തദ്ദേശ സ്വയംഭരണ സ്ഥാപനങ്ങളിലേക്കുള്ള പൊതു തെരഞ്ഞെടുപ്പില്‍ തവിഞ്ഞാല്‍ ഗ്രാമ പഞ്ചായത്തിലാണ് ജില്ലയിലെ ഏക ഭാഷാ ന്യൂനപക്ഷ വാര്‍ഡുള്ളത്. ഗ്രാമപഞ്ചായത്തിലെ ആറാം വാര്‍ഡായ കൈതക്കൊല്ലിയില്‍ പ്രത്യേക സജ്ജീകരണങ്ങളാണ് ഇതിന്റെ ഭാഗമായി ഒരുക്കുന്നത്. ഇവിടെ 22 ശതമാനം പേര്‍ തമിഴ് ഭാഷയാണ് ഉപയോഗിക്കുന്നത്. അതിനാല്‍ വാര്‍ഡിലെ ബാലറ്റ് പേപ്പറിലും, ബാലറ്റ് ലേബലിലും മലയാളത്തിന് പുറമേ തമിഴിലും വിവരങ്ങള്‍ രേഖപ്പെടുത്തും.

തദ്ദേശ തെരഞ്ഞെടുപ്പുമായി ബന്ധപ്പെട്ട് സംസ്ഥാന തെരഞ്ഞെടുപ്പ് കമ്മീഷന്റെ നിര്‍ദ്ദേശ പ്രകാരം ജില്ലാതലത്തില്‍ മീഡിയാ റിലേഷന്‍സ് സമിതി രൂപീകരിച്ചു. ജില്ലാ തെരഞ്ഞെടുപ്പ് ഓഫീസറായ ജില്ലാ കലക്ടര്‍ ഡോ. അദീല അബ്ദുള്ള ചെയര്‍മാനും ജില്ലാ ഇന്‍ഫര്‍മേഷന്‍ ഓഫീസര്‍ കെ. മുഹമ്മദ് കണ്‍വീനറുമായാണ് മീഡിയാ റിലേഷന്‍സ് സമിതി രൂപീകരിച്ചത്. പബ്ലിക് റിലേഷന്‍സ് വകുപ്പ് മേഖലാ ഡെപ്യൂട്ടി ഡയറക്ടര്‍ ഇ.വി. സുഗതന്‍, കലക്ടറേറ്റിലെ ലോ ഓഫീസര്‍ ഉണ്ണികൃഷ്ണന്‍ കെ.പി, വയനാട് പ്രസ് ക്ലബ്ബ് സെക്രട്ടറി നിസാം കെ. അബ്ദുള്ള എന്നിവര്‍ സമിതിയില്‍ അംഗങ്ങളാണ്.

· 111 പേര്‍ക്ക് രോഗമുക്തി

വയനാട് ജില്ലയില്‍ ഇന്ന് (24.11.20) 103 പേര്‍ക്ക് കോവിഡ് സ്ഥിരീകരിച്ചതായി ജില്ലാ മെഡിക്കല്‍ ഓഫീസര്‍ ഡോ. ആര്‍. രേണുക അറിയിച്ചു. 111 പേര്‍ രോഗമുക്തി നേടി. ഒരു ആരോഗ്യ പ്രവര്‍ത്തകന്‍ ഉള്‍പ്പെടെ 100 പേര്‍ക്ക് സമ്പര്‍ക്കത്തിലൂടെയാണ് രോഗബാധ. 7 പേരുടെ സമ്പര്‍ക്ക ഉറവിടം ലഭ്യമല്ല. മൂന്ന് പേര്‍ ഇതര സംസ്ഥാനത്ത് നിന്നും വിദേശത്ത് നിന്നുമായി എത്തിയതാണ്.

തദ്ദേശ സ്വയംഭരണ സ്ഥാപനങ്ങളിലേക്കുള്ള പൊതുതെരഞ്ഞെടുപ്പിനായി ജില്ലയിലെ വിവിധ തെരഞ്ഞെടുപ്പ് ഉദ്യോഗസ്ഥര്‍ക്കുള്ള പരിശീലനം നവംബര്‍ 30, ഡിസംബര്‍ 1, 2, 3 തീയതികളിലും ഈ ദിവസങ്ങളില്‍ അനിവാര്യ കാരണങ്ങളാല്‍ പങ്കെടുക്കാനാകാത്തവര്‍ക്ക് ഡിസംബര്‍ 4 നും നടക്കും. നവംബര്‍ 30 ന് സെന്റ് പാട്രിക് സ്‌കൂള്‍ മാനന്തവാടി, ഡിസംബര്‍ 1 ന് പനമരം ഗവ. എച്ച്.എസ്.എസ്., 2 ന് സുല്‍ത്താന്‍ ബത്തേരി സര്‍വ്വജന എച്ച്.എസ്.എസ്., 3 നും 4 നും കല്‍പ്പറ്റ സെന്റ് ജോസഫ് സ്‌കൂള്‍ എന്നിവിടങ്ങളിലാണ് പരിശീലനം. രാവിലെ 9.30 മുതല്‍ ഒരു മണി വരെയും ഉച്ചയ്ക്ക് 1.30 മുതല്‍ വൈകീട്ട് 5 വരെയുമുള്ള രണ്ട് ഷെഡ്യൂളുകളിലായാണ് പരിശീലനം.

പോലീസ് ഉദ്യോഗസ്ഥരുടെ പരാതികള്‍ സംസ്ഥാന പോലീസ് മേധാവി നേരിട്ടു കേള്‍ക്കാന്‍ സംവിധാനം. എസ് പി സി ടോക്ക്‌സ് വിത്ത് കോപ്‌സ്  എന്ന സംവിധാനം ഈ മാസം 26 ന് ഉദ്ഘാടനം ചെയ്യും. ഓണ്‍ലൈനായി നടത്തുന്ന ഈ പരാതിപരിഹാര പരിപാടിയുടെ ആദ്യഘട്ടം രാവിലെ 10.30 ന് ഇടുക്കി, കണ്ണൂര്‍ ജില്ലകളിലെ പോലീസുദ്യോഗസ്ഥരുടെ പരാതികള്‍ കേട്ടു സംസ്ഥാന പോലീസ് മേധാവി തുടക്കമിടും. spctalks.pol@kerala.gov.in എന്ന ഇ  മെയില്‍ വിലാസത്തിലോ, എസ്പിസി ടോക്ക്‌സ് ടു കോപ്‌സ്, പോലീസ് ആസ്ഥാനം, തിരുവനന്തപുരം എന്ന വിലാസത്തിലോ പോലീസുദ്യോഗസ്ഥര്‍ക്ക് പരാതികള്‍ അയക്കാം.

ജില്ലയില്‍ നാഷണല്‍ വൈറല്‍ ഹെപ്പറ്റൈറ്റിസ് കണ്‍ട്രോള്‍ പ്രോഗ്രാം (എന്‍.വി.എച്ച്.സി.പി) ആരംഭിച്ചതായി ഡി.എം.ഒ: ഡോ. എ.എല്‍ ഷീജ അറിയിച്ചു. 2030 ഓടുകൂടി ഹെപ്പറ്റൈറ്റിസ് ബി, സി എന്നിവ നിര്‍മാര്‍ജനം  ചെയ്യുക, ഹെപ്പറ്റൈറ്റിസ്  ബി യും സി യും ബാധിച്ചവരില്‍ ലിവര്‍ സിറോസിസ്, ലിവര്‍ ക്യാന്‍സര്‍  തുടങ്ങിയവ മൂലമുളള മരണനിരക്ക് കുറയ്ക്കുക, രോഗബാധിതരുടെ എണ്ണം കുറയ്ക്കുക, ഹെപ്പറ്റൈറ്റിസ് എ, ഇ എന്നിവ മൂലമുളള രോഗാതുരതയും മരണ നിരക്കും കുറയ്ക്കുക എന്നീ  ലക്ഷ്യങ്ങളോടെയാണ്  ഈ പ്രോഗ്രാം ആരംഭിച്ചിട്ടുളളത്.

തദ്ദേശ പൊതുതെരഞ്ഞെടുപ്പ് സംബന്ധിച്ച് സംസ്ഥാന തെരഞ്ഞെടുപ്പ് കമ്മീഷന്‍ പുറപ്പെടുവിച്ച നിര്‍ദേശങ്ങള്‍ ബന്ധപ്പെട്ടവര്‍ പാലിക്കണമെന്നും കുറ്റകൃത്യങ്ങളും ലംഘനങ്ങളും ഉണ്ടായാല്‍ കര്‍ശനമായി തടയുമെന്നും ജില്ലാപോലീസ് മേധാവി അറിയിച്ചു. കൂടാതെ, കോവിഡ്  പശ്ചാത്തലത്തില്‍ കമ്മിഷന്റെ പ്രത്യേകനിര്‍ദേശങ്ങള്‍ എല്ലാ രാഷ്ട്രീയകക്ഷികളും സ്ഥാനാര്‍ഥികളും അനുസരിക്കേണ്ടതുമാണ്. ഭവനസന്ദര്‍ശനത്തിന് ഒരേസമയം സ്ഥാനാര്‍ഥി ഉള്‍പ്പെടെ പരമാവധി അഞ്ചുപേര്‍ മാത്രമേ ഉണ്ടാകാവൂ. കോവിഡ് പ്രോട്ടോകോള്‍ പാലിച്ചുവേണം ആളുകളെ സമീപിക്കേണ്ടതും  വീടുകളിലും മറ്റും സന്ദര്‍ശനം നടത്തേണ്ടതും.

തദ്ദേശ പൊതുതെരഞ്ഞെടുപ്പുമായി ബന്ധപ്പെട്ട് ജില്ലാതലത്തില്‍ പ്രത്യേക പോലീസ് സംഘത്തെ നിയോഗിച്ചതായി ജില്ലാപോലീസ് മേധാവി അറിയിച്ചു. ജില്ലാ അഡിഷണല്‍ പോലീസ് സൂപ്രണ്ട് എ.യു സുനില്‍കുമാറിന്റെ മേല്‍നോട്ടത്തിലാണ് പ്രത്യേക ടീം പ്രവര്‍ത്തിക്കുക. ജില്ലാ ക്രൈം റെക്കോര്‍ഡ്സ് ബ്യൂറോ ഡിവൈഎസ്പി എ.സന്തോഷ്‌കുമാര്‍ ജില്ലാ നോഡല്‍ ഓഫീസറാണ്. തെരഞ്ഞെടുപ്പുമായി ബന്ധപ്പെട്ട ജോലികള്‍ക്ക് പോലീസ് ഇലക്ഷന്‍ സെല്‍ രൂപവത്കരിച്ചതായും ജില്ലാപോലീസ് മേധാവി പറഞ്ഞു.

തദ്ദേശ പൊതുതെരഞ്ഞെടുപ്പ് പ്രചാരണവുമായി ബന്ധപ്പെട്ട്  സ്ഥാനാര്‍ഥികളുടെ ചിത്രങ്ങളും സ്വകാര്യ ചിത്രങ്ങളും  മറ്റും എഡിറ്റ് ചെയ്തും അശ്ലീലപദങ്ങള്‍ ഉപയോഗിച്ചുമുള്ള പരാമര്‍ശത്തോടെയും സാമൂഹിക മാധ്യമങ്ങള്‍ വഴി പ്രചരിപ്പിക്കുന്നതു ശ്രദ്ധയില്‍പ്പെട്ടാല്‍ കര്‍ശന നിയമനടപടികള്‍ സ്വീകരിക്കുമെന്ന് ജില്ലാപോലീസ് മേധാവി കെ.ജി സൈമണ്‍ അറിയിച്ചു. ഇതുസംബന്ധിച്ച് എല്ലാ സബ് ഡിവിഷണല്‍ പോലീസ് ഓഫീസര്‍മാര്‍ക്കും എസ് എച്ച് ഒ മാര്‍ക്കും നിര്‍ദേശങ്ങള്‍ നല്‍കിയിട്ടുണ്ട്. ഇക്കാര്യം വിശദമാക്കി സാമൂഹിക മാധ്യമങ്ങളില്‍ വ്യാപകപ്രചാരണത്തിന് ജില്ലാ സൈബര്‍ പോലീസ് സ്റ്റേഷനെ  ചുമതലപ്പെടുത്തി.

  തദ്ദേശസ്വയംഭരണ സ്ഥാപനങ്ങളിലേക്കുള്ള പൊതുതെരഞ്ഞെടുപ്പുമായി ബന്ധപ്പെട്ട് ജില്ലയില്‍ ഇലക്ഷന്‍ ഒബ്‌സര്‍വര്‍മാര്‍ ചുമതലയേറ്റു. ജില്ലാ വരണാധികാരിയും ജില്ലാ കളക്ടറുമായ പി.ബി. നൂഹിന്റെ സാന്നിധ്യത്തിലാണ് ഒബ്‌സര്‍വര്‍മാര്‍ ചുമതലയേറ്റത്. ഐഎഫ്എസ് ഉദ്യോഗസ്ഥനും പെരിയാര്‍ ടൈഗര്‍ റിസര്‍വ് ഫീല്‍ഡ് ഓഫീസറുമായ കെ.ആര്‍. അനൂപാണ് ജില്ലയില്‍ ഇലക്ഷന്‍ ജനറല്‍ ഒബ്‌സര്‍വറായി(പൊതുനിരീക്ഷകന്‍) ചുമതലയേറ്റത്. തെരഞ്ഞെടുപ്പുമായി ബന്ധപ്പെട്ട ജില്ലയിലെ പരാതികള്‍ observerd03@gmail.com എന്ന മെയില്‍ ഐഡിയില്‍ ഒബ്‌സര്‍വറെ അറിയിക്കാം.