അട്ടപ്പാടി ഐ. ടി. ഡി. പി ഓഫീസിന് കീഴിലെ വിവിധ ഊരുകളില്‍ എസ്.ടി പ്രമോട്ടര്‍മാരെ നിയമിക്കുന്നു. കൂടിക്കാഴ്ചയുടെ അടിസ്ഥാനത്തിലായിരിക്കും നിയമനം. അട്ടപ്പാടി മേഖലയിലെ പട്ടികവര്‍ഗ്ഗ ഉദ്യോഗാര്‍ഥികള്‍ക്ക് അപേക്ഷിക്കാം. അപേക്ഷകര്‍ എട്ടാം ക്ലാസ് പാസായവരാകണം. പ്രായപരിധി  25-50 വയസ്സ്. താത്പ്പര്യമുള്ളവര്‍ പേര്, വിലാസം, ജാതി,  വയസ്, വിദ്യാഭ്യാസ യോഗ്യത തെളിയിക്കുന്നതിന് ആവശ്യമായ സര്‍ട്ടിഫിക്കറ്റുകള്‍ സഹിതം ഫെബ്രുവരി എട്ടിനകം ഐ.ടി.ഡി.പി, അട്ടപ്പാടി, മിനി സിവില്‍ സ്റ്റേഷന്‍, അഗളി 678581 വിലാസത്തില്‍ അപേക്ഷ സമര്‍പ്പിക്കണം. അപേക്ഷയില്‍ ഫോണ്‍നമ്പര്‍ ഉള്‍പ്പെടുത്തണം.

എളമ്പുലാശ്ശേരി ലെഫ്.കേണല്‍ നിരഞ്ജന്‍ മെമ്മോറിയല്‍ ഗവ. ഐ.ടി.ഐയില്‍ എംപ്ലോയബിലിറ്റി സ്‌കില്‍സ് ഗസ്റ്റ് ഇന്‍സ്ട്രക്ടര്‍ നിയമനം നടത്തുന്നു. യോഗ്യത എം.ബി.എ അല്ലെങ്കില്‍ ബി.ബി.എ രണ്ട് വര്‍ഷത്തെ പ്രവൃത്തി പരിചയവും അല്ലെങ്കില്‍ സോഷ്യോളജി/സോഷ്യല്‍ വെല്‍ഫെയര്‍/  എക്കണോമിക്സ് ബിരുദവും രണ്ട് വര്‍ഷത്തെ പ്രവൃത്തി പരിചയവും. താത്പര്യമുള്ളവര്‍ ഫെബ്രുവരി അഞ്ചിന് രാവിലെ 10ന് അസ്സല്‍ സര്‍ട്ടിഫിക്കറ്റുമായി ഐ.ടി.ഐയില്‍ കൂടിക്കാഴ്ചയ്ക്ക് എത്തണമെന്ന് പ്രിന്‍സിപ്പാള്‍ അറിയിച്ചു. ഫോണ്‍-9447039401

ജനുവരിയിലെ റേഷന്‍ വിതരണം ഫെബ്രുവരി ആറ് വരെ ദീര്‍ഘിപ്പിച്ചതായി ജില്ലാ സപ്ലൈ ഓഫീസര്‍ അറിയിച്ചു. ജനുവരിയിലെ ഭക്ഷ്യകിറ്റ് വിതരണവും ഇതോടൊപ്പം തുടരും.

ജില്ലയില്‍ പ്രവാസികള്‍ക്കായി സ്പെഷ്യല്‍ അദാലത്ത് ഫെബ്രുവരി 16 ന് രാവിലെ 11 ന് കലക്ടറേറ്റ് കോണ്‍ഫറന്‍സ് ഹാളില്‍ നടത്തും. മുഖ്യമന്ത്രി പ്രഖ്യാപിച്ച പത്തിന പരിപാടികളുടെ ഭാഗമായി റവന്യൂ, തദ്ദേശസ്വയംഭരണം, നോര്‍ക്ക  വകുപ്പുകളുടെ സംയുക്താഭിമുഖ്യത്തിലാണ് സ്പെഷ്യല്‍ അദാലത്ത് നടത്തുന്നത്. പ്രവാസികള്‍ക്ക് പരാതികളും നിര്‍ദ്ദേശങ്ങളും പ്രവാസി പരാതി പരിഹാര കമ്മിറ്റി കണ്‍വീനറായ പഞ്ചായത്ത് ഡെപ്യൂട്ടി ഡയറക്ടര്‍ക്ക് മുന്‍കൂറായോ അദാലത്ത് ദിവസമോ സമര്‍പ്പിക്കാമെന്ന് അധികൃതര്‍ അറിയിച്ചു. ഫോണ്‍: 0491-2505155.

സംസ്ഥാന ഭക്ഷ്യകമ്മീഷന്‍ ചെയര്‍മാന്‍ കെ.വി. മോഹന്‍കുമാറും കമ്മീഷന്‍ അംഗങ്ങളും ഫെബ്രുവരി നാലിന് രാവിലെ 10 ന് മലമ്പുഴയിലെ ആദിവാസി ഊരുകള്‍ സന്ദര്‍ശിക്കും. ഭക്ഷ്യ വിതരണവുമായി ബന്ധപ്പട്ട പ്രശ്നങ്ങള്‍, പോഷകാഹാരക്കുറവ്, ആദിവാസി മേഖലയില്‍ നിലനില്‍ക്കുന്ന മറ്റു പ്രശ്നങ്ങള്‍ എന്നിവയുമായി ബന്ധപ്പെട്ട് ഊരുനിവാസികളുമായി ചര്‍ച്ച ചെയ്യും. സിവില്‍ സപ്ലൈസ്, ട്രൈബല്‍ ഡെവലപ്മെന്റ്, ഐ.സി.ഡി.എസ്, ഫോറസ്റ്റ്, തദ്ദേശസ്വയംഭരണം, പോലീസ് ഉദ്യോഗസ്ഥര്‍ ഒപ്പമുണ്ടാകും.

കഴിഞ്ഞ അഞ്ചു വര്‍ഷക്കാലയളവില്‍ ജില്ലയില്‍ സര്‍ക്കാര്‍ നടപ്പാക്കിയ വികസന നേട്ടങ്ങള്‍ സമന്വയിപ്പിച്ച് ജില്ലാ ഇന്‍ഫര്‍മേഷന്‍ ഓഫീസ് തയ്യാറാക്കിയ വീഡിയോ പ്രദര്‍ശനം 'അഞ്ചു  വര്‍ഷങ്ങള്‍ നെല്ലറയുടെ വികസനം' ഇന്ന് (ഫെബ്രുവരി മൂന്ന്) ആലത്തൂര്‍, കൊല്ലങ്കോട് ബ്ലോക്കുകളിലെ വിവിധ സ്ഥലങ്ങളില്‍ പര്യടനം നടത്തും. രാവിലെ 8.30 ന് ആലത്തൂരില്‍ നിന്നും ആരംഭിക്കുന്ന പര്യടനം എരുമയൂര്‍, കുനിശ്ശേരി, പുതുനഗരം, വടവന്നൂര്‍, കൊല്ലങ്കോട്, നന്തന്‍കിഴായ, കാമ്പ്രത്ത്ചള്ള, മുതലമട
എന്നിവിടങ്ങളില്‍ പ്രദര്‍ശനം നടത്തും.