മുഴപ്പിലങ്ങാട് ഗ്രാമ പഞ്ചായത്ത് പരിധിയില്‍ സ്ഥാപിച്ച മുഴുവന്‍ ഫ്‌ളക്‌സ് ബോര്‍ഡുകളും ജനകീയ പിന്തുണയോടെ നീക്കുന്നതിന്  വിവിധ രാഷ്ട്രീയ പാര്‍ട്ടികളുടെ യോഗത്തില്‍ തീരുമാനമെടുത്തു. ഈ ഉദ്യമത്തിന് മുഴുവനാളുകളുടെയും പിന്തുണയുണ്ടാകണമെന്ന് സെക്രട്ടറി അഭ്യര്‍ത്ഥിച്ചു. 

    യുദ്ധത്തിലോ യുദ്ധസമാന സാഹചര്യത്തിലോ സേവനത്തിനിടയിലോ മരണപ്പെടുകയോ അംഗലൈകല്യം സംഭവിക്കുകയോ ചെയ്ത കര/വ്യോമ/നാവിക സേനയിലെ ജവാന്‍മാരുടെ കുട്ടികള്‍ക്കുള്ള സ്‌കോളര്‍ഷിപ്പിന് നവംബര്‍ 30 വരെ അപേക്ഷിക്കാം. അപേക്ഷ ഫോമിനും വിശദവിവരങ്ങള്‍ക്കും ജില്ലാ സൈനിക ക്ഷേമ ഓഫീസുമായി ബന്ധപ്പെടുക. ഫോണ്‍ 0497 27700069.

സംസ്ഥാന സാക്ഷരതാ  മിഷന്റെ  ആഭിമുഖ്യത്തില്‍   പത്താംതരം  ഹയര്‍ സെക്കന്ററി  തുല്യത പഠിതാക്കള്‍  നടത്തുന്ന  പ്രളയാനന്തര  കേരളം  സര്‍വേയുടെ  കാസര്‍കോട് ബ്ലോക്ക്തല  ഉദ്ഘാടനം  ബ്ലോക്ക്  പഞ്ചായത്ത്  പ്രസിഡന്റ്   സി. എച്ച്  മുഹമ്മദ്  കുഞ്ഞി  ചായിന്റടി  നിര്‍വഹിച്ചു.  മെഹമൂദ്  തൈവളപ്പില്‍, സിദ്ദിഖ്, അബൂബക്കര്‍, ഷറഫുന്നിസ,  സി. കെ പുഷ്പകുമാരി, സുജിത,  കെ. വി.  പുഷ്പകുമാരി  എന്നിവര്‍  സംസാരിച്ചു. ഒരു  പഠിതാവ്  അഞ്ച്  വീടുകളില്‍  സര്‍വേ  നടത്തും.  ഇനിയൊരു  ദുരന്തം  ഉണ്ടായാല്‍  എങ്ങനെ  അതില്‍ നിന്നും  രക്ഷനേടാം എന്ന്  ജനങ്ങളെ  ബോധവല്‍ക്കരിക്കുക  എന്നതാണ്  ഇതിലൂടെ ലക്ഷ്യമിടുന്നത്.

    വിമുക്ത ഭടന്‍മാരുടെ കുട്ടികള്‍ക്ക് കേന്ദ്രീയ സൈനികബോര്‍ഡ് നല്‍കുന്ന സ്‌കോളര്‍ഷിപ്പിന് അപേക്ഷ ക്ഷണിച്ചു. 10,12 ക്ലാസുകള്‍ വിജയിച്ച കുട്ടികള്‍ക്ക് ഒക്ടോബര്‍ 28 വരെയും അണ്ടര്‍ഗ്രാജുവേഷന്‍ വിജയിച്ചിട്ടുള്ളവര്‍ക്ക് നവംബര്‍ 28 വരെയും അപേക്ഷിക്കാം. അപേക്ഷ ഓണ്‍ലൈനായി സമര്‍പ്പിച്ചതിന് ശേഷം പ്രിന്റും ഒറിജിനല്‍ രേഖകളും സഹിതം ജില്ലാ ഓഫീസില്‍ വെരിഫിക്കേഷന് ഹാജരാകേണ്ടതാണെന്ന് ജില്ലാ സൈനിക ക്ഷേന ഓഫീസര്‍ അറിയിച്ചു. ഫോണ്‍ 0497 27700069.

 ഉത്തരവാദിത്ത ടൂറിസം മിഷന്‍ നടപ്പാക്കുന്ന വിവിധ ടൂര്‍ പാക്കേജുകളുടെ ഭാഗമാകാന്‍ ആഗ്രഹിക്കുന്ന കര്‍ഷകര്‍, ഹോം സ്റ്റേകള്‍, കരകൗശല വസ്തുക്കള്‍ നിര്‍മ്മിക്കുന്നവര്‍, ഓട്ടോ, ടാക്‌സി ഡ്രൈവര്‍മാര്‍, സര്‍ക്കാര്‍ അംഗീകാരം നല്‍കിയിട്ടുള്ള ബോട്ട് ഓപ്പറേറ്റര്‍മാര്‍, അംഗീകൃത ഭക്ഷണശാലകള്‍, കലാപ്രവര്‍ത്തകര്‍, കലാഗ്രൂപ്പുകള്‍,പരമ്പരാഗത തൊഴില്‍ ചെയ്യുന്നവര്‍, ഖാദി യൂണിറ്റ് എന്നിവര്‍ക്ക് ഇപ്പോള്‍ യൂണിറ്റുകളായി ഇന്നു(5) രജിസ്റ്റര്‍ ചെയ്യാം.

    2018-19 വര്‍ഷത്തെ ഒ ബി സി പ്രീമെട്രിക് സ്‌കോളര്‍ഷിപ്പിനായി വിദ്യാര്‍ഥികളില്‍ നിന്നും ഒക്‌ടോബര്‍ 10 വരെ അപേക്ഷ സ്വീകരിക്കും.  സ്‌കൂള്‍ അധികൃതര്‍ ഡാറ്റാ എന്‍ട്രി നടത്തുന്നതിനുള്ള തീയതി 15 ന് വൈകിട്ട് അഞ്ച് മണി വരെയാണ്.  

കാസര്‍കോട് റീജിയണല്‍ ട്രാന്‍സ്‌പോര്‍ട്ട്  അതോറിട്ടി യോഗം ഒക്‌ടോബര്‍ 25 ന് രാവിലെ 11 ന് കളക്ടറേറ്റ് മിനി കോണ്‍ഫറന്‍സ് ഹാളില്‍ നടക്കും.

    ലോകമാനസികാരോഗ്യ ദിനത്തോടനുബന്ധിച്ച് കണ്ണൂര്‍ ജില്ലാ മാനസികാരോഗ്യ പദ്ധതി പ്രകാരം ജില്ലയിലെ പ്രമുഖ കോളേജുകളിലെ തിരഞ്ഞെടുക്കപ്പെട്ട വിദ്യാര്‍ത്ഥികള്‍ക്കായി ഒക്‌ടോബര്‍ ആറിന് ജില്ലാ സ്‌പോര്‍ട്‌സ് കൗണ്‍സില്‍ ഹാളില്‍ ഏകദിന ശില്‍പശാല സംഘടിപ്പിക്കുന്നു. 'മാറുന്ന ലോകത്തിലെ യുവതി യുവാക്കളുടെ മാനസികാരോഗ്യം' എന്നതാണ് ഇ വര്‍ഷത്തെ പ്രമേയം. പരിശീലനം പൂര്‍ത്തിയാക്കിയ വിദ്യാര്‍ത്ഥികളുടെ നേതൃത്വത്തില്‍ ഒക്‌ടോബര്‍ 10 ന് ലോക മാനസികാരോഗ്യ ദിനത്തില്‍ എക്‌സിബിഷനും മറ്റു പരിപാടികളും സംഘടിപ്പിക്കും.

    കേരള സംസ്ഥാന ചെങ്കല്‍ ഉല്‍പാദന ഉടമസ്ഥ ക്ഷേമ സംഘം മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന ചെയ്തത് 55,50,000 രൂപ. രണ്ട് ഘട്ടമായാണ് സംഘം തുക കൈമാറിയത്. പ്രളയാനന്തര കേരളത്തിന്റെ പുനസൃഷ്ടിക്കായി മന്ത്രിമാരുടെ നേതൃത്വത്തില്‍ നടന്ന ജില്ലാതല ദുരിതാശ്വാസ സമാഹരണ യജ്ഞത്തിലായിരുന്നു ഒന്നാം ഘട്ടമായി തുക കൈമാറിയത്.