സർവ്വെയും ഭൂരേഖയും വകുപ്പ് 2018 ൽ വിവിധ കേന്ദ്രങ്ങളിൽ റവന്യൂ ജീവനക്കാർക്കായി നടത്തിയ ഹയർ സർവ്വെ പരീക്ഷാഫലം പ്രസിദ്ധീകരിച്ചു.

സർവ്വെ ഡയറക്ടറേറ്റിലും www.dslr.kerala.gov.in   വെബ്‌സൈറ്റിലും പരീക്ഷാഫലം ലഭ്യമാണ്.

പി.എൻ.എക്സ്. 557/19

ഹയർ സെക്കണ്ടറി, നോൺ വൊക്കേഷണൽ അദ്ധ്യാപക നിയമനത്തിന് ഏർപ്പെടുത്തിയിരിക്കുന്ന സംസ്ഥാനതല യോഗ്യത നിർണ്ണയ പരീക്ഷയായ സെറ്റ് (സ്റ്റേറ്റ് എലിജിബിലിറ്റി ടെസ്റ്റ്) മാർച്ച് 31 ന് നടക്കും.

ഓൺലൈൻ രജിസ്‌ട്രേഷൻ ഈ മാസം അഞ്ചിന് മുമ്പായി പൂർത്തിയാക്കണം. അപേക്ഷകൾ 20 ന് വൈകുന്നേരം അഞ്ചിനുമുമ്പായി എൽ.ബി.എസ്. സെന്ററിൽ ലഭിക്കണം. വൈകി ലഭിക്കുന്ന അപേക്ഷകൾ പരിഗണിക്കുന്നതല്ല.

പി.എൻ.എക്സ്. 556/19

പ്രളയാനന്തരം ജില്ലയില്‍ ക്ഷീരസംഘങ്ങളുടെയും ക്ഷീരകര്‍ഷകരുടെയും കാര്യക്ഷമമായ പ്രവര്‍ത്തനങ്ങളെ തുടര്‍ന്ന്‌ പ്രതിദിന പാല്‍ ഉല്‌പാദനം 4.75 ലക്ഷം ലിറ്ററായി വര്‍ധിച്ചു. 17 ക്ഷീരവികസന യൂണിറ്റുകള്‍ വഴിയാണ്‌ ഇത്രയും പാല്‍ ഉല്‌പാദിപ്പിക്കുന്നത്‌. ക്ഷീരസഹകരണ സംഘങ്ങളിലൂടെ മാത്രം പ്രതിദിനം 95,000 ലിറ്റര്‍ പാല്‍ ഉല്‌പാദിപ്പിക്കാനാവുന്നുണ്ടെന്നും ജില്ലാ ക്ഷീരവികസന ഡെപ്യൂട്ടി ഡയറക്ടര്‍ അറിയിച്ചു. രജിസ്‌ട്രര്‍ ചെയ്‌തു പ്രവര്‍ത്തിക്കുന്ന 242 ക്ഷീര സഹകരണ സംഘങ്ങളില്‍ പതിനായിരത്തോളം കര്‍ഷകര്‍ ഉള്‍പ്പെടുന്നുവെന്നാണ്‌ കണക്ക്‌.

ജില്ലയിലെ എട്ട്‌ നഗരകേന്ദ്രങ്ങള്‍ക്കു വികസന മാസ്‌റ്റര്‍ പ്ലാന്‍ തയ്യാറാക്കി സര്‍ക്കാരിന്റെ അംഗീകാരത്തിന്‌ സമര്‍പ്പിച്ചതായി ടൗണ്‍ പ്ലാനര്‍ അറിയിച്ചു. വികസന മാസ്റ്റര്‍ പ്ലാനിലൂടെ സംസ്ഥാനത്തെ പ്രധാന മികച്ച നഗരങ്ങളെപ്പോലെ ജില്ലയിലെ നഗരകേന്ദ്രങ്ങളെ രൂപപ്പെടുത്താനാണ്‌ ശ്രമം. തൃശൂര്‍ കോര്‍പ്പറേഷന്‍, നഗരസഭകളായ ഗുരുവായൂര്‍, വടക്കാഞ്ചേരി, കൊടുങ്ങല്ലൂര്‍, ചാവക്കാട്‌, കുന്നംകുളം, ചാലക്കുടി, ഇരിങ്ങാലക്കുട എന്നിവിടങ്ങളിലാണ്‌ വികസന മാസ്റ്റര്‍ പ്ലാനുകള്‍ തയ്യാറാക്കിയിട്ടുള്ളത്‌. ഇതോടൊപ്പം പ്രാദേശിക വികസനരേഖകളും സംയോജിത ജില്ലാ വികസനരൂപരേഖയും തയ്യാറാക്കിയിട്ടുണ്ട്‌.

കേരളത്തിലെ തീരദേശങ്ങളിലെ മുഴുവന്‍ കായികതാരങ്ങളെയും ഉള്‍പ്പെടുത്തി ദേശീയ തീരദേശ കായികമേള സംഘടിപ്പിക്കുമെന്ന്‌ വ്യവസായ-കായികക്ഷേമവകുപ്പു മന്ത്രി ഇ പി ജയരാജന്‍. ബീച്ച്‌ ഗെയിംസില്‍ മികച്ച പ്രകടനം കാഴ്‌ചവെക്കുന്നവര്‍ക്കു ജോലിയും പഠനത്തിനാവശ്യമായ സൗകര്യങ്ങളും ലഭ്യമാക്കുമെന്നും അദ്ദേഹം പറഞ്ഞു. നാട്ടിക ഗവ. ഫിഷറീസ്‌ ഹയര്‍ സെക്കണ്ടറി സ്‌കൂളില്‍ നവീകരിച്ച കളിസ്ഥലം ഉദ്‌ഘാടനം ചെയ്‌തു സംസാരിക്കുകയായിരുന്നു മന്ത്രി.

തൃശൂര്‍ ജില്ലയില്‍ പത്താം ക്ലാസ്സ്‌ പരീക്ഷ എഴുതുന്ന മുഴുവന്‍ കുട്ടികള്‍ക്കും അവരുടെ രക്ഷിതാക്കള്‍ക്കും തൃശൂര്‍ ഡയറ്റിന്റെ നേതൃത്വത്തില്‍ മോട്ടിവേഷന്‍ കൗണ്‍സലിങ്‌ നല്‍കുന്നു. ഫെബ്രുവരി 14, 15, 16 തീയതികളിലാണ്‌ ജില്ലയിലെ മുഴുവന്‍ വിദ്യാലയങ്ങളിലും കൗണ്‍സലിങ്‌ നടക്കുക. ആത്മവിശ്വാസം വര്‍ദ്ധിപ്പിക്കല്‍, പഠന തന്ത്രങ്ങല്‍, പഠിക്കാനുളള എളുപ്പ വഴികള്‍, സമയക്രമീകരണം, ചിട്ടകള്‍, ശീലങ്ങള്‍, ഉറക്കം, വ്യായാമം, ആഹാരം, മുന്നൊരുക്കങ്ങള്‍, ദൈനംദിന ടൈംടേബിള്‍ തയ്യാറാക്കല്‍ തുടങ്ങിയവയിലാണ്‌ കുട്ടികള്‍ക്ക്‌ കൗണ്‍സിലങ്‌ നല്‍കുക.

സംസ്ഥാന സര്‍ക്കാരിന്‍െ്‌റ നേതൃത്വത്തില്‍ സഹകരണ ബാങ്കുകളെ സംയോജിപ്പിച്ചകൊണ്ട്‌ രൂപീകരിക്കുന്ന കേരള ബാങ്കില്‍ പ്രവാസികള്‍ക്ക്‌ നേരിട്ട്‌ നിക്ഷേപം നടത്തുന്നതിനുള്ള സൗകര്യം ഒരുക്കുമെന്ന്‌ വ്യവസായ-കായിക-യുവജന ക്ഷേമ വകുപ്പ്‌ മന്ത്രി ഇ.പി. ജയരാജന്‍. നാട്ടിക സര്‍വ്വീസ്‌ സഹകരണ ബാങ്ക്‌ ചേര്‍ക്കര ബ്രാഞ്ച്‌ ഉദ്‌ഘാടനം നിര്‍വഹിച്ച്‌ സംസാരിക്കുകയായിരുന്നു അദ്ദേഹം. കേരള ബാങ്ക്‌ കേരളത്തിന്‍െ്‌റ വികസനത്തിന്‌ കുതിപ്പേകും. പ്രവാസികള്‍ക്ക്‌ നിക്ഷേപം നടത്തുന്നതിന്‌ ആവശ്യമായ രീതിയില്‍ നൂതനവും ആധുനികവുമായ സൗകര്യങ്ങളാണ്‌ കേരള ബാങ്കില്‍ ഒരുക്കുക. ജില്ലാ സഹകരണ ബാങ്കുകള്‍ ലയിച്ച്‌ ഇനി ഒറ്റ ബാങ്കായി തീരും.

ജില്ലാ ആസൂത്രണ സമിതി യോഗം ഫെബ്രുവരി 16 രാവിലെ 10 ന്‌ ജില്ലാ ആസൂത്രണ ഭവന്‍ കോണ്‍ഫറന്‍സ്‌ ഹാളില്‍ ചേരും. 

ദേശീയ കുഷ്‌ഠരോഗ നിര്‍മ്മാര്‍ജ്ജന പക്ഷാചരണം സ്‌പര്‍ശ്‌ 2019 ജില്ലാതല സമാപനം ഫെബ്രുവരി 14 രാവിലെ 10 ന്‌ മുണ്ടൂര്‍ കുടുംബാരോഗ്യ കേന്ദ്രത്തില്‍ നടക്കും. ഡോ. പി കെ ബിജു എംപി ഉദ്‌ഘാടനം ചെയ്യും. കൈപ്പറമ്പ്‌ ഗ്രാമപഞ്ചായത്ത്‌ പ്രസിഡണ്ട്‌ സി ജെ ആന്റോ അദ്ധ്യക്ഷത വഹിക്കും. സമാപനത്തിന്റെ ഭാഗമായി പ്രദര്‍ശനം, ത്വക്ക്‌ രോഗനിര്‍ണ്ണയ ക്യാമ്പ്‌, ബാപ്പുജി ടോക്ക്‌, നാടന്‍ പാട്ട്‌ ആലാപനം, ഗാനമേള എന്നിവ നടത്തും. ജില്ലാ ലെപ്രസി ഓഫീസര്‍ ഡോ. വി കെ മിനി സ്വാഗതവും മുണ്ടൂര്‍ കുടുംബാരോഗ്യ കേന്ദ്രം മെഡിക്കല്‍ ഓഫീസര്‍ ഡോ. കെ പി ചിന്ത നന്ദിയും പറയും.