കേരള കലാമണ്ഡലം നവതിയുടെ ഭാഗമായി ഏർപ്പെടുത്തിയ ഗുരുസ്മരണ അവാർഡിന് അപേക്ഷ ക്ഷണിച്ചു. കലാമണ്ഡലത്തിൽ പഠിപ്പിക്കുന്ന 14 കലാവിഷയങ്ങളിൽ ഏതെങ്കിലും കലാമേഖലകളിൽ പ്രഗത്ഭരായവരും അറുപത് വയസ്സിന് മുകളിൽ പ്രായമുള്ളവരുമായ കലാകാരന്മാർ/കലാകാരികൾക്കാണ് അപേക്ഷിക്കാൻ അവസരം. കേന്ദ്ര സംസ്ഥാന സർക്കാരുകളുടേയോ, കേന്ദ്ര സംഗീത നാടക അക്കാദമി, കേരള സംഗീത നാടക അക്കാദമി, കേരള കലാമണ്ഡലം തുടങ്ങിയ കലാ സാംസ്കാരിക സ്ഥാപനങ്ങളുടെയോ അവാർഡുകൾ ലഭിക്കാത്തവരായിരിക്കണം.

    • പട്ടയമേളയിൽ ജില്ലയിൽ 48 പട്ടയങ്ങൾ കൂടി നല്‍കി

മുള്ളൂർക്കര ഗ്രാമപഞ്ചായത്തിൽ നവീകരണം പൂർത്തിയാക്കിയ കോട്ടക്കുളം യു ആർ പ്രദീപ് എം എൽ എ നാടിന് സമർപ്പിച്ചു. മൈനർ ഇറിഗേഷൻ വകുപ്പിന്റെ തലപ്പിള്ളി സ്പെഷ്യൽ പാക്കേജിൽ നിന്നും 80 ലക്ഷം രൂപ അനുവദിച്ചാണ് കുളം നവീകരിച്ചത്. 50 ഹെക്ടറോളം വരുന്ന കൃഷിക്ക് ഈ കുളം  പ്രയോജനം ചെയ്യും. ഒരു നീന്തൽ കുളവും എം. എൽ.എ ഫണ്ട്‌ ഉപയോഗിച്ച് സ്ഥാപിച്ച  ഹൈമാസ്റ്റ് ലൈറ്റും ഇതോടൊപ്പം ഒരുക്കിയിട്ടുണ്ട്. യോഗത്തിൽ മുള്ളൂർക്കര ഗ്രാമപഞ്ചായത്ത് പ്രസിഡന്റ്‌ എം. എച്ച് അബ്ദുൾ സലാം അധ്യക്ഷത വഹിച്ചു. പഞ്ചായത്ത്‌ വൈസ് പ്രസിഡന്റ്‌ മിനി രാധാകൃഷ്ണൻ, മെമ്പർമാരായ സ്മിത, ശോഭന മണികണ്ഠൻ, പഞ്ചായത്ത്‌ സെക്രട്ടറി അൻസാർ തുടങ്ങിയവർ പങ്കെടുത്തു.

പ്രധാനമന്ത്രി മത്സ്യസമ്പദ യോജന പദ്ധതിയുടെ കീഴിൽ റീ സർക്കുലേറ്ററി അക്വാകൾച്ചർ സിസ്റ്റം (ആർഎഎസ്), ബയോഫ്ലോക്ക് മത്സ്യകൃഷി എന്നീ പദ്ധതികളിലേക്ക് ജില്ലാ ഫിഷറീസ് വകുപ്പ് അപേക്ഷ ക്ഷണിച്ചു. മത്സ്യത്തോടൊപ്പം പച്ചക്കറിയും വളർത്താൻ സാധിക്കുന്ന ജല ആവശ്യകത കുറഞ്ഞ നൂതന കൃഷി രീതിയാണ് ആർഎഎസ്. ജലത്തിലെ അമോണിയ നിയന്ത്രിച്ച് മത്സ്യത്തിന് ആവശ്യമായ സൂക്ഷ്മജീവികൾ അടങ്ങുന്ന ആഹാരം ടാങ്കിൽ തന്നെ ഉത്പാദിപ്പിച്ച് മത്സ്യം വളർത്തുന്ന കൃഷിരീതിയാണ് ബയോഫ്ലോക്ക്. ജലലഭ്യത കുറവുള്ള സ്ഥലങ്ങളിലും സ്വന്തമായി കുളങ്ങൾ ഇല്ലാത്തവർക്കും മത്സ്യ കൃഷി ചെയ്യാവുന്ന ഒന്നാണിത്.

മാടക്കത്തറ നാല് സെൻറ് കോളനിയിൽ നിർമിക്കാൻ പോകുന്ന വാട്ടർടാങ്കിന്റെയും മറ്റ് അനുബന്ധ പ്രവൃത്തികളുടെയും നിർമാണോദ്ഘാടനം ഗവ ചീഫ് വിപ്പ് അഡ്വ കെ രാജൻ   നിർവഹിച്ചു. മാടക്കത്തറ  ഗ്രാമപഞ്ചായത്ത് പ്രസിഡൻ്റ് പി എസ് വിനയൻ അധ്യക്ഷത വഹിച്ചു. എംഎൽഎയുടെ പ്രത്യേക വികസന ഫണ്ടിൽ നിന്നും 10 ലക്ഷം ചെലവഴിച്ചാണ് വാട്ടർ ടാങ്കും മറ്റ് അനുബന്ധ പ്രവൃത്തികളും പൂർത്തീകരിക്കുക. ഈ പ്രദേശത്തെ 80 കുടുംബങ്ങൾക്ക് കുടിവെള്ളം ലഭ്യമാക്കുന്ന പദ്ധതിയാണിത്. ചടങ്ങിൽ വാർഡ് മെമ്പർ സാവിത്രി രാമചന്ദ്രൻ, കുടിവെള്ള പദ്ധതി സെക്രട്ടറി കെ പി രാജേഷ് തുടങ്ങിയവർ പങ്കെടുത്തു.

വള്ളത്തോൾ നഗറിൽ പണി പൂർത്തിയാക്കിയ   സാംസ്‌കാരിക നിലയവും ഇ.കെ.നായനാർ സ്മാരക ഓപ്പൺ എയർ ഓഡിറ്റോറിയവും ഉദ്ഘാടനം ചെയ്തു. പരേതനായ മുൻ പഞ്ചായത്ത് പ്രസിഡൻ്റ് ടി.ആർ.നായരുടെ പേരിലുള്ള ലൈബ്രറിയും ഓഫീസ് മുറിയും ചേർന്നതാണ് സാംസ്‌കാരിക നിലയം. ജില്ലാ പഞ്ചായത്തിൻ്റെ 30 ലക്ഷം രൂപയാണ് പദ്ധതികൾക്കായി വിനിയോഗിച്ചത്. ജില്ലാ പഞ്ചായത്ത് മെമ്പർ കെ.പി.രാധാകൃഷ്ണൻ സാംസ്‌കാരിക നിലയവും പൊതു വേദിയും ഉദ്ഘാടനം ചെയ്തു. ആരോഗ്യ-വിദ്യാഭ്യാസ സ്റ്റാൻ്റിങ് കമ്മിറ്റി ചെയർപേഴ്സൺ അജിത രവികുമാർ, എം.ആർ.ജയകൃഷ്ണൻ, പി.നിർമ്മലദേവി, എ.കെ.പ്രതീഷ് കുമാർ, എം സുലൈമാൻ,  പി.കെ.അജയകുമാർ തുടങ്ങിയവർ ചടങ്ങിൽ പങ്കെടുത്തു.

കോവിഡ് രോഗികൾക്ക് മറ്റ് ചികിത്സാ സംബന്ധമായ പരിശോധന നടത്താനായി ഗവ മെഡിക്കൽ കോളേജിൽ പുതിയ ലാബ് പ്രവർത്തനം തുടങ്ങി. കോവിഡ് ട്രയാജ് ബ്ളോക്കിലാണ് പുതിയ ലാബിന്റ പ്രവർത്തനം. രോഗിയെ അഡ്മിറ്റ് ചെയ്യുമ്പോൾ തന്നെ ആരോഗ്യ സ്ഥിതി വിലയിരുത്തി വേണ്ട  പരിശോധനക്കാവശ്യമായ സാമ്പിളുകൾ ശേഖരിക്കും. പരിശോധന ഫലം വാർഡുകളിൽ നേരിട്ട് എത്തിക്കും.

2020-21 വര്‍ഷത്തേക്കുള്ള ബി.എസ്.സി നഴ്സിംഗ് ആന്‍ഡ് പാരാമെഡിക്കല്‍ ഡിഗ്രി കോഴ്സിലേക്കുള്ള ഒന്നാംഘട്ട അലോട്ട്മെന്റ് പ്രസിദ്ധീകരിച്ചതായി എല്‍.ബി.എസ് സെന്റര്‍ ഫോര്‍ സയന്‍സ് ആന്‍ഡ് ടെക്നോളജി ഡയറക്ടര്‍ അറിയിച്ചു. www.lbscentre.kerala.gov.in എന്ന വെബ്സൈറ്റില്‍ അലോട്ട്മെന്റ് വിവരങ്ങള്‍ ലഭിക്കും.  അലോട്ട്മെന്റില്‍ പേരുള്ളവര്‍ ഓണ്‍ലൈന്‍ മുഖേനയോ ഫെഡറല്‍ ബാങ്കിന്റെ ശാഖകളിലൂടെയോ നവംബര്‍ ആറിനു മുന്‍പ് ഫീസ് അടയ്ക്കണം.  കൂടുതല്‍ വിവരങ്ങള്‍ക്ക് 0471-2560363, 2560364.