ത്രിതല പഞ്ചായത്തുകള്‍ വഴി കഴിഞ്ഞ ഭരണസമിതിയുടെ നേതൃത്വത്തില്‍ നടപ്പിലാക്കിയ  വികസന പദ്ധതികള്‍ വിലയിരുത്തുന്ന വികേന്ദ്രീകൃത സമഗ്ര സര്‍വ്വെയുടെ (ഡിസെന്‍ട്രലൈസ്ഡ്  റൗണ്ട് സര്‍വ്വേ) നടപടിക്രമങ്ങള്‍ ജില്ലയില്‍ ആരംഭിച്ചു. ഇതുമായി ബന്ധപ്പെട്ട നിര്‍വഹണ ഉദ്യോഗസ്ഥര്‍ക്ക് നിര്‍ദേശം നല്‍കണമെന്ന് ജില്ലാ കലക്ടര്‍ ബി അബ്ദുല്‍ നാസര്‍ ഗൂഗിള്‍ മീറ്റ് വഴി ചേര്‍ന്ന ജില്ലാ അസൂത്രണ  സമിതി  യോഗത്തില്‍ അറിയിച്ചു. എക്കണോമിക്‌സ് ആന്റ് സ്റ്റാറ്റിസ്റ്റിക്‌സ്  വകുപ്പിന്റെ നേതൃത്വത്തില്‍ നടക്കുന്ന സര്‍വ്വേയുമായി  ബന്ധപ്പെട്ട് ഇന്നലെ (ഡിസംബര്‍ 23) മുതല്‍ കിലയുടെ നേതൃത്വത്തില്‍ പ്രത്യേക പരിശീലന പരിപാടി ആരംഭിച്ചു.

ദേശീയ യുവജനോത്സവത്തിന്റെ മുന്നോടിയായി കേന്ദ്ര യുവജന-കാര്യ കായിക മന്ത്രലയത്തിന്റെ നേതൃത്വത്തില്‍ നെഹ്റു യുവ കേന്ദ്ര, നാഷണല്‍ സര്‍വീസ് സ്‌കീം, യുണൈറ്റഡ് നേഷന്‍ ഡെവലപ്മെന്റ് പ്രോഗ്രാം എന്നിവയുടെ പങ്കാളിത്തത്തോടെ സംഘടിപ്പിക്കുന്ന  നാഷണല്‍ യൂത്ത് പാര്‍ലമെന്റില്‍ പങ്കെടുക്കാന്‍ യുവതീ-യുവാക്കള്‍ക്ക് അവസരം.   പ്രാഥമിക ഘട്ടത്തില്‍ ജില്ലാതലത്തില്‍  നടത്തുന്ന യൂത്ത് പാര്‍ലമെന്റില്‍ 18 നും 25 നും ഇടയില്‍ പ്രായമുള്ള യുവജനങ്ങള്‍ക്ക് പങ്കെടുക്കാം. പങ്കെടുക്കുന്നവര്‍  നാലു മിനുട്ടില്‍ കൂടാതെയുള്ള സമയം നിശ്ചിത വിഷയത്തില്‍ പ്രസംഗിക്കണം. കോവിഡിന്റെ  പശ്ചാത്തലത്തില്‍ ഓണ്‍ലൈന്‍ വഴിയായിരിക്കും മത്സരം.

എഴുകോണ്‍ ഗവണ്‍മെന്റ് പോളിടെക്‌നിക് കോളജില്‍ ഒഴിവുള്ള കെമിസ്ട്രി ലക്ചറര്‍ തസ്തികയില്‍ ദിവസവേതാനാടിസ്ഥാനത്തില്‍ താത്കാലിക നിയമനം നടത്തും. എം എസ് സി, നെറ്റ്/എം എസ് സി, പി എച്ച് ഡി യോഗ്യതയുള്ളവര്‍ ഡിസംബര്‍ 28 ന് രാവിലെ 10 ന് യോഗ്യതാ സര്‍ട്ടിഫിക്കറ്റുകളുമായി ഓഫീസില്‍ എത്തണം. വിശദ വിവരങ്ങള്‍ 0474-2484068 നമ്പരില്‍ ലഭിക്കും.
(പി.ആര്‍.കെ നമ്പര്‍ 3425/2020)

ഐ എച്ച് ആര്‍ ഡി യുടെ കോന്നി എലിമുള്ളുംപ്ലാക്കലിലെ കോളജ് ഓഫ് അപ്ലൈഡ് സയന്‍സില്‍ ആരംഭിക്കുന്ന ഡിജിറ്റല്‍ തെര്‍മോമീറ്റര്‍ നിര്‍മാണ സര്‍ട്ടിഫിക്കറ്റ് കോഴ്‌സിലേക്ക് അപേക്ഷിക്കാം. പ്ലസ് ടൂ സയന്‍സ്, ടി എച്ച് എസ് സി, വി എച്ച് എസ് സി,  ഐ ടി ഐ, ഡിപ്ലോമ, ബി എസ് സി പൂര്‍ത്തിയാക്കിയ പട്ടികജാതി വിഭാഗം വിദ്യാര്‍ഥികള്‍ക്ക് 15 ദിവസത്തെ സൗജന്യ പരിശീലനം നല്‍കും. വിശദ വിവരങ്ങള്‍ www.ihrd.ac.in, caskonni.ihrd.ac.in    എന്നീ വെബ്‌സൈറ്റുകളില്‍ ലഭിക്കും. അവസാന തീയതി ഡിസംബര്‍ 30. ഫോണ്‍: 0468-2382280, 8547005074, 9947193877.

നാവിക സേനയുടെ യുദ്ധകപ്പലായ ഐ എന്‍ എസ് ദ്രോണാചാര്യയില്‍ നിന്നും 2021 ജനുവരി ഒന്ന്, അഞ്ച്, എട്ട്, 12, 15, 19, 22, 26, 29, ഫെബ്രുവരി രണ്ട്, അഞ്ച്, ഒന്‍പത്, 12, 16, 19, 23, 26, മാര്‍ച്ച് രണ്ട്, അഞ്ച്, ഒന്‍പത്, 12, 16, 19, 23, 26 29 എന്നീ തീയതികളില്‍ വെടിവെപ്പ് പരിശീലനം നടത്തുമെന്ന് അറിയിച്ചിട്ടുണ്ട്. ഈ ദിവസങ്ങളില്‍ കടലില്‍ പോകുന്നവര്‍ ബന്ധപ്പെട്ട ഫിഷറീസ് സ്റ്റേഷനില്‍ പരിശീലനം നടക്കുന്ന പ്രദേശത്തെ സംബന്ധിച്ച വിവരം തേടിയതിന് ശേഷം മാത്രം കടലില്‍ പോകണമെന്ന് ജില്ലാ ദുരന്ത നിവാരണ അതോറിറ്റി ചെയര്‍മാന്‍ കൂടിയായ ജില്ലാ കലക്ടര്‍ അറിയിച്ചു.
(പി.ആര്‍.കെ നമ്പര്‍ 3423/2020)

ഐ എച്ച് ആര്‍ ഡി യുടെ കരുനാഗപ്പളളി മോഡല്‍ പോളിടെക്‌നിക്ക് കോളേജില്‍ 2020-2021 അക്കാഡമിക് വര്‍ഷത്തെ ത്രിവത്സര ഡിപ്ലോമ അഡ്മിഷന് ജനറല്‍ വിഭാഗത്തില്‍ സാമ്പത്തികമായി പിന്നാക്കം നില്‍ക്കുന്ന (ഇ ഡബ്ല്യൂ എസിന് അര്‍ഹരായ) വിദ്യാര്‍ഥികള്‍ക്കായി സീറ്റൊഴിവുണ്ട്. ഈ വിഭാഗത്തില്‍പ്പെട്ടവര്‍ ഡിസംബര്‍ 28 ന് രാവിലെ 10 ന് കോളേജില്‍ സര്‍ട്ടിഫിക്കറ്റുമായി നേരിട്ടെത്തുകയോ 9447488348 നമ്പരിലോ ബന്ധപ്പെടണം.
(പി.ആര്‍.കെ നമ്പര്‍ 3422/2020)

ശിശുദിനഘോഷം 2020 ന്റെ ഭാഗമായി ജില്ലയിലെ വിവിധ ചില്‍ഡ്രന്‍സ് ഹോമിലെ കുട്ടികള്‍ കോവിഡ് കാലത്ത് നിര്‍മിച്ച വിവിധ വസ്തുക്കളുടെ പ്രദര്‍ശനം ജില്ലാ ശിശുസംരക്ഷണ ഓഫീസിന്റെ നേതൃത്വത്തില്‍ കലക്‌ട്രേറ്റില്‍ സംഘടിപ്പിച്ചു. ഉദ്യോഗസ്ഥരും പൊതുജനങ്ങളും കുട്ടികളുടെ കലാസൃഷ്ടികള്‍ കാണുകയും വാങ്ങുകയും ചെയ്തത് കുട്ടികള്‍ക്ക് പ്രോത്സാഹനമായി.  കൊല്ലം ഗവണ്‍മെന്റ് ചില്‍ഡ്രന്‍സ് ഹോം, ഒബ്‌സര്‍വേഷന്‍ ഹോം, ഗാന്ധിഭവന്‍, നവജ്യോതി, ആശ്രയ എന്നീ ചില്‍ഡ്രന്‍സ് ഹോമുകളിലെ കുട്ടികളാണ് പങ്കെടുത്തത്. ഏറ്റവും കൂടുതല്‍ പ്രവര്‍ത്തനങ്ങള്‍ കാഴ്ച്ചവെച്ച കുട്ടികള്‍ക്ക് സമ്മാനങ്ങളും പ്രഖ്യാപിച്ചു.

ജില്ലയിലെ ആദിവാസി മേഖല ഉള്‍പ്പെടെയുള്ള പിന്നാക്ക മേഖലകളില്‍ സുഭിക്ഷ കേരളം പദ്ധതിയുടെ കൂടുതല്‍ ഇടപെടല്‍ ആവശ്യമാണെന്ന് ജില്ലാ കലക്ടര്‍ ബി അബ്ദുല്‍ നാസര്‍. ഗൂഗിള്‍ മീറ്റ്  വഴി ചേര്‍ന്ന സുഭിക്ഷ കേരളം ജില്ലാതല അവലോകന യോഗത്തില്‍ സംസാരിക്കുകയായിരുന്നു കലക്ടര്‍. സന്തുലിതവും കുറ്റമറ്റതുമായ സംവിധാനം പദ്ധതി നടത്തിപ്പില്‍ ഉണ്ടാകണമെന്നും കലക്ടര്‍ ബന്ധപ്പെട്ട ഉദ്യോഗസ്ഥര്‍ക്ക് നിര്‍ദേശം നല്‍കി.

ജില്ലാ കലക്ടറുടെ കൊട്ടാരക്കര താലൂക്കിലെ ഓണ്‍ലൈന്‍ പരാതി പരിഹാര അദാലത്ത് ജനുവരി നാലിന് രാവിലെ 11 ന് നടക്കും. കൊട്ടാരക്കര താലൂക്ക് പരിധിയിലെ മിനര്‍വ ജംഗ്ഷന്‍, ഓടനാവട്ടം, ചിതറ ജംഗ്ഷന്‍, നിലമേല്‍ ജംഗ്ഷന്‍, ചടയമംഗലം, ഉമ്മന്നൂര്‍, മൈലം ജംഗ്ഷന്‍ എന്നിവിടങ്ങളിലെ അക്ഷയ കേന്ദ്രങ്ങളിലൂടെ പരാതികള്‍ ഡിസംബര്‍ 30 ന് വൈകിട്ട് അഞ്ചുവരെ രജിസ്റ്റര്‍ ചെയ്യാം. പരാതി കക്ഷികളെ അക്ഷയകേന്ദ്രങ്ങളിലൂടെ ഓണ്‍ലൈനായി കേട്ട് തീര്‍പ്പാക്കാന്‍ കഴിയുന്നവ അദാലത്തില്‍ തീര്‍പ്പാക്കും.
(പി.ആര്‍.കെ നമ്പര്‍ 3419/2020)