തിരുവനന്തപുരത്ത് ഇന്ന് (27 ഫെബ്രുവരി 2021) 240 പേര്‍ക്കു കൂടി കോവിഡ് 19 സ്ഥിരീകരിച്ചു. 394 പേര്‍ രോഗമുക്തരായി. നിലവില്‍ 3,082 പേരാണു രോഗം സ്ഥിരീകരിച്ചു ചികിത്സയില്‍ കഴിയുന്നത്. 

ഇന്നു രോഗം സ്ഥിരീകരിച്ചവരില്‍ 175 പേര്‍ക്കു സമ്പര്‍ക്കത്തിലൂടെയാണു രോഗബാധയുണ്ടായത്. ഇതില്‍ 4 പേര്‍ ആരോഗ്യ പ്രവര്‍ത്തകരാണ്.

ജില്ലയിൽ പൊതുനിരത്തുകളിൽ സ്ഥാപിച്ചിട്ടുള്ള മുഴുവൻ അനധികൃത പരസ്യ ബോർഡുകളും ഹോർഡിംഗുകളും ഇന്നു (28 ഫെബ്രുവരി) വൈകുന്നേരത്തിനു മുൻപു നീക്കം ചെയ്യണമെന്നു ജില്ലാ തെരഞ്ഞെടുപ്പ് ഓഫിസർകൂടിയായ കളക്ടർ ഡോ. നവ്‌ജ്യോത് ഖോസ. തെരഞ്ഞെടുപ്പ് പെരുമാറ്റച്ചട്ടം നിലവിൽവന്ന സാഹചര്യത്തിലാണു തീരുമാനം.

അനധികൃത ബോർഡുകളും മറ്റു പരസ്യങ്ങളും സ്ഥാപിച്ചവർ സ്വന്തം ചെലവിൽ അവ നീക്കം ചെയ്യണം. ഇക്കാര്യം നിരീക്ഷിക്കാൻ ജില്ലാ ഇലക്ഷൻ ഓഫിസറുടേയും പൊലീസിന്റെയും നേതൃത്വത്തിൽ ആന്റി ഡിഫേസ്‌മെന്റ് സ്‌ക്വാഡ് രൂപീകരിച്ചിട്ടുണ്ടെന്നും കളക്ടർ അറിയിച്ചു.

* നിരത്തുവക്കിലും പൊതുസ്ഥലങ്ങളിലും പൊങ്കാലയിടരുത്

കോവിഡിന്റെ പശ്ചാത്തലത്തിൽ ഇത്തവണത്തെ ആറ്റുകാൽ പൊങ്കാല വീടുകളിൽ മാത്രമാക്കണമെന്നു ജില്ലാ കളക്ടർ ഡോ. നവ്‌ജ്യോത് ഖോസ. വീടുകളിൽ പൊങ്കാലയിടുമ്പോൾ സാമൂഹിക അലകം അടക്കമുള്ള കോവിഡ് പ്രോട്ടോക്കോൾ പാലിക്കുന്നതിൽ ശ്രദ്ധവയ്ക്കണമെന്നും കളക്ടർ അഭ്യർഥിച്ചു.

തിരുവനന്തപുരത്ത് ഇന്ന് (26 ഫെബ്രുവരി 2021) 234 പേര്‍ക്കു കൂടി കോവിഡ് 19 സ്ഥിരീകരിച്ചു. 372 പേര്‍ രോഗമുക്തരായി. നിലവില്‍ 3,241 പേരാണു രോഗം സ്ഥിരീകരിച്ചു ചികിത്സയില്‍ കഴിയുന്നത്. 

ഇന്നു രോഗം സ്ഥിരീകരിച്ചവരില്‍ 164 പേര്‍ക്കു സമ്പര്‍ക്കത്തിലൂടെയാണു രോഗബാധയുണ്ടായത്. ഇതില്‍ രണ്ടുപേര്‍ ആരോഗ്യ പ്രവര്‍ത്തകരാണ്.

ആറ്റുകാല്‍ പൊങ്കാല നടക്കുന്ന ഇന്ന്(27 ഫെബ്രുവരി) തിരുവനന്തപുരം ജില്ലയ്ക്ക് പ്രാദേശിക അവധിയായിരിക്കുമെന്ന് ജില്ലാ കളക്ടര്‍ ഡോ. നവജ്യോത് ഖോസ അറിയിച്ചു. എല്ലാ വിദ്യാഭ്യാസ സ്ഥാപനങ്ങള്‍ക്കും സര്‍ക്കാര്‍-അര്‍ദ്ധസര്‍ക്കാര്‍ സ്ഥാപനങ്ങള്‍ക്കും അവധി ബാധകമായിരിക്കും.

ജില്ലയില്‍ കനത്ത ചൂട് റിപ്പോര്‍ട്ട് ചെയ്യുന്ന സാഹചര്യത്തില്‍ ജനങ്ങള്‍ കൂടുതല്‍ ജാഗ്രത പാലിക്കണമെന്ന് ജില്ലാ മെഡിക്കല്‍ ഓഫീസര്‍ ഡോ. കെ.എസ് ഷിനു അറിയിച്ചു. കനത്ത ചൂടില്‍ സൂര്യതാപം, സൂര്യാഘാതം എന്നിവയുണ്ടാകാനിടയുണ്ട്. രാവിലെ 11 മുതല്‍ ഉച്ചയ്ക്ക് മൂന്നുവരെയുള്ള വെയില്‍ നേരിട്ട് കൊള്ളുന്നത് പൂര്‍ണമായും ഒഴിവാക്കണം. നിര്‍ജലീകരണം തടയാന്‍ ധാരാളം വെള്ളം കുടിക്കണം. ഉപ്പിട്ട കഞ്ഞിവെള്ളം, നാരങ്ങാവെള്ളം തുടങ്ങിയവ ഉപയോഗിക്കാം. ജോലി സമയത്ത് ശരീരത്തില്‍ സൂര്യപ്രകാശം ഏല്‍ക്കാത്തവിധം ശരീരം മൂടുന്ന രീതിയിലുള്ളഇളം നിറത്തിലുള്ള വസ്ത്രംധരിക്കണം.

നിയമസഭാ തെരഞ്ഞെടുപ്പിനു മുന്നോടിയായി ജില്ലാ കളക്ടര്‍ ഡോ. നവജ്യോത് ഖോസ, കന്യാകുമാരി കളക്ടര്‍ എം. അരവിന്ദുമായി കൂടിക്കാഴ്ച നടത്തി. തെരഞ്ഞെടുപ്പിന്റെ പശ്ചാത്തലത്തില്‍ അതിര്‍ത്തികള്‍, ചെക്ക്‌പോസ്റ്റുകള്‍, തീരദേശപ്രദേശങ്ങള്‍ എന്നിവിടങ്ങളില്‍ നിരീക്ഷണം ശക്തമാക്കുമെന്ന് കളക്ടര്‍മാര്‍ പറഞ്ഞു. വാഹനപരിശോധനയും ശക്തിപ്പെടുത്തും. വിഴിഞ്ഞം ഐ.ബിയില്‍ നടന്ന കൂടിക്കാഴ്ചയില്‍ സബ് കളക്ടര്‍ എം.എസ് മാധവിക്കുട്ടി, റൂറല്‍ എസ്.പി പി.കെ മധു, കന്യാകുമാരി എസ്.പി വി. ബദ്രിനാരായണ്‍, രണ്ടു ജില്ലകളിലെയും പോലീസ്, എക്‌സൈസ്, ഫയര്‍ഫോഴ്‌സ്, റവന്യു ഉദ്യോഗസ്ഥര്‍ എന്നിവരും പങ്കെടുത്തു

ആലപ്പുഴ : ആരോഗ്യപ്രവർത്തകർ, കോവിഡ മുന്നണിപ്പോരാളികൾ ,പോളിംഗ് ഉദ്യോഗസ്ഥർ തുടങ്ങിയവർക്കായി ഇന്ന് (മാർച്ച് 1) ജില്ലയിൽ വാക്സിനേഷൻ നടക്കുന്നതാണെന്ന് ജില്ലാ മെഡിക്കൽ ഓഫീസർ അറിയിച്ചു. സന്ദേശം ലഭിക്കുന്നവർ  അനുവദിച്ച കേന്ദ്രത്തിലെത്തി വാക്സിൻ എടുക്കേണ്ടതാണ്. 60 വയസ്സിന് മുകളിലുള്ളവർക്കും  45 നും 59 നും ഇടയിൽ പ്രായമുള്ള മറ്റ്  അസുഖമുള്ളവർക്കും തിങ്കളാഴ്ച മുതൽ കോവിൻ 2.0എന്ന പോർട്ടലിൽ ഓൺലൈൻ  രജിസ്ട്രേഷൻ ആരംഭിക്കുന്നതാണ് .രജിസ്ട്രേഷൻ സമയത്ത് വാക്‌സിനേഷൻ കേന്ദ്രങ്ങൾ തെരഞ്ഞെടുക്കാവുന്നതും തുടർന്ന്   അനുവദിക്കുന്നദിവസം കൃത്യ  സമയത്ത് കേന്ദ്രത്തിലെത്തി  വാക്സിൻ എടുക്കാവുന്നതാണ്. .

കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തില്‍ ആരംഭിച്ച ആര്‍മി റിക്രൂട്ട്‌മെന്റ് റാലി ജില്ലാ കളക്ടര്‍ ഡോ. നവജ്യോത് ഖോസ ഫ്‌ളാഗ് ഓഫ് ചെയ്തു. കര്‍ശന കോവിഡ് മാനദണ്ഡങ്ങളോടെയാണ് റാലി സംഘടിപ്പിച്ചിരിക്കുന്നത്. സംസ്ഥാനത്തെ 14 ജില്ലയിലുള്ളവര്‍ക്കുമായി മാര്‍ച്ച് 12 വരെയാകും റാലി നടക്കുക. റാലിക്കായി ഓരോ ജില്ലക്കാര്‍ക്കും പ്രത്യേകം തീയതികള്‍ നിശ്ചയിച്ചു നല്‍കിയിട്ടുണ്ട്. റാലിക്കായി ജില്ലാ ഭരണകൂടം നിയോഗിച്ചിട്ടുള്ള നോഡല്‍ ഓഫിസറും ജില്ലാ ഡെവലപ്‌മെന്റ് കമ്മിഷണറുമായ ഡോ. വിനയ് ഗോയലാണ് സ്റ്റേഡിയത്തിലെ ക്രമീകരണങ്ങളും ഉദ്യോഗാര്‍ത്ഥികളുടെ താമസ, യാത്രാ സൗകര്യങ്ങളും ഏകോപിപ്പിക്കുന്നത്.