എല്‍. ബി. എസ്. സെന്ററിന്റെ മഞ്ചേരി കേന്ദ്രത്തില്‍ ഡാറ്റാ എന്‍ട്രി ആന്റ് ഓഫീസ് ഓട്ടോമേഷന്‍, ഡിപ്ലോമ ഇന്‍ കമ്പ്യൂട്ടര്‍ അപ്ലിക്കേഷന്‍ കോഴ്‌സുകള്‍ ആരംഭിക്കുന്നു. പ്രവേശനം ആഗ്രഹിക്കുന്നവര്‍  കച്ചേരിപ്പടിയിലെ ഐ ജി  ബി ടി യില്‍ പ്രവര്‍ത്തിക്കുന്ന   എല്‍. ബി. എസ്.  സെന്ററുമായി  ബന്ധപ്പെടുക.  .(ഫോണ്‍ :2764674)

ജില്ലയില്‍ വരള്‍ച്ച പ്രതിരോധ പ്രവര്‍ത്തനങ്ങള്‍ ഏകോപിപ്പിക്കുന്നതിനും കുടിവെള്ള ലഭ്യത ഉറപ്പുവരുത്തുന്നതിനുമായി ജില്ലാതലത്തില്‍ ആറംഗ സമിതി രൂപീകരിച്ചു. വരള്‍ച്ച, ഉഷ്ണതരംഗം എന്നിവ മൂലം ജില്ലയില്‍ പല പ്രദേശങ്ങളും കുടിവെള്ള ദൗര്‍ലഭ്യവും അനുബന്ധ പ്രശ്‌നങ്ങളും അഭിമുഖീകരിച്ചു വരുന്ന സാഹചര്യത്തിലാണ് ജില്ലാദുരന്ത നിവാരണ വിഭാഗവും ജലവിഭവ, ജലസേചന വകുപ്പുകളുടെ ജില്ലാമേധാവികളും ഉള്‍പ്പെടുന്ന സമിതി രൂപീകരിച്ചിരിക്കുന്നത്.  കുടിവെള്ള ദൗര്‍ല്ലഭ്യം നേരിടുന്ന പ്രദേശങ്ങളില്‍ കുടിവെള്ളം ലഭ്യമാക്കുന്നതിനുള്ള നടപടികള്‍ സമിതി സ്വീകരിക്കും.

ലോക്സഭാ തെരഞ്ഞെടുപ്പിന് മുന്നോടിയായി ജില്ലയിലെ വിവിധ പരിശോധനാ സ്‌ക്വാഡുകളുടെ ഇതുവരെയുള്ള പ്രവര്‍ത്തനം വിലയിരുത്താനായി ജില്ലാ തെരഞ്ഞെടുപ്പ് ഓഫീസര്‍ കൂടിയായ ജില്ലാ കലക്ടര്‍ അമിത് മീണയുടെ നേതൃത്വത്തില്‍ യോഗം ചേര്‍ന്നു. വിവിധ സ്‌ക്വാഡുകള്‍ തമ്മിലുള്ള ഏകോപനം ഉറപ്പാക്കണമെന്നു കലക്ടര്‍ നിര്‍ദ്ദേശിച്ചു. ഇന്നു മുതല്‍ പ്രധാന കേന്ദ്രങ്ങള്‍ക്കൊപ്പം ഉള്‍പ്രദേശങ്ങളില്‍ കൂടി പരിശോധന കര്‍ശനമാക്കും. വിവിധ മണ്ഡലം അതിര്‍ത്തികളില്‍ പ്രത്യേക നിരീക്ഷണം ഏര്‍പ്പെടുത്താനും തീരുമാനിച്ചു.

ലോക്‌സഭാ തെരഞ്ഞെടുപ്പിനായി കലക്ടറേറ്റില്‍ പ്രത്യേകം സജ്ജമാക്കിയ സ്‌ട്രോങ് റൂമില്‍  സൂക്ഷിച്ചിരുന്ന ഇലക്‌ട്രോണിക് വോട്ടിങ് മെഷീന്‍, കണ്‍ട്രോള്‍ യൂനിറ്റ്, വി.വി പാറ്റ് തുടങ്ങിയ പോളിങ് സാമഗ്രികളുടെ വിതരണം തുടങ്ങി.  രാഷ്ട്രീയ പാര്‍ട്ടി പ്രതിനിധികളുടെ സാന്നിദ്ധ്യത്തില്‍ അതത് മണ്ഡലങ്ങളിലെ അസിസ്റ്റന്റ് റിട്ടേണിങ് ഓഫീസര്‍മാര്‍ വോട്ടിങ് സാമഗ്രികള്‍ ഏറ്റുവാങ്ങി. അവ  മണ്ഡലങ്ങളില്‍ ഒരുക്കിയിട്ടുള്ള സ്‌ട്രോങ് റൂമിലേക്ക് മാറ്റുന്നതിനുള്ള നടപടികളും കലക്ടറേറ്റില്‍ തുടങ്ങി.  

ലോക്സഭാ തെരഞ്ഞെടുപ്പിനുള്ള  നാമനിര്‍ദ്ദേശ പത്രികാ സമര്‍പ്പണത്തിന്റെ ആറാം ദിവസം ജില്ലയില്‍ നാല് സ്ഥാനാര്‍ത്ഥികള്‍ കൂടി പത്രിക സമര്‍പ്പിച്ചു. പൊന്നാനി മണ്ഡലത്തില്‍ പി.വി.അന്‍വറും (സ്വതന്ത്രന്‍), മലപ്പുറത്ത് വി.പി.സാനുവുമാണ് (സി.പി.എം) പത്രിക സമര്‍പ്പിച്ചത്.  ഇതിനു പുറമെ എസ്.ഡി.പി.ഐ. സ്ഥാനാര്‍ത്ഥികളായ കെ.സി.നസീര്‍ (പൊന്നാനി) അബ്ദുല്‍ മജീദ് (മലപ്പുറം ) എന്നിവരും പത്രിക സമര്‍പ്പിച്ചിട്ടുണ്ട്. കഴിഞ്ഞ ദിവസം പൊന്നാനിയില്‍ പത്രിക സമര്‍പ്പിച്ച സ്വതന്ത്ര സ്ഥാനാര്‍ത്ഥി  നൗഷാദ് പി.പി ഒരു സെറ്റ് പത്രിക കൂടി നല്‍കിയിട്ടുണ്ട്.  ഇതോടെ ജില്ലയില്‍ പത്രിക സമര്‍പ്പിച്ചവരുടെ എണ്ണം പത്തായി.