തോട്ടശ്ശേരിയറ നെടിയിരുപ്പ് ഹരിജന്‍ കോളനി റോഡ് ടാറിങ് നടക്കുന്നതിനാല്‍ ഗതാഗതം നിരോധിച്ചു.  വാഹനങ്ങള്‍ തോട്ടശ്ശേരിയറ -കൊണ്ടോടി, കുന്നമ്പുറം - വേങ്ങര വഴിയോ പോകണം. 

2019-20 അധ്യയനവര്‍ഷത്തില്‍ മഞ്ചേരി ഗവ ടെക്‌നിക്കല്‍ ഹൈസ്‌കൂള്‍ എട്ടാം ക്ലാസ്സ് പ്രവേശനത്തിനുളള അപേക്ഷാ ഫോറം വിതരണം തുടങ്ങി.  അപേക്ഷ സ്വീകരിക്കുന്ന അവസാന തീയതി മെയ് രണ്ട്.

തെരഞ്ഞെടുപ്പ് പ്രചരണം ചൂടുപിടിച്ചതോടെ  വോട്ടര്‍മാരെ സ്വാധീനിക്കാന്‍ ജില്ലയിലേക്ക് അനധികൃതമായി ഇതുവരെ എത്തിയത്  ഒരു കോടി രൂപയും 425.080 ഗ്രാം സ്വര്‍ണ്ണവും. ജില്ലയിലെ  വിവിധ സ്‌ക്വാഡുകളുടെ നേതൃത്വത്തിലാണ് ഒരു കോടി ആറ് ലക്ഷം രൂപയും 12 ലക്ഷം രൂപ വരുന്ന 425.080 ഗ്രാം സ്വര്‍ണ്ണവും പിടിച്ചെടുത്തത്. ജില്ലയിലെ 16 മണ്ഡലങ്ങളില്‍  13 മണ്ഡലങ്ങളിലായി  ഫ്ളയിങ് സ്‌ക്വാഡും സ്റ്റാറ്റിക് സര്‍വെയലന്‍സ്  സ്‌ക്വാഡും  നടത്തിയ പരിശോധനയിലാണ് പണവും  സ്വര്‍ണ്ണവും പിടിച്ചെടുത്തത്.

ജില്ലയില്‍ ഓണ്‍ലൈന്‍ സംവിധാനം വഴി ബാലറ്റ് നല്‍കിയത്  ജില്ലയിലെ 1579 സര്‍വീസ് വോട്ടര്‍മാര്‍ക്ക്. ലോക്‌സഭാ തെരഞ്ഞെടുപ്പില്‍ സര്‍വീസ് വോട്ടര്‍മാര്‍ക്ക്  വോട്ടുചെയ്യുന്നതിനായി തെരഞ്ഞെടുപ്പ് കമ്മീഷന്‍ പ്രത്യേകം സജ്ജമാക്കിയ പോര്‍ട്ടല്‍ വഴിയാണ് റിട്ടേണിങ് ഓഫീസര്‍ കൂടിയായ ജില്ലാകലക്ടര്‍ ഇ-ബാലറ്റുകള്‍ അയച്ചത്. ഇതുവരെ സര്‍വീസ് ബാലറ്റ് പേപ്പര്‍ അടക്കം ചെയ്ത കവര്‍ ഉള്‍പ്പടെ വലിയ കവറിലാക്കി അയക്കുകയായിരുന്നു പതിവ് രീതി. എന്നാല്‍ ഇത്തവണ ഓണ്‍ലൈനിലൂടെയാണ് ഇ-ബാലറ്റുകള്‍ നല്‍കിയത്.

സ്ഥാനാര്‍ത്ഥികള്‍ക്കും അവരുടെ ഏജന്റുമാര്‍ക്കുമായി നിയമപരമായി അവരുടെ പണം എങ്ങനെ ചെലവഴിക്കാം എന്നതു സംബന്ധിച്ച് സെമിനാര്‍ സംഘടിപ്പിച്ചു. മലപ്പുറം തെരഞ്ഞെടുപ്പ് ചെലവ് നിരീക്ഷകന്‍ ധ്രുവകുമാര്‍ സിങ് ഐ.സി.എ.എസ് സ്ഥാനാര്‍ത്ഥികള്‍ക്കും ഏജന്റുമാര്‍ക്കും ക്ലാസ്സെടുത്തു. ജില്ലാകലക്ടര്‍ അമിത് മീണ, ഫിനാന്‍സ് ഓഫീസര്‍ എന്‍.സന്തോഷ് കുമാര്‍ തുടങ്ങിയവര്‍ പങ്കെടുത്തു.

കരുത്തുറ്റ ജനാധിപത്യത്തിന് വര്‍ധിച്ച പങ്കാളിത്തം എന്ന ലക്ഷ്യവുമായി സുതാര്യവും വിശ്വസനീയവുമായ തിരഞ്ഞെടുപ്പിന്റെ പ്രചരണാര്‍ത്ഥം കേന്ദ്ര ഇലക്ഷന്‍ കമ്മീഷന്റെ നിര്‍ദ്ദേശ പ്രകാരം നടപ്പിലാക്കുന്ന പ്രത്യേക ബോധവത്കരണ പരിപാടി ജില്ലാ ആസ്ഥാനത്ത് തുടങ്ങി. സിവില്‍ സ്റ്റേഷനിലെ നെഹ്റു യുവ കേന്ദ്രയിലാണ് പ്രദര്‍ശനമുള്‍പ്പടെയുള്ളവ ഒരുക്കിയിരിക്കുന്നത്. ജില്ലാ ഭരണകൂടവുമായി സഹകരിച്ച് നടപ്പിലാക്കുന്ന പരിപാടിയില്‍ കേന്ദ്ര പരസ്യ ദൃശ്യ പ്രചാരണ വിഭാഗം, കേന്ദ്ര ഫോട്ടോ ഡിവിഷന്‍, ദേശീയ സാക്ഷരതാ മിഷന്‍ അതോറിറ്റി കൂടാതെ മുഖ്യ തെരഞ്ഞെടുപ്പ് അധികാരികള്‍ എന്നിവരുടെയും പങ്കാളിത്തത്തിലാണ്.

സ്വകാര്യ സ്ഥാപനത്തിലെ സിസി ടി. വി ടെക്നീഷ്യന്‍, സെയില്‍സ് ആന്‍റ് മാര്‍ക്കറ്റിംഗ് എക്സിക്യൂട്ടീവ് തസ്തികകളിലേക്ക് ഏപ്രില്‍ 17ന് കോട്ടയം എംപ്ലോയബിലിറ്റി സെന്‍ററില്‍ ഇന്‍റര്‍വ്യൂ നടത്തും.  താത്പര്യമുളളവര്‍ യോഗ്യത തെളയിക്കുന്ന സര്‍ട്ടിഫിക്കറ്റുമായി രാവിലെ 10ന് എത്തണം.