ഉപതെരഞ്ഞെടുപ്പ് നടക്കുന്ന മൂന്ന് മണ്ഡലങ്ങളില്‍ മദ്യ നിരോധനം ഏര്‍പ്പെടുത്തി ജില്ലാ കലക്ടര്‍ ഉത്തരവിട്ടു. ഫെബ്രുവരി 12  വൈകീട്ട് അഞ്ചു മുതല്‍ ഫെബ്രുവരി 14 ന് വൈകീട്ട് അഞ്ച് വരെയും വോട്ടെണ്ണല്‍ ദിവസമായ ഫെബ്രുവരി 15 നുമാണ് മദ്യനിരോധനം ഏര്‍പ്പെടുത്തിയത്.

ജില്ലയില്‍ ഉപതെരഞ്ഞെടുപ്പ് നടക്കുന്ന തദ്ദേശ സ്വയംഭരണ സ്ഥാപന  വാര്‍ഡുകളിലെ സര്‍ക്കാര്‍ സ്ഥാപനങ്ങള്‍ക്കും വിദ്യാഭ്യാസ സ്ഥാപനങ്ങള്‍ക്കും തെരഞ്ഞെടുപ്പ് ദിവസമായ ഫെബ്രുവരി 14 ന് ജില്ലാ കലക്ടര്‍ അവധി പ്രഖ്യാപിച്ചു.

എംപ്ലോയബിലിറ്റി സെന്റര്‍ മുഖേന പ്രമുഖ സ്ഥാപനങ്ങളിലേക്ക് ഡെപ്യൂട്ടി ബ്രാഞ്ച് മാനേജര്‍, എക്‌സിക്യൂട്ടീവ്, മാര്‍ക്കറ്റിംഗ് എക്‌സിക്യൂട്ടീവ്, സെയില്‍സ് എക്‌സിക്യൂട്ടീവ്, ഓഫീസ് സ്റ്റാഫ്, ടെലികോളര്‍, റിസപ്ഷനിസ്റ്റ്, ടീച്ചര്‍, സ്റ്റുഡന്റ് റിലേഷന്‍ഷിപ്പ് ഓഫീസര്‍ എന്നീ തസ്തികകളിലേക്ക് ഉദ്യോഗാര്‍ത്ഥികളെ ആവശ്യമുണ്ട്. എംപ്ലോയബിലിറ്റി സെന്ററില്‍ ഫെബ്രുവരി 14 വ്യാഴാഴ്ച രാവിലെ 10 ന് നടക്കുന്ന ഇന്റര്‍വ്യൂവില്‍ എസ്.എസ്.എല്‍.സി, പ്ലസ്ടു, ഡിപ്ലൊമ, ഡിഗ്രി, ടി.ടി.സി, എം.ബി.എ യോഗ്യതയുള്ളവര്‍ ബയോഡാറ്റയുമായി എത്തണം. ഫോണ്‍ : 04832 734 737

പൊന്നാനി താലൂക്ക് സപ്ലൈ ഓഫീസില്‍ 2018 ജൂണ്‍, ജൂലൈ മാസങ്ങളില്‍ അപേക്ഷ സമര്‍പ്പിച്ചിട്ടുളള (അക്ഷയകേന്ദ്രങ്ങള്‍ വഴി അപേക്ഷ സമര്‍പ്പിച്ചവര്‍ ഒഴികെ) കാലടി പഞ്ചായത്തിലുള്ളവര്‍ക്ക് ഫെബ്രുവരി 18, 19നും , തവനൂര്‍  പഞ്ചായത്തിലുളളവര്‍ക്ക് 21, 22 തിയ്യതികളിളും പൊന്നാനി താലൂക്ക് സപ്ലൈ ഓഫീസില്‍ പുതിയ റേഷന്‍ കാര്‍ഡ്, സര്‍ട്ടിഫിക്കറ്റുകള്‍ എന്നിവ വിതരണം ചെയ്യും.   പേര് നീക്കം ചെയ്യുന്നതിനും ഉള്‍പ്പെടുത്തുന്നതിനും, തെറ്റ് തിരുത്തുന്നതിനുമുളള റേഷന്‍ കാര്‍ഡുകളും കൈപ്പറ്റുന്ന   വ്യക്തിയുടെ ആധാര്‍കാര്‍ഡും റേഷന്‍ കാര്‍ഡിന്റെ വിലയും അപേക്ഷ സമര്‍പ്പിച്ചപ്പോള്‍  ലഭിച്ച രശീതും കൊണ്ടുവരണം.  

പ്രളയ ബാധിത കേരളത്തിന്റെ പുനര്‍ നിര്‍മ്മാണത്തിന്റെ ഭാഗമായി വാഴക്കാട് ഗവ. ആശുപത്രിക്ക് 10  കോടിയോളം രൂപ ചെലവില്‍ നിര്‍മ്മിച്ചു നല്‍കുന്ന കെട്ടിടത്തിന്റെ ശിലാസ്ഥാപനം ഫെബ്രുവരി 18 ന് നടക്കും. രാവിലെ 10.30 ന് ആരോഗ്യ വകുപ്പ് മന്ത്രി കെ.കെ.ശൈലജ ടീച്ചര്‍ ഉദ്ഘാടനം ചെയ്യുന്ന ചടങ്ങില്‍ വി.പി.എസ് ഹെല്‍ത്ത് കെയര്‍ ചെയര്‍മാന്‍ ഡോ.വി.എം.ഷംസീര്‍ വയലില്‍ ശിലാസ്ഥാപനം നിര്‍വ്വഹിക്കും. പ്രോജക്റ്റ് ഉപദേശകനായ മെട്രോ മാന്‍  ഇ.എം.ശ്രീധരന്‍ മുഖ്യാതിഥിയാവും. അഞ്ച് മാസം കൊണ്ട് നിര്‍മാണം പൂര്‍ത്തിയാക്കാനാണ് ആക്ഷന്‍ പ്ലാന്‍ തയ്യാറാക്കിയിരിക്കുന്നത്.

പിന്നോക്ക വികസന കോര്‍പ്പറേഷന്‍ വഴി കഴിഞ്ഞ മൂന്നു വര്‍ഷത്തിനിടെ ജില്ലയില്‍ വായ്പയായി വിതരണം ചെയ്തത്  91.06 കോടി രൂപ. 4771 കുടുംബങ്ങള്‍ക്കായാണ്  തുക വിതരണം ചെയ്തത്. സാമ്പത്തികമായി പിന്നോക്കം നില്‍ക്കുന്നവര്‍ക്കുള്ള എന്റ് വീട് ഭവനവായ്പാ പദ്ധതി, പ്രവാസി പുനരധിവാസ പദ്ധതി, വിദ്യാഭ്യാസ വായ്പാ പദ്ധതി, കുടുംബശ്രീ ലഘുവായ്പാ പദ്ധതി തുടങ്ങിയ വിഭാഗങ്ങളിലുള്‍പ്പെടുത്തിയാണ് പ്രധാനമായും വായ്പ വിതരണം ചെയ്തത്.

ശാരീരികവും മാനസികവുമായ പീഡനങ്ങള്‍ക്ക് ഇരയായ സ്ത്രീകള്‍ക്കും കുട്ടികള്‍ക്കും അഭയം നല്‍കാനായി സംസ്ഥാന വനിതാ ശിശുവികസന വകുപ്പ്  പെരിന്തല്‍മണ്ണയിലെ വണ്‍ സ്റ്റോപ്പ് സെന്ററില്‍  എത്തുന്നത് നിരവധി കേസുകള്‍.  ചെറുതും വലുതുമായ ആകെ 72  കേസുകളില്‍ 69 പേര്‍ക്ക് കൗണ്‍സിലിങ് നല്‍കുകയും രണ്ട് പേര്‍ക്ക് സ്‌പെഷല്‍ ഓര്‍ഡര്‍ പ്രകാരം മൂന്നു ദിവസത്തില്‍ കൂടുതല്‍ അഭയം നല്‍കുകയും ചെയ്തു.  ആവശ്യമുള്ള കേസുകളില്‍ നിയമ പരിരക്ഷയും വണ്‍സ്റ്റോപ്പ് സെന്റര്‍ നല്‍കുന്നുണ്ട്. 187 കേസുകളുടെ  തുടര്‍ പ്രവര്‍ത്തനങ്ങളാണ് നടന്നുകൊണ്ടിരിക്കുന്നത്.

ചെറുകിട വ്യവസായ മേഖലയില്‍ വന്‍ മുന്നേറ്റമാണ് കഴിഞ്ഞ മൂന്നു വര്‍ഷം കൊണ്ട് ജില്ലയിലുണ്ടായത്. 3248 ചെറുകിട വ്യവസായ യൂനിറ്റുകള്‍ ഈ കാലയളവില്‍ ജില്ലയില്‍ തുടങ്ങി. ഇതു വഴി 12601 പേര്‍ക്ക് തൊഴില്‍ ലഭിച്ചു. 2016-17 വര്‍ഷത്തില്‍ 148.83 കോടി രൂപ നിക്ഷേപിച്ച്  ആകെ 1316 ചെറുകിട വ്യവസായ യൂനിറ്റുകളിലായി 5286 പേര്‍ക്ക് തൊഴില്‍ നല്‍കാന്‍ കഴിഞ്ഞു. 2017-18 ല്‍ 109.62 കോടി രൂപ നിക്ഷേപത്തില്‍ 1200 സംരംഭങ്ങളിലായി 4260 പേര്‍ക്കും 2018-19 ല്‍ 72.67 കോടിയുടെ നിക്ഷേപത്തില്‍ 732 സംരംഭങ്ങളിലായി 3055 പേര്‍ക്കും തൊഴില്‍ ലഭ്യമായി.