രാജ്യത്ത് ആദ്യമായി വയലുടമകള്‍ക്ക് റോയല്‍റ്റി നല്കുന്ന പദ്ധതിപ്രകാരമുള്ള തുകയുടെ സംസ്ഥാനതല വിതരണോദ്ഘാടനം ഇന്ന് (05) രാവിലെ 10 മണിക്ക് തൃശൂര്‍ ജില്ലാ പ്ലാനിംഗ് ഹാളില്‍ വച്ച് കൃഷിവകുപ്പ് മന്ത്രി വി.എസ്.സുനില്‍കുമാറിന്റെ അദ്ധ്യക്ഷതയില്‍ കേരള മുഖ്യമന്ത്രി പിണറായി വിജയന്‍ ഓണ്‍ലൈന്‍ മുഖേന നിര്‍വ്വഹിക്കും. ചടങ്ങില്‍ മന്ത്രിമാര്‍, എം.പി മാര്‍, എം.എല്‍.എ മാര്‍, കര്‍ഷക സംഘടനാ പ്രതിനിധികള്‍, കൃഷിവകുപ്പ് ഉദ്യോഗസ്ഥര്‍ എന്നിവര്‍ പങ്കെടുക്കുന്നു. കൃഷിവകുപ്പ് മന്ത്രിയുടെ ഫേസ്ബുക്ക് പേജിലൂടെ തല്‍സമയം വീക്ഷിക്കാം. 

സംസ്ഥാനത്തെ തദ്ദേശ സ്വയംഭരണ സ്ഥാപന തെരഞ്ഞെടുപ്പ് പ്രസിഡന്റ്മാരുടെ സംവരണ സ്ഥാനങ്ങള്‍ നിശ്ചയിച്ച് സര്‍ക്കാര്‍ ഉത്തരവാ.യി.  ഇടുക്കി ജില്ലാ പഞ്ചായത്ത് പ്രസിഡന്റ് സ്ഥാനം ഈ പ്രാവശ്യം ജനറല്‍ വിഭാഗത്തിനാണ്.  കട്ടപ്പന മുനിസിപ്പല്‍ അധ്യക്ഷ സ്ഥാനം സ്ത്രീ സംവരണമാണ്.

 ഇടുക്കി നിയോജക മണ്ഡലത്തില്‍  പണിപൂര്‍ത്തിയാക്കിയ  8 റോഡുകളുടെ ഉദ്ഘാടനവും  3 റോഡുകളുടെ നിര്‍മ്മാണ  ഉദ്ഘാടനവും നവംബര്‍ 7 ന് നാലു മണിക്ക് മുരിക്കാശ്ശേരിയില്‍ ചേരുന്ന യോഗത്തില്‍ പൊതുമരാമത്ത് വകുപ്പ് മന്ത്രി. ജി. സുധാകരന്‍ നിര്‍വഹിക്കും.  വൈദ്യുതി വകുപ്പ് മന്ത്രി എം.എം. മണി അധ്യക്ഷത വഹിക്കും. ഡീന്‍ കുര്യാക്കോസ് എം.പി മുഖ്യപ്രഭാഷണം നടത്തും. റോഷി അഗസ്റ്റിന്‍ എം.എല്‍.എ സ്വാഗതം പറയും.  

വിദ്യാഭ്യാസ രംഗത്ത് നടപ്പിലാക്കുന്നത് സമാനതകളില്ലാത്ത മാറ്റങ്ങളെന്ന് മുഖ്യമന്ത്രി പിണറായി വിജയന്‍ പറഞ്ഞു. വിവിധ സ്‌കൂളുകളുടെ നിര്‍മ്മാണം പൂര്‍ത്തിയാക്കിയ കെട്ടിടങ്ങളുടെ ഉദ്ഘാടനവും നിര്‍മ്മിക്കാനുള്ള സ്‌കൂള്‍ കെട്ടിടങ്ങളുടെ ശിലാസ്ഥാപനവും നിര്‍വഹിച്ച് സംസാരിക്കുകയായിരുന്നു അദ്ദേഹം. ഒരു കോടി രൂപാ മുടക്കി നിര്‍മ്മിക്കുന്ന പൈനാവ് ഗവ. യു.പി. സ്‌കൂള്‍ കെട്ടിടത്തിന്റെ ശിലാസ്ഥാപനവും ഇതോടൊപ്പം വീഡിയോ കോണ്‍ഫ്രന്‍സിലൂടെ മുഖ്യമന്ത്രി നിര്‍വഹിച്ചു. 46 സ്‌കൂള്‍ കെട്ടിടങ്ങളുടെ ഉദ്ഘാടനവും 79 സ്‌കൂള്‍ കെട്ടിടങ്ങളുടെ ശിലാസ്ഥാപനവുമാണ് നടന്നത്.

ഇടുക്കി ജില്ലയിലെ കുടിയേറ്റ കര്‍ഷകരുടെ ചിരകാല സ്വപ്നമായ കൈവശഭൂമിക്ക് പട്ടയം എന്ന ആവശ്യം സാക്ഷാത്കരിച്ച് കഞ്ഞിക്കുഴിയില്‍ സംഘടിപ്പിച്ച ആറാമത് ജില്ലാതല പട്ടയമേളയും സ്മാര്‍ട്ട് വില്ലേജ് ഓഫീസുകളുടെ ഉദ്ഘാടനവും   മുഖ്യമന്ത്രി പിണറായി  വിജയന്‍ കോണ്‍ഫറന്‍സിലൂടെ നിര്‍വഹിച്ചു.  സംസ്ഥാനത്ത് പൂര്‍ത്തീകരിച്ച 5  സ്മാര്‍ട്ട് വില്ലേജ് ഓഫീസുകളുടെ ഉദ്ഘാടനം,  159 വില്ലേജ് ഓഫീസ് കെട്ടിടങ്ങളുടെ നിര്‍മ്മാണോദ്ഘാടനം, 6,524 കുടുംബങ്ങള്‍ക്കുള്ള പട്ടയ വിതരണം എന്നിവയാണ് മുഖ്യമന്ത്രി ഉദ്ഘാടനം ചെയ്തത്.

നഗരത്തിൽ വിവിധ ആവശ്യങ്ങൾക്ക് എത്തുന്ന സ്ത്രീകൾക്ക് സുരക്ഷിതമായ താമസ സൗകര്യമൊരുക്കി നിർമിച്ച ഷീ ലോഡ്ജ് തൊഴിൽ വകുപ്പു മന്ത്രി ടി.പി.രാമകൃഷ്ണൻ ഉദ്ഘാടനം ചെയ്തു. 

കോഴിക്കോട് മുനിസിപ്പൽ കോർപ്പറേഷൻ വാർഷിക പദ്ധതിയിൽ ഉൾപ്പെടുത്തി 4.7 കോടി രൂപ ചെലവിലാണ് കെട്ടിടം നിർമ്മിച്ചത്. 1800 ചതുരശ്ര മീറ്റർ വിസ്തീർണ്ണമാണ് കെട്ടിടത്തിനുള്ളത്. കോർപറേഷനിൽ വാർഡ് 61 ൽ നിലവിലുള്ള കെട്ടിടം പൊളിച്ചാണ് ഷീ ലോഡ്ജ് നിർമ്മിച്ചിരിക്കുന്നത്. 50 പേർക്ക് ഒന്നിച്ചിരുന്ന് ഭക്ഷണം കഴിക്കാവുന്ന ഡൈനിങ് ഹാളും അതിനോട് അനുബന്ധമായി വാഷ് ഏരിയ, അടുക്കള, ശുചിമുറി, 2 ഡോർമെറ്ററി, മൂന്ന് മുറികൾ എന്നിവയുമുണ്ട്.

സർക്കാരിന്റെ നൂറുദിന കർമ്മപദ്ധതികളുടെ ഭാഗമായി സംസ്ഥാനത്ത് അഞ്ച് സ്മാർട്ട് വില്ലേജ് ഓഫീസുകളുടെ പ്രവർത്തനവും 159 സ്മാർട്ട് വില്ലേജ് ഓഫീസ് കെട്ടിട നിർമ്മാണ ഉദ്ഘാടനവും മുഖ്യമന്ത്രി പിണറായി വിജയൻ ഓൺലൈനായി നിർവ്വഹിച്ചു. റവന്യൂ വകുപ്പ് മന്ത്രി ഇ. ചന്ദ്രശേഖരൻ അദ്ധ്യക്ഷത വഹിച്ചു. 

മാവൂർ ഗവ. ഹയർ സെക്കന്ററി സ്കൂൾ ചുറ്റുമതിലിൻ്റെയും കവാടത്തിൻ്റെയും  നിർമാണ പ്രവൃത്തി പി.ടി.എ റഹീം എം.എൽ.എ ഉദ്ഘാടനം ചെയ്തു. എം.എൽ.എയുടെ ആസ്തിവികസന ഫണ്ടിൽ നിന്നും അനുവദിച്ച 16.5 ലക്ഷം രൂപ ചെലവിലാണ് പ്രവൃത്തി നടത്തുന്നത്. 

ബാലുശ്ശേരി ഗ്രാമപഞ്ചായത്തിലെ മഞ്ഞപ്പുഴ ചെമ്പോളിതാഴെ പുഴയോട് ചേർന്ന്  പുനരുദ്ധാരണം നടത്തിയ പ്രളയ പ്രതിരോധ സംരക്ഷണഭിത്തി  ജലവിഭവ വകുപ്പ് മന്ത്രി കെ.കൃഷ്ണൻകുട്ടി ഉദ്ഘാടനം ചെയ്തു.  

ചെങ്ങോട്ടുകാവ്  ഗ്രാമപഞ്ചായത്തിലെ കൊണ്ടം വെള്ളി പാടശേഖരം പൂർണ്ണ തോതിൽ കൃഷിയോഗ്യമാക്കാനുതകും വിധം നിർമ്മിക്കുന്ന വി.സി.ബിയുടെ പ്രവൃത്തി ഉദ്ഘാടനം കെ.ദാസൻ എം.എൽ.എ നിർവ്വഹിച്ചു.  സംസ്ഥാന സർക്കാർ ചെറുകിട ജലസേചന വകുപ്പ് വഴി അനുവദിച്ച 45 ലക്ഷം രൂപ വിനിയോഗിച്ചാണ് നിർമ്മാണം. വി.സി.ബി നിർമ്മാണവും പാടത്തെ മുറിച്ചു കടക്കുന്ന അനുബന്ധ റോഡും പൂർത്തിയാകുന്നതോടെ ഈ പാടശേഖരത്തിലെ ഭൂരിഭാഗം സ്ഥലത്തും ശരിയായ വിധം ജല ക്രമീകരണം നടത്താൻ കഴിയും. ഇതോടെ നെൽക്കൃഷി പുനരാരംഭിക്കുവാനും സാധിക്കും. 45 ഹെക്ടറോളം ഭാഗത്തേക്ക് നെൽകൃഷി വ്യാപിപ്പിക്കാൻ കഴിയുമെന്നാണ് കരുതുന്നത്.