ഗാര്‍ഹിക ഉപഭോക്താക്കള്‍ക്ക് സബ്‌സിഡി സ്‌കീമില്‍ സൗരോര്‍ജ്ജ നിലയം സ്ഥാപിക്കുന്നതിനായി അനെര്‍ട്ട് അപേക്ഷ ക്ഷണിച്ചു.  www.buymysun.com വെബ് പോര്‍ട്ടലില്‍ രജിസ്റ്റര്‍ ചെയ്ത് ആവശ്യമായ രേഖകള്‍ സഹിതം അപേക്ഷിക്കാം.  ആദ്യ മൂന്ന് കിലോവാട്ടിന് 40% സബ്‌സിഡിയും, അധികമായി വരുന്ന 10 കിലോവാട്ട് വരെയുളള നിലയങ്ങള്‍ക്ക് ഓരോ കിലോവാട്ടിനും 20 ശതമാനം സബ്‌സിഡിയും ലഭ്യമാകും.  മുന്‍ഗണനാ ക്രമമനുസരിച്ച് സാധ്യത പഠനം നടത്തിയാകും നിലയങ്ങള്‍ സ്ഥാപിക്കുക.

തൃശൂർ ജില്ലാ പഞ്ചായത്ത് പറപ്പൂക്കര ഡിവിഷനിൽ ആലത്തൂരിൽ ചെക്ക്ഡാം നിർമ്മാണോദ്ഘാടനം നടന്നു. ജില്ലാ പഞ്ചായത്തിൻ്റെ 2019-20 വാർഷിക പദ്ധതിയിൽ ഉൾപ്പെടുത്തി 20 ലക്ഷം വിനിയോഗിച്ചാണ് പറപ്പൂക്കര പഞ്ചായത്തിലെ ആലത്തൂരിൽ  ചെക്ക്ഡാം നിർമ്മിക്കുന്നത്. ചെക്ക്ഡാമിൻ്റെ നിർമ്മാണോദ്ഘാടനം ജില്ലാ പഞ്ചായത്ത് അംഗം ടി ജി ശങ്കരനാരായണൻ ഉദ്ഘാടനം ചെയ്തു. ആലത്തൂർ, വയലൂർ, നെല്ലായി പ്രദേശങ്ങളിലെ ഏകദേശം 500 ഏക്കറിൽ കൃഷി ചെയ്യുന്നതിനും കുടിവെള്ള ക്ഷാമത്തിന് പരിഹാരം കാണുന്നതിനും ഈ പദ്ധതി ഉപകാരിക്കും. പറപ്പൂക്കര പഞ്ചായത്ത് പ്രസിഡൻ്റ് കാർത്തിക ജയൻ അദ്ധ്യക്ഷത വഹിച്ച ചടങ്ങിൽ പഞ്ചായത്ത് അംഗം ജലജ തിലകൻ ആശംസകൾ നേർന്നു.

ജില്ലയില്‍ പ്രവര്‍ത്തനസജ്ജമായ ആറു കുടുംബാരോഗ്യ കേന്ദ്രങ്ങളുടെ ഉദ്ഘാടനം ഇന്ന്(05 നവംബര്‍) രാവിലെ 10ന് ആരോഗ്യമന്ത്രി കെ.കെ. ശൈലജ ടീച്ചര്‍ വീഡിയോ കോണ്‍ഫറന്‍സിലൂടെ നിര്‍വഹിക്കും.  മുദാക്കല്‍, മംഗലപുരം, പുതുകുറിച്ചി, തോണിപ്പാറ, മുക്കോല, പൂന്തുറ എന്നിവയാണ് ഉദ്ഘാടനം ചെയ്യുന്ന കുടുംബാരോഗ്യ കേന്ദ്രങ്ങള്‍.  ആര്‍ദ്രം മിഷന്റെ ഭാഗമായാണ് പ്രാഥമികാരോഗ്യ കേന്ദ്രങ്ങളെ കുടുംബാരോഗ്യ കേന്ദ്രങ്ങളാക്കി ഉയര്‍ത്തിയത്.  ആര്‍ദ്രം മിഷന്റെ ഒന്നാംഘട്ടത്തില്‍ 170 പ്രാഥമികാരോഗ്യ കേന്ദ്രങ്ങളും രണ്ടാംഘട്ടത്തില്‍ 503 പ്രാഥമികാരോഗ്യ കേന്ദ്രങ്ങളുമാണ് കുടുബാരോഗ്യ കേന്ദ്രമായി ഉയര്‍ത്താന്‍ സര്‍ക്കാര്‍ തീരുമാനിച്ചത്.

ജില്ലയിലെ 13 വില്ലേജ് ഓഫിസുകള്‍കൂടി സ്മാര്‍ട്ട് വില്ലേജ് ഓഫിസുകളാകുന്നു. മുഖ്യമന്ത്രി പിണറായി വിജയന്‍ ഇവയുടെ നിര്‍മാണോദ്ഘാടനം നിര്‍വഹിച്ചു.  വില്ലേജ് ഓഫിസുകള്‍ സ്മാര്‍ട്ട് ആകുന്നതോടെ റവന്യൂ സേവനങ്ങള്‍ കൂടുതല്‍ വേഗത്തിലും കാര്യക്ഷമമായും ജനങ്ങള്‍ക്കു ലഭിക്കും.

തൃശൂർ ജില്ലയിൽ ശനിയാഴ്ച (31/10/2020) 1112 പേർക്ക് കൂടി കോവിഡ്-19 സ്ഥീരികരിച്ചു. 582 പേർ രോഗമുക്തരായി. ജില്ലയിൽ രോഗബാധിതരായി ചികിത്സയിൽ കഴിയുന്നവരുടെ എണ്ണം 10437 ആണ്. തൃശൂർ സ്വദേശികളായ 79 പേർ മറ്റു ജില്ലകളിൽ ചികിത്സയിൽ കഴിയുന്നു. ജില്ലയിൽ ഇതുവരെ കോവിഡ് സ്ഥീരികരിച്ചവരുടെ എണ്ണം 39,771 ആണ്. 29,006 പേരെയാണ് ആകെ രോഗമുക്തരായി ആശുപത്രിയിൽ നിന്നും ഡിസ്ചാർജ് ചെയ്തത്.  

മലക്കപ്പാറ പൊലീസ് സ്റ്റേഷൻ പുതിയ കെട്ടിടത്തിന്റെ ഉദ്ഘാടനം ഒക്ടോബർ ഒന്നിന് രാവിലെ 10 മണിക്ക് മുഖ്യമന്ത്രി പിണറായി വിജയൻ ഓൺലൈനായി നിർവഹിക്കും. തദ്ദേശ സ്വയംഭരണ വകുപ്പ് മന്ത്രി എ സി മൊയ്‌തീൻ, ബെന്നി ബെഹനാൻ എം പി, ബി ഡി ദേവസ്സി എം എൽ എ, അതിരപ്പിള്ളി പഞ്ചായത്ത്‌ പ്രസിഡന്റ്‌ തങ്കമ്മ വർഗീസ്, സംസ്ഥാന പൊലീസ് മേധാവി ലോക്നാഥ്‌ ബെഹ്‌റ, ക്രമസമാധാന ചുമതലയുള്ള എ ഡി ജി പി ഷേക്ക് ദർവേഷ് സാഹിബ്‌, ഉത്തര മേഖല ഐ ജി അശോക് യാദവ്, തൃശൂർ റൂറൽ  ജില്ലാ പൊലീസ് മേധാവി ആർ വിശ്വനാഥ്‌ തുടങ്ങിയവർ പങ്കെടുക്കും.

Reply all

ജില്ലാ പഞ്ചായത്ത് പറപ്പൂക്കര ഡിവിഷനിൽ കലാഭവൻ മണി സ്മാരക ഇൻഡോർ സ്റ്റേഡിയം നാടിന് സമർപ്പിച്ചു. 2019-20 ജനകീയാസൂത്രണം വാർഷിക പദ്ധതിയിൽ ഉൾപ്പെടുത്തി 35 ലക്ഷം വിനിയോഗിച്ചാണ് ഇൻഡോർ സ്റ്റേഡിയത്തിൻ്റെ നിർമാണം പൂർത്തീകരിച്ചത്.  മുരിയാട് പഞ്ചായത്തിലെ ആറാം വാർഡിൽ നിർമ്മിച്ച ഇൻഡോർ സ്റ്റേഡിയത്തിൻ്റെ ഉദ്ഘാടനം  ജില്ലാ പഞ്ചായത്ത് പ്രസിഡൻ്റ് മേരി തോമസ് നിർവഹിച്ചു. ജില്ലാ പഞ്ചായത് അംഗം ടി ജി ശങ്കരനാരായണൻ അദ്ധ്യക്ഷത വഹിച്ചു.

ഐരാണിക്കുളം ഗവ ഹയര്‍സെക്കൻ്ററി സ്കൂളിലെ പുതിയ ഹൈസ്കൂൾ വിഭാഗം കെട്ടിടത്തിന്റെ നിർമ്മാണോദ്ഘാടനം പൊതു വിദ്യാഭ്യാസ വകുപ്പ് മന്ത്രി പ്രൊഫ സി രവീന്ദ്രനാഥ്‌ ഓൺലൈലൈനായി നിർവഹിച്ചു. ഭൗതിക സാഹചര്യങ്ങൾ മെച്ചപ്പെടുന്നതോടൊപ്പം അക്കാദമിക മികവിലും പൊതു വിദ്യാലയങ്ങൾ മുന്നിട്ട് നിൽ  ക്കേണ്ടതുണ്ടെന്ന് മന്ത്രി പറഞ്ഞു. ഇതിനായി അധ്യാപകരുടെ ഭാഗത്ത്‌ നിന്നും നല്ല സഹകരണം ഉറപ്പാക്കണം. വി ആർ സുനിൽ കുമാർ എം എൽ എ അധ്യക്ഷത വഹിച്ചു.2019-20 ലെ സംസ്ഥാന ബഡ്ജറ്റിൽ അനുവദിച്ച ഒരു കോടി രൂപ ചെലവിലാണ് ഹൈ സ്കൂൾ വിഭാഗത്തിന് പുതിയ കെട്ടിടം ഒരുങ്ങുന്നത്.

നടത്തറയിൽ പുതുതായി നിർമിക്കുന്ന സ്മാർട്ട് വില്ലേജ് ഓഫീസിന്റെ നിർമാണോദ്ഘാടനം നവംബർ 4 ന് രാവിലെ 11.30 ന് മുഖ്യമന്ത്രി പിണറായി വിജയൻ വീഡിയോ കോൺഫറൻസിലൂടെ  നിർവഹിക്കും. റവന്യൂ വകുപ്പ് മന്ത്രി ഇ ചന്ദ്രശേഖരൻ അധ്യക്ഷത വഹിക്കും. 44 ലക്ഷം രൂപ ചെലവഴിച്ചാണ് റവന്യൂ വകുപ്പ് നടത്തറയിൽ സ്മാർട്ട്‌  വില്ലേജ് ഓഫീസ് നിർമ്മിക്കുന്നത്. ഗവ ചീഫ് വിപ്പ് അഡ്വ കെ രാജൻ, നടത്തറ ഗ്രാമപഞ്ചായത്ത് പ്രസിഡൻ്റ് പി ആർ രജിത്ത് തുടങ്ങിയവർ പങ്കെടുക്കും.

പാറളം കുടുംബാരോഗ്യ കേന്ദ്രത്തിൽ 2019 -20 വർഷത്തെ വികസന പദ്ധതിയിൽ ഉൾപ്പെടുത്തി 5 ലക്ഷം ചെലവഴിച്ച് പുതിയ ജനറേറ്റർ സ്ഥാപിച്ചു. 2020-21 വാർഷിക പദ്ധതിയിൽ ഉൾപ്പെടുത്തി 3,25,000 രൂപ ചെലവഴിച്ച്  ആശുപത്രിയിലേക്കുള്ള നടപ്പാത ടൈൽ വിരിച്ചു. കൂടാതെ വിഷൻ സെന്ററും പ്രവർത്തനമാരംഭിച്ചു. ഈ  പ്രവർത്തനങ്ങളുടെ ഉദ്ഘാടനം പാറളം ഗ്രാമപഞ്ചായത്ത് പ്രസിഡൻറ് സദീപ് ജോസഫ് നിർവഹിച്ചു. വൈസ് പ്രസിഡൻറ് വത്സല ദിവാകരൻ  അധ്യക്ഷയായി.