കൊച്ചി: ആലപ്പുഴ ഇന്‍ഡസ്ട്രിയല്‍ ട്രൈബ്യൂണല്‍ ആന്റ് ഇ.ഐ കോര്‍ട്ട് ജഡ്ജ് എം.ബി പ്രജിത്ത് ഒക്‌ടോബര്‍ 5, 11, 12, 25, 26 തീയതികളില്‍ എറണാകുളം ലേബര്‍ കോടതിയിലും ഒമ്പതിന് മൂവാറ്റുപുഴ കച്ചേരിത്താഴം കോര്‍ട്ട് കോംപ്ലക്‌സിലുളള ഓള്‍ഡ് ഫാമിലി കോര്‍ട്ട് ഹാളിലും, 30-ന് പത്തനംതിട്ട ജില്ലാ മീഡിയേഷന്‍ സെന്ററിലും, മറ്റ് പ്രവൃത്തി ദിവസങ്ങളില്‍ ആസ്ഥാനത്തും തൊഴില്‍ തര്‍ക്ക കേസുകളും, എംപ്ലോയീസ് ഇന്‍ഷ്വറന്‍സ് കേസുകളും, എംപ്ലോയീസ് കോമ്പന്‍സേഷന്‍ കേസുകളും വിചാരണ ചെയ്യും.

കൊച്ചി: അതിതീവ്രമഴയ്ക്കുള്ള സാധ്യതയുണ്ടെന്ന കേന്ദ്ര കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പിനെ തുടര്‍ന്ന് അടിയന്തരസാഹചര്യം നേരിടുന്നതിന് മുന്നൊരുക്കങ്ങള്‍ നടത്താന്‍ വിവിധ വകുപ്പുകള്‍ക്ക് ചുമതലകള്‍ നല്‍കി ജില്ലാ കലക്ടര്‍ ഉത്തരവായി. ശക്തമായ മഴ മൂലം പെട്ടെന്നുള്ള വെള്ളപ്പൊക്കം, ഉരുള്‍പൊട്ടല്‍, മണ്ണിടിച്ചില്‍ എന്നിവയ്ക്ക് സാധ്യതയുള്ളതിനാല്‍ അടിയന്തരസാഹചര്യം നേരിടുന്നതിനാണ്  നടപടികള്‍ എടുത്തിരിക്കുന്നത്. ദുരന്തനിവാരണം ഡെപ്യൂട്ടി കലക്ടര്‍ പി ടി ഷീലാദേവിയ്ക്കാണ് ജില്ലാതല ഏകോപന ചുമതല. 

കൊച്ചി: സംസ്ഥാനത്ത് അതിതീവ്രമഴയ്ക്കുള്ള സാധ്യത കേന്ദ്ര കാലാവസ്ഥാ നിരീക്ഷണ കേന്ദ്രം പ്രവചിച്ചതിനെ തുടര്‍ന്ന് അടിയന്തിര സാഹചര്യം നേരിടുന്നതിനുള്ള മുന്നൊരുക്കങ്ങളുമായി ബന്ധപ്പെട്ട് ജില്ലയിലെ ജനപ്രതിനിധികളുടെയും ഉദ്യോഗസ്ഥരുടെയും യോഗം ഇന്ന് (ഒക്‌ടോബര്‍ 5) രാവിലെ 11-ന് കളക്ടറേറ്റിലെ കോണ്‍ഫറന്‍സ് ഹാളില്‍ ചേരും.

കൊച്ചി: പ്രളയാനന്തര പുനര്‍നിര്‍മ്മാണ പ്രക്രിയകള്‍ക്കായി വ്യക്തികളെയും സന്നദ്ധ സംഘടനകളെയും പങ്കാളികളാക്കി ക്രൗഡ് സോഴ്‌സിംഗ് സംവിധാനം ഒരുങ്ങുന്നു. ഇതു സംബന്ധിച്ച ആദ്യഘട്ട യോഗം കലക്ടറേറ്റില്‍ നടന്നു. പ്രളയാനന്തരം ജില്ല നേരിടുന്ന വിവിധ പ്രശ്‌നങ്ങള്‍ക്ക് പരിഹാരം കാണുന്നതിനും വീട് നിര്‍മാണം, പുനരുദ്ധാരണം തുടങ്ങിയ പ്രവര്‍ത്തനങ്ങളില്‍ ജില്ലാ ഭരണകൂടവുമായി ചേര്‍ന്ന് പ്രവര്‍ത്തിക്കുന്നതിനും തയ്യാറാകുന്ന വ്യക്തികളെയും സന്നദ്ധ സംഘടനകളെയും കണ്ടെത്തി കര്‍മസേന രൂപീകരിക്കുന്നതിനാണ് യോഗം ചേര്‍ന്നത്.

         മഹാത്മാഗാന്ധിയുടെ 150-ാം ജന്‍മവാര്‍ഷികാഘോഷങ്ങളുടേയും ഖാദി പ്രസ്ഥാനത്തിന്റെ നൂറാം വാര്‍ഷികാഘോഷത്തിന്റെയും ഭാഗമായി കേരള ഖാദി ഗ്രാമവ്യവസായ ബോര്‍ഡ്, കേരളത്തിലെ ഹൈസ്‌ക്കൂള്‍/കോളേജ് വിദ്യാര്‍ത്ഥികള്‍ക്കായി മഹാത്മാഗാന്ധിയും ഖാദിയും സ്വാതന്ത്ര്യസമരവും എന്ന വിഷയത്തില്‍ സംസ്ഥാനതല ക്വിസ് മല്‍സരം നടത്തും.         

പുനര്‍വിവാഹം നടത്തിയ സാധുക്കളായ വിധവകളുടെ ധനസഹായപദ്ധതിയായ മംഗല്യയില്‍ അപേക്ഷ ക്ഷണിച്ചു. 2007 ഏപ്രില്‍ ഒന്നിനു ശേഷം പുനര്‍വിവാഹം നടത്തിയ മുന്‍ഗണനാ വിഭാഗത്തില്‍പ്പെട്ട 18നും 50നും മദ്ധ്യേ പ്രായമുളള സ്ത്രീകള്‍ക്കാണ് ധനസഹായത്തിന് അര്‍ഹത. ബ്ലോക്ക് തലത്തിലെ ശിശു വികസന പദ്ധതി ഓഫീസില്‍ അപേക്ഷ നല്‍കണം. കൂടുതല്‍ വിവരം അങ്കണവാടികളിലും ശിശു വികസന പദ്ധതി ഓഫീസിലും ലഭിക്കും

        പി.എന്‍.എക്‌സ്.4382/18

അറബിക്കടലിന്റെ തെക്ക് കിഴക്കന്‍ ഭാഗത്ത് ഒക്‌ടോബര്‍ ആറിന് ന്യൂനമര്‍ദ്ദം രൂപപ്പെടുമെന്നും ഏഴ്, എട്ട് തിയതികളില്‍ ശക്തിപ്രാപിച്ച് അറബിക്കടലിന്റെ വടക്ക് പടിഞ്ഞാറന്‍ ഭാഗത്തേക്ക് നീങ്ങുമെന്നും കാലാവസ്ഥാ നിരീക്ഷണ കേന്ദ്രം അറിയിച്ച സാഹചര്യത്തില്‍ മത്സ്യത്തൊഴിലാളികള്‍ ജാഗ്രത പാലിക്കണം. ന്യൂനമര്‍ദ്ദത്തെ തുടര്‍ന്ന് കടല്‍ അതീവപ്രക്ഷുബ്ധമാകാന്‍ സാദ്ധ്യതയുണ്ട്. ഈ ദിവസങ്ങളില്‍ കടലില്‍ പോകുന്നത് ഒഴിവാക്കണം. ദീര്‍ഘനാളത്തേക്ക് മത്സ്യബന്ധനത്തിന് പോയവര്‍ ഒക്‌ടോബര്‍ അഞ്ചിന് മുമ്പ് തിരികെ എത്തണമെന്നും ഫിഷറീസ് ഹാര്‍ബര്‍ എഞ്ചിനിയറിംഗ് മന്ത്രിയുടെ ഓഫീസ് അറിയിച്ചു. 

പി.എന്‍.എക്‌സ്.4381/18

കേരള സംഗീത നാടക അക്കാദമി നവംബര്‍ 6 മുതല്‍ 10 വരെ അഞ്ചുദിവസം നീണ്ടുനില്‍ക്കുന്ന മോഹിനിയാട്ടം റസിഡന്‍ഷ്യല്‍ ശില്പശാല സംഘടിപ്പിക്കും. 15 വയസ്സിനും 30 വയസ്സിനും ഇടയിലുളളവര്‍ക്കും അഞ്ചു വര്‍ഷമെങ്കിലും മോഹിനിയാട്ടം പഠിച്ചവര്‍ക്കുമാണ് ക്യാമ്പില്‍ പ്രവേശനം. അപേക്ഷകര്‍ ബയോഡാറ്റ സഹിതം വെളളക്കടലാസില്‍ അപേക്ഷ ഒക്‌ടോബര്‍ 20ന് മുമ്പ് സംഗീത നാടക അക്കാദമിയില്‍ തപാല്‍ മുഖേനയോ നേരിട്ടോ നല്‍കണം. അപേക്ഷകരില്‍ നിന്ന് കൂടിക്കാഴ്ചയ്ക്ക് ശേഷം 32 പേരെയാണ് തിരഞ്ഞെടുക്കുക. അപേക്ഷ അയക്കേണ്ട വിലാസം: സെക്രട്ടറി, കേരള സംഗീത നാടക അക്കാദമി, ചെമ്പൂക്കാവ,് തൃശ്ശൂര്‍-20

പി.എന്‍.എക്‌സ്.4380/18

എറണാകുളം ഭാരത് പെട്രോളിയം കോര്‍പറേഷന്‍ പരിസരത്തും കമ്പനിയുടെ രണ്ട് കിലോമീറ്റര്‍ ചുറ്റളവിലും ഡ്രോണുകളും വിളക്ക് ഘടിപ്പിച്ച പട്ടങ്ങളും പറത്തുന്നത് ആറ് മാസത്തേക്ക് നിരോധിച്ച് സര്‍ക്കാര്‍ വിജ്ഞാപനം പുറപ്പെടുവിച്ചു. സുരക്ഷ കണക്കിലെടുത്ത് ജില്ലാ കളക്ടറുടെ ശുപാര്‍ശ പ്രകാരമാണ് നടപടി. കഴിഞ്ഞ ജൂണില്‍ രണ്ടു മാസത്തേക്ക് നിരോധനം ഏര്‍പ്പെടുത്തിയിരുന്നു.

ജൂണ്‍ 9ന് പുലര്‍ച്ചെ മൂന്നിനും അഞ്ചിനുമിടയില്‍ കമ്പനിക്ക് മുകളില്‍ ഡ്രോണ്‍ പറക്കുന്നത് കണ്ട ജീവനക്കാര്‍ അമ്പലമേട് പോലീസില്‍ പരാതി നല്‍കിയിരുന്നു.തുടര്‍ന്നാണ് ആദ്യം നിരോധനം ഏര്‍പ്പെടുത്തിയത്.

പി.എന്‍.എക്‌സ്.4379/18