സംസ്ഥാന പട്ടികജാതി പട്ടികവര്‍ഗ്ഗ വികസന കോര്‍പ്പറേഷന്റെ ഇടുക്കി ജില്ലാ കാര്യാലയത്തില്‍ നിന്നും വായ്പ എടുത്തിട്ടുള്ളതും കുടിശിക വരുത്തിയിട്ടുള്ളതുമായ ഗുണഭോക്താക്കള്‍ക്ക് കുടിശിക അടയ്ക്കുന്നതിന് ബ്ലോക്ക് അടിസ്ഥാനത്തില്‍ തിരിച്ചടവ് ക്യാമ്പുകള്‍ സംഘടിപ്പിക്കുന്നു. മൂന്നാറിലും (പഞ്ചായത്ത് ഓഫീസ്) തൊടുപുഴയിലും ( ബ്ലോക്ക് ഓഫീസ്) ജൂണ്‍ 10നും പീരുമേട് (അഴുത് ബ്ലോക്ക് ഓഫീസ്) 15നും നെടുങ്കണ്ടത്ത് (താലൂക്ക് ഓഫീസ്) 18നും ആണ് ക്യാമ്പ്.
 

 പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി അന്താരാഷ്ട്ര നിലവാരത്തിലുള്ള പഠനം ഉറപ്പുവരുത്തുന്നതിന് ജില്ലയിലെ പൊതുവിദ്യാലയങ്ങള്‍ സുസജ്ജം. ഒന്നു മുതല്‍ 8 വരെ ക്ലാസുകളില്‍ 70,000 പാഠപുസ്തകങ്ങളില്‍ 60,000 പുസ്തകങ്ങളുടെയും വിതരണം പൂര്‍ത്തിയായി. അതോടൊപ്പം 9,10 ക്ലാസുകളിലെ 23,000 പാഠപുസ്തകങ്ങളില്‍ 19000 പുസ്തകങ്ങളുടെയും വിതരണം പൂര്‍ത്തിയായി. 

ജൂണ്‍ 7 ലോക ഭക്ഷ്യ സുരക്ഷ ദിനമായി ആചരിക്കുന്നതിന്റെ  പ്രചരണാര്‍ത്ഥം  തൊടുപുഴ മുനിസിപ്പല്‍ ബസ് സ്റ്റാന്‍ഡിലും മിനി സിവില്‍ സ്റ്റേഷനു മുന്നിലും ഫ്ലാഷ് മോബ് സംഘടിപ്പിച്ചു. മുട്ടം ഗവണ്മെന്റ് നഴ്സിംങ്ങ് സ്‌കൂളിലെ 20ഓളം കുട്ടികള്‍ അടങ്ങുന്ന സംഘമാണ് ഫ്ലാഷ് മോബ് അവതരിപ്പിച്ചത്.  ഇടുക്കി ജില്ലാ ഭക്ഷ്യസുരക്ഷാ അസിസ്റ്റന്റ് കമ്മീഷണര്‍ ബെന്നി ജോസഫ് പരിപാടിക്ക് നേതൃത്വം വഹിച്ചു.  മുട്ടം ഗവ: നഴ്സിംഗ് സ്‌കൂള്‍ പ്രിന്‍സിപ്പല്‍ മറിയം കോശി സന്നിഹിതയായിരുന്നു. കെ.എച്.ആര്‍.എ യുടെയും മറ്റു വിവിധ സംഘടനകളുടെയും  സഹകരണത്തോടെ ഭക്ഷ്യ സുരക്ഷാ വകുപ്പിന്റെ നേതൃത്വത്തിലാണ് പരിപാടി സംഘടിപ്പിച്ചത്.

സംസ്ഥാന ബാലാവകാശ കമ്മീഷന്റെയും സമഗ്രശിക്ഷ കേരളയുടെയും സംയുക്ത ആഭിമുഖ്യത്തില്‍ സംഘടിപ്പിച്ച ഊരുണര്‍ത്തലിന്റെ ഭാഗമായിട്ടാണ് കുട്ടികള്‍ക്ക് പഠനോപകരണങ്ങള്‍ വിതരണം ചെയ്തത്. ബാഗ്്, കുട, പുസത്കങ്ങള്‍ എന്നിവയടങ്ങുന്നതാണ് ഓരോ കിറ്റുകളും. പഠനത്തിനൊപ്പം കായികമായ താല്‍പര്യങ്ങള്‍ വര്‍ദ്ധിപ്പിക്കുന്നിനായാണ് കിറ്റുകള്‍ നല്‍കിയത്. ക്രിക്കറ്റ്,ഫുട്‌ബോള്‍, ബാഡ്മിന്റണ്‍ തുടങ്ങിയവ കമ്മീഷന്‍ അംഗങ്ങള്‍ വിദ്യാര്‍ത്ഥികള്‍ക്ക് കൈമാറി. പഠനം രസകരമാകുമെന്ന പ്രതീക്ഷയും സന്തോവും പങ്കുവെച്ചാണ് പുതിയ അധ്യായന വര്‍ഷത്തിനായി ഇവിടുത്തെ കുട്ടികള്‍ കാത്തിരിക്കുന്നത്. 
 

ജില്ലാതല പ്രവേശനോത്സവം രാജാക്കാട് ഗവ.എച്ച് എസ് എസ്സില്‍ നാളെ (ജൂണ്‍ 6) രാവിലെ 10 മണിക്ക് സംസ്ഥാന വൈദ്യുതി വകുപ്പ് മന്ത്രി എം.എം മണി  ഉദ്ഘാടനം ചെയ്യും. രാജാക്കാട് ഗ്രാമപഞ്ചായത്ത് പ്രസിഡന്റ് സതി കുഞ്ഞുമോന്റെ അധ്യക്ഷതയില്‍ ചേരുന്ന ചടങ്ങില്‍ നിയുക്ത ഇടുക്കി എം.പി ഡീന്‍ കുര്യാക്കോസ് മുഖ്യപ്രഭാഷണം നടത്തും. ഇടുക്കി ജില്ലാ പഞ്ചായത്ത് പ്രസിഡന്റ് കൊച്ചുത്രേസ്സ്യാ പൗലോസ് നവാഗതരെ സ്വീകരിക്കും. അതോടൊപ്പം ബ്ലോക്ക് പഞ്ചായത്ത് പ്രസിഡന്റ് രജി പനച്ചിക്കല്‍ പ്രതിഭകളെ ആദരിക്കും.

പഞ്ചായത്ത് തലത്തില്‍ നടപ്പാക്കുന്ന ജനകീയ പദ്ധതികള്‍ പൊതു സമൂഹത്തിലെത്തിക്കുക എന്ന ലക്ഷ്യത്തോടെ പഞ്ചായത്തുകളിലൂടെ പ്രക്ഷേപണ പര്യടന പരമ്പര നടത്തുന്ന ആകാശവാണിയുടെ ശ്രമം അഭിനന്ദനാര്‍ഹമാണെന്ന് വൈദ്യുതി മന്ത്രി എം.എം മണി. മുരിക്കാശേരി പഞ്ചായത്ത് കമ്യുണിറ്റി ഹാളില്‍ നടന്ന ജനസമക്ഷം പര്യടന പരമ്പരയുടെ ജില്ലാതല ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം. ജില്ലയിലെ ഗ്രാമപഞ്ചായത്തുകള്‍ തദ്ദേശ സ്വയംഭരണ സ്ഥാപനങ്ങള്‍ക്ക് മാതൃകയാകുന്ന തരത്തില്‍ അനവധി പദ്ധതികള്‍ ഏറ്റെടുക്കുകയും നടപ്പിലാക്കി വരുകയും ചെയ്യുന്നുണ്ട്.

വനിതാ ശിശു വികസന വകുപ്പിന്റ ആഭിമുഖ്യത്തില്‍ ജില്ലാ ചൈല്‍ഡ് പ്രൊട്ടക്ഷന്‍ യൂണിറ്റ് മുഖേന നടപ്പിലാക്കി വരുന്ന ഔര്‍ റെസ്‌പോണ്‍സിബിലിറ്റി ടു ചില്‍ഡ്രന്‍ (ഓ.ആര്‍.സി) പദ്ധതി പയ്യാനക്കല്‍ ജി.വി.എച്ച്.എസ്.എസില്‍ നാളെ (ജൂണ്‍ 6) രാവിലെ 11 മണിക്ക് സ്‌കൂള്‍ പ്രവേശനോത്സവത്തിനോടൊപ്പം നടത്തും. ചൈല്‍ഡ് പ്രൊട്ടക്ഷന്‍ ഓഫീസര്‍ ജോസഫ് റിബല്ലോ പരിപാടി ഉദ്ഘാടനം ചെയ്യും.