കോഴിക്കോട് സബ് റീജ്യണല്‍ എംപ്ലോയ്മെന്റ് ഓഫീസില്‍ നിന്ന് 2021-23 കാലയളവില്‍ വിവിധ ജോലി ഒഴിവുകള്‍ക്ക് പരിഗണിക്കാന്‍ യോഗ്യതയുളളവരുടെ പട്ടിക സിവില്‍ സ്റ്റേഷനിലെ ഭിന്നശേഷിക്കാര്‍ക്കുളള പ്രത്യേക എംപ്ലോയമെന്റ് എക്സ്ചേഞ്ചില്‍ തയ്യാറാക്കി.  ഉദ്യോഗാര്‍ത്ഥികള്‍ക്ക് നവംബര്‍ 30 വരെ ഓണ്‍ലൈനായി പട്ടിക പരിശോധിക്കാം. സീനിയോറിറ്റി സംബന്ധമായ പരാതികള്‍ 2020 നവംബര്‍ 30 നകം ഓണ്‍ലൈനായി ഓഫീസില്‍ നല്‍കണം. ഫോണ്‍ 0495 2373179. ഇ മെയില്‍ : seekzkd.emp.lbr@kerala.gov.in

നീലേശ്വരം നഗരസഭാ കൗണ്‍സിലിന്റെ കഴിഞ്ഞ അഞ്ച് വര്‍ഷത്തെ വികസന ക്ഷേമ പ്രവര്‍ത്തനങ്ങള്‍ ചിത്രീകരിച്ചുകൊണ്ടുള്ള 'നാട്യങ്ങളില്ലാതെ നേട്ടങ്ങളുടെ അഞ്ച് വര്‍ഷങ്ങള്‍' എന്ന ഹ്രസ്വചിത്രം പ്രകാശനം മുന്‍ എം പി പി കരുണാകരന്‍ പ്രകാശനം ചെയ്തു. നഗരസഭാ ചെയര്‍മാന്‍ പ്രൊഫ. കെ.പി. ജയരാജന്‍ അദ്ധ്യക്ഷത വഹിച്ചു.  വിദ്യാഭ്യാസ സ്ഥിരം സമിതി അദ്ധ്യക്ഷന്‍ പി.പി. മുഹമ്മദ് റാഫി, കൗണ്‍സിലര്‍ എറുവാട്ട് മോഹനന്‍ തുടങ്ങിയവര്‍ സംസാരിച്ചു.  വൈസ് ചെയര്‍പേഴ്‌സണ്‍ വി. ഗൗരി സ്വാഗതവും നഗരസഭാ സെക്രട്ടറി സി.കെ. ശിവജി നന്ദിയും പറഞ്ഞു.

മാവൂര്‍ പോലീസ് സ്റ്റേഷന്‍ കെട്ടിട നവീകരണ പ്രവൃത്തികളുടെ ഉദ്ഘാടനം പി.ടി.എ റഹീം എം.എല്‍.എ നിര്‍വ്വഹിച്ചു. എം.എല്‍.എയുടെ ആസ്തി വികസന ഫണ്ടില്‍ നിന്ന് അനുവദിച്ച 15 ലക്ഷം രൂപ ചെലവിലാണ് പ്രവൃത്തി നടത്തുന്നത്.കാലപ്പഴക്കം കാരണം ചോര്‍ന്നൊലിക്കുന്നതായും സംരക്ഷണ ഭിത്തിയില്ലാത്തതിനാല്‍ സുരക്ഷിതത്വത്തിന് ഭീഷണിയുള്ളതായും ബന്ധപ്പെട്ട ഉദ്യോഗസ്ഥര്‍ ശ്രദ്ധയില്‍ പെടുത്തിയതിനെ തുടര്‍ന്നാണ് പോലീസ് സ്റ്റേഷന്‍ കെട്ടിട നവീകരണത്തിന് എം.എല്‍.എ തുക അനുവദിച്ചത്.

നൊച്ചാട് ഗ്രാമപഞ്ചായത്തും കേരള ശാസ്ത്ര സാഹിത്യ പരിഷത്തും സഹകരിച്ച് തയ്യാറാക്കിയ 'കോവിഡും ജീവിതവും നൊച്ചാടിന്റെ നേര്‍ക്കാഴ്ചകള്‍' എന്ന പുസ്തകത്തിന്റെ പ്രകാശനം ധനകാര്യവകുപ്പ് മന്ത്രി ടി.എം തോമസ് ഐസക്ക് ഓണ്‍ലൈനായി നിര്‍വഹിച്ചു. 

കോവിഡ് പ്രതിരോധത്തില്‍ നൊച്ചാട് ഗ്രാമപഞ്ചായത്ത് ഉയര്‍ത്തിപ്പിടിച്ച ജനകീയ പ്രതിരോധത്തിന്റെ നേര്‍സാക്ഷ്യമാണ് പുസ്തകം. പ്രാദേശിക ഭരണകൂടം ശക്തിപ്പെടുത്തുകയും ജനകീയവല്‍കരിക്കുകയും വേണമെന്നാണ് കോവിഡ് കാലം നമ്മെ ഓര്‍മ്മപ്പെടുത്തുന്നത്. കോവിഡ് പ്രതിരോധത്തില്‍ തദ്ദേശസ്ഥാപനങ്ങള്‍ മികച്ച പ്രവര്‍ത്തനമാണ് നടത്തുന്നതെന്നും മന്ത്രി പറഞ്ഞു.

കോഴിക്കോട് ജില്ലാ പഞ്ചായത്ത് സെക്രട്ടറിയായി ടി.അഹമ്മദ് കബീർ ചുമതലയേറ്റു. നവംബർ രണ്ടിനാണ്  ചുമതലയേറ്റത്.

കൊയിലാണ്ടി താലൂക്ക് തിരുവങ്ങായൂര്‍ മഹാശിവക്ഷേത്രത്തിലെ പാരമ്പര്യേതര ട്രസ്റ്റിമാരുടെ ഒഴിവില്‍ നിയമനം നടത്തുന്നതിന് ഹിന്ദുധര്‍മ്മ സ്ഥാപന നിയമപ്രകാരം അര്‍ഹരായ തദ്ദേശവാസികളില്‍ നിന്ന് അപേക്ഷ ക്ഷണിച്ചു. അപേക്ഷ നവംബര്‍ 22 ന് വൈകീട്ട് അഞ്ചു മണിക്കകം  കോഴിക്കോട് സിവില്‍ സ്റ്റേഷനിലെ  മലബാര്‍ ദേവസ്വം ബോര്‍ഡ് അസിസ്റ്റന്‍ഡ് കമ്മിഷണറുടെ ഓഫീസില്‍ ലഭിക്കണം.