ഈസ്റ്റ് എളേരി ഗ്രാമപഞ്ചായത്തില്‍ ഭിന്നശേഷിക്കാരുടെയും വയോജനങ്ങളുടെയും ഗ്രാമസഭ ഫെബ്രുവരി എട്ടിന് പഞ്ചായത്ത് ഹാളില്‍ നടക്കും. ഭിന്നശേഷിക്കാരുടെ ഗ്രാമസഭ രാവിലെ 11.30 നും വയോജനങ്ങളുടെ ഗ്രാമസഭ  ഉച്ചയ്ക്ക് 2.30 നും നടക്കും.

വനിതാ കമ്മീഷന്‍ മെഗാ അദാലത്ത് ഫെബ്രുവരി 11 ന് രാവിലെ 10.30 മുതല്‍  കാസര്‍കോട് കളക്ടറേറ്റ് കോണ്‍ഫറന്‍സ് ഹാളില്‍ നടക്കും.

കേരളാ നിയമസഭാ തിരഞ്ഞെടുപ്പുമായി ബന്ധപ്പെട്ട കാര്യങ്ങള്‍ ചര്‍ച്ച ചെയ്യുന്നതിന് ജില്ലയിലെ അംഗീകൃത രാഷ്ട്രീയ പാര്‍ട്ടി പ്രതിനിധികളുടെ യോഗം ഫെബ്രുവരി അഞ്ചിന് വൈകീട്ട് മൂന്നിന് കളക്ടറേറ്റ് കോണ്‍ഫറന്‍സ് ഹാളില്‍ നടക്കുമെന്ന് ജില്ലാ കളക്ടര്‍ ഡോ ഡി സജിത് ബാബു അറിയിച്ചു.

കാസര്‍കോട് വികസന പാക്കേജില്‍ ഉള്‍പ്പെടുത്തി ഗവ. ഹയര്‍ സെക്കെന്ററി  സ്‌കൂളില്‍ പുതിയ കെട്ടിട നിര്‍മ്മാണത്തിന് ഭരണാനുമതിയായി. ആറ് ക്ലാസ് മുറികളോട് കൂടി നിര്‍മ്മിക്കുന്ന ഇരുനില കെട്ടിടത്തിന് 1.60 കോടി രൂപയാണ് വകയിരുത്തിയത്.  പെണ്‍കുട്ടികള്‍ക്കും ആണ്‍കുട്ടികള്‍ക്കും പ്രത്യേകം ശുചിമുറി സൗകര്യങ്ങളും പുതിയ കെട്ടിടത്തിലുണ്ടാകും.  കെട്ടിട നിര്‍മ്മാണം ഒരു വര്‍ഷത്തിനുള്ളില്‍ പൂര്‍ത്തിയാകുമെന്ന് കാസര്‍കോട് വികസന പാക്കേജ് സ്‌പെഷ്യല്‍ ഓഫീസര്‍ ഇ.പി.രാജമോഹന്‍ പറഞ്ഞു.

ആരോഗ്യകുടുംബ ക്ഷേമ വകുപ്പിന്റെയും ജില്ലാ മെഡിക്കല്‍ ഓഫീസിന്റെയും ആഭിമുഖ്യത്തില്‍ സംഘടിപ്പിച്ച ലോക കാന്‍സര്‍ ദിനാചരണത്തിന്റെ  ജില്ലാതല ഉദ്ഘാടനവും ബോധവല്‍കരണ സെമിനാറും എം രാജഗോപാലന്‍ എം എല്‍ എ നിര്‍വ്വഹിച്ചു. കയ്യൂര്‍ കുടുംബാരോഗ്യ കേന്ദ്രത്തില്‍ നടന്ന ചടങ്ങില്‍ കയ്യൂര്‍ ചീമേനി ഗ്രാമ പഞ്ചായത്ത് പ്രസിഡന്റ് കെ പി വത്സലന്‍ അധ്യക്ഷനായി. ജൂനിയര്‍ അഡ്മിനിസ്ട്രേറ്റീവ് മെഡിക്കല്‍ ഓഫീസര്‍, ഡോ. നിര്‍മ്മല്‍ മുഖ്യ പ്രഭാഷണം നടത്തി.

കോവിഡ് 19 പശ്ചാത്തലത്തില്‍ ഫെബ്രുവരി 26 മുതല്‍ മാര്‍ച്ച് ഏഴ് വരെ കണ്ണൂരില്‍ നടത്താനിരുന്ന ആര്‍മി റിക്രൂട്ട്‌മെന്റ് റാലി മാറ്റി വെച്ചു.