കോഴിക്കോട് താലൂക്ക് സപ്ലൈ ഓഫീസില്‍ പുതിയ റേഷന്‍കാര്‍ഡിനു ഓണ്‍ലൈന്‍ അപേക്ഷ സമര്‍പ്പിച്ചവര്‍ക്കുള്ള കാര്‍ഡ് ടോക്കണ്‍ നമ്പര്‍ 8500 മുതല്‍ 9000 വരെ മെയ് 20 നും 9000 മുതല്‍ 9500 വരെ മെയ് 21 നും രാവിലെ 10 നും മൂന്നിനുമിടയില്‍ സിവില്‍ സ്റ്റേഷനിലുള്ള താലൂക്ക് സപ്ലൈ ഓഫീസില്‍ വിതരണം ചെയ്യും. അപേക്ഷകര്‍ പഴയ റേഷന്‍ കാര്‍ഡ്, കാര്‍ഡിന്റെ വില, ആധാര്‍ കാര്‍ഡ് എന്നിവ സഹിതം എത്തണം. ന്യൂനതകള്‍ കാരണം അപേക്ഷ നിരസിച്ചവര്‍ക്കുള്ള കാര്‍ഡ് വിതരണ തീയ്യതി പിന്നീട് അറിയിക്കും. 

 നേരത്തെ ക്വാറി ഉടമകളുടെ അപേക്ഷയിലുള്ള എകജാലക ഹിയറിങ്  കമ്മിറ്റി യോഗം ജില്ലാ കളക്ടറേറ്റില്‍ നടന്നു. ക്വാറി ഉടമകള്‍ അനുമതിക്കായി കമ്മിറ്റിക്കു സമര്‍പ്പിച്ച അപേക്ഷ പഞ്ചായത്തിന്റെ അനുമതിക്കായി യോഗത്തില്‍ വച്ച് സെക്രട്ടറിക്ക്  കൈമാറി.  നിയമാനുസൃത തീരുമാനമെടുക്കാന്‍ കമ്മിറ്റി സെക്രട്ടറിയെ ചുമതലപ്പെടുത്തി.

ചെങ്ങോട്ടുമല ഖനനം സംബന്ധിച്ച വിഷയത്തില്‍ വിദഗ്ദ്ധ സമിതിയോട് രണ്ടാഴ്ചയ്ക്കകം റിപ്പോര്‍ട്ട് സമര്‍പ്പിക്കാന്‍ ജില്ലാ കളക്ടര്‍ സാംബശിവറാവു ആവശ്യപ്പെട്ടു. എന്‍ഐടി, സിഡബ്‌ളിയുആര്‍ഡിഎം, സെസ്സ് അല്ലെങ്കില്‍ ജിഐഎസ് എന്നിവിടങ്ങളിലെ വിദഗ്ദ്ധരും ജില്ലാ ജിയോളജിസ്റ്റും സോയില്‍ കണ്‍സര്‍വേഷന്‍ ഓഫീസറും ഡിവിഷണല്‍ ഫോറസ്റ്റ് ഓഫീസറും അടങ്ങിയ സമിതിയാണ് റിപ്പോര്‍ട്ട് നല്‌കേണ്ടത്.
 
 

തദ്ദേസ്വയംഭരണ സ്ഥാപനങ്ങളുടെയും പൊതുമരാമത്ത് വകുപ്പിന്റെയും നിയന്ത്രണത്തിലും ഉടമസ്ഥതയിലുമുള്ള റോഡുകൾ ടാർ ചെയ്യുമ്പോൾ നിശ്ചിത ശതമാനം ഷ്രഡഡ് പ്ലാസ്റ്റിക് ഉപയോഗിക്കണമെന്ന നിർദ്ദേശം നടപ്പാക്കുന്നുണ്ടോയെന്ന് നിരീക്ഷിക്കാൻ സംസ്ഥാനതല കമ്മിറ്റി രൂപീകരിച്ചു.  ഹരിതകേരളം മിഷൻ എക്‌സിക്യൂട്ടീവ് വൈസ് ചെയർപേഴ്‌സൺ അധ്യക്ഷയായ കമ്മിറ്റിയിൽ നഗരകാര്യ, പഞ്ചായത്ത് വകുപ്പ് ഡയറക്ടർമാർ, പൊതുമരാമത്ത് വകുപ്പ് (റോഡ്‌സ്) ചീഫ് എൻജിനീയർ, തദ്ദേശസ്വയംഭരണ വകുപ്പ് ചീഫ് എക്‌സിക്യൂട്ടീവ് ഡയറക്ടർ, ക്ലീൻ കേരള കമ്പനി എം.ഡി എന്നിവർ അംഗങ്ങളാണ്.

പി.എൻ.എക്സ്. 1363/19

മിശ്രവിവാഹിതരിൽ ഒരാൾ പിന്നാക്ക വിഭാഗത്തിലാണെങ്കിൽ അവരുടെ കുട്ടികൾക്ക് നോൺക്രീമിലെയർ സർട്ടിഫിക്കറ്റ് അനുവദിക്കാമെന്ന് സർക്കാർ ഉത്തരവായി.  നിലവിലുളള നോൺക്രീമിലെയർ മാനദണ്ഡങ്ങൾക്കു വിധേയമായാണ് ഇത്.  മിശ്രവിവാഹിതരിൽ ഒരാൾ പിന്നാക്ക വിഭാഗവും മറ്റേയാൾ മുന്നാക്ക വിഭാഗവുമാണെങ്കിൽ അവരുടെ കുട്ടികൾക്ക് സർട്ടിഫിക്കറ്റ് ലഭിക്കുന്നതിന് ബുദ്ധിമുട്ട് നേരിടുന്നുവെന്ന പരാതികളുടെ അടിസ്ഥാനത്തിലാണ് ഉത്തരവ്.

പി.എൻ.എക്സ്. 1361/19

സാംസ്‌കാരിക വൈജ്ഞാനിക മേഖലകളിലെ അതുല്യപ്രതിഭയായിരുന്ന പി.കെ. ശിവദാസിന്റെ നിര്യാണത്തിൽ സാംസ്‌കാരിക മന്ത്രി എ.കെ. ബാലൻ അനുശോചിച്ചു. പത്രപ്രവർത്തകൻ, വിവർത്തകൻ, നിഘണ്ടുകാരൻ തുടങ്ങിയ നിലകളിൽ വലിയ സംഭാവനയാണ് അദ്ദേഹം നൽകിയത്. മലയാളത്തിലെ ആദ്യത്തെ ഇ-റിവേഴ്‌സ് ഡിക്ഷ്ണറി തയ്യാറാക്കിയും പ്രശസ്ത ഇടതുപക്ഷ ചിന്തകരുടെ പുസ്തകങ്ങൾ വിവർത്തനം ചെയ്തും സ്വതന്ത്ര വിജ്ഞാന ഗ്രന്ഥങ്ങളുടെ രചനയിലൂടെയും സാഹിത്യ ലോകത്തും അദ്ദേഹം ചിരപ്രതിഷ്ഠ നേടി. അദ്ദേഹത്തിന്റെ അകാല വേർപാട്  സാംസ്‌കാരിക ലോകത്തിന് വലിയ നഷ്ടമാണ് - അനുശോചന സന്ദേശത്തിൽ മന്ത്രി അറിയിച്ചു.

പി.എൻ.എക്സ്. 1360/19