ജില്ലയിൽ കോവിഡ് പ്രതിരോധ പ്രവർത്തനങ്ങൾ ഊർജ്ജിതമാക്കണമെന്നും മുൻപുണ്ടായിരുന്ന ജാഗ്രതയിൽ നിന്ന് പിറകോട്ടു പോകരുതെന്നും ജില്ലാ വികസന സമിതി യോഗം. കോവിഡിനെ മികച്ച രീതിയിൽ പ്രതിരോധിച്ച ജില്ലയാണ് തൃശൂർ. എന്നാൽ ഇപ്പോൾ കോവിഡ് രോഗികൾ വർധിക്കുന്ന സാഹചര്യത്തിൽ ശ്രദ്ധക്കുറവുണ്ടായോ എന്നും വികസന സമിതി ആശങ്ക രേഖപ്പെടുത്തി. നിയോജക മണ്ഡലാടിസ്ഥാനത്തിൽ എം എൽ എമാരുടെ നേതൃത്വത്തിൽ പ്രതിരോധം ശക്തിപ്പെടുത്തണം. തദ്ദേശ സ്ഥാപനങ്ങൾ ഇത് ഉറപ്പു വരുത്തണമെന്നും അങ്ങനെ പഴയ നിലയിലേക്ക് തിരിച്ചു പോകാനാകുമെന്നും അധ്യക്ഷത വഹിച്ച ജില്ലാ കലക്ടർ എസ് ഷാനവാസ് പറഞ്ഞു.

ജല ജീവൻ മിഷൻ കുടിവെള്ള പദ്ധതിക്ക് കൊടകരയിൽ തുടക്കം. പഞ്ചായത്ത്‌ പ്രസിഡന്റ്‌ പി ആർ പ്രസാദൻ ഉദ്ഘാടനം നിർവഹിച്ചു. 3.40 കോടി രൂപ ചെലവിൽ 1976 കുടിവെള്ള കണക്ഷനുകൾ നൽകും. കേന്ദ്ര സംസ്ഥാന സർക്കാരുകളുടെ 75% പഞ്ചായത്തിന്റെ 15%  ഉപഭോക്താക്കളുടെ 10%  എന്നിങ്ങനെയാണ് പദ്ധതി വിഹിതം. പഞ്ചായത്ത്‌ വൈസ് പ്രസിഡന്റ്‌ കെ എസ് സുധ, പഞ്ചായത്ത്‌ അംഗങ്ങളായ ഇ എൻ പാപ്പച്ചൻ, മിനി ദാസൻ, ഓവർ സിയർ സി എൻ ലിഷ, എ ഇ വാസുദേവൻ കെ കെ തുടങ്ങിയവർ പങ്കെടുത്തു.

ജില്ലകളില്‍ പി.ആര്‍.ഡിയുടെ വീഡിയോ സ്ട്രിംഗര്‍ പാനല്‍ രൂപീകരിക്കുന്നതിന് അപേക്ഷ ക്ഷണിച്ചു. ബന്ധപ്പെട്ട ജില്ലാ ഇന്‍ഫര്‍മേഷന്‍ ഓഫീസുകളിലാണ് അപേക്ഷ സമര്‍പ്പിക്കേണ്ടത്. യോഗ്യത: ദൃശ്യമാധ്യമ രംഗത്ത് വാര്‍ത്താ വിഭാഗത്തില്‍ കുറഞ്ഞത് ഒരു വര്‍ഷത്തെ പ്രവൃത്തി പരിചയം, അപേക്ഷിക്കുന്ന ജില്ലയില്‍ സ്ഥിര താമസക്കാരനാകണം,  പ്രീഡിഗ്രി/പ്ലസ്ടു അഭിലഷണീയം, സ്വന്തമായി ഫുള്‍ എച്ച്.ഡി. പ്രൊഫഷണല്‍ ക്യാമറ, ഡ്രൈവിംഗ് ലൈസന്‍സ് ഉണ്ടാകണം, ദൃശ്യങ്ങള്‍ വേഗത്തില്‍ അയക്കുന്നതിനുള്ള സംവിധാനവും പരിജ്ഞാനവും ഉണ്ടാകണം. അപേക്ഷിക്കേണ്ട അവസാന തീയതി: നവംബര്‍ 20.

ജില്ലയില്‍ നല്ലേപ്പിള്ളി ഗ്രാമപഞ്ചായത്തിലെ വാര്‍ഡ് പത്ത് - വാക്കിനിചള്ള, വാര്‍ഡ് പതിനാല് - ആണ്ടിത്തറ - പന്നിപെരുന്തല, പന്നിപെരുന്തല - പുളിങ്കോട്, പട്ടഞ്ചേരി ഗ്രാമപഞ്ചായത്തിലെ വാര്‍ഡ് അഞ്ച് തണ്ണീര്‍പന്തല്‍ - അമ്പലപറമ്പ്, വാര്‍ഡ് പതിനാല് കല്ലന്‍കാട് - തെക്കേപറമ്പ് എന്നീ സ്ഥലങ്ങളില്‍ ഓരോ 150 mm  ( 6') കുഴല്‍കിണര്‍ നിര്‍മ്മിക്കുന്നതിന് അംഗീകൃത കരാറുകാരില്‍ നിന്നും ദര്‍ഘാസ് ക്ഷണിച്ചു. ദര്‍ഘാസുകള്‍ സമര്‍പ്പിക്കേണ്ട അവസാന തിയ്യതി നവംബര്‍ ഒമ്പത്. ഫോണ്‍ - 0491 2528471.

ഗവ.വിക്ടോറിയ കോളേജില്‍ സുവോളജി വിഭാഗത്തിന് സമീപത്ത് അക്കാദമിക് നോളേജ് സെന്റര്‍ നിര്‍മ്മാണ സ്ഥലത്തെ രണ്ട് മഴ മരങ്ങള്‍ നവംബര്‍ 10ന് ഉച്ചയ്ക്ക് 12ന്  കോളേജ് പ്രിന്‍സിപ്പാള്‍ ഓഫീസില്‍ പരസ്യമായി ലേലം ചെയ്യും. ലേലത്തില്‍ പങ്കെടുക്കാന്‍ താത്പര്യമുള്ളവര്‍ അന്നേദിവസം 500 രൂപ നിരതദ്രവ്യം അടച്ച് രജിസ്റ്റര്‍ ചെയ്യണം. ഫോണ്‍: 0491 2576773.

 
പട്ടഞ്ചേരി ഗ്രാമപഞ്ചായത്തിലെ നവീകരിച്ച വടതോട് കുളത്തിന്റെ ഉദ്ഘാടനം ഇന്ന് (നവംബര്‍ 5) ഉച്ചയ്ക്ക് 12.30ന് കൃഷി, മണ്ണ് പര്യവേക്ഷണ, മണ്ണ് സംരക്ഷണ വകുപ്പ് മന്ത്രി അഡ്വ.വി.എസ്. സുനില്‍കുമാര്‍ ഓണ്‍ലൈനായി നിര്‍വഹിക്കും. ജലവിഭവവകുപ്പ് മന്ത്രി കെ.കൃഷ്ണന്‍കുട്ടി അധ്യക്ഷനാകും.

ജില്ലാ പഞ്ചായത്ത് പറപ്പൂക്കര ഡിവിഷനിൽ കലാഭവൻ മണി സ്മാരക ഇൻഡോർ സ്റ്റേഡിയം നാടിന് സമർപ്പിച്ചു. 2019-20 ജനകീയാസൂത്രണം വാർഷിക പദ്ധതിയിൽ ഉൾപ്പെടുത്തി 35 ലക്ഷം വിനിയോഗിച്ചാണ് ഇൻഡോർ സ്റ്റേഡിയത്തിൻ്റെ നിർമാണം പൂർത്തീകരിച്ചത്.  മുരിയാട് പഞ്ചായത്തിലെ ആറാം വാർഡിൽ നിർമ്മിച്ച ഇൻഡോർ സ്റ്റേഡിയത്തിൻ്റെ ഉദ്ഘാടനം  ജില്ലാ പഞ്ചായത്ത് പ്രസിഡൻ്റ് മേരി തോമസ് നിർവഹിച്ചു. ജില്ലാ പഞ്ചായത് അംഗം ടി ജി ശങ്കരനാരായണൻ അദ്ധ്യക്ഷത വഹിച്ചു.