തിരുവനന്തപുരത്ത് ഇന്ന് (08 ഡിസംബര്‍ 2020) 272 പേര്‍ക്കു കൂടി കോവിഡ് 19 സ്ഥിരീകരിച്ചു. 350 പേര്‍ രോഗമുക്തരായി. നിലവില്‍ 3,819 പേരാണു രോഗം സ്ഥിരീകരിച്ചു ചികിത്സയില്‍ കഴിയുന്നത്. ജില്ലയില്‍ നാലുപേരുടെ മരണം കോവിഡ് മൂലമാണെന്ന് സ്ഥിരീകരിച്ചു. പാങ്ങോട് സ്വദേശി ഹാഷിം (51), കാരക്കോണം സ്വദേശി ഹനില്‍ സിങ് (53), മാരായമുട്ടം സ്വദേശി ഗോപിനാഥന്‍ നായര്‍ (70), വെഞ്ഞാറമൂട് സ്വദേശിനി നസീമ ബീവി (47) എന്നിവരുടെ മരണമാണു കോവിഡ് മൂലമാണെന്നു സ്ഥിരീകരിച്ചത്.

പോളിംഗ് ബൂത്തുകളിൽ റിസർവായി വെച്ചിട്ടുള്ള ഉദ്യോഗസ്ഥരെ യാതൊരു കാരണവശാലും മുൻകൂട്ടി പിരിച്ചുവിടാൻ പാടില്ലെന്ന് ജില്ലാ കലക്ടർ എസ് ഷാനവാസ്. തിരഞ്ഞെടുപ്പിൽ അത്യാവശ്യഘട്ടങ്ങളിൽ ചുമതലയേൽപ്പിക്കുന്നതിനായാണ് റിസർവ് ഉദ്യോഗസ്ഥരെ നിയമിക്കുന്നത്. ജില്ലയിലെ വിവിധ ബ്ലോക്ക്, മുനിസിപ്പാലിറ്റി, കോർപ്പറേഷൻ റിട്ടേണിംഗ് ഓഫീസർമാർ, അസിസ്റ്റന്റ് റിട്ടേണിങ് ഓഫീസർമാർ, ഇലക്ടറൽ രജിസ്ട്രേഷൻ ഓഫീസർ എന്നിവരുടെ യോഗത്തിലാണ് തീരുമാനം. 

ചിമ്മിനി ഡാമിൻ്റെ 4 സ്പിൽവേ ഷട്ടറുകളും 7.5 സെൻറീമീറ്റർ വീതം തുറന്ന് കുറുമാലി പുഴയിലേക്ക് നിയന്ത്രിത അളവിൽ വെള്ളം ഒഴുക്കുന്നതിന് ജില്ലാ കലക്ടർ എസ് ഷാനവാസ് ഉത്തരവിട്ടു. 

കാർഷിക ആവശ്യങ്ങൾക്ക് ചിമ്മിനി ഡാമിൽ നിന്നും വെള്ളം തുറന്നു വിടുന്ന സ്ളൂയിസ് വാൽവ് തുറക്കുവാൻ സാധിക്കുന്നില്ലെന്നും കോൾ നിലങ്ങളിലേക്ക് ഉപ്പുവെള്ളം കയറുന്നത് തടയാൻ അടിയന്തരമായി ഡാമിൽ നിന്ന് കുറുമാലി പുഴയിലേക്ക് വെള്ളം തുറന്നു വിടണമെന്നുമുള്ള ഡാം അധികൃതരുടെ അപേക്ഷയുടെ അടിസ്ഥാനത്തിലാണ് കലക്ടർ ഉത്തരവിട്ടത്.

തിരഞ്ഞെടുപ്പ് ഡ്യൂട്ടിയ്ക്ക് ശേഷം  പോളിങ് ഉദ്യോഗസ്ഥർ ഉപയോഗിച്ച പി പി ഇ കിറ്റ് അടക്കമുള്ള സുരക്ഷാ ഉപാധികൾ ശരിയായ രീതിയിൽ സംസ്കരിക്കണമെന്ന് ഡി എം ഒ അറിയിച്ചു. പോളിങ് ബൂത്തുകളിൽ വച്ചിട്ടുള്ള മഞ്ഞ, ചുവപ്പ് കവറുകളിലാണ് ഇവ ഇടേണ്ടത്. 

മഞ്ഞ കവറിൽ മാസ്ക്, ഗൗൺ, പഞ്ഞി എന്നിവ മാത്രമേ നിക്ഷേപിക്കാൻ പാടുള്ളൂ. ചുവപ്പുകവറിൽ ഫെയ്സ് ഷീൽഡ്, കയ്യുറ, മറ്റ് പ്ലാസ്റ്റിക് വസ്തുക്കൾ എന്നിവ നിക്ഷേപിക്കാം. എല്ലാ പോളിങ് ഉദ്യോഗസ്ഥരും ഏറെ കരുതലോടെ ഈ മാലിന്യ നിക്ഷേപം നിർവഹിക്കണമെന്നും ഡി എം ഒ കൂട്ടിച്ചേർത്തു.

തദ്ദേശ സ്വയംഭരണ തിരഞ്ഞെടുപ്പ് പ്രചാരണത്തിലെ അവസാന ഘട്ടം ആവേശ തിരയിളക്കമില്ലാതെ ജില്ലയിൽ അവസാനിച്ചു.

തദ്ദേശ സ്വയംഭരണ സ്ഥാപങ്ങളിലേക്കുള്ള

തിരഞ്ഞെടുപ്പ് ജോലികൾക്ക് നിയോഗിച്ചിട്ടില്ലാത്ത റെവന്യൂ ജീവനക്കാരും അവരവരുടെ ഹെഡ് ക്വാർട്ടേഴ്സ് വിട്ടുപോകരുതെന്ന് ഡെപ്യൂട്ടി കലക്ടർ അറിയിച്ചു.

തിരഞ്ഞെടുപ്പുമായി ബന്ധപ്പെട്ട ജോലികൾക്ക് ഉദ്യോഗസ്ഥരുടെ കുറവ് വരാനുള്ള സാധ്യത മുൻകൂട്ടി കണ്ടുകൊണ്ടാണ് തീരുമാനം.

സംസ്ഥാന ന്യൂനപക്ഷ ക്ഷേമ വകുപ്പിൻ്റെ കീഴിൽ ജില്ലയിലെ

ന്യൂനപക്ഷ ഉദ്യോഗാർത്ഥികൾക്ക് സൗജന്യ പി.എസ്.സി പരിശീലനം നൽകുന്നു.

ജില്ലയിലെ കോച്ചിംങ് സെൻ്റർ ഫോർ മൈനോരിറ്റി യൂത്ത്സിൻ്റെ സബ്ബ് സെൻ്ററുകളായ കേച്ചേരി തണൽ ചാരിറ്റബിൾ സൊസൈറ്റി, കിഴക്കേകോട്ട എക്സൽ അക്കാഡമി എന്നീ സെൻ്ററുകളുടെ സഹകരണത്തോടെയാണ് സൗജന്യ പി.എസ്.സി പരിശീലനം നൽകുന്നത്.

2021 ജനവരി 1 മുതൽ എല്ലാ ഞായറാഴ്ച്ചകളിലും രണ്ടാം ശനിയാഴ്ച്ചകളിലുമാണ് ക്ലാസ്.

തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിനോടനുബന്ധിച്ച് താലൂക്ക് അടിസ്ഥാനത്തിൽ സെക്ടറൽ ഓഫീസർമാർക്ക് പരിശീലനം നൽകി. പോളിംഗ് പ്രവർത്തനങ്ങൾ ഏകോപിപ്പിക്കുന്നതിന് തദ്ദേശ സ്വയംഭരണ സ്ഥാപനങ്ങളിൽ വില്ലേജ് ഓഫീസർമാരെയാണ് സെക്ടർ ഓഫീസർമാരായി ചുമതലപ്പെടുത്തിയിരിക്കുന്നത്. അപ്രതീക്ഷിതമായി ഇലക്ട്രോണിക് വോട്ടിംഗ് മെഷീനുകൾക്ക്‌ സംഭവിക്കാവുന്ന തകരാറുകൾ, വോട്ടിംഗ് കണക്കുകൾ കൃത്യമായി രേഖപ്പെടുത്തുന്ന പോൾ മാനേജർ ആപ്പ് എന്നിവയെ കുറിച്ചുള്ള ക്ലാസുകളാണ് നൽകിയത്. 

തിരഞ്ഞെടുപ്പ് പോളിങിന്റെ പുതുക്കിയ വിവരങ്ങൾ നൽകുന്നതിനായി തിരഞ്ഞെടുപ്പ് ഉദ്യോഗസ്ഥർക്കായുള്ള പോളിംഗ് മാനേജർ പോർട്ടലിന്റെയും ആപ്പിന്റെയും പരിശീലനം നടന്നു. അഡീഷണൽ ഡിസ്ട്രിക്ട് ഇൻഫർമാറ്റിക്ക് ഓഫീസർ സി ഡബ്ല്യൂ ബർക്കിങ്സ്, ജൂനിയർ സൂപ്രണ്ട് സബിത വാര്യർ തുടങ്ങിയവർ ക്ലാസെടുത്തു.