യുവജനങ്ങളിൽ വോട്ടിങ് അവബോധപരിപാടിയായ സ്വീപ് പ്രചാരണത്തിന്റെ ഭാഗമായി ജില്ലാ ഭരണകൂടം വോട്ടർ അവബോധ നൈറ്റ്  വോക്ക് സംഘടിപ്പിച്ചു. ജില്ലയിലെ സ്വീപ് പ്രവർത്തനങ്ങളുടെ പ്രചാരണത്തിന് ഇതോടെ തുടക്കമായി. ജനാധിപത്യത്തിൽ ഓരോ വോട്ടിന്റെയും പ്രാധാന്യം യുവജനങ്ങൾക്ക് ബോധ്യപ്പെടുത്തുക എന്നതാണ് പരിപാടിയുടെ പ്രധാന ലക്ഷ്യം.

തൃശ്ശൂരിലെ നെഹ്റു പാർക്കിൽ നിന്ന് ആരംഭിച്ച പരിപാടി പോപ്പ് പോൾ മേഴ്‌സി ഹോമിലെ ഭിന്നശേഷിക്കാരുടെ ശിങ്കാരിമേളത്തിന്റെ അകമ്പടിയോടെ തുടങ്ങി. ജില്ലാ കളക്ടർ ശിഖ സുരേന്ദ്രൻ പരിപാടി ഉദ്ഘാടനം ചെയ്തു. അസിസ്റ്റന്റ് കളക്ടർ സ്വാതി മോഹൻ റാത്തോഡ് പങ്കെടുത്തു.

നിയമസഭ തിരഞ്ഞെടുപ്പിന്റെ ഭാഗമായി സാരഥി പോർട്ടൽ പരിശീലനം ജില്ലാ കളക്ടറേറ്റ് എക്സിക്യൂട്ടീവ് കോൺഫറൻസ് ഹാളിൽ നടന്നു. പോസ്റ്റൽ ബാല്ലറ്റ് സംബന്ധിച്ച് ജില്ലയിലെ വരണാധികാരികൾ, ഉപവരണാധികാരികൾ, പോസ്റ്റൽ ബാലറ്റ് ടീമുകൾ എന്നിവർക്ക് ബോധവത്ക്കരണം നൽകുന്നതിനാണ് പരിശീലനം സംഘടിപ്പിച്ചത്. പോസ്റ്റൽ ബാലറ്റ് നോഡൽ ഓഫീസറും ഡെപ്യൂട്ടി കളക്ടറുമായ പി സുരേഷ്, ഇലക്ഷൻ ഡെപ്യൂട്ടി കളക്ടർ കെ.എസ് പ്രീത സ്‌കറിയ, അസിസ്റ്റന്റ് ഡിസ്ട്രിക്ട് ഇൻഫർമാറ്റിക് ഓഫീസർ അനു സെബാസ്റ്റ്യൻ എന്നിവർ പരിശീലനത്തിന് നേതൃത്വം നൽകി.

നിയമസഭ തിരഞ്ഞെടുപ്പുമായി ബന്ധപ്പെട്ട് മാർച്ച് 25 ന് കേരളത്തിലെ എല്ലാ നിയമസഭാ മണ്ഡലങ്ങളിലും ഇസിഐ നെറ്റ് പ്രൊ ആപ്പുകളുടെ പരിശോധന നടത്തും. അതിന്റെ ഭാഗമായി ജില്ലയിലെ എല്ലാ നിയോജകമണ്ഡലങ്ങളിലും മുന്നൊരുക്ക പ്രവർത്തനങ്ങൾ കൃത്യമായി നടക്കുന്നുണ്ടെന്ന് ഉറപ്പാക്കണമെന്ന് ജില്ലാ ഇലക്ഷൻ ഓഫീസറും ജില്ലാ കളക്ടറുമായ ശിഖ സുരേന്ദ്രൻ അറിയിച്ചു.

  കേരള നിയമസഭയിലേയ്ക്കുള്ള പൊതുതിരഞ്ഞെടുപ്പുമായി ബന്ധപ്പെട്ട് പോളിംഗ് ഡ്യൂട്ടിക്കായി നിയോഗിച്ച ഉദ്യോഗസ്ഥര്‍ക്കുള്ള ഉത്തരവുകള്‍ ഓർഡർ സോഫ്റ്റ് വെയറില്‍ (https://order.ceo.kerala.gov.in) പ്രസിദ്ധീകരിച്ചതായി ജില്ലാതിരഞ്ഞെടുപ്പ് ഓഫീസറായ ജില്ലാകളക്ടര്‍ അറിയിച്ചു.

നിയമസഭ തിരഞ്ഞെടുപ്പിനോടനുബന്ധിച്ച് ജില്ലാ ഭരണകൂടം നടപ്പിലാക്കുന്ന സ്വീപ് ക്യാമ്പയിനായ ‘ഇങ്ക് ഇറ്റ് കണ്ണൂർ’ൻ്റെ ഭാഗമായി വിവിധ ബോധവൽക്കരണ പരിപാടികൾ സംഘടിപ്പിച്ചു. 

'നിങ്ങളുടെ വോട്ട്, നിങ്ങളുടെ നാളെ' എന്ന മുദ്രാവാക്യം ഉയർത്തി യുവാക്കളെയും സ്ത്രീകളെയും ഉൾപ്പെടെ സമൂഹത്തിലെ എല്ലാ വിഭാഗങ്ങളെയും തിരഞ്ഞെടുപ്പിൽ പങ്കാളികളാക്കുക എന്ന ലക്ഷ്യത്തോടെയാണ് പയ്യാമ്പലം ബീച്ചിൽ പരിപാടി സംഘടിപ്പിച്ചത്.

ആർ.ജെ ജിത്തു ചോദ്യോത്തരങ്ങളിലൂടെ ജനങ്ങളുമായി സംവദിച്ച് തിരഞ്ഞെടുപ്പുമായി ബന്ധപ്പെട്ട അവബോധം വർധിപ്പിച്ചു. സ്വീപ് ലോഗോയുടെ മണൽ ശിൽപ്പവും സ്വീപ് ലോഗോ ജിഗ്‌സോ പസിലും ഒരുക്കി. 

നിയമസഭാ തെരഞ്ഞെടുപ്പ് അവബോധത്തിന്റെ ഭാഗമായി എന്റെ വോട്ട് എന്റെ അഭിമാനം എന്ന ക്യാമ്പയിനിൽ സ്വീപ് (സിസ്റ്റമാറ്റിക് വോട്ടർ എഡ്യൂക്കേഷൻ ആൻഡ് ഇലക്ടറൽ പാർട്ടിസിപ്പേഷൻ) മലപ്പുറത്തിന്റെ നേതൃത്വത്തിൽ സെൽഫി മത്സരം സംഘടിപ്പിക്കുന്നു. നാല് ഘട്ടമായാണ് മത്സരത്തിൽ പങ്കെടുക്കാൻ കഴിയുക. വോട്ടർ അവബോധം കാണിക്കുന്ന ഒരു ക്രീയേറ്റീവ് സെൽഫി എടുക്കുക, വോട്ടിംഗിനെയും ജനാധിപത്യത്തെയും കുറിച്ച് ആകർഷകമായ ഒരു അടിക്കുറിപ്പ് എഴുതുക, നിങ്ങളുടെ ഇൻസ്റ്റാഗ്രാം ഫീഡിൽ പബ്ലിക്കായി പോസ്റ്റ് ചെയ്യുക, ഔദ്യോഗിക അക്കൗണ്ടുകൾ@malappuramdc, @sveepmalappuram ടാഗ് ചെയ്യുക എന്നിവയാണ് ചെയ്യേണ്ടത്. വിജയികൾക്ക് ആകർഷകമായ സമ്മാനം ലഭിക്കും.

വരാനിരിക്കുന്ന തിരഞ്ഞെടുപ്പിൽ വോട്ടർമാരുടെ പൂർണ്ണ പങ്കാളിത്തം ഉറപ്പാക്കുന്നതിനായി തിരഞ്ഞെടുപ്പ് കമ്മീഷന്റെ 'സ്വീപ്' (സിസ്റ്റമാറ്റിക് വോട്ടേഴ്സ് എഡ്യൂക്കേഷൻ ആൻഡ് ഇലക്ടറൽ പാർട്ടിസിപ്പേഷൻ) ക്യാമ്പയിന്റെ ഭാഗമായി മലപ്പുറം കോട്ടക്കുന്നിൽ വിപുലമായ പ്രചാരണ പരിപാടികൾ സംഘടിപ്പിച്ചു. വൈവിധ്യമാർന്ന പരിപാടികളാൽ ശ്രദ്ധേയമായ ചടങ്ങ് ജില്ലാ കളക്ടർ ഡോ. വിനയ് ഗോയൽ ഉദ്ഘാടനം ചെയ്തു. ജനാധിപത്യ പ്രക്രിയയിൽ ഓരോ വോട്ടിനുമുള്ള പ്രാധാന്യത്തെക്കുറിച്ചും, സമ്മതിദാന അവകാശം വിനിയോഗിക്കേണ്ടതിന്റെ ആവശ്യകതയെക്കുറിച്ചും കളക്ടർ ഓർമ്മിപ്പിച്ചു.

നിയമസഭാ തെരഞ്ഞെടുപ്പുമായി ബന്ധപ്പെട്ട് ജില്ലയിലെ പോസ്റ്റല്‍ ബാലറ്റ് അപേക്ഷകള്‍ കൈകാര്യം ചെയ്യുന്നതിനായി ജില്ലാ പ്ലാനിങ് ഓഫീസില്‍ സജ്ജീകരിച്ച പോസ്റ്റല്‍ ബാലറ്റ് ജില്ലാതല ക്ലിയറിങ് സെന്ററിന്റെ പ്രവര്‍ത്തനം ജില്ലാ കളക്ടര്‍ ഡോ. വിനയ് ഗോയല്‍ നേരിട്ടെത്തി വിലയിരുത്തി. അവശ്യ സർവീസ്, ഭിന്നശേഷി വിഭാഗത്തിൽ ഉൾപ്പെട്ടവരുടെ പോസ്റ്റല്‍ ബാലറ്റ് അപേക്ഷകളാണ്  ആദ്യം പരിഗണിക്കുന്നത്. ഈ അപേക്ഷകൾ അതത് നോഡല്‍ ഓഫീസര്‍മാര്‍ മുഖേനയാണ് ക്ലിയറിംഗ് സെന്ററില്‍ എത്തുന്നത്.