അനര്‍ഹമായി കൈവശംവച്ചിരുന്ന 55 മുന്‍ഗണനാ റേഷന്‍ കാര്‍ഡുകള്‍ പിടിച്ചെടുത്തു. ജില്ലാ സപ്ലൈ ഓഫിസറുടെ നേതൃത്വത്തില്‍ നടത്തിയ പരിശോധനയിലാണ് കാര്‍ഡുകള്‍ പിടിച്ചെടുത്തത്.

    പിടിച്ചെടുത്ത കാര്‍ഡ് ഉടമകളില്‍ ഭൂരിഭാഗവും 1000 സ്‌ക്വയര്‍ ഫീറ്റിനു മുകളില്‍ വലിപ്പമുള്ള വീടും വാഹനങ്ങളും സ്വന്തമായി ഉള്ളവരാണ്. പലരുടേയും മക്കള്‍ വിദേശത്ത് ജോലി ചെയ്യുന്നവരുമാണ്. ഇവരുടെ കാര്‍ഡുകള്‍ പൊതു വിഭാഗത്തിലേക്കു മാറ്റിയതായും കൈപ്പറ്റിയ റേഷന്‍ സാധനങ്ങളുടെ കമ്പോള വില ഈടാക്കുന്നതിനുള്ള നടപടി സ്വീകരിച്ചതായും ജില്ലാ സപ്ലൈ ഓഫിസര്‍ ജലജാ റാണി അറിയിച്ചു.

കോഴിക്കോട് ജില്ലയില്‍ ഫിഷറീസ് വകുപ്പിനു കീഴിലുള്ള കല്ലാനോട് മത്സ്യവിത്തുല്‍പാദന കേന്ദ്രത്തിലേക്ക് കരാറടിസ്ഥാനത്തില്‍ പ്രൊജക്റ്റ് അസിസ്റ്റന്റിനെ നിയമിക്കുന്നു. മത്സ്യവിത്തുല്‍പാദന മേഖലയില്‍ സാങ്കേതിക പരിജ്ഞാനവും ഒരു വര്‍ഷത്തെ             ഹാച്ചറി പ്രവര്‍ത്തന പരിചയമുള്ളവരുമായിരിക്കണം.  ബി.എഫ്.എസ്.സി. ബിരുദം അല്ലെങ്കില്‍ എം.എസ്.സി. സുവോളജിയോടൊപ്പം ഒരു വര്‍ഷത്തെ പ്രവര്‍ത്തന പരിചയം ആണ് അടിസ്ഥാന യോഗ്യത. പ്രായപരിധി 35 വയസ്സ്. തെരഞ്ഞെടുക്കുന്നവര്‍ പകല്‍ / രാത്രി ഷിഫ്റ്റുകളില്‍ ജോലി ചെയ്യാന്‍ തയ്യാറുള്ളവരായിരിക്കണം.

ഗവ. ചില്‍ഡ്രന്‍സ് ഹോം ഫോര്‍ ഗേള്‍സില്‍ നിന്നും ചെലവൂര്‍ എല്‍.പി , മലാപ്പറമ്പ് യു.പി, നടക്കാവ് ഗേള്‍സ്, എന്‍.ജി.ഒ ക്വാട്ടേഴ്സ് ഹൈസ്‌കൂള്‍ എന്നിവിടങ്ങളിലേക്ക് രാവിലെ കുട്ടികളെ കൊണ്ടുപോവുന്നതിനും ക്ലാസ് കഴിഞ്ഞ് തിരികെ സ്ഥാപനത്തില്‍ എത്തിക്കുന്നതിനും വാഹനം ലഭ്യമാക്കുന്നതിന് വാഹന ഉടമകളില്‍ നിന്നും അംഗീകൃത ട്രാവല്‍ ഏജന്‍സികളില്‍ നിന്നും ടെണ്ടര്‍ ക്ഷണിച്ചു. ടെണ്ടര്‍ സമര്‍പ്പിക്കേണ്ട അവസാന തീയതി  ജൂണ്‍ ഏഴിന് രാവിലെ 11 മണി. ഫോണ്‍ 0495 - 2730459.

ജില്ലാ ശുചിത്വമിഷന്‍ ഓഫീസിലേക്ക് അസിസ്റ്റന്റ് കോര്‍ഡിനേറ്റര്‍ (എസ്.ഡബ്ല്യുഎം.) തസ്തികയിലേക്ക് സയന്‍സ് ബിരുദം ഉള്ളവരില്‍ നിന്നും അസി കോര്‍ഡിനേറ്റര്‍ (ഐ.ഇ.സി) തസ്തികയിലേക്ക് ബിരുദവും സേവനതത്പരതയും ഉള്ളവരില്‍ നിന്നും ദിവസവേതനാടിസ്ഥാനത്തില്‍ അപേക്ഷ ക്ഷണിച്ചു. അപേക്ഷ  ജൂണ്‍ ഏഴിനകം ജില്ലാ കോര്‍ഡിനേറ്റര്‍, ശുചിത്വമിഷന്‍, സിവില്‍ സ്റ്റേഷന്‍, കോഴിക്കോട് എന്ന വിലാസത്തില്‍ ലഭിക്കണം.

കൊയിലാണ്ടി താലൂക്കിലെ പേരാമ്പ്ര പഞ്ചായത്തില്‍ ചേനായി എന്ന സ്ഥലത്ത്  കൊയിലാണ്ടി താലൂക്ക് സപ്ലൈ ഓഫീസര്‍ വി.പി.രാജീവന്റെ നേതൃത്വത്തില്‍ നടത്തിയ പരിശോധനയില്‍ അനര്‍ഹമായി കൈവശം വെച്ച എ.എ.വൈ, പി.എച്ച്.എച്ച്, സബ്സിഡി വിഭാഗത്തില്‍പ്പെട്ട 26 റേഷന്‍കാര്‍ഡുകള്‍ പിടിച്ചെടുത്തു.  അനര്‍ഹമായി വാങ്ങിയ റേഷന്‍സാധനങ്ങളുടെ വിപണിവില കാര്‍ഡുടമകളില്‍ നിന്ന് ഈടാക്കുന്നതിനുള്ള നടപടികള്‍ സ്വീകരിച്ചുവരികയാണ്.  പരിശോധനയില്‍ താലൂക്ക് സപ്ലൈ ഓഫീസര്‍ക്കുപുറമെ റേഷനിംഗ് ഇന്‍സ്പെക്ടര്‍മാരായ സജിത.എസ്.കെ, ലിജി.എന്‍, എം.പി.ശ്രീജ, എം.ശ്രീജു, ജ്യോതിബസു എന്നിവര്‍ പങ്കെടുത്തു.

കോഴിക്കോട് ജില്ലയില്‍ ജൈവസംരക്ഷണ പ്രവര്‍ത്തനങ്ങള്‍ക്കുള്ള 2018 ലെ വനമിത്ര പുരസ്‌ക്കാരത്തിന് വടകര ചാനിയംകടവ് സ്വദേശി വടയക്കണ്ടി നാരായണന്‍ അര്‍ഹനായതായി അസി ഫോറസ്റ്റ് കണ്‍സര്‍വേറ്റര്‍ അറിയിച്ചു. 25,000 രൂപയും ഫലകവും അടങ്ങുന്നതാണ് അവാര്‍ഡ്. കാവ്, കണ്ടല്‍ വനം, ഔഷധ സസ്യങ്ങള്‍ തുടങ്ങി ജൈവവൈവിധ്യമേഖലയില്‍ സ്തുത്യര്‍ഹ സംരക്ഷണ പ്രവര്‍ത്തനം നടത്തുന്ന വ്യക്തികള്‍, സ്ഥാപനങ്ങള്‍, സംഘടനകള്‍, കൃഷിക്കാര്‍ എന്നിവരെയാണ് വനം വകുപ്പ് അവാര്‍ഡിന് തെരഞ്ഞെടുക്കുന്നത്. 

     ജില്ലയിലെ വിവിധ സ്വകാര്യ സ്ഥാപനങ്ങളിലേക്ക് സെയില്‍സ്മാന്‍, മൊബൈല്‍ സര്‍വ്വീസ് ടെക്‌നീഷ്യന്‍ ട്രെയിനി ഉള്‍പ്പെടെ 100 ഓളം ഒഴിവുകളിലേക്ക് ഇന്ന് (ജൂണ്‍ 1) സിവില്‍ സ്റ്റേഷനിലുളള എംപ്ലോയബിലിറ്റി സെന്ററില്‍ രാവിലെ 10.30 ന് കൂടിക്കാഴ്ച നടത്തും. എംപ്ലോയ്ബിലിറ്റി സെന്ററില്‍ രജിസ്റ്റര്‍ ചെയ്തവര്‍ക്ക്  സൗജന്യമായും അല്ലാത്തവര്‍ക്ക് 250 രൂപ ഒറ്റത്തവണ ഫീസടച്ച് ഓണ്‍ലൈനായി www.employabilitycentre.org  എന്ന വെബ് സൈറ്റില്‍ രജിസ്റ്റര്‍ ചെയ്തും അഭിമുഖത്തില്‍ പങ്കെടുക്കാം. താല്‍പര്യമുളള ഉദ്യോഗാര്‍ത്ഥികള്‍  ബയോഡാറ്റ സഹിതം രാവിലെ 10.30ന് സെന്ററില്‍    എത്തണം.  ഫോണ്‍ : 0495  2370178.    

സ്‌കോളര്‍ഷിപ്പിന് അപേക്ഷ ക്ഷണിച്ചു

    കെട്ടിട നിര്‍മാണ തൊഴിലാളി ക്ഷേമ ബോര്‍ഡിന്റെ അംഗതൊഴിലാളികളുടെ മക്കള്‍ക്ക് വിവിധ കോഴ്‌സുകള്‍ക്ക് നല്‍കിവരുന്ന സ്‌കോളര്‍ഷിപ്പിന് അപേക്ഷ ക്ഷണിച്ചു. പഠന സഹായത്തിനുള്ള അപേക്ഷ ഇന്ന് (ജൂണ്‍ ഒന്ന്) മുതല്‍ ജൂലൈ 15 വരെയും മറ്റ് ഉന്നത വിദ്യാഭ്യാസത്തിനുളള അപേക്ഷ അതത് കോഴ്‌സുകള്‍ ആരംഭിച്ച് 45 ദിവസം വരെയും ബോര്‍ഡിന്റെ ചെറൂട്ടി റോഡില്‍ പ്രവര്‍ത്തിക്കുന്ന ജില്ലാ ഓഫീസില്‍ സ്വീകരിക്കുമെന്ന് എക്‌സിക്യുട്ടീവ് ഓഫീസര്‍ അറിയിച്ചു.