പേരിയ ഗവ. ഹൈസ്‌കൂളില്‍  കിച്ചണ്‍ കം ഡൈനിംഗ് കെട്ടിടവും മക്കിമല സ്‌കൂളില്‍ ടോയിലറ്റ് കോംപ്ലക്‌സും വൈസ്‌മെന്‍ ഇന്റര്‍നാഷണല്‍ ബംഗളൂരു ഡിസ്ട്രിക്ട് - 2 ഗവര്‍ണര്‍ പരമേശ്വരന്‍ ഉദ്ഘാടനം ചെയ്തു.  പ്രളയാനന്തര പുനര്‍നിര്‍മ്മാണത്തിന്റെ ഭാഗമായി വൈസ്‌മെന്‍ ഇന്റര്‍നാഷണല്‍ ബംഗളൂരു ഡിസ്ട്രിക്ട് - 2 വിന്റെ നേതൃത്വത്തില്‍ ജില്ല നിര്‍മ്മിതി കേന്ദ്രം മുഖേനയാണ് നിര്‍മ്മാണ പ്രവൃത്തികള്‍ പൂര്‍ത്തിയാക്കിയത്. പ്രളയത്തില്‍ പൂര്‍ണ്ണമായി തകര്‍ന്ന പേരിയ സ്‌കൂള്‍ കിച്ചണ്‍ കെട്ടിടം ആറു ലക്ഷം രൂപ ചെലവഴിച്ചാണ് പുനര്‍നിര്‍മ്മിച്ചത്.

     താനൂര്‍ സി.എച്ച്.എം.കെ.എം.ഗവ.ആര്‍ട്‌സ് & സയന്‍സ് കോളേജില്‍  ഇംഗ്‌ളീഷ്, കോമേഴ്‌സ് & മാനേജ്‌മെന്റ്, കമ്പ്യുട്ടര്‍ അപ്ലിക്കേഷന്‍, മാത്തമാറ്റിക്‌സ്, ഇലക്ട്രോണിക്‌സ് എന്നീ വിഷയങ്ങളില്‍ ഗസ്റ്റ് അദ്ധ്യാപകരെ നിയമിക്കുന്നു.  കോഴിക്കോട് കോളേജ് വിദ്യാഭ്യാസ ഡെപ്യൂട്ടീഡയറക്ടറുടെ ഓഫീസില്‍ പേര് രജിസ്റ്റര്‍ ചെയ്തിട്ടുളളവര്‍ക്ക് അപേക്ഷിക്കാം. ബന്ധപ്പെട്ട വിഷയങ്ങളില്‍ നെറ്റ് യോഗ്യത യുളളവരുടെ  അഭാവത്തില്‍ 55 ശതമാനം മാര്‍ക്കുള്ള ബിരുദാനന്തര ബിരുദക്കാരെയും  പരിഗണിക്കും.  താല്‍പര്യമുളളവര്‍ മെയ് 25 രാവിലെ 10 ന് അസ്സല്‍ രേഖകളുമായി കൂടിക്കാഴ്ചക്ക് കോളേജില്‍ എത്തണം.   ഫോണ്‍ നമ്പര്‍ 0494 2582800.

        ലോക ഭക്ഷ്യസുരക്ഷ വാരാചരണത്തോടനുബന്ധിച്ച് ജില്ലാതല ക്വിസ് മത്സം സംഘടിപ്പിക്കുന്നു. മെയ് 29ന് കല്‍പ്പറ്റ എസ്.കെ.എം.ജെ ഹയര്‍ സെക്കന്‍ഡറി സ്‌കൂളിലാണ് മത്സരം. അപേക്ഷകള്‍ മെയ് 25ന് വൈകിട്ട് അഞ്ചുവരെ സ്വീകരിക്കും. 23 വയസ്സ് കഴിയാത്ത രണ്ടുപേരടങ്ങുന്ന ടീമായിവേണം മത്സരത്തില്‍ പങ്കെടുക്കാന്‍. ജില്ലാതല വിജയികള്‍ക്ക് യഥാക്രമം 5,000, 2000, 1500 രൂപ സമ്മാനമായി ലഭിക്കും. ജില്ലാതലത്തില്‍ ഒന്നാം സ്ഥാനം ലഭിക്കുന്ന ടീമിന് സംസ്ഥാനതല മത്സരത്തില്‍ പങ്കെടുക്കാം. സംസ്ഥാന തല മത്സരത്തില്‍ പങ്കെടുക്കുന്നതിനായി യാത്രാചെലവും താമസ സൗകര്യവും നല്‍കും.

ചേളാരിയിലെ തിരൂരങ്ങാടി എ.കെ.എന്‍.എം. ഗവണ്‍മെന്റ് പോളിടെക്‌നിക് കോളേജ് ഇലക്‌ട്രോണിക്‌സ്  എഞ്ചിനീയറിംഗ് (യോഗ്യത ബി.ടെക് ബിരുദം), ഇലക്‌ട്രോണിക്‌സ് വിഭാഗം ഡെമോണ്‍സ്‌ട്രേറ്റര്‍ (യോഗ്യത ഇലക്‌ട്രോണിക്‌സ് എഞ്ചിനീയറിങില്‍ ഫസ്റ്റ് ക്ലാസ് ഡിപ്ലൊമ) എന്നീ ഒഴിവുകളിലേക്ക് ദിവസ വേതനാടിസ്ഥാനത്തില്‍ നിയമനം നടത്തുന്നതിന് അപേക്ഷ ക്ഷണിച്ചു.  പോളിടെക്‌നിക്ക് കോളേജിലെ അധ്യാപന പരിചയം അഭിലഷണീയ യോഗ്യതയായി കണക്കാക്കും. താല്‍പര്യമുള്ളവര്‍ അസ്സല്‍ രേഖകളുമായി മെയ് 24ന് രാവിലെ 10ന് എഴുത്തു പരീക്ഷക്കും കൂടിക്കാഴ്ചക്കുമായി കോളേജില്‍ എത്തണം.

   ദീനദയാല്‍ വികലാംഗ പുനരധിവാസ പദ്ധതി,  ഇന്റഗ്രേറ്റഡ് പ്രോഗ്രാം ഫോര്‍ സീനിയര്‍ സിറ്റിസണ്‍സ്, ഇന്റഗ്രേറ്റഡ് റീഹാബിലിറ്റേഷന്‍ സെന്റര്‍ ഫോര്‍ അഡിക്റ്റ്‌സ് എന്നീ പദ്ധതികള്‍ പ്രവര്‍ത്തന ധനസഹായം ലഭ്യമാക്കുന്നതിന് യോഗ്യതയുള്ള സന്നദ്ധ സംഘടനകളില്‍ നിന്ന്  അപേക്ഷ ക്ഷണിച്ചു.   

     ജില്ലാ തെരഞ്ഞെടുപ്പുദ്യോഗസ്ഥനായ ജില്ലാ കലക്ടറുടെയും തെരഞ്ഞെടുപ്പ് നിരീക്ഷകരുടേതുമൊഴികെയുള്ള  വാഹനങ്ങള്‍ വോട്ടെണ്ണല്‍ കേന്ദ്രത്തിലേക്ക്  കടത്തിവിടില്ല. സുരക്ഷാ ഉദ്യോഗസ്ഥരുടെ നിര്‍ദ്ദേശാനുസരണം ഗേറ്റിനു പുറത്ത് വാഹനങ്ങള്‍ പാര്‍ക്ക് ചെയ്യണം. കൗണ്ടിങ് ഉദ്യോഗസ്ഥര്‍ വരുന്ന വാഹനങ്ങള്‍ വോട്ടെണ്ണല്‍ കേന്ദ്രത്തിന് പുറത്ത് പാര്‍ക്ക് ചെയ്യാനുള്ള സൗകര്യം അവരവര്‍ തന്നെ കണ്ടെത്തണം.

  വോട്ടെണ്ണല്‍ വിവരം ലഭ്യമാക്കാന്‍ മലപ്പുറം ഗവ. കോളജിലും സെന്റ് ജെമ്മാസ് ഹയര്‍ സെക്കന്‍ഡറി സ്‌കൂളിലുമാണ് മീഡിയ സെന്റര്‍ സജ്ജീകരിച്ചിരിക്കുന്നത്. സുവിധ, ട്രെന്‍ഡ് എന്നീ വെബ് ആപ്ലിക്കേഷനുകളിലൂടെ വോട്ടെണ്ണല്‍ നില തത്സമയം  ലഭ്യമാകും.   തെരഞ്ഞെടുപ്പു കമ്മീഷന്റെ അനുമതിപത്രം ലഭിച്ചിട്ടുള്ള മാധ്യമപ്രവര്‍ത്തകര്‍ക്കുമാത്രമാണ് മീഡിയ സെന്ററില്‍ പ്രവേശനം. 

     വോട്ടെണ്ണല്‍ കേന്ദ്രത്തിലേക്ക് തെരഞ്ഞെടുപ്പ് ഉദ്യോഗസ്ഥര്‍, സ്ഥാനാര്‍ത്ഥികള്‍, ചീഫ് കൗണ്ടിങ് ഏജന്റ്,  തെരഞ്ഞെടുപ്പു കമ്മീഷന്റെ അനുമതിപത്രം ലഭിച്ചിട്ടുള്ള   മാധ്യമപ്രവര്‍ത്തകര്‍ തുടങ്ങിയവര്‍ക്കു മാത്രമേ പ്രവേശനമുള്ളൂ.  

       വോട്ടെണ്ണല്‍ ഹാളില്‍ മൊബൈല്‍ ഫോണ്‍ ഉപയോഗിക്കാന്‍ ആര്‍ക്കും അനുമതിയില്ല. കൗണ്ടിങ് ഉദ്യോഗസ്ഥര്‍ മൊബൈല്‍ ഫോണ്‍ ഉള്‍പ്പെടെ കയ്യില്‍ കരുതിയിട്ടുള്ള എല്ലാ വസ്തുക്കളും സൂക്ഷിക്കുന്നതിനായി അതത്  ഉപ വരണാധികാരികളുടെ കൗണ്ടറുകളില്‍ നല്‍കണം.