കല്ല്യാശ്ശേരി മണ്ഡലത്തിലെ മുവുവന്‍ ലൈബ്രറികളും ഹൈടെക്ക്-ജനസേവന കേന്ദ്രങ്ങളാക്കുന്ന പദ്ധതി യാഥാര്‍ഥ്യമാകുന്നു. ഇതിന്റെ ഭാഗമായി മണ്ഡലത്തിലെ 106 ലൈബ്രറികള്‍ക്ക് ലാപ്ടോപ്, പ്രൊജക്ടര്‍, പ്രിന്റര്‍, മൈക്ക് സെറ്റ് എന്നീ ഉപകരണങ്ങള്‍ ഇതിനകം നല്‍കിക്കഴിഞ്ഞു. ടി വി രാജേഷ് എംഎല്‍എയുടെ പ്രത്യേക വികസന നിധിയില്‍ നിന്ന് 1.28 കോടി രൂപ ചെലവഴിച്ചാണ് പദ്ധതി നടപ്പിലാക്കുന്നത്. 

ജില്ലാ സപ്ലൈ ഓഫീസ്‌ നവീകരിച്ചു. കളക്‌ടറേറ്റിലെ നവീകരിച്ച ഓഫീസിന്റെ ഉദ്‌ഘാടനം ജില്ലാ കളക്‌ടര്‍ ടി വി അനുപമ നിര്‍വഹിച്ചു. ഓഫീസുകള്‍ വൃത്തിയോടെയായിരിക്കുമ്പോള്‍ ഉദ്യോഗസ്ഥര്‍ക്ക്‌ പ്രവര്‍ത്തിക്കാനുളള ആര്‍ജ്ജവം കൂടും. അതോടൊപ്പം ഓഫീസിലേക്ക്‌ പൊതുജനങ്ങള്‍ക്ക്‌ എത്താനുളള താല്‍പര്യം വര്‍ദ്ധിക്കുമെന്നും ജില്ലാ കളക്‌ടര്‍ പറഞ്ഞു. പ്രളയകാലത്ത്‌ സപ്ലൈ ഓഫീസുകളുടെ പ്രവര്‍ത്തനം മാതൃകാപരമായിരുന്നുവെന്നും ജില്ലാ കളക്‌ടര്‍ കൂട്ടിച്ചേര്‍ത്തു. യോഗത്തില്‍ ഡെപ്യൂട്ടി കളക്‌ടര്‍ എം ബി ഗിരീഷ്‌, ജില്ലാ സപ്ലൈ ഓഫീസര്‍ ടി അയ്യപ്പദാസ്‌ തുടങ്ങിയവര്‍ പങ്കെടുത്തു.

ആരാധനാലയങ്ങളിലെ പ്രസാദ-ഭക്ഷണ വിതരണം ഭക്ഷ്യസുരക്ഷാ മാനദണ്‌ഡങ്ങള്‍ പാലിക്കണമെന്ന കേന്ദ്ര ഭക്ഷ്യസുരക്ഷാ അതോറിറ്റിയുടെ നിര്‍ദ്ദേശപ്രകാരം നടപ്പാക്കുന്ന 'ഭോഗ്‌' പദ്ധതിയുടെ ഭാഗമായി ബോധവല്‍ക്കരണ സെമിനാറും ലൈസന്‍സ്‌ മേളയും ഫെബ്രുവരി 14 രാവിലെ 10 ന്‌ പാറമേക്കാവ്‌ ഹാളില്‍ നടക്കും. ക്ഷേത്രങ്ങള്‍, ക്രിസ്‌ത്യന്‍ ദേവാലയങ്ങള്‍, മുസ്ലീം പളളികള്‍ എന്നിവടിങ്ങളിലെ പ്രതിനിധികള്‍ പങ്കെടുത്ത്‌ ലൈസന്‍സിന്‌ അപേക്ഷിക്കാം. ലൈസന്‍സന്‍ / രജിസ്‌ട്രേഷന്‍ അപേക്ഷയോടൊപ്പം തിരിച്ചറിയല്‍ കാര്‍ഡിന്റെ കോപ്പിയും ഒരു പാസ്‌പോര്‍ട്ട്‌ സൈസ്‌ ഫോട്ടോയും കൊണ്ടുവരണം.

ചാലക്കുടി ഈസ്റ്റ്‌ ഗവണ്‍മെന്റ്‌ എല്‍ പി സ്‌കൂളില്‍ ക്ലാസ്‌്‌ മുറികള്‍ക്കായി പുതിയതായി നിര്‍മ്മിക്കുന്ന കെട്ടിടത്തിന്റെ നിര്‍മ്മാണോദ്‌ഘാടനം നടത്തി. ബി ഡി ദേവസ്സി എം.എല്‍.എയുടെ 2107-2018 വര്‍ഷത്തെ ആസ്‌തിവികസന ഫണ്ടില്‍ നിന്നും ഒരു കോടി 30 ലക്ഷം രൂപചെലവഴിച്ചാണ്‌ കെട്ടിടം നിര്‍മ്മിക്കുന്നത്‌. 8 ക്ലാസ്‌ മുറികള്‍, ബാത്‌റൂം, വരാന്ത എന്നീ സൗകര്യങ്ങളാണ്‌ കെട്ടിടത്തില്‍ ഉണ്ടായിരുക്കുക. പൊതുമരാമത്ത്‌ വകുപ്പിനാണ്‌ നിര്‍മ്മാണചുമതല. 6 മാസം കൊണ്ട്‌ നിര്‍മ്മാണം പൂര്‍ത്തീകരിക്കും. കെട്ടിടത്തിന്റെ നിര്‍മ്മാണോദ്‌ഘാടനം ബി ഡി ദേവസ്സി എം.എല്‍.എ നിര്‍വ്വഹിച്ചു.

സംസ്ഥാന യുവജനക്ഷേമ ബോര്‍ഡ്‌്‌ കലാഭവന്‍ മണിയുടെ നാമധേയത്തില്‍ യുവജന ക്ലബ്ബ്‌ുകള്‍ക്കായി നാടന്‍പാട്ട്‌്‌ മത്സരം സംഘടിപ്പിക്കുന്നു. മണിനദം എന്ന പേരില്‍ ഫെബ്രുവരി 12, 13 തീയ്യതികളിലായി ചാലക്കുടി ബോയ്‌സ്‌ സ്‌കൂള്‍ ഗ്രൗണ്ടില്‍ ആണ്‌്‌ മത്സരം. നാടന്‍പാട്ട്‌ മത്സരം ഫെബ്രുവരി 12 വൈകീട്ട്‌ 4 ന്‌ സിനിമാസംവിധായകന്‍ പ്രിയനന്ദനന്‍ ഉദ്‌ഘാടനം ചെയ്യും. രണ്ട്‌ ദിവസങ്ങളിലായി നടക്കുന്ന മത്സരത്തില്‍ 14 ജില്ലകളില്‍ നിന്നുള്ള ടീമുകള്‍ പങ്കെടുക്കും. സമാപനസമ്മേളനം ഫെബ്രുവരി 13 വൈകീട്ട്‌ 5 ന്‌ വ്യവസായ - യുവജന കായികവകുപ്പ്‌ മന്ത്രി ഇ.പി ജയരാജന്‍ നിര്‍വ്വഹിക്കും. ബി.ഡി ദേവസ്സി എം.എല്‍.എ ചടങ്ങില്‍ അധ്യക്ഷത വഹിക്കും.

തൃശൂര്‍ ജില്ലയില്‍ ആയിരം ദിനാഘോഷവുമായി ബന്ധപ്പെട്ട്‌ സംഘടിപ്പിക്കുന്ന പ്രദര്‍ശന മേള നടത്തുന്നത്‌ സംബന്ധിച്ച്‌ ജില്ലാ ഓഫീസര്‍മാരുടെ ആലോചനയോഗം ഫെബ്രുവരി 13 രാവിലെ 11 ന്‌ കളക്‌ടറേറ്റ്‌ കോണ്‍ഫറന്‍സ്‌ ഹാളില്‍ നടക്കുമെന്ന്‌ ജില്ലാ കളക്‌ടര്‍ ടി വി അനുപമ അറിയിച്ചു.

ജില്ലാ പഞ്ചായത്തിന്റെ 2019-20ലെ വാര്‍ഷിക ബജറ്റ് അവതരണം നാളെ(ഫെബ്രുവരി 11) രാവിലെ 10.30 ജില്ലാ പഞ്ചായത്ത് ഹാളില്‍ നടക്കുമെന്ന് പ്രസിഡന്റ് കെ വി സുമേഷ് അറിയിച്ചു.

സംസ്ഥാന ന്യൂനപക്ഷ ക്ഷേമവകുപ്പിന്റെ കീഴില്‍ ന്യൂനപക്ഷ യുവജനങ്ങള്‍ക്കായി ജില്ലാതലത്തില്‍ സംഘടിപ്പിച്ച പ്രീമാരിറ്റല്‍ കോഴ്‌സ്‌ സമാപിച്ചു. കോഴ്‌സ്‌ പൂര്‍ത്തിയാക്കിയവരുടെ ജില്ലാതല സമാപനസമ്മേളനവും കുടുംബസംഗമവും സര്‍ട്ടിഫിക്കറ്റ്‌ വിതരണവും കൊടുങ്ങല്ലൂര്‍ ചേരമാന്‍ മാലിക്‌ മന്‍സില്‍ ഓര്‍ഫനേജ്‌ ഹാളില്‍ അഡ്വ. വി. ആര്‍. സുനില്‍കുമാര്‍ എം.എല്‍.എ ഉദ്‌ഘാടനം ചെയ്‌തു. കോഴ്‌സ്‌ പൂര്‍ത്തിയാക്കിയവരുടെ കുടുംബാംഗങ്ങള്‍ക്കായി സംസ്ഥാനത്ത്‌ ആദ്യമായാണ്‌ ഇത്തരത്തില്‍ കുടുംബസംഗമം നടത്തുന്നത്‌.

ഭക്ഷ്യസംസ്‌ക്കരണ മേഖലയിലും ഇലക്‌ട്രോണിക്‌സ്‌ ഉപകരണ നിര്‍മ്മാണ മേഖലയിലും മിനിമം വേതനം പുതുക്കി നിശ്ചിയിക്കുന്നതിനുളള ഉപദേശക സമിതിയുടെ തെളിവെടുപ്പ്‌ തൃശൂരില്‍ നടന്നു. തൃശൂര്‍, പാലക്കാട്‌, മലപ്പുറം ജില്ലകളിലുളളവര്‍ക്ക്‌ വേണ്ടി രാമനിലയത്തിലായിരുന്നു തെളിവെടുപ്പ്‌ നടന്നത്‌. ഭക്ഷ്യസംസ്‌ക്കരണ മേഖല ഉപദേശകസമിതിയുടെ ആദ്യതെളിവെടുപ്പായിരുന്നു തൃശൂരിലേത്‌. സമിതി കണ്‍വീനര്‍ ആനത്തലവട്ടം ആനന്ദന്‍, ഉപദേശകസമിതി അംഗങ്ങളായ തോമസ്‌ ജോസഫ്‌, എം എ അബ്‌ദുറഹ്മാന്‍ എന്നിവരുടെ നേതൃത്വത്തിലായിരുന്നു തെളിവെടുപ്പ്‌.

തൃശൂര്‍ ഗവണ്‍മെന്റ്‌ മെഡിക്കല്‍ കോളേജില്‍ നിന്നും ഉപയോഗശൂന്യമായ കേസ്‌ ഷീറ്റുകളും രജിസ്റ്ററുകളും ഏറ്റെടുത്ത്‌ ഷ്രഡ്‌ ചെയ്‌ത്‌ നീക്കം ചെയ്യുന്നതിന്‌ ക്വട്ടേഷന്‍ ക്ഷണിച്ചു. ക്വട്ടേഷന്‍ സ്വീകരിക്കുന്ന അവസാന തീയതി ഫെബ്രുവരി 20. കൂടുതല്‍ വിവരങ്ങള്‍ക്ക്‌ ഫോണ്‍ : 0487-2200310, 2200317.