സ്‌കോൾ-കേരള മുഖേന 2020-22 ബാച്ചിലേക്കുള്ള ഹയർ സെക്കൻഡറി കോഴ്‌സുകളുടെ ഒന്നാം വർഷ പ്രവേശനത്തിന് രജിസ്റ്റർ ചെയ്യാനുള്ള സമയം നീട്ടി. പിഴയില്ലാതെ 23 വരെയും 60 രൂപ പിഴയോടെ 30 വരെയും ഫീസടച്ച് രജിസ്റ്റർ ചെയ്യാം. ഓൺലൈൻ രജിസ്‌ട്രേഷനും മാർഗ നിർദ്ദേശങ്ങൾക്കും www.scolekerala.org സന്ദർശിക്കുക. ഓൺലൈൻ രജിസ്‌ട്രേഷൻ നടത്തിയശേഷം അപേക്ഷയുടെ പ്രന്റൗട്ടും അനുബന്ധ രേഖകളും രണ്ട് ദിവസത്തിനകം എക്‌സിക്യൂട്ടീവ് ഡയറക്ടർ, സ്‌കോൾ-കേരള, വിദ്യാഭവൻ, പൂജപ്പുര.പി.ഒ, തിരുവനന്തപുരം-12 എന്ന വിലാസത്തിൽ സ്പീഡ്/രജിസ്റ്റേർഡ് തപാലിൽ അയയ്ക്കണം.

തിരുവനന്തപുരം ജില്ലയിലെ കേന്ദ്ര സർക്കാർ സ്ഥാപനത്തിൽ ഓപ്പൺ വിഭാഗത്തിൽ സെക്യൂരിറ്റി ഗാർഡ് (വനിതകൾ മാത്രം) തസ്തികയിൽ രണ്ട് താൽകാലിക ഒഴിവുണ്ട്. എട്ടാം ക്ലാസ് യോഗ്യതയും മൂന്ന് വർഷത്തെ പ്രവൃത്തിപരിചയവും വേണം. വൈകിട്ട് അഞ്ചു മുതൽ രാവിലെ ഒൻപതുവരെയാണ് ജോലിയുടെ സമയക്രമം. 2020 ഒക്‌ടോബർ എട്ടിന് 18-41 നും മധ്യേ പ്രായമുള്ളവരായിരിക്കണം. ശമ്പളം പ്രതിമാസം 8,000 രൂപ.  വിദ്യാഭ്യാസ യോഗ്യത, തൊഴിൽപരിചയം എന്നിവ തെളിയിക്കുന്ന അസ്സൽ സർട്ടിഫിക്കറ്റുകളുമായി ഉദ്യോഗാർഥികൾ അതത് എംപ്ലോയ്‌മെന്റ് എക്‌സ്‌ചേഞ്ചുകളിൽ 18നു മുമ്പ് നേരിട്ട് ഹാജരായി പേര് രജിസ്റ്റർ ചെയ്യണം.
പി.എൻ.എക്‌സ്. 3889/2020
 

തിരുവനന്തപുരം ജില്ലയിലെ കേന്ദ്ര സർക്കാർ സ്ഥാപനത്തിൽ ഓപ്പൺ വിഭാഗത്തിൽ മൾട്ടിപർപ്പസ് ഹെൽപ്പർ (വനിതകൾ മാത്രം) തസ്തികയിൽ രണ്ട് താത്കാലിക ഒഴിവ് നിലവിലുണ്ട്. എട്ടാം ക്ലാസ് യോഗ്യതയും മൂന്ന് വർഷത്തെ പ്രവൃത്തി പരിചയവും വേണം, 2020 ഒക്‌ടോബർ എട്ടിന് പ്രായം 18-41നും മദ്ധ്യേ. പ്രതിമാസ ശമ്പളം 8,000 രൂപ.
ഉദ്യോഗാർത്ഥികൾ വിദ്യാഭ്യാസ യോഗ്യത, തൊഴിൽപരിചയം എന്നിവ തെളിയിക്കുന്ന അസ്സൽ സർട്ടിഫിക്കറ്റുകളുമായി അതാത് എംപ്ലോയ്‌മെന്റ് എക്‌സ്‌ചേഞ്ചുകളിൽ 18ന് മുൻപ് നേരിട്ടെത്തി  പേര് രജിസ്റ്റർ ചെയ്യണം.
പി.എൻ.എക്‌സ്. 3888/2020

കുന്നംകുളം നഗരസഭ ആർത്താറ്റ് സൗത്ത് വാർഡിലെ വിവിധ പദ്ധതികളുടെ ഉദ്ഘാടനം നഗരസഭ ചെയർപേഴ്‌സൺ സീത രവീന്ദ്രൻ  നിർവ്വഹിച്ചു.  തദ്ദേശ സ്വയംഭരണ വകുപ്പ് മന്ത്രി എ.സി. മൊയ്തീന്റെ ആസ്തി വികസന ഫണ്ടിൽ നിന്നും ലഭിച്ച 23 ലക്ഷം ചെലവഴിച്ച് നിർമ്മാണം പൂർത്തീകരിച്ച ആർത്താറ്റ് പള്ളി കണ്ടപ്പൻ ബസാർ റോഡും നഗരസഭ വാർഷിക പദ്ധതിയിൽ ഉൾപ്പെടുത്തി നവീകരിച്ച 104ാം നമ്പർ പ്രിയദർശിനി അങ്കണവാടിയുമാണ് തുറന്നത്.  
ആർത്താറ്റ് സൗത്ത് പ്രദേശത്തെ ജനങ്ങളുടെ കാലങ്ങളായുള്ള അഭിലാഷമാണ് പദ്ധതികളിലൂടെ യാഥാർഥ്യമായത്.

ആനന്ദപുരം ഗവ. യു പി സ്‌കൂള്‍ കെട്ടിടത്തിന്റെ നിര്‍മ്മാണോദ്ഘാടനം പ്രൊഫ. കെ യു. അരുണന്‍ എംഎല്‍എ നിര്‍വ്വഹിച്ചു. 2019-20 സാമ്പത്തിക വര്‍ഷത്തെ ബഡ്ജറ്റില്‍ നിന്നും ഒരു കോടി രൂപയാണ് സ്‌കൂള്‍ കെട്ടിടത്തിന്റെ നിര്‍മ്മാനത്തിനായി ആദ്യഘട്ടത്തില്‍ അനുവദിച്ചിട്ടുള്ളത്. 340.62 ചതുരശ്ര മീറ്റര്‍ വിസ്തീര്‍ണ്ണത്തില്‍ നിര്‍മിക്കുന്ന കെട്ടിടത്തില്‍ 6 ക്ലാസ്സ് മുറികളും, ശുചി മുറിയും, കോണിമുറിയും വരാന്തയുമാണ് ഉണ്ടാവുക. നിര്‍മ്മാണ പ്രവര്‍ത്തികള്‍ പൊതു മരാമത്ത് വകുപ്പ് കെട്ടിട വിഭാഗത്തിന്റെ മേല്‍നോട്ടത്തില്‍ നടക്കും.

വലപ്പാട് ഗ്രാമപഞ്ചായത്ത് കഴിമ്പ്രം ബീച്ചില്‍ പണി പൂര്‍ത്തികരിച്ച നടപ്പാതയുടെയും വിശ്രമകേന്ദ്രത്തിന്റെയും ഉദ്ഘാടനം നടത്തി. ടോയ്‌ലറ്റ് സമുച്ചയം, ഓപ്പണ്‍ ഫിറ്റ്‌നസ് സെന്റ്റര്‍, എല്‍.ഇ.ഡി ലൈറ്റിങ് സംവിധാനം, ഇരിപ്പിടങ്ങള്‍ എന്നിവയുടെ നിര്‍മ്മാണത്തിനു തുടക്കം കുറിക്കുകയും ചെയ്തു. പഞ്ചായത്ത് പ്രസിഡന്റ് ഇ.കെ. തോമസ് ഉദ്ഘാടനം ചെയ്തു.

കൊരട്ടി പോളിടെക്‌നിക്കിൽ 1.17 കോടി രൂപ ചിലവിൽ നിർമ്മിച്ച രജത ജൂബിലി സ്മാരക  അഡ്മിനിസ്‌ട്രേറ്റീവ് ബ്ലോക്കിന്റെ ഉദ്ഘാടനം ഉന്നത വിദ്യാഭ്യാസ വകുപ്പ് മന്ത്രി കെ ടി ജലീൽ ഓൺലൈനായി നിർവഹിച്ചു. 38.5 ലക്ഷം രൂപ ചിലവിൽ പൂർത്തീകരിച്ച ക്യാമ്പസ് റിങ് റോഡിന്റെയും 5 ലക്ഷം രൂപ ചിലവിൽ പണി പൂർത്തീകരിച്ച വനിതാ വിശ്രമ മുറിയുടെയും ഉദ്ഘാടനം മന്ത്രി നിർവഹിച്ചു. സാങ്കേതിക വിദ്യാഭ്യാസ രംഗത്തു കേരളം വലിയ മുന്നേറ്റമാണ് കാഴ്ചവെക്കുന്നതെന്ന് മന്ത്രി പറഞ്ഞു.

അഭ്യസ്തവിദ്യരായിട്ടും ആഗ്രഹിച്ച മേഖലയില്‍ തൊഴില്‍ നേടാന്‍ കഴിയാത്ത ചെറുപ്പക്കാര്‍ക്ക് സഹായകരമാകുന്ന കുടുംബശ്രീയുടെ ‘കണക്റ്റ് ടു വര്‍ക്ക്’ പദ്ധതി ഇനി കൊടുങ്ങല്ലൂരിലും. കൊടുങ്ങല്ലൂർ നഗരസഭ ഓഫീസിനോട് ചേർന്ന് പുനർനിർമ്മിച്ച 'കണക്റ്റ് ടു വർക്ക് ട്രെയ്നിങ് സെൻ്റർ ' ഹാൾ പരിശീലനത്തിനായി തുറന്നുകൊടുത്തു. മതിലകം ബ്ലോക്കിലെയും കൊടുങ്ങല്ലൂർ നഗരസഭയിലെയും അഭ്യസ്തവിദ്യരായ യുവതീ- യുവാക്കൾക്ക് വിവിധ മത്സര പരീക്ഷകളിൽ പരിശീലനം നൽകുന്നതിനായാണ് ട്രെയ്നിങ് സെൻ്റർ ഹാൾ പരിശീലനത്തിനായി തുറന്നുകൊടുത്തത്.  പരിശീലനം നടത്തുന്നതിനായി ടെലിവിഷൻ, ലാപ്ടോപ്, മൈക്ക്, ഫാനുകൾ, ലൈറ്റ് , ഫർണീച്ചറുകൾ എന്നിവ സജ്ജീകരിച്ചിട്ടുണ്ട്.

സംസ്ഥാന സര്‍ക്കാരിന്റെ സ്മാര്‍ട്ട് വില്ലേജ് ഓഫീസ് പദ്ധതിയിലുള്‍പ്പെടുത്തി തൃശൂര്‍ ജില്ലയിലെ 14 വില്ലേജ് ഓഫീസുകള്‍ സ്മാര്‍ട്ടാകുന്നു. എരവ്, ശ്രീനാരായണപുരം, പുല്ലൂറ്റ്, അഴീക്കോട്, കാക്കുളിശ്ശേരി, ആളൂര്‍, കല്ലേറ്റുംകര, ചാലക്കുടി ഈസ്റ്റ്, വടക്കേക്കാട്, കണിയാര്‍ക്കോട്, കൊണ്ടാഴി, അഞ്ഞൂര്‍ ഗ്രൂപ്പ്, ഒല്ലൂര്‍ക്കര, നടത്തറ എന്നീ വില്ലേജ് ഓഫീസുകളാണ് സ്മാര്‍ട്ടാകുന്നത്. ഇവയുടെ നിര്‍മാണോദ്ഘാടനം മുഖ്യമന്ത്രി പിണറായി വിജയന്‍ ഓണ്‍ലൈനായി നിര്‍വ്വഹിച്ചു. റവന്യൂ വകുപ്പ് മന്ത്രി ഇ ചന്ദ്രശേഖരന്‍ അധ്യക്ഷത വഹിച്ചു. തദ്ദേശസ്വയംഭരണ വകുപ്പ് മന്ത്രി എ സി മൊയ്തീന്‍ മുഖ്യാതിഥിയായി. 

തദ്ദേശ സ്വയംഭരണ  സ്ഥാപനങ്ങളുടെ ഭരണ സമിതി കാലാവധി അവസാനിയ്ക്കുന്ന വേളയിൽ ഹരിത കേരള മിഷന്റെ നിർദ്ദേശാനുസരണം കുന്നംകുളം നഗരസഭയിലെ കൗൺസിലർമാർ മരങ്ങൾ നട്ട് മാതൃകയായി.  തൃശ്ശൂർ റോഡിൽ ഗവ. ബോയ്സ്  ഹൈസ്കൂളിന് മുൻഭാഗത്ത് ഫുട്പാത്തിനോട് ചേർന്നാണ് നഗരസഭ കൗൺസിലർമാരെല്ലം മരത്തൈകൾ നട്ടുപിടിപ്പിച്ചത്.'ഓർമ്മ തുരുത്ത് 'എന്ന് പേരിട്ടിട്ടുള്ള ഈ പദ്ധതി നഗരസഭ ചെയർപേഴ്സൺ സീതാ രവീന്ദ്രൻ ഉൽഘാടനം ചെയ്തു. വൈസ് ചെയർമാൻ പി.എം സുരേഷ്, സ്റ്റാന്റിങ് കമ്മിറ്റി ചെയർമാൻമാരായ ഗീത ശശി, സുമ ഗംഗാധരൻ, കെ.കെ.ആനന്ദൻ,  മിഷ സെബാസ്റ്റ്യൻ എന്നിവരും കൗൺസിലർമാരും സന്നിഹിതരായി.