വായു ചുഴലിക്കാറ്റിന്റെ സാഹചര്യത്തില്‍ സംസ്ഥാനത്ത്  ഒറ്റപ്പെട്ടയിടങ്ങളില്‍ ശക്തമായ മഴയ്ക്ക് സാധ്യതയുള്ളതായി കേന്ദ്ര കാലാവസ്ഥ കേന്ദ്രം  മുന്നറിയിപ്പിനെ തുടര്‍ന്ന് ജില്ലയില്‍ ജൂണ്‍ 12 നും 15നും മഞ്ഞ അലേര്‍ട്ട് പ്രഖ്യാപിച്ചു.  മണിക്കൂറില്‍ 40-50 കി.മീ വേഗതയില്‍ ശക്തമായ കാറ്റ് വീശാന്‍ സാധ്യതയുള്ളതിനാല്‍ മത്സ്യ തൊഴിലാളികള്‍ ജൂണ്‍ 13 വരെ കടലില്‍ പോകരുതെന്ന് സംസ്ഥാന ദുരന്തനിവാരണ അതോറിറ്റി അറിയിച്ചു. തീരപ്രദേശങ്ങളില്‍ കടലാക്രമണം ശക്തമാകാനും സാധ്യതയുണ്ട്.

പെരിന്തല്‍മണ്ണ ഗവ. പോളിടെക്‌നിക് കോളജില്‍ സിവില്‍ എഞ്ചിനീയറിങ്,   ഇലക്‌ട്രോണിക്‌സ് എഞ്ചിനീയറിങ്, എന്നീ  ബ്രാഞ്ചുകളില്‍ ഒഴിവുളള    ഡമോണ്‍സ്‌ട്രേറ്റര്‍  തസ്തികയിലേക്ക്    താത്കാലിക നിയമനത്തിന് അപേക്ഷ ക്ഷണിച്ചു.  ബന്ധപ്പെട്ട എഞ്ചിനീയറിങ് ശാഖയില്‍ ഡിപ്‌ളോമയാണ്  യോഗ്യത. താത്പര്യമുളളവര്‍ ജൂണ്‍ 13 ന് രാവിലെ 10 ന്  അസല്‍ സര്‍ട്ടിഫിക്കറ്റുകളും പകര്‍പ്പും  സഹിതം   കൂടിക്കാഴ്ചയ്ക്ക് ഹാജരാകണം.  

കേരള കള്ളുവ്യവസായ തൊഴിലാളി ക്ഷേമനിധി ബോര്‍ഡില്‍ അടവാക്കാനുള്ള കുടിശ്ശിക തുക പലിശ ഇളവ് ചെയ്ത് ഒറ്റത്തവണ തീര്‍പ്പാക്കല്‍ പദ്ധതി പ്രകാരം തീര്‍പ്പാക്കാനുള്ള കാലാവധി ആഗസ്റ്റ് 22 വരെ ദീര്‍ഘിപ്പിച്ചു.  ഫോണ്‍ 0483 2734827.

മലപ്പുറം ഗവ. കോളേജില്‍ മൂന്ന്, നാല് സെമസ്റ്ററുകളില്‍ വിവിധ ഡിഗ്രി കോഴ്‌സുകളില്‍ സീറ്റൊഴിവുണ്ട്.  അപേക്ഷ ജൂണ്‍ 13നകം കോളജില്‍ ലഭിക്കണം.

 സി. എച്ച്. എം. കെ. എം ഗവ.ആര്‍ട്‌സ് &സയന്‍സ് കോളേജ്  താനൂരില്‍ ബി. എസ്. സി ഇലക്ട്രോണിക്‌സ്, ബി. എ ഇംഗ്ലീഷ് എന്നീ കോഴ്‌സുകളില്‍ ഒഴിവുണ്ട്.  കോളജ് ട്രാന്‍സ്ഫര്‍ മുഖേന പ്രവേശനം നേടാന്‍ ആഗ്രഹിക്കുന്ന വിദ്യാര്‍ത്ഥികള്‍ ജൂണ്‍ 13ന് വൈകുന്നേരം നാലിനകം കോളേജ് ഓഫീസില്‍ യോഗ്യതാ സര്‍ട്ടിഫിക്കറ്റുകളുടെ സ്വയം സാക്ഷ്യപ്പെടുത്തിയ പകര്‍പ്പുകള്‍ സഹിതം അപേക്ഷിക്കണം.

തവനൂര്‍ വൃദ്ധമന്ദിരത്തില്‍ എംപ്ലോയ്‌മെന്റ് എക്‌സ്‌ചേഞ്ച് മുഖേന മെയില്‍/ ഫീമെയില്‍ അറ്റന്റന്റ് തസ്തികയിലേക്ക് ജൂണ്‍ 13ന്  നടത്താനിരുന്ന ഇന്റര്‍വ്യൂ മാറ്റി വെച്ചു.

മഞ്ചേരി പോസ്റ്റല്‍ സൂപ്രണ്ട് ഓഫീസില്‍ ജൂണ്‍ 25ന് വൈകുന്നേരം മൂന്നിന് തപാല്‍ പെന്‍ഷന്‍ / കുടുംബ പെന്‍ഷന്‍കാര്‍ക്കായി അദാലത്ത് നടത്തുന്നു.  മഞ്ചേരി തപാല്‍ ഡിവിഷനിലെ പരാതികളാണ് അദാലത്തില്‍ പരിഗണിക്കുക.  അപേക്ഷ കെ.പി. സുരേഷ്‌കുമാര്‍, പോസ്റ്റല്‍ സൂപ്രണ്ട്, മഞ്ചേരി ഡിവിഷന്‍, മഞ്ചേരി വിലാസത്തില്‍ ജൂണ്‍ 21നകം ലഭിക്കണം.

ഐ.എച്ച്.ആര്‍.ഡിയുടെ തിരൂര്‍ സെന്ററില്‍ പി.ജി.ഡി.സി.എ (യോഗ്യത ബിരുദം), ഡി.സി.എ (യോഗ്യത പ്ലസ്ടു) ഡാറ്റാ എന്‍ട്രി ടെക്‌നീഷ്യന്‍ ആന്‍ഡ് ഓഫീസ് ഓട്ടോമേഷന്‍ (യോഗ്യത എസ്.എസ്.എല്‍.സി) എന്നീ കോഴ്‌സുകളിലേക്ക് അപേക്ഷ ക്ഷണിച്ചു.  എസ്.സി, എസ്.ടി, ഒ.ഇ.സി വിഭാഗക്കാര്‍ക്ക് ഫീസ് സൗജന്യവും സ്റ്റൈപ്പന്റും ലഭിക്കും.  അപേക്ഷ സ്വീകരിക്കുന്ന അവസാന തിയ്യതി ജൂണ്‍ 22. ഫോണ്‍ 0494 2423599, 8547005088.

കേരള തൊഴിലാളി ക്ഷേമനിധി ബോര്‍ഡില്‍ വരിക്കാരായ തൊഴിലാളികളുടെ മക്കള്‍ക്ക് ഉന്നത വിദ്യാഭ്യാസ ഗ്രാന്റിന് അപേക്ഷ ക്ഷണിച്ചു.  എട്ട്, ഒമ്പത്, പത്ത് ക്ലാസുകളിലെ കുട്ടികള്‍ക്ക് ക്യാഷ് അവാര്‍ഡും പ്രൊഫഷനല്‍ കോഴ്‌സുകള്‍ ഉള്‍പ്പെടെ ഉന്നത കോഴ്‌സുകള്‍ക്ക് പഠിക്കുന്നവര്‍ക്ക് ഗ്രാന്റും നല്‍കുന്നു.   പ്ലസ് വണ്‍, ഡിഗ്രി, പി.ജി കോഴ്‌സുകള്‍ പാരല്‍ കോളേജില്‍ പഠിക്കുന്നവര്‍ അപേക്ഷിക്കേണ്ടതില്ല.  അപേക്ഷ ആഗസ്റ്റ് 30നകം ജില്ലാ ലേബര്‍ വെല്‍ഫെയര്‍ ഫണ്ട് ഇന്‍സ്‌പെക്ടറുടെ കാര്യാലയത്തില്‍ ലഭിക്കണം.  ഫോണ്‍ 0491 2505135.