പട്ടാമ്പി ഗവ. സംസ്‌കൃത കോളേജിലെ 2025-26 വര്‍ഷത്തെ ഒന്നാം വര്‍ഷ ബിരുദാനന്തര ബിരുദ കോഴ്‌സുകളില്‍ സീറ്റുകള്‍ ഒഴിവുണ്ട്. എം.എ. ഇക്കണോമിക്സ് (ഒബിഎക്‌സ് 1), എംഎസ്‌സി കെമിസ്ട്രി (എസ്.സി/എസ്.ടി 1) എന്നിങ്ങനെയാണ് ഒഴിവുകള്‍. യോഗ്യരായ വിദ്യാര്‍ത്ഥികള്‍ നാളെ (ആഗസ്റ്റ് 26) വൈകീട്ട് നാലിനുള്ളില്‍ സര്‍ട്ടിഫിക്കറ്റുകളുമായി അതത് വകുപ്പ് മേധാവികള്‍ മുന്‍പാകെ ഹാജരാകണം. ഫോണ്‍: 8921816429

മലപ്പുറം ഗവ. കോളേജില്‍ ഒന്നാംവര്‍ഷ എം.എസ്.സി  സ്റ്റാറ്റിസ്റ്റിക്‌സ് ക്ലാസുകളിലേക്ക് ഒഴിവുണ്ട്. എസ്.സി, എസ്.ടി, ഇ.ഡബ്ലി.യു.എസ് എന്നീ വിഭാഗങ്ങളില്‍ ഓരോ സീറ്റുകള്‍ വീതമാണുള്ളത്. കാലിക്കറ്റ് യൂണിവേഴ്‌സിറ്റിയില്‍ ഓണ്‍ലൈന്‍ രജിസ്‌ട്രേഷന്‍ നടത്തി ക്യാപ് ഐഡി നേടിയ വിദ്യാര്‍ത്ഥികള്‍ക്ക് സ്‌പോട്ട് അഡ്മിഷന് അപേക്ഷിക്കാം. യോഗ്യത തെളിയിക്കുന്ന അസ്സല്‍ രേഖകളുമായി ഓഗസ്റ്റ് 26ന് ഉച്ചയ്ക്ക് രണ്ടുമണിക്കകം കോളേജ് ഓഫീസില്‍ റിപ്പോര്‍ട്ട് ചെയ്യണം.

വേങ്ങര നിയോജക മണ്ഡലത്തില്‍ ഹോര്‍ട്ടികള്‍ച്ചറല്‍ മിഷന്‍ പദ്ധതി പ്രകാരം ഈ വര്‍ഷം നടപ്പാക്കുന്ന കൂണ്‍ഗ്രാമം പദ്ധതി പ്രകാരമുള്ള ആനുകൂല്യങ്ങള്‍ക്ക് അപേക്ഷ ക്ഷണിച്ചു. ഒതുക്കുങ്ങല്‍, അബ്ദുറഹ്‌മാന്‍ നഗര്‍, എടരിക്കോട്, കണ്ണമംഗലം, പറപ്പൂര്‍, ഊരകം, തെന്നല, വേങ്ങര പഞ്ചായത്തുകളിലെ കര്‍ഷകര്‍ക്ക് സെപ്റ്റംബര്‍ 10നകം കൃഷിഭവനുകളില്‍ അപേക്ഷിക്കാം. ചെറുകിട കൂണ്‍ ഉല്‍പാദന യൂണിറ്റ്, വന്‍കിട കൂണ്‍ ഉല്‍പാദന യൂണിറ്റ്, കൂണ്‍ വിത്ത് ഉല്‍പാദന യൂണിറ്റ്, കൂണ്‍ സംസ്‌കരണ യൂണിറ്റ്, പാക്ക് ഹൗസ്, തുടങ്ങിയവയ്ക്കുള്ള ആനുകൂല്യങ്ങളാണ് പദ്ധതി പ്രകാരം ലഭിക്കുക. ഫോണ്‍: 9383471694

ജില്ലാ എംപ്ലോയ്‌മെന്റ് എക്‌സ്‌ചേഞ്ച്, എംപ്ലോയബിലിറ്റി സെന്ററിന്റെ ആഭിമുഖ്യത്തില്‍ സംഘടിപ്പിക്കുന്ന ജോബ് ഫെയര്‍ ആഗസ്റ്റ് 29 ന് രാവിലെ 10 മുതല്‍ ഉച്ചയ്ക്ക് 1.30 വരെ മലപ്പുറം എംപ്ലോയബിലിറ്റി സെന്ററില്‍ വെച്ച് നടക്കും.  നൂറിലധികം ഒഴിവുകള്‍ റിപ്പോര്‍ട്ട് ചെയ്തിട്ടുണ്ട്. നാല് പ്രമുഖ സ്ഥാപനങ്ങളിലേക്കായി നടക്കുന്ന ജോബ് ഫെയറില്‍ ഡെലിവറി പാര്‍ട്ണര്‍, വീഡിയോ എഡിറ്റര്‍ ആന്‍ഡ് ക്യാമറ ഓപ്പറേറ്റര്‍, ട്യൂഷന്‍ അധ്യാപകര്‍, ഫാര്‍മസിസ്റ്റ്, ബില്ലിംഗ് സ്റ്റാഫ് എന്നീ ഒഴിവുകളുണ്ട്.

എടപ്പാള്‍ ഗവ. ഐ.ടി.ഐയില്‍ ഫാഷന്‍ ഡിസൈന്‍ ആന്‍ഡ് ടെക്‌നോളജി ട്രേഡില്‍ ഒഴിവുള്ള സീറ്റുകളിലേക്ക് സ്‌പോട്ട് അഡ്മിഷന്‍ നടത്തുന്നു. ഓഗസ്റ്റ് 26 മുതല്‍ 30 വരെയാണ് അഡ്മിഷന്‍ നടക്കുക. അപേക്ഷകള്‍ എല്ലാ ദിവസവും ഉച്ചയ്ക്ക് 12.30 വരെ സ്വീകരിക്കും. പ്രവേശനം നേടാന്‍ ആഗ്രഹിക്കുന്നവര്‍ അസ്സല്‍ സര്‍ട്ടിഫിക്കറ്റുകളും പകര്‍പ്പുകളും സഹിതം നേരിട്ട് മാറഞ്ചേരി ഗവ. ഐ.ടി.ഐ ഓഫീസില്‍ അപേക്ഷ സമര്‍പ്പിക്കണം.
ഫോണ്‍: 9744489127

മഞ്ചേരി ഗവ. മെഡിക്കല്‍ കോളേജിലെ മൈക്രോബയോളജി വിഭാഗത്തിന് കീഴില്‍ പ്രവര്‍ത്തിക്കുന്ന വൈറോളജി ലാബിലേക്ക് സയിന്റിസ്റ്റ് ബി (മെഡിക്കല്‍) തസ്തികയിലേക്ക് കരാര്‍ അടിസ്ഥാനത്തില്‍ നിയമനം നടത്തുന്നു.  യോഗ്യരായ ഉദ്യോഗാര്‍ത്ഥികള്‍ ഓഗസ്റ്റ് 29ന് രാവിലെ 10 ന് മെഡിക്കല്‍ കോളേജിലെ അക്കാഡമിക് ബ്ലോക്ക്  || ല്‍ ഒറിജിനല്‍ സര്‍ട്ടിഫിക്കറ്റുകള്‍ സഹിതം എത്തിച്ചേരണം.

കോട്ടക്കല്‍ നഗരസഭാ പരിധിയിൽ അങ്കണവാടി ഹെല്‍പ്പർ ഒഴിവുകളിലേക്ക് അപേക്ഷ ക്ഷണിച്ചു. 18 നും 46 ഇടയിലുള്ള പത്താം ക്ലാസ്സ് പാസാകാത്തവരായിരിക്കണം. നഗരസഭാ പരിധിയില്‍ സ്ഥിര താമസക്കാരായിരിക്കണം. അപേക്ഷയോടൊപ്പം വിദ്യാഭ്യാസ യോഗ്യത, വയസ്, ജാതി, സ്ഥിരതാമസം (കോട്ടക്കല്‍ നഗരസഭ സെക്രട്ടറി സക്ഷ്യപ്പെടുത്തിയ ആറു മാസത്തില്‍ കുറയാത്തത്) പ്രവൃത്തിപരിചയം എന്നിവ തെളിയിക്കുന്ന രേഖകളുടെ സാക്ഷ്യപ്പെടുത്തിയ പകര്‍പ്പുകള്‍ സഹിതം സെപ്റ്റംബര്‍ 25 വരെ അപേക്ഷിക്കാം. ശിശുവികസന പദ്ധതി ഓഫീസര്‍, മലപ്പുറം റൂറല്‍, പൊന്മള പഞ്ചായത്ത് ഓഫീസിനു സമീപം, ചാപ്പനങ്ങാടി പി.ഒ. മലപ്പുറം ജില്ല, 676503 എന്ന വിലാസത്തില്‍ അപേക്ഷ ലഭിക്കണം.

ഓണത്തോടനുബന്ധിച്ച് കയര്‍ ഫെഡിൻ്റെ സഞ്ചരിക്കുന്ന ഓണവിപണനമേള ജില്ലയില്‍ നാളെ (ആഗസ്റ്റ് 26) മുതല്‍ തുടങ്ങും. ആഗസ്റ്റ് 26- പൊന്നാനി മിനി സിവില്‍ സ്റ്റേഷന്‍, 27, 28- തിരൂര്‍ മിനി സിവില്‍ സ്റ്റേഷന്‍, 29,30-കാലിക്കറ്റ് യൂണിവേഴ്‌സിറ്റി ബസ് സ്റ്റോപ്പ് എന്നിവിടങ്ങളില്‍ മേള ഉണ്ടാകും. ആഗസ്റ്റ് 27 മുതല്‍ സെപ്റ്റംബര്‍ 15 വരെ അരിയല്ലൂര്‍ സര്‍വീസ് സഹകരണ ബാങ്കിന്റെ ആഭിമുഖ്യത്തില്‍ ഹെഡ് ഓഫീസിന് സമീപം കയര്‍ഫെഡ് ഓണം വിപണമേള നടക്കും. മേളയില്‍ ഉല്‍പ്പന്നങ്ങള്‍ക്ക് 30 ശതമാനം മുതല്‍ 50 ശതമാനം വരെ ശതമാനം വിലക്കുറവും 2000 രൂപയ്ക്ക് മുകളിലുള്ള ഓരോ ബില്ലിനും സമ്മാന കൂപ്പണും ലഭിക്കും. ഫോണ്‍: 0483 2731806

സപ്ലൈകോ മലപ്പുറം ജില്ലാ ഓണം ഫെയറിന് നാളെ (ഓഗസ്റ്റ് 26) തുടക്കമാകും. രാവിലെ 10.30 ന് മലപ്പുറം പെരിന്തല്‍മണ്ണ റോഡിലെ ഡാലിയ കെപിസ് അവന്യൂവില്‍ നടക്കുന്ന പരിപാടി ന്യൂനപക്ഷ ക്ഷേമ-കായിക-വഖഫ് വകുപ്പ് മന്ത്രി വി. അബ്ദുറഹ്‌മാന്‍ ഉദ്ഘാടനം ചെയ്യും. സപ്ലൈകോയുടെ സഞ്ചരിക്കുന്ന ഓണചന്തയുടെ ഫ്‌ലാഗ് ഓഫും അദ്ദേഹം നിര്‍വഹിക്കും. പി. ഉബൈദുള്ള എംഎല്‍എ അധ്യക്ഷത വഹിക്കും.

നബാര്‍ഡിന്റെ സഹകരണത്തോടെ കുടുംബശ്രീ ജില്ലാ മിഷനും വള്ളിക്കുന്ന് ഗ്രാമപഞ്ചായത്തും സംയുക്തമായി സംഘടിപ്പിക്കുന്ന ജില്ലാതല ഓണം മേളയ്ക്കും, വിപണന മേളയ്ക്കും ആഗസ്റ്റ് 30ന് തുടക്കമാവും. മേള ആഗസ്റ്റ് 30ന് വൈകിട്ട് 4.30ന് കായിക, ഹജ്ജ് വഖഫ് വകുപ്പ് മന്ത്രി വി. അബ്ദുറഹിമാന്‍ ഉദ്ഘാടനം ചെയ്യും.