ഓണാഘോഷത്തോടനുബന്ധിച്ച് ജില്ലയില്‍ വ്യാജമദ്യം, മയക്കുമരുന്ന്, ഇതര ലഹരിവസ്തുക്കള്‍ എന്നിവയുടെ വിപണനവും വിതരണവും തടയുന്നതിന് കര്‍ശന നടപടിയെടുക്കുമെന്ന് ജില്ലാ കലക്ടര്‍ ആനി ജൂല തോമസ്. വിവിധ വകുപ്പുകളെ ഏകോപിപ്പിച്ച് രാത്രികാല പട്രോളിംഗ് സുശക്തമാക്കും. 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റൂമുകള്‍ തുറക്കും.
അതിര്‍ത്തി ചെക്ക് പോസ്റ്റുകളില്‍ പരിശോധന കൃത്യതയോടെ നടത്തും.  താലൂക്ക്തലത്തില്‍ തഹസില്‍ദാര്‍മാരുടെനേതൃത്വത്തില്‍ വിവിധ വകുപ്പ് ഉദ്യോഗസ്ഥരെ ഉള്‍പ്പെടുത്തി സംയുക്ത സ്‌ക്വാഡുകളുടെ പരിശോധനകളുമുണ്ടാകും.

ജില്ലാ ആരോഗ്യ വകുപ്പും ജില്ലാ എയ്ഡ്‌സ് കണ്‍ട്രോള്‍ യൂണിറ്റും സംയുക്തമായി ലോക യുവജനദിനത്തോടനുബന്ധിച്ച് നടത്തിയ  റെഡ് റണ്‍ മാരത്തണ്‍ മത്സരത്തില്‍ വിവിധ കോളജുകളില്‍നിന്നുള്ള 96 വിദ്യാര്‍ത്ഥികള്‍ പങ്കെടുത്തു.

  വനിതാ ശിശുവികസന വകുപ്പ് നല്‍കുന്ന 2025-ലെ മിഷന്‍ വാത്സല്യ- ഉജ്ജ്വലബാല്യ പുരസ്‌കാരത്തിന് അപേക്ഷ ക്ഷണിച്ചു. കല, കായികം, സാഹിത്യം, ശാസ്ത്രം, സാമൂഹികം, പരിസ്ഥിതിസംരക്ഷണം, ഐ.ടി, കൃഷി, മാലിന്യസംസ്‌കരണം, ജീവകാരുണ്യപ്രവര്‍ത്തനം, ക്രാഫ്റ്റ്, ശില്പനിര്‍മാണം എന്നീ മേഖലകളില്‍ കഴിവ് തെളിയിച്ചവര്‍ക്കും, അസാമാന്യധൈര്യത്തോടെ  നടത്തിയപ്രവര്‍ത്തനം കാഴ്ചവച്ച കുട്ടികള്‍ക്കുമാണ് പുരസ്‌കാരം നല്‍കുന്നത്.

കൊല്ലം അര്‍ബന്‍ 1 ഐ.സി.ഡി.എസ്. പ്രോജക്ടിലേക്ക്  പോഷകബാല്യം പദ്ധതി പ്രകാരം അങ്കണവാടികളില്‍ മുട്ട, പാല്‍ വിതരണംചെയ്യുന്നതിന് ടെന്‍ഡര്‍  ക്ഷണിച്ചു. ഓഗസ്റ്റ് 13 ഉച്ചയ്ക്ക് രണ്ട് വരെ സ്വീകരിക്കും.   ഫോണ്‍ : 9895057946.
 

ഇത്തവണത്തെ ഓണാഘോഷം താലൂക്ക്-പഞ്ചായത്ത്-മുന്‍സിപ്പാലിറ്റി  തലങ്ങളിലേക്കും വ്യാപിപ്പിച്ച് ആകര്‍ഷകമാക്കുമെന്ന് ജില്ലാ കലക്ടര്‍ ആനി ജൂല തോമസ്. ചേമ്പറില്‍ ചേര്‍ന്ന പ്രത്യേകയോഗത്തില്‍ വ്യക്തമാക്കി.  പരിപാടികളുടെ സംഘാടനത്തിനായി ജില്ലയിലെ മന്ത്രിമാര്‍, മേയര്‍, ജില്ലാ പഞ്ചായത്ത് അധ്യക്ഷ എന്നിവരടങ്ങിയ സബ് കമ്മിറ്റി രൂപീകരിക്കും. ഓഗസ്റ്റ് 24 മുതല്‍ 30 വരെയാണ് പരിപാടികള്‍.

കലക്ട്രേറ്റ് കോണ്‍ഫറന്‍സ് ഹാളില്‍ചേര്‍ന്ന ബാലാവകാശ കമ്മീഷന്റെ സിറ്റിങ്ങില്‍ 33 കേസുകള്‍ തീര്‍പ്പാക്കി. 43 കേസുകളാണ്പരിഗണിച്ചത്. 10 കേസുകള്‍ തുടര്‍നടപടികള്‍ക്കായി മാറ്റി.
കമ്മീഷന്‍ അംഗങ്ങളായ ബി മോഹന്‍കുമാര്‍, സിസിലി ജോസഫ്, കെ കെ ഷാജു എന്നിവരാണ് പങ്കെടുത്തത്. ശങ്കരമംഗലത്ത് ദേശീയപാത നിര്‍മാണവുമായി ബന്ധപ്പെട്ട് സഞ്ചാരസ്വാതന്ത്ര്യം ഉറപ്പാക്കാന്‍ പന്മന ഗ്രാമപഞ്ചയാത്ത് പ്രസിഡന്റ്, പൊലിസ് എസ് എച്ച് ഒ എന്നിവരെ ചുമതലപ്പെടുത്തി.
 
 

തീരപ്രദേശത്ത്  ഓഗസ്റ്റ് 8 വരെ മണിക്കൂറില്‍ 65 കിലോമീറ്റര്‍ വേഗതയില്‍ ശക്തമായ കാറ്റ് ഉണ്ടാകാന്‍ സാധ്യതയുണ്ടെന്ന് കേന്ദ്ര കാലാവസ്ഥവകുപ്പ് അറിയിച്ചിട്ടുള്ളതിനാല്‍ മത്സ്യത്തൊഴിലാളികള്‍ കടലില്‍ പോകരുതെന്ന് ജില്ലാ കലക്ടര്‍ ആനി ജൂലാ തോമസ്. മോശം കാലാവസ്ഥയും ശക്തമായ കാറ്റും പ്രക്ഷുബ്ധമായ കടലും മത്സ്യബന്ധനത്തിന് പ്രതികൂലമാകും. കാറ്റിന്റെ വേഗം മണിക്കൂറില്‍ 65 കിലോമീറ്റര്‍ വരെ ഉയര്‍ന്നേക്കാം. ജാഗ്രതനിര്‍ദ്ദേശങ്ങള്‍ മത്സ്യത്തൊഴിലാളികളും ജില്ലയിലെ തീരദേശവാസികളും കര്‍ശനമായി പാലിക്കണമെന്നും ജില്ലാ കലക്ടര്‍ അറിയിച്ചു.
 

ഉജ്ജ്വലബാല്യം പുരസ്‌കാരത്തിന് അപേക്ഷ ക്ഷണിച്ചു