രാഹുല്‍ഗാന്ധി എം.പിയുടെ സന്ദര്‍ശനത്തിന്റെ ഭാഗമായി ഇന്ന്‌ (14.03.19) നാട്ടിക ഫിഷറീസ്‌ ഗ്രൗണ്ടിന്റെ പരിസര പ്രദേശങ്ങളില്‍ ചെറുവിമാനങ്ങള്‍, ഗ്ലൈഡറുകള്‍, വിദൂര നിയന്ത്രിത ഇലക്ട്രോണിക്‌ കളിവിമാനങ്ങള്‍, ഹെലിക്യാമുകള്‍ തുടങ്ങിയവ പറത്തുന്നത്‌ നിരോധിച്ചതായി ജില്ലാ കളക്ടര്‍ ടി.വി.അനുപമ അറിയിച്ചു. സുരക്ഷാ ക്രമീകരണത്തിന്റെ ഭാഗമായാണിത്‌.
 

തൃശൂര്‍ ലോക്‌സഭാ മണ്ഡലത്തിലെ മാതൃക പെരുമാറ്റചട്ടം നടപ്പിലാക്കുന്നതിനുളള നോഡല്‍ ഓഫീസറായി അസിസ്റ്റന്റ്‌ കളക്ടര്‍ എസ്‌. പ്രേംകൃഷ്‌ണനെ ജില്ലാ ഭരണാധികാരി കൂടിയായ കളക്ടര്‍ ടി.വി. അനുപമ നിയമിച്ചു. തൃശൂര്‍ എല്‍.എ. നം 1 സ്‌പെഷല്‍ തഹസില്‍ദാര്‍ വികാസ്‌ ഡേവിസിനെ എം.സി.സി സ്‌ക്വാഡ്‌ 065 വടക്കാഞ്ചേരി മണ്‌ഡലത്തിലെ അസിസ്റ്റന്റ്‌ നോഡല്‍ ഓഫീസറായും കൊടുങ്ങല്ലൂര്‍ താലൂക്ക്‌ ഇന്‍ഡസ്‌ട്രീസ്‌ ഓഫീസര്‍ സി.എസ്‌. ബിജോയിയെ എം.സി.സി സ്‌ക്വാഡ്‌ 069 കയ്‌പമംഗലം മണ്‌ഡലത്തിലെ അസിസ്റ്റന്റ്‌ നോഡല്‍ ഓഫീസറായും നിയമിച്ചു.

ലോകസഭ തെരഞ്ഞെടുപ്പുമായി ബന്ധപ്പെട്ട യോഗങ്ങള്‍ സംഘടിപ്പിക്കുമ്പോള്‍ ക്രമസമാധാനം പാലിക്കുന്നതിനും ഗതാഗതം നിയന്ത്രിക്കുന്നതിനുളള ക്രമീകരണം നടത്താന്‍ പോലീസിന്‌ കഴിയും വിധം യോഗസ്ഥലംവും സമയവും നേരത്തെ തന്നെ പോലീസ്‌ അധികാരികളെ അറിയിക്കാന്‍ പാര്‍ട്ടികളും സ്ഥാനാര്‍ത്ഥികളും തയ്യാറാകണമെന്ന്‌ ജില്ലാ ഇലക്ഷന്‍ ഓഫീസറായ ജില്ലാ കളക്‌ടര്‍ ടി വി അനുപമ അറിയിച്ചു.

ദേശീയ ഭക്ഷ്യഭദ്രതാ നിയമത്തിന്‍റെ വിവിധ ഘടകങ്ങളെക്കുറിച്ചും ഇ-പോസ് മെഷിനുകളുടെ പ്രവര്‍ത്തനരീതികള്‍, പൊതുവിതരണ രംഗത്തെ മാറ്റങ്ങളെ സംബന്ധിച്ച് ജില്ലാ സപ്ലൈ ഓഫീസിന്‍റെ ആഭിമുഖ്യത്തില്‍ മാധ്യമ പ്രവര്‍ത്തകര്‍ക്കുള്ള ശില്‍പശാല മാര്‍ച്ച് 12ന് രാവിലെ 11ന് പ്രസ് ക്ലബ് ഹാളില്‍ നടക്കും. ജില്ലയിലെ മുഴുവന്‍ മാധ്യമപ്രവര്‍ത്തകരും ശില്‍പശാലയില്‍ പങ്കെടുക്കണമെന്ന് ജില്ലാ സപ്ലൈ ഓഫീസര്‍ അറിയിച്ചു.

മുനിസിപ്പല്‍ കോമണ്‍ സര്‍വീസില്‍ ജൂനിയര്‍ ഹെല്‍ത്ത് ഇന്‍സ്പെക്ടര്‍ ഗ്രേഡ് 2 (കാറ്റഗറി നമ്പര്‍ 571/14) തസ്തികയിലേക്കുള്ള ചുരുക്കപ്പട്ടികയില്‍ ജില്ലയില്‍ നിന്നും ഉള്‍പ്പെട്ടവര്‍ക്ക് മാര്‍ച്ച് 13,14 തീയതികളില്‍ ഇന്‍റര്‍വ്യൂ നടക്കും. ജില്ലാ പി.എസ്.സി ഓഫീസില്‍ നടക്കുന്ന അഭിമുഖത്തില്‍ എസ്.എം.എസ്/ പ്രൊഫൈല്‍ അറിയിപ്പ് ലഭിച്ചവര്‍ ആവശ്യമായ രേഖകളുമായി നേരിട്ടെത്തണം. അറിയിപ്പ് ലഭിക്കാത്ത അര്‍ഹരായവര്‍ ജില്ലാ പി.എസ്.സി ഓഫീസുമായി ബന്ധപ്പെടണമെന്ന്  ജില്ലാ ഓഫീസര്‍ അറിയിച്ചു. ഫോണ്‍: 0491 2505398. 

ലോക്‌സഭാ തെരഞ്ഞെടുപ്പ് പ്രവര്‍ത്തനങ്ങളുടെ തുടക്കം മുതല്‍ അവസാനം വരെ ഹരിതചട്ടം ഉറപ്പാക്കാന്‍ രാഷ്ട്രീയ പാര്‍ട്ടികള്‍ സഹകരിക്കണമെന്ന് ജില്ലാ കളക്ടര്‍ പി.കെ. സുധീര്‍ ബാബു. കളക്‌ട്രേറ്റില്‍ വിവിധ രാഷ്ട്രീയ പാര്‍ട്ടി പ്രതിനിധികളുടെ യോഗത്തില്‍ അദ്ധ്യക്ഷത വഹിച്ച് സംസാരിക്കുകയായിരുന്നു അദ്ദേഹം. തെരഞ്ഞെടുപ്പ് പ്രചരണത്തിന് ഫ്‌ളക്‌സ് നിര്‍മ്മിത ബോര്‍ഡുകള്‍, ബാനറുകള്‍, തോരണങ്ങള്‍ എന്നിവയ്ക്ക് പകരം പ്രകൃതി സൗഹൃദ വസ്തുക്കള്‍ ഉപയോഗിക്കണം. യോഗങ്ങളും മറ്റും ചേരുമ്പോള്‍ ഡിസ്‌പോസിബിള്‍ ഗ്ലാസ്, പ്ലെയിറ്റ്, പ്ലാസ്റ്റിക് കുപ്പികള്‍ എന്നിവ ഒഴിവാക്കണം. പകരം പുനരുപയോഗ സാധ്യതയുളള വസ്തുക്കള്‍ ഉപയോഗിക്കണം.

പട്ടികവര്‍ഗ വിഭാഗക്കാരായ ഭൂരഹിത കുടുംബങ്ങള്‍ക്ക് മണ്ണാര്‍ക്കാട് വില്ലേജ് തത്തേങ്ങലത്തെ 200 ഏക്കര്‍ നിക്ഷിപ്ത വനഭൂമി ഒരു ഏക്കര്‍ വീതം അളന്ന് അതിര്‍ത്തി തിരിച്ച് കല്ലിട്ട് സ്കെച്ച് സമര്‍പ്പിക്കുന്നതിന് അംഗീകൃത സര്‍വ്വെയര്‍മാരില്‍ നിന്ന് പട്ടികവര്‍ഗ്ഗ വികസന ഓഫീസര്‍ ടെണ്ടര്‍ ക്ഷണിച്ചു.  കൂടുതല്‍ വിവരങ്ങള്‍ക്ക് പട്ടികവര്‍ഗ്ഗ വികസന ഓഫീസ്, സിവില്‍ സ്റ്റേഷന്‍, പാലക്കാട്-678001, ഫോണ്‍: 0491-2505383.

കേരള മോട്ടോര്‍ വകുപ്പ് ജില്ലയിലെ അംഗീകൃത വാഹന ഡീലര്‍മാര്‍ക്കായി ഇന്ന് (മാര്‍ച്ച് 13) മാര്‍ഗ്ഗ നിര്‍ദ്ദേശ ക്ലാസ് സംഘടിപ്പിക്കും. രാവിലെ 10.30 ന് കോട്ടയം പ്രസ് ക്ലബില്‍ നടക്കുന്ന ക്ലാസില്‍ ജില്ലയിലെ എല്ലാ ഡീലര്‍മാരുടെയും രണ്ട് പ്രതിനിധികള്‍ വീതം പങ്കെടുക്കണമെന്ന് ആര്‍ടിഒ ബാബു ജോണ്‍ അറിയിച്ചു.  കേരള മോട്ടോര്‍ വാഹന വകുപ്പില്‍ ലഭ്യമായ സേവനങ്ങള്‍ 'വാഹന്‍' എന്ന കേന്ദ്ര സോഫ്റ്റ്‌വെയറിലേക്ക് മാറുന്നതിന്റെ ഭാഗമായാണ് ക്ലാസ്.