മോട്ടോര്‍ വാഹന വകുപ്പിന്റെ പുതിയ സോഫ്റ്റ്‌വെയറായ സാരഥിയിലൂടെ ഡ്രൈവിംഗ് ലൈസന്‍സിനായി അപേക്ഷിച്ച് ചേവായൂര്‍ ഗ്രൗണ്ടില്‍ നിന്നും ടെസ്റ്റ് പാസ്സായവര്‍ക്കുളള ഡ്രൈവിംഗ് ലൈസന്‍സ് ജൂണ്‍ എട്ടിന് രാവിലെ എട്ട് മുതല്‍ ഉച്ച രണ്ട് വരെ ചേവായൂര്‍ ടെസ്റ്റ് ഗ്രൗണ്ടില്‍ നിന്നും അപേക്ഷകര്‍ക്ക് നേരിട്ട് വിതരണം ചെയ്യുമെന്ന് റീജ്യണല്‍ ട്രാന്‍സ്‌പോര്‍ട്ട് ഓഫീസര്‍ എ.കെ ശശികുമാര്‍ അറിയിച്ചു. അപേക്ഷകര്‍ ഒറിജിനല്‍ ഐഡി പ്രൂഫും ലൈസന്‍സിന്റെ ഇ-പ്രിന്റുമായി ഹാജരാകണം.   

നിപ യുമായി ബന്ധപ്പെട്ട ഉണ്ടാവുന്ന എന്ത് അടിയന്തര സാഹചര്യവും നേരിടാന്‍ ജില്ലാ സജ്ജമാണെന്ന് ജില്ലാ കലക്ടര്‍ സാംബശിവറാവു.  കളക്ടറേറ്റില്‍ നടന്ന ആരോഗ്യവകുപ് ഉദ്യോഗസ്ഥരുടെ യോഗത്തില്‍ ജില്‌ലയിലെ സംവിധാനങ്ങള്‍ വിലയിരുത്തുകയായിരുന്നു അദ്ദേഹം. അത്യാവശ്യ മരുന്നുകളുടെയും കിറ്റുകളുടെയും ലഭ്യത ഉറപ്പാക്കിയിട്ടുണ്ട്. നിപ ബാധിച്ചെന്നു സംശയിക്കുന്ന രോഗികളെ മെഡിക്കല്‍ കോളേജിലേക്ക,് മറ്റു ക്‌ളിനിക്കുകളില്‍ നിന്നും ആശുപത്രികളില്‍ നിന്നും റഫര്‍ ചെയ്യുന്നതിന് മുമ്പ്  ജില്ലാ മെഡിക്കല്‍ ഓഫീസറുമായി നിര്‍ബന്ധമായും ബന്ധപ്പെട്ടിരിക്കണം.

ആലപ്പുഴ:  സംസ്ഥാന ഫിഷറീസ് വകുപ്പ് മുഖേന മത്സ്യത്തൊഴിലാളികളുടെ മക്കൾക്ക് റസിഡൻഷ്യൽ ബാങ്ക് പരീക്ഷ പരിശീലനം നൽകുന്നു.  പരിശീലന ചെലവ് സർക്കാർ വഹിക്കുന്നതാണ്.  അപേക്ഷ ഫോറവും വിശദ വിവരങ്ങളും ജില്ലാ ഫിഷറീസ് ഓഫീസ്, മത്സ്യഭവൻ എന്നിവടങ്ങളിൽ  ലഭ്യമാണ്.  പൂരിപ്പിച്ച അപേക്ഷ ഫോറം ജൂൺ 15 ന് മുമ്പായി ജില്ലാ ഫിഷറീസ് ഓഫീസുകൾ, മത്സ്യഭവനുകൾ എന്നിവടങ്ങളിൽ സമർപ്പിക്കേണ്ടതാണ്. 

ആലപ്പുഴ: സർക്കാരിന്റെ പൊതുവിദ്യാഭ്യാസ സംരക്ഷണ യജ്ഞത്തിന് കൂടുതൽ കരുത്തേകുന്ന പ്രവർത്തന മികവോടെ പുതിയ അധ്യയന വർഷത്തെ വരവേൽക്കാൻ ഒരുങ്ങുകയാണ് ചേർത്തല ടൗൺ ഗവ:എൽ.പി സ്‌കൂൾ. മികവിന്റെ കേന്ദ്രമായി മാറിയ ഈ വിദ്യാലയത്തിലേക്ക് കഴിഞ്ഞ അദ്ധ്യയന വർഷത്തിൽ 2 മണിക്കൂറുകൾ കൊണ്ട് പ്രവേശനം നേടിയത് 233 കുട്ടികൾ ആണെങ്കിൽ ഇത്തവണ ഒരു മണിക്കൂർ കൊണ്ട് പ്രവേശന യോഗ്യത നേടിയത് 247 കുട്ടികളാണ്. സംസ്ഥാനത്ത് മറ്റ് സർക്കാർ സ്‌കൂളുകൾക്ക്  കൂടി മാതൃകയാവുകയാണ് മികച്ച പ്രവർത്തനങ്ങളിലൂടെ സ്‌കൂൾ.  ഇത്തവണ പ്രീ പ്രൈമറി, ഒന്നാം ക്ലാസ് എന്നിവയിലേക്ക് കഴിഞ്ഞ ആഴ്ചവരെ 277 കുട്ടികളാണ് പുതുതായി ചേർന്നത്.

ആലപ്പുഴ: ലോക പരിസ്ഥിതി ദിനവുമായി ബന്ധപ്പെട്ട് ജില്ല ശുചിത്വമിഷനും ഡിസാസ്റ്റർ റെസ്‌പോൺസ് ഫോഴ്‌സ്, സേവ് ആലപ്പി, ടെമ്പിൾ ഓഫ് ഇംഗ്ലീഷ് മീഡിയം സ്‌കൂൾ എന്നിവരുടെ ആഭിമുഖ്യത്തിൽ ജൂൺ അഞ്ചിന് ചുടുകാട് റോഡരികിൽ  വൃത്തിയാക്കി ഫലവൃക്ഷങ്ങൾ വെച്ചുപിടിപ്പിക്കുന്നു. രാവിലെ 9.30ന് പരിപാടി ആരംഭിക്കും. ശുചിത്വമിഷൻ ജില്ലകോ-ഓർഡിനേറ്റർ വൃക്ഷത്തൈ നട്ട് പരിപാടി ഉദ്ഘാടനം ചെയ്യും.

ആലപ്പുഴ: പുനലൂർ ടിംബർ സെയിൽസ് ഡിവിഷന്റെ കീഴിലുള്ള വിവിധ സർക്കാർ തടി ഡിപ്പോകളിലെ 2019-20 വർഷത്തെ വീഡിങ് ജോലികൾ കരാറെടുത്ത് ചെയ്തു തീർക്കുന്നതിന് താൽപര്യമുള്ള രജിസ്റ്റേർഡ് കോൺട്രാക്ടർമാരിൽ നിന്ന് മുദ്രവെച്ച  ദർഘാസ് ക്ഷണിച്ചു. ദർഘാസ് ജൂൺ 15ന് ഉച്ചയ്ക്ക് ഒന്നു വരെ സ്വീകരിക്കും. അന്നേദിവസം 3.30ന് തുറക്കും. ഫോൺ: 0475-2222617.
 

ആലപ്പുഴ:  കേരള ഫിഷറീസ് വകുപ്പ് ആലപ്പുഴ ജില്ലയിൽ നടപ്പാക്കുന്ന ജനകീയ മത്സ്യക്യഷി രണ്ടാം ഘട്ടം പദ്ധതിയുടെ നിർവ്വഹണവുമായി ബന്ധപ്പെട്ട് ജില്ലയിലെ വിവിധ പഞ്ചായത്തുകളിൽ നിന്നും അക്വാകൾച്ചർ പ്രൊമോട്ടർമാരെ ഒരു വർഷത്തേക്ക് കരാർ അടിസ്ഥാനത്തിൽ താൽക്കാലികമായി തെരഞ്ഞെടുക്കുന്നതിന്  അപേക്ഷ ക്ഷണിക്കുന്നു. യോഗ്യത - ഫിഷറീസ് വിഷയത്തിലുളള വി.എച്ച്.എസ്.സി / സുവോളജി വിഷയത്തിലുളള ബിരുദം/എസ്.എസ്.എൽ.സി യും, കുറഞ്ഞത് മൂന്നുവർഷം ബന്ധപ്പെട്ട മേഖലയിലുളള പ്രവ്യത്തി പരിചയം. 20 നും 56 നും ഇടയിൽ പ്രായമുളളവരായിരിക്കണം അപേക്ഷകർ.