തളിക്കുളം ഗ്രാമപഞ്ചായത്ത് കുടുംബാരോഗ്യ കേന്ദ്രം ബയോമെഡിക്കല്‍ മാലിന്യ ശേഖരണ കേന്ദ്രത്തിന് പുതിയ കെട്ടിടം. ഗ്രാമപഞ്ചായത്ത് 2020-21 ജനകീയാസൂത്രണ പദ്ധതി പ്രകാരം 10,60,000 രൂപ ചെലവഴിച്ചാണ് തളിക്കുളം കുടുംബാരോഗ്യ കേന്ദ്രത്തില്‍ ബയോമെഡിക്കല്‍ മാലിന്യ ശേഖരണ കേന്ദ്രം നിര്‍മ്മിച്ചത്. കെട്ടിടത്തിന്റെ പ്രവര്‍ത്തനോദ്ഘാടനം തളിക്കുളം ബ്ലോക്ക് പഞ്ചായത്ത് പ്രസിഡന്റ് ഡോ. സുഭാഷിണി മഹാദേവന്‍ നിര്‍വഹിച്ചു. തളിക്കുളം പഞ്ചായത്ത് പ്രസിഡന്റ് പി ഐ സജിത അധ്യക്ഷയായി. 

പത്മഭൂഷണ്‍ വൈദ്യഭൂഷണം രാഘവന്‍ തിരുമുല്‍പ്പാടിന്റെ സ്മരണക്കായി നിര്‍മിക്കുന്ന ആയുഷ് ആയുര്‍വേദ ആശുപത്രിയുടെ നിര്‍മാണോദ്ഘാടനം ഒക്ടോബര്‍ മൂന്ന് വൈകുന്നേരം 5 മണിക്ക് ആരോഗ്യ വകുപ്പ് മന്ത്രി കെ കെ ഷൈലജ ടീച്ചര്‍ നിര്‍വഹിക്കും. നഗരസഭ ജൂബിലി ഹാളില്‍ നടക്കുന്ന ചടങ്ങില്‍ ബി ഡി ദേവസ്സി എം എല്‍ എ അധ്യക്ഷത വഹിക്കും. ബെന്നി ബെഹനാന്‍ എം പി മുഖ്യാതിഥിയാകും.

മലയാളം ഭരണഭാഷാ വാരാചരണത്തിന്റെ ഭാഗമായ തൃശൂർ ജില്ലാ ഇൻഫർമേഷൻ ഓഫീസ് ഹൈസ്‌കൂൾ, പ്ലസ്ടു വിദ്യാർഥികൾക്കായി 'അമ്മ മലയാളം' എന്ന വിഷയത്തിൽ മലയാള ഉപന്യാസ രചനാ മത്സരം ഓൺലൈനായി സംഘടിപ്പിക്കുന്നു. തൃശൂർ ജില്ലയിലെ വിദ്യാർഥികൾക്ക് പങ്കെടുക്കാം. രണ്ടു പുറത്തിൽ കവിയാത്ത സ്വന്തം രചനകൾ പേര്, വിലാസം, സ്‌കൂൾ, ഫോൺ നമ്പർ എന്നിവ സഹിതം prismthr...@gmail.com എന്ന ഇമെയിൽ വിലാസത്തിൽ അയക്കുക. അവസാന തീയതി: നവംബർ 9. 

സൈബർ കുറ്റകൃത്യങ്ങൾ തടയുന്നതിന് തൃശൂർ റൂറൽ ജില്ലാ പൊലീസിൻ്റെ സൈബർ പൊലീസ് സ്റ്റേഷൻ ഇരിങ്ങാലക്കുടയിൽ പ്രവർത്തനമാരംഭിച്ചു. ഇരിങ്ങാലക്കുട ഉൾപ്പെടെ 15 പൊലീസ് സ്റ്റേഷനുകളെ സൈബർ ക്രൈം പൊലീസ് സ്റ്റേഷനുകളായി ഉയർത്തുന്നതിൻ്റെ ഉദ്ഘാടനം മുഖ്യമന്ത്രി പിണറായി വിജയൻ ഓൺലൈനായി നിർവഹിച്ചു. സ്ത്രീകൾക്കും കുട്ടികൾക്കുമെതിരെ നടക്കുന്ന സൈബർ കുറ്റകൃത്യങ്ങളെ തടയുന്നതിന് സൈബർ പൊലീസ് സ്റ്റേഷനുകളുടെ മികച്ച പ്രവർത്തനങ്ങൾ വഴിയൊരുക്കുമെന്നും സൈബർ കുറ്റകൃത്യങ്ങൾ തടയാൻ പൊലീസ് ആക്റ്റിൽ കാലാനുസൃതമായ ഭേദഗതി വരുത്തുമെന്നും മുഖ്യമന്ത്രി പറഞ്ഞു.

തൃശൂർ ജില്ലയിൽ ഞായറാഴ്ച (01/11/2020) 943 പേർക്ക് കൂടി കോവിഡ്-19 സ്ഥീരികരിച്ചു. 1049 പേർ രോഗമുക്തരായി. ജില്ലയിൽ രോഗബാധിതരായി ചികിത്സയിൽ കഴിയുന്നവരുടെ എണ്ണം 10332 ആണ്. തൃശൂർ സ്വദേശികളായ 82 പേർ മറ്റു ജില്ലകളിൽ ചികിത്സയിൽ കഴിയുന്നു. ജില്ലയിൽ ഇതുവരെ കോവിഡ് സ്ഥിരീകരിച്ചവരുടെ എണ്ണം 40714 ആണ്. 30055 പേരെയാണ് ആകെ രോഗമുക്തരായി ആശുപത്രിയിൽ നിന്നും ഡിസ്ചാർജ് ചെയ്തത്.
ജില്ലയിൽ ഞായറാഴ്ച സമ്പർക്കം വഴി 920 പേർക്കാണ് രോഗം സ്ഥിരീകരിച്ചത്. കൂടാതെ 11 ആരോഗ്യ പ്രവർത്തകർക്കും രോഗബാധ ഉണ്ടായിട്ടുണ്ട്. മറ്റു സംസ്ഥാനങ്ങളിൽ നിന്ന് എത്തിയ 3 പേരും, രോഗ ഉറവിടം അറിയാത്ത 9 പേരുമുണ്ട്.

ഗുരുവായൂരിലേക്ക് തിരിച്ച തമിഴ്‌നാട് ചെങ്കൽപ്പേട്ട മാറായി മലൈർ നഗർ മനോൻമണി സ്ട്രീറ്റിലെ കുമരനെ(83) 2020 മെയ് 25 മുതൽ കാണാതായ സംഭവത്തിൽ കാഞ്ചീപുരം പോലീസ് കേസെടുത്ത് അന്വേഷണം നടത്തുന്നു. ഗുരുവായൂരിലേക്ക് പോവുകയാണെന്ന് പറഞ്ഞ് പോന്ന ശേഷം തിരിച്ച് വീട്ടിൽ എത്തിയിട്ടില്ലെന്നാണ് പരാതി. ഇദ്ദേഹത്തെക്കുറിച്ച് എന്തെങ്കിലും വിവരം അറിയുന്നവർ തൃശ്ശൂർ ഈസ്റ്റ് പോലീസ് സ്റ്റേഷനിൽ ബന്ധപ്പെടണമെന്ന് അറിയിച്ചു. ഫോൺ: 04872424192, 9443154246, 9500154246.
 

വിയ്യൂര്‍ പൊലീസ് സ്റ്റേഷന്‍ ശിശു സൗഹൃദ പൊലീസ് സ്റ്റേഷനാക്കി മാറ്റിയതിന്റെ ഉദ്ഘാടനം കൃഷി വകുപ്പ് മന്ത്രി വി എസ് സുനില്‍ കുമാര്‍ നിര്‍വഹിച്ചു. മേയര്‍ അജിത ജയരാജന്‍ അധ്യക്ഷത വഹിച്ചു. അഡ്വ വി എസ് സുനില്‍കുമാറിന്റെ എം.എല്‍.എ ഫണ്ടില്‍ നിന്ന് 25 ലക്ഷം രൂപയാണ് ഇതിനായി ചെലവഴിച്ചത്. 1200 ചതുരശ്ര അടി വിസ്തീര്‍ണത്തില്‍ നിര്‍മിച്ച ഈ കെട്ടിടത്തില്‍ മുലയൂട്ടല്‍ മുറി, സ്ത്രീകള്‍ക്കും കുട്ടികള്‍ക്കുമുള്ള വിശ്രമസ്ഥലം, കളിയുപകരണങ്ങള്‍ എന്നിവ ഒരുക്കിയിരിക്കുന്നു.

നെടുപുഴ ഗവ ജെ ബി സ്കൂളിൽ ഒരു കോടി രൂപ ചെലവഴിച്ച് നിർമിക്കുന്ന പുതിയ കെട്ടിടത്തിന്റെ നിർമാണോദ്ഘാടനം നവംബർ 3 ന് വൈകിട്ട് 3 മണിക്ക് ഗവ ചീഫ് വിപ്പ് അഡ്വ കെ രാജൻ  നിർവഹിക്കും. കോർപ്പറേഷൻ മേയർ അജിത ജയരാജൻ അധ്യക്ഷത വഹിക്കും.

Reply all

മലക്കപ്പാറ പൊലീസ് സ്റ്റേഷൻ പുതിയ കെട്ടിടത്തിന്റെ ഉദ്ഘാടനം മുഖ്യമന്ത്രി പിണറായി വിജയൻ ഓൺലൈനായി നിർവഹിച്ചു. മികച്ച പൊലീസ് സംവിധാനം കേരളത്തിന് മാതൃകയാണെന്ന് മുഖ്യമന്ത്രി പറഞ്ഞു. സൈബർ കുറ്റകൃത്യങ്ങൾ തടയുന്നതിനായി ആരംഭിച്ച സൈബർ പൊലീസ് സ്റ്റേഷനുകൾ സംസ്ഥാനത്തിന്റെ ക്രമസമാധാന പാലനത്തിൽ വലിയ പങ്ക് വഹിക്കുന്ന സംവിധാനമായി മാറും. ആധുനിക കാലത്തെ കുറ്റകൃത്യങ്ങൾ കണ്ടെത്തുന്നതിന് അത്യാധുനിക രീതികൾ നടപ്പിലാക്കിയ നാടാണ് നമ്മുടെയെന്നും അദ്ദേഹം കൂട്ടിച്ചേർത്തു.

പൊയ്യ പഞ്ചായത്ത്‌ ആറാം വാർഡിലെ ഖാദി ഭവൻ ലിങ്ക് റോഡ് റീച്ച് ടു യാത്രക്കായി തുറന്നുകൊടുത്തു. വി ആർ സുനിൽ കുമാർ എം എൽ എ ഉദ്ഘാടനം നിർവഹിച്ചു. പഞ്ചായത്തിന്റെ 2020-21 വാർഷിക പദ്ധതിയിലുൾപ്പെടുത്തി 4,40000 രൂപ ചെലവഴിച്ചാണ് റോഡ് പണി പൂർത്തീകരിച്ചത്. 109 മീറ്റർ നീളം വരുന്ന റോഡ് ഇന്റർലോക് കട്ട വിരിച്ച് യാത്രാ സൗകര്യമൊരുക്കി. പഞ്ചായത്ത്‌ പ്രസിഡന്റ്‌ സിജി വിനോദ്, പഞ്ചായത്ത്‌ അംഗങ്ങളായ മിനി അശോകൻ, സരോജ വേണു ശങ്കർ, ടി എൻ രാധാകൃഷ്ണൻ തുടങ്ങിയവർ പങ്കെടുത്തു.