തമിഴ് ചിത്രമായ മഹാമുനിയുടെ ഷൂട്ടിങ് ലോക്കേഷനായ പൊള്ളാച്ചിയില്‍ നിന്നാണ് മഹിമ നമ്പ്യാര്‍ വോട്ട് ചെയ്യാന്‍ കാസര്‍കോട് എത്തിയത്.തമിഴകത്തെ അറിയപ്പെടുന്ന ചലച്ചിത്രതാരമായ മഹിമ നമ്പ്യാര്‍ നായമ്മാര്‍മൂല ടി ഐ എച്ച്  എസ് എസിലെ 101-ാം നമ്പര്‍ പോളിങ് ബൂത്തിലാണ് വോട്ട് രേഖപ്പെടുത്തിയത്. 'വോട്ട് രേഖപ്പെടുത്തുന്നതിലൂടെ നമ്മളെ ആര് ഭരിക്കണം എന്ന് നാം തന്നെ തീരുമാനിക്കുകയാണ്.വോട്ട് രേഖപ്പെടുത്തുകയെന്നത് നമ്മുടെ അവകാശമാണ്.അതോടെപ്പം സമൂഹത്തോടുള്ള നമ്മുടെ ഉത്തരവാദിത്വം കൂടിയാണിത്' മഹിമ പറഞ്ഞു.ഏട്ടന്‍ ഉണ്ണികൃഷ്ണനോടൊപ്പമാണ് മഹിമ എത്തിയത്. 

പതിനേഴാം ലോക്‌സഭയിലേക്കുള്ള തെരഞ്ഞെടുപ്പില്‍ റവന്യൂ വകുപ്പ് മന്ത്രി ഇ ചന്ദ്രശേഖരനും ജില്ലയിലെ എം എല്‍ എമാരും  കാസര്‍കോട് ലോക്‌സഭാ മണ്ഡലത്തിലെ വിവിധ കേന്ദ്രങ്ങളില്‍ വോട്ട് രേഖപ്പെടുത്തി. റവന്യൂ വകുപ്പ് മന്ത്രി ഇ ചന്ദ്രശേഖരന്‍ കോളിയടുക്കം ഗവര്‍മെന്റ് യുപി സ്‌കൂളിലെ  33-ാം നമ്പര്‍  പോളിങ് ബൂത്തിലാണ് വോട്ട് രേഖപ്പെടുത്തിയത്.എന്‍.എ  നെല്ലിക്കുന്ന് എം എല്‍ എ, നെല്ലിക്കുന്ന് ഗവര്‍മെന്റ് ഗേള്‍സ് ഹയര്‍സെക്കഡറി സ്‌കൂളിലെ 141-ാം ബൂത്തില്‍ ആദ്യവോട്ടര്‍ ആയി വോട്ട് ചെയ്തു. കൂട്ടക്കനി ഗവര്‍മെന്റ് യുപി സ്‌കൂളിലെ 132-ാം നമ്പര്‍ പോളിങ് ബൂത്തിലാണ് കെ.കുഞ്ഞിരാമന്‍ എം എല്‍ എ വോട്ട് രേഖപ്പെടുത്തിയത്.

തെരഞ്ഞെടുപ്പ് ദിനത്തില്‍ ജില്ലയിലെ 43 പ്രശ്‌നബാധിത ബൂത്തുകളിലെ പ്രവര്‍ത്തനങ്ങള്‍ തല്‍സമയം നിരീക്ഷിച്ച് തെരഞ്ഞെടുപ്പ് വരണാധികാരികൂടിയായ ജില്ലാകളക്ടര്‍ ഡോ. ഡി സജിത് ബാബുവും സംഘവും. കളക്ടറേറ്റ് മിനികോണ്‍ഫറന്‍സ് ഹാളില്‍ പ്രത്യേകം സജ്ജമാക്കിയ കണ്‍ട്രോള്‍ റൂമിലാണ് ജില്ലയിലെ 43 ബൂത്തുകളിലെ വോട്ടെടുപ്പ് കളക്ടര്‍ തല്‍സമയം നിരീക്ഷിച്ചത്. കളക്ടര്‍ക്കു പുറമെ പൊതുനിരീക്ഷകന്‍ എസ്.ഗണേഷ്, പൊലീസ് നിരീക്ഷകന്‍ ഓംപ്രകാശ് ത്രിപാഠി, എഡിഎം: സി ബിജു, ഇലക്ഷന്‍ ഡെപ്യൂട്ടി കളക്ടര്‍ വി പി അബ്ദു റഹ്മാന്‍,  ട്രയിനിങ്ങ് നോഡല്‍ ഓഫീസര്‍ കെ.വിനോദ് കുമാര്‍ എന്നിവര്‍ തല്‍സമയ നിരീക്ഷണത്തില്‍ പങ്കാളികളായി. 

തെരഞ്ഞെടുപ്പ് ദിനത്തില്‍ ഫ്‌ളയിങ് സ്‌ക്വാഡ് നടത്തിയ പരിശോധനയില്‍ 2,80,000 രൂപ പിടികൂടി. നീലേശ്വരം കരുവാച്ചേരിയില്‍ കാറില്‍ നിന്നാണ് പണം പിടികൂടിയത്. സ്‌ക്വാഡ് മജിസ്‌ട്രേറ്റ് മധു കരിമ്പിലിന്റെ നേതൃത്വത്തിലായിരുന്നു പരിശോധന.

 83-ാം വയസില്‍ കന്നിവോട്ട് രേഖപ്പെടുത്തിയതിന്റെ ആഹ്ലാദത്തിലാണ് ഭിന്നശേഷി വോട്ടറായ ആസ്സിയുമ്മ. എന്മകജെ പഞ്ചായത്തിലെ ഷേണി വില്ലേജിലെ എല്‍ക്കാന ഷേണിമൂല സ്വദേശനിയായ ആസ്സിയുമ്മ അങ്കണ്‍വാടി അധ്യാപികയായ യശോദയുടെയും മരുമകളുടെയും കൈപിടിച്ചാണ് ഏല്‍ക്കാന എ ജെ ബി എസിലെ 189 -ാം നമ്പര്‍ പോളിങ് ബൂത്തിലെത്തി തന്റെ ആദ്യ വോട്ട് രേഖപ്പെടുത്തിയത്. ആസ്സിയുമ്മയുടെ മകന്‍ ജുനൈദും ഭിന്നശേഷിക്കാരനാണ്. ഭിന്നശേഷിക്കാര്‍ക്കായി പ്രത്യേകം ഏര്‍പ്പാടാക്കിയ ആംബുലന്‍സിലാണ് ഇവര്‍ പോളിങ് ബൂത്തില്‍ എത്തിയത്.  

ജില്ലയിലെ വിവിധ നിയോജക മണ്ഡലങ്ങളിലെ ഭിന്നശേഷി വോട്ടര്‍മാരെ പോളിങ് ബൂത്തില്‍ എത്തിച്ച് എന്‍ എസ് എസ് വളണ്ടിയര്‍മാരും അങ്കണ്‍വാടി ജീവനക്കാരും. ജില്ലയിലെ 19 സ്‌കൂളിലെ നൂറോളം  വരുന്ന പ്ലസ് വണ്‍ വിദ്യാര്‍ഥികളായ എന്‍ എസ് എസ് വളണ്ടിയര്‍മാരും 850 അങ്കണ്‍വാടി ജീവനക്കാരുമാണ് ഭിന്നശേഷി വോട്ടര്‍മാരെ പോളിങ് ബൂത്തില്‍ എത്തിക്കാന്‍ അണിനിരന്നത്. ഭിന്നശേഷിക്കാരുടെ നോഡല്‍ ഓഫീസറായ പി ബിജുവിന്റെ നേതൃത്വത്തില്‍ അഞ്ചു നിയമസഭാ മണ്ഡലങ്ങളില്‍ നിന്നുള്ള 12 കോഡിനേറ്റര്‍മാരാണ് ഇവരെ ബൂത്തിലെത്തിക്കാനുള്ള പ്രവര്‍ത്തനങ്ങള്‍ ഏകോപിപ്പിച്ചത്. 

ജനാധിപത്യ പ്രക്രിയയില്‍ ബഹുസ്വരതയുടെ സൗന്ദര്യം പ്രസരിപ്പിച്ച് സപ്തഭാഷാ സംഗമഭൂമിയില്‍ സ്ഥിതി ചെയ്യുന്ന കേരളത്തിന്റെ ഒന്നാം നമ്പര്‍ ബൂത്ത്. സംസ്ഥാന അതിര്‍ത്തിയായ മഞ്ചേശ്വരം കുഞ്ചത്തൂരിലെ കേരളത്തിന്റെ ഒന്നാം നമ്പര്‍ ബൂത്തിലാണ് കഠിന വെയിലിനെയും അവഗണിച്ചും ഭാഷാ വൈവിധ്യം നാനാത്വത്തില്‍ ഏകത്വം തീര്‍ത്തത്. ജനാധിപത്യത്തിന്റെ വിധി നിര്‍ണയിക്കാനായി പോളിങ് ബൂത്തിനു മുന്നില്‍ രൂപപ്പെട്ട വരി ഭാഷാ-സംസ്‌കാര വൈവിധ്യം വിളിച്ചോതുന്നതായിരുന്നു. 

ലോക്‌സഭാ തെരഞ്ഞെടുപ്പ് കാസര്‍കോട് പാര്‍ലമെന്റ് മണ്ഡലത്തില്‍ സുതാര്യവും സമാധനപരവുമായി വോട്ടെടുപ്പ് പൂര്‍ത്തിയാക്കാന്‍ സഹായിച്ച എല്ലാവര്‍ക്കും ജില്ലാ വരണാധികാരിയും ജില്ലാ കളക്ടറുമായ ഡോ. ഡി സജിത് ബാബു നന്ദി പറഞ്ഞു. രാഷ്ട്രീയ പാര്‍ട്ടികള്‍, വോട്ടര്‍മാര്‍, പൊതുജനങ്ങള്‍, മാധ്യമങ്ങള്‍ എന്നിവരുടെ   അകമഴിഞ്ഞ സഹകരണമാണ് തെരഞ്ഞടുപ്പ് വിജയകരമായി പൂര്‍ത്തിയാക്കാന്‍ സഹായകമായത്. ആത്മാര്‍ത്ഥയോടെ തെരഞ്ഞെടുപ്പ് ഡ്യൂട്ടി നിര്‍വഹിച്ച മുഴുവന്‍ ജീവനക്കാരെയും കളക്ടര്‍ അഭിനന്ദിച്ചു. ജില്ലയില്‍ ഒറ്റപ്പെട്ട അനിഷ്ട സംഭവങ്ങള്‍ക്ക് കാരണമായവര്‍ക്കെതിരെ ശക്തമായ നടപടി സ്വീകരിക്കുമെന്ന് കളക്ടര്‍ പറഞ്ഞു.

കുഞ്ഞിമംഗലം ഇലക്ട്രിക്കല്‍ സെക്ഷന്‍ പരിധിയിലെ ചെറാട്ട്, കണ്ണാംകുഴി, കുന്നിന് കിഴക്ക്, സംസ്‌കൃത യൂണിവേഴ്‌സിറ്റി എന്നീ ഭാഗങ്ങളില്‍ നാളെ (ഏപ്രില്‍ 24) രാവിലെ 8.30 മുതല്‍ വൈകിട്ട് 6.30 വരെ വൈദ്യുതി മുടങ്ങും. 

കതിരൂര്‍ ഇലക്ട്രിക്കല്‍ സെക്ഷന്‍ പരിധിയിലെ കുണ്ടുചിറ, അണക്കെട്ട് റോഡ് എന്നീ ഭാഗങ്ങളില്‍ നാളെ(ഏപ്രില്‍ 24) രാവിലെ എട്ട് മണി മുതല്‍ വൈകിട്ട് മൂന്ന് മണിവരെ വരെ വൈദ്യുതി മുടങ്ങും. 

ലോക്‌സഭാ തെരഞ്ഞെടുപ്പ് നടപടികള്‍ ചിട്ടയായി കുറ്റമറ്റ രീതിയില്‍ പൂര്‍ത്തിയാക്കുന്നതില്‍ താരമായത് 'പോള്‍ മാനേജര്‍' മൊബൈല്‍ ആപ്പ്. ഓരോ ബൂത്തിലും അനുനിമിഷം നടക്കുന്ന കാര്യങ്ങള്‍ ജില്ലാ തലത്തിലുള്ള കണ്‍ട്രോള്‍ റൂമില്‍ നിന്ന് നേരിട്ട് നിരീക്ഷിക്കാനും പ്രശ്‌നങ്ങള്‍ പരിഹരിക്കാനും ഏറെ സഹായകമായത് ഈ സംവിധാനമാണ്.