കാലാവസ്ഥ വ്യതിയാനം കാരണം അന്തരീക്ഷ ഊഷ്മാവ് ക്രമാതീതമായി ഉയരുന്ന സാഹചര്യത്തിൽ ജനങ്ങൾ ജാഗ്രത പാലിക്കണമെന്ന് ആരോഗ്യവകുപ്പ് അറിയിച്ചു. സൂര്യതാപം ഏറ്റവരുടെ ചികിത്സയ്ക്കായി ആശുപത്രികളിൽ സൗകര്യമൊരുക്കിയിട്ടുണ്ട്. ജില്ലാ മെഡിക്കൽ ഓഫീസർമാർക്ക് ഇതുസംബന്ധിച്ച് ആവശ്യമായ നിർദ്ദേശം നൽകി. 11 മണിക്കും 3 മണിക്കും ഇടയ്ക്ക് സൂര്യനുമായി നേരിട്ടുള്ള സമ്പർക്കം ഒഴിവാക്കണം. നിർജലീകരണം ഒഴിവാക്കാൻ ധാരാളം വെള്ളം കുടിക്കണം.  ബുദ്ധിമുട്ട്  തോന്നിയാൽ ഉടൻ ചികിത്സ തേടണം. 

ആരോഗ്യ വകുപ്പിന്റെ ജാഗ്രത നിർദേശം

കേന്ദ്ര കാലാവസ്ഥാ വകുപ്പ് പുറപ്പെടുവിച്ച കാലാവസ്ഥാ വിശകലനത്തിൽ ആലപ്പുഴ, കോട്ടയം, പാലക്കാട്,  കോഴിക്കോട് ജില്ലകളിൽ 26 വരെ ഉയർന്ന താപനില ശരാശരിയിൽ നിന്നും മൂന്ന്  മുതൽ നാല് ഡിഗ്രി വരെയും  27  നും 28  നും ഉയർന്ന താപനില ശരാശരിയിൽ നിന്നും രണ്ട്  മുതൽ മൂന്ന്  ഡിഗ്രി വരെയും ഉയരുമെന്ന് മുന്നറിയിപ്പ്. 

മാർച്ച് 25 മുതൽ 28 വരെ  തിരുവനന്തപുരം, കൊല്ലം, പത്തനംതിട്ട, എറണാകുളം, തൃശ്ശൂർ, മലപ്പുറം, കണ്ണൂർ, കാസർഗോഡ്  ജില്ലകളിൽ ഉയർന്ന താപനില ശരാശരിയിൽ നിന്ന് രണ്ട്  മുതൽ മൂന്ന്  ഡിഗ്രി സെൽഷ്യസ് വരെ ഉയരാൻ സാധ്യതയുണ്ട്.

ഇടുക്കി ജില്ലാ നിര്‍മ്മിതി കേന്ദ്രത്തിന്റെ ആഭിമുഖ്യത്തില്‍ ജില്ലാ നിര്‍മ്മിതി കേന്ദ്രം മുട്ടം ഓഫീസില്‍ ഏപ്രില്‍ മാസം രണ്ടാംവാരത്തില്‍ വിവിധയിനം ചിലവ് കുറഞ്ഞ കെട്ടിട നിര്‍മ്മാണ സാങ്കേതിക വിദ്യയില്‍ പരിശീലനം സംഘടിപ്പിക്കുന്നു. താല്‍പ്പര്യമുള്ളവര്‍ ഇടുക്കി ജില്ലാ നിര്‍മ്മിതി കേന്ദ്രം ഹെഡ് ഓഫീസുമായി ബന്ധപ്പെടണം. ഫോണ്‍ 04862 232252, 232546.

2018-19 വര്‍ഷത്തെ നികുതികളും ഫീസുകളും സ്വീകരിക്കുന്നതിനായി അടിമാലി ഗ്രാമ പഞ്ചായത്ത് ഓഫീസ് 24ന് ഞായറാഴ്ച രാവിലെ 9 മുതല്‍ 5 വരെ തുറന്ന് പ്രവര്‍ത്തിക്കുന്നതാണന്ന് സെക്രട്ടറി അറിയിച്ചു.

ഇടുക്കി ജില്ലാതല ജനകീയ സമിതി മാര്‍ച്ച്  26ന് ഉച്ചക്ക് 12 മണിക്ക് ജില്ലാകലക്ടറടെ അധ്യക്ഷതയില്‍ ചേമ്പറില്‍ ചേരും.

ലോക്‌സഭാ തെരഞ്ഞെടുപ്പിനോടനുബന്ധിച്ച് തെരഞ്ഞെടുപ്പ് ഡ്യൂട്ടികള്‍ക്ക് നിയോഗിക്കേണ്ട ഉദ്യോഗസ്ഥരുടെ ലിസ്റ്റ് യഥാസമയം നല്‍കുന്നതില്‍ വീഴ്ച വരുത്തിയതായി ശ്രദ്ധയില്‍പ്പെട്ട ദേവികുളം താലൂക്കിലെ 8 സ്ഥാപനമേലധികാരികള്‍ക്കെതിരെ ജനപ്രാതിനിധ്യ നിയമം അനുസരിച്ച് അച്ചടക്ക നടപടി ആരംഭിച്ചതായി ജില്ലാകലക്ടര്‍ എച്ച്. ദിനേശന്‍ അറിയിച്ചു. മറ്റ് താലൂക്കുകളില്‍ ലിസ്റ്റ് നല്‍കുന്നതില്‍ വീഴ്ചവരുത്തിയിട്ടുണ്ടെങ്കില്‍ അവര്‍ക്കെതിരെയും നടപടി ഉണ്ടാകുമെന്നും അദ്ദേഹം അറിയിച്ചു.

ലോക്‌സഭാ തെരഞ്ഞെടുപ്പിലെ 088 ദേവികുളം, 089 ഉടുമ്പന്‍ചോല, 090 തൊടുപുഴ, 091 ഇടുക്കി, 092 പീരുമേട് എന്നീ നിയോജകമണ്ഡലങ്ങളിലേക്ക് അനുവദിക്കേണ്ട ഇലക്‌ട്രോണിക് വോട്ടിംഗ് മെഷീന്‍,  വിവിപാറ്റ് എന്നിവയുടെ ഒന്നാം റാന്‍ഡമൈസേഷന്‍ മാര്‍ച്ച് 25 ഉച്ചക്ക് 2.30ന് ജില്ലാകലക്ടറുടെ ചേമ്പറില്‍ ജില്ലാ ഇലക്ഷന്‍ ഓഫീസറുടെ മേല്‍നോട്ടത്തില്‍  നടത്തും. അംഗീകൃത ദേശീയ /സംസ്ഥാന  രാഷ്ട്രീയപാര്‍ട്ടികളുടെ പ്രതിനിധികള്‍ പങ്കെടുക്കണമെന്ന് ജില്ലാ തെരഞ്ഞെടുപ്പ് ഓഫീസര്‍ അറിയിച്ചു.

തെരഞ്ഞെടുപ്പുമായി ബന്ധപ്പെട്ട പെയ്ഡ് ന്യൂസുകള്‍ കണ്ടെത്തി നടപടി സ്വീകരിക്കല്‍, മാധ്യമങ്ങള്‍ വഴി പ്രചരിപ്പിക്കുന്ന രാഷ്ട്രീയ പരസ്യം എന്നിവയ്ക്ക് അംഗീകാരം നല്‍കുന്നതിനുള്ള മീഡിയ സര്‍ട്ടിഫിക്കേഷന്‍ ആന്റ് മോണിറ്ററിംഗ് കമ്മിറ്റി (എം.സി.എം.സി) ജില്ലയില്‍ മാര്‍ച്ച് 25ന് ഉദ്ഘാടനം ചെയ്യും. ജില്ലാ ഇന്‍ഫര്‍മേഷന്‍ ഓഫീസില്‍ പ്രത്യേകം സജ്ജീകരിച്ചിട്ടുള്ള സെല്ലിന്റെ ഉദ്ഘാടനം  രാവിലെ 11ന് ജില്ലാ തെരഞ്ഞെടുപ്പ് ഓഫീസര്‍ ജില്ലാകലക്ടര്‍ എച്ച്. ദിനേശന്‍ നിര്‍വഹിക്കും. സമിതി അംഗങ്ങള്‍ തെരഞ്ഞെടുപ്പ്  ഉദ്യോഗസ്ഥര്‍ തുടങ്ങിയവര്‍ സംബന്ധിക്കും.

ലോക്സഭാ തെരഞ്ഞെടുപ്പിനോടനുബന്ധിച്ച് തിരുവനന്തപുരം പ്രസ്സ് ഇൻഫർമേഷൻ ബ്യൂറോ തയ്യാറാക്കിയ ''ലോകസഭാ തെരഞ്ഞെടുപ്പും  കേരളവും; 2014 ലേക്ക്ഒരുതിരിഞ്ഞു നോട്ടം'' എന്ന ഇ-ലഘു പുസ്തകം സംസ്ഥാന മുഖ്യതെരഞ്ഞെടുപ്പ് ഓഫീസർ  ടിക്കാറാം മീണ പ്രകാശനം ചെയ്തു. തിരുവനന്തപുരം പ്രസ്സ് ഇൻഫർമേഷൻ ബ്യൂറോ ഡെപ്യൂട്ടി ഡയറക്ടർ ഡോ. നീതുസോണ ആദ്യപ്രതി ഏറ്റുവാങ്ങി.

തെരഞ്ഞെടുപ്പിൽ ഹരിത ചട്ടം പാലിക്കുന്നതിന് സഹായിക്കുന്ന കൈപ്പുസ്തകം മുഖ്യ തിരഞ്ഞെടുപ്പ് ഓഫീസർ ടിക്കാറാം മീണ പ്രകാശനം ചെയ്തു. ഹരിത കേരളം മിഷനാണ് ഹരിതചട്ട പാലനം സംശയങ്ങളും മറുപടികളും എന്ന പുസ്തകം തയ്യാറാക്കിയത്.