഥാനത്ത് തന്നെ ഏറ്റവും കൂടുതൽ പദ്ധതികൾക്ക് ഡി.പി.ആർ തയ്യാറാക്കി അംഗീകാരം ലഭ്യമായത്  മലപ്പുറം ജില്ലയിലാണ്. ഇതോടെ ജില്ലയിൽ നിന്ന് ആകെ അംഗീകാരം ലഭ്യമായ 38 പദ്ധതികളിൽ 20 സംരംഭങ്ങൾക്ക്  വിപുലീകരണ പദ്ധതിയുടെ ഡി.പി.ആർ. തയ്യാറാക്കി അംഗീകാരം ലഭിച്ചു.

സംസ്ഥാന സർക്കാരിന്റെ നാലാം വാർഷികത്തോടനുബന്ധിച്ച് മെയ് ഏഴു മുതൽ 13 വരെ മലപ്പുറം കോട്ടക്കുന്നിൽ നടക്കുന്ന 'എന്റെ കേരളം 'പ്രദർശന വിപണന മേളയിൽ വാണിജ്യ സ്റ്റാളുകൾ അനുവദിക്കുന്നതിന് അപേക്ഷ ക്ഷണിച്ചു. എം.എസ്.എം.ഇ –ഉദ്യം രജിസ്ട്രേഷൻ നേടിയിട്ടുളള ഉൽപാദനം, സേവനം, കരകൗശലം എന്നീ മേഖലകളിലെ സംരംഭങ്ങൾക്ക് അപേക്ഷ നൽകാം.  ഉദ്യം പകർപ്പ് സഹിതം നിശ്ചിത മാതൃകയിലുളള അപേക്ഷകൾ മലപ്പുറം ജില്ലാ വ്യവസായ കേന്ദ്രത്തിൽ ഏപ്രിൽ 29നകം നൽകണം. ഫോൺ : 0483-2737405.

മലപ്പുറം സിവിൽ സ്റ്റേഷനിലെ ആസൂത്രണ സമിതി സെക്രട്ടറിയേറ്റ് കെട്ടിടത്തിൽ പ്രവർത്തിക്കുന്ന ജില്ലാ വികസന കമ്മീഷണറുടെ കാര്യാലയത്തിലെ 2025 മെയ് മാസം മുതൽ ഒരു വർഷത്തേക്ക് 10 ലക്ഷം രൂപയിൽ താഴെ വിലവരുന്ന ഡീസൽ വാഹനം (വെള്ള നിറത്തിലുള്ള ഹോണ്ട സിറ്റി, ടാറ്റ നെക്‌സോൺ, മാരുതി സിയാസ് എന്നീ പ്രീമിയം സെഡാൻ വാഹനങ്ങൾക്ക് മുൻഗണന) പ്രതിമാസ വാടകയ്ക്ക് നൽകാൻ താൽപര്യമുള്ള വാഹന ഉടമകളിൽ നിന്നും ക്വട്ടേഷൻ ക്ഷണിച്ചു. ജില്ലാ വികസന കമ്മീഷണറുടെ കാര്യാലയം, ആസൂത്രണ സമിതി സെക്രട്ടേറിയറ്റ്, സിവിൽ സ്റ്റേഷൻ, മലപ്പുറം - 676505 എന്ന വിലാസത്തിൽ മെയ് ഒമ്പതിന് രാവിലെ 11നുള്ളിൽ ക്വട്ടേഷൻ സമർപ്പിക്കണം.

കൊണ്ടോട്ടി സബ്ഡിവിഷൻ ഡെപ്യൂട്ടി സൂപ്രണ്ട് ഓഫ് പോലീസിന്റെ നേതൃത്വത്തിലുള്ള സംഘം പിടിച്ചെടുത്ത 18,000 ലിറ്റർ ഡീസലും ഇത് സൂക്ഷിച്ച 1000 ലിറ്റർ സംഭരണ ശേഷിയുള്ള പ്ലാസ്റ്റിക് കണ്ടെയ്‌നറുകളും ലേലം ചെയ്യുന്നു. തേഞ്ഞിപ്പലം പഞ്ചായത്തിലെ കൊയപ്പപാടത്തുള്ള പെരിഞ്ചേരിമാട്ടിൽ അബ്ദുൽ സലാമിന്റെ ഉടമസ്ഥതതയിലുള്ള കെട്ടിടത്തിൽ ഏപ്രിൽ 25ന് രാവിലെ 10.30നാണ് ലേലം. താത്പര്യമുള്ളവർക്ക് 24ന് വൈകീട്ട് നാലിന് മുമ്പായി തിരൂരങ്ങാടി താലൂക്ക് സപ്ലൈ ഓഫീസിൽ ക്വട്ടേഷൻ സമർപ്പിക്കണം. ഫോൺ: 0494 2462917.

ദേശീയ ഗ്രാമീണ ഉപജീവന മിഷൻ കുടുംബശ്രീ മുഖേന പെരുമ്പടപ്പ് ബ്ലോക്കിലെ എസ്.വി.ഇ.പി ( സ്റ്റാർട്ടപ് വില്ലേജ് എന്റർപ്രണർഷിപ് പ്രോഗ്രാം) പദ്ധതിയിലേക്ക് മൈക്രോ എന്റർ പ്രൈസസ് കൺസൾട്ടന്റുമാരെ നിയമിക്കുന്നു. പ്ലസ് ടു വിദ്യാഭ്യാസ യോഗ്യതയുള്ള 25നും 45 വയസ്സിനും ഇടയിൽ പ്രായമുള്ള കുടുംബശ്രീ അംഗത്തിനോ കുടുംബാംഗത്തിനോ ഓക്സിലറി ഗ്രൂപ്പ് അംഗത്തിനോ അപേക്ഷിക്കാം. അപേക്ഷകർ പെരുമ്പടപ്പ് ബ്ലോക്കിൽ ഉൾപ്പെട്ട ഗ്രാമപഞ്ചായത്തുകളിൽ സ്ഥിര താമസക്കാരായിരിക്കണം. ബയോഡാറ്റ, വിദ്യാഭ്യാസ യോഗ്യത തെളിയിക്കുന്ന സർട്ടിഫിക്കറ്റുകളുടെ കോപ്പി എന്നിവ സഹിതം അതത് ഗ്രാമപഞ്ചായത്തിലെ കുടുംബശ്രീ സി.ഡി.എസ് ഓഫീസിൽ ഏപ്രിൽ 30നകം അപേക്ഷ നൽകണം.