കേരളത്തിന്റെ പരമ്പരാഗത വ്യവസായത്തിന്റെ ഗുണമേന്മ വിളിച്ചോതി എന്റെ കേരളം പ്രദർശന വിപണനമേളയിലെ കയർവകുപ്പ് സ്റ്റാൾ.  കയർ വകുപ്പിന്റെ വിവിധങ്ങളായ ഉൽപ്പന്നങ്ങളുടെ പ്രദർശനവും വിപണനവുമായി മേളയിൽ വേറിട്ട കാഴ്ച ഒരുക്കുകയാണ് കയർ വകുപ്പ്. പ്രകൃതി വിഭവങ്ങളായ മണ്ണും ജലവും സംരക്ഷിക്കുകയെന്ന ലക്ഷ്യത്തോടെ കയർ വകുപ്പ് വികസിപ്പിച്ചെടുത്ത കയർ ഭൂവസ്ത്രമാണ് ഇവിടുത്ത പ്രധാന ആകർഷണം. പൊതുതോടുകളുടെയും കുളങ്ങളുടെയും വശങ്ങളിൽ കയർഭൂവസ്ത്രം വിരിക്കുന്നതോടെ ആ പ്രദേശത്തെ മണ്ണൊലിപ്പ് തടയുന്നതിനൊപ്പം ജലവും മണ്ണും ജൈവ സമ്പത്തും സംരക്ഷിക്കാൻ കഴിയും. 

കേരള വാട്ടർ അതോറിറ്റി അഞ്ചരക്കണ്ടി, പെരളശ്ശേരി കുടിവെള്ള പദ്ധതിയുടെ ഗ്രാവിറ്റി ലൈനിൽ അടിയന്തിര അറ്റകുറ്റ പ്രവൃത്തികൾ നടക്കുന്നതിനാൽ ഏപ്രിൽ 29, 30, മെയ് ഒന്ന് (ചൊവ്വ, ബുധൻ, വ്യാഴം) എന്നീ ദിവസങ്ങളിൽ പെരളശ്ശേരി, കടമ്പൂർ, മുഴപ്പിലങ്ങാട് എന്നീ പഞ്ചായത്തുകളിലേക്കുള്ള കുടിവെള്ള വിതരണം പൂർണമായും തടസ്സപ്പെടും. ഉപഭോതാക്കൾ ക്രമീകരണവുമായി സഹകരിക്കണമെന്നും, മുൻ കരുതൽ നടപടികൾ സ്വീകരിക്കണമെന്നും വാട്ടർ അതോറിറ്റി പെരളശ്ശേരി വാട്ടർ സപ്ലൈ സബ് ഡിവിഷൻ അസി. എക്സിക്യൂട്ടീവ് എഞ്ചിനീയർ അറിയിച്ചു.

കെ എസ് ആർ ടി സി കണ്ണൂർ ബഡ്ജറ്റ് ടൂറിസം സെൽ വയനാട്, കോഴിക്കോട് ജില്ലകളുടെ നേതൃത്വത്തിൽ ആഡംബര ക്രൂയിസ് ടൂർ പാക്കേജ് സംഘടിപ്പിക്കുന്നു. മെയ് ഒന്നിന് രാവിലെ 5.30 ന് കണ്ണൂരിൽ നിന്നും കൊച്ചിയിലേക്ക് സെമി സ്ലീപ്പർ എയർ സസ്പെൻഷൻ ബസിലാണ് യാത്ര. വൈകുന്നേരം മൂന്ന് മണിക്ക് ആഡംബര ക്രൂയ്‌സിൽ ബോർഡ്‌ ചെയ്യും. അഞ്ച് മണിക്കൂർ യാത്രയിൽ ഡിജെ മ്യൂസിക് പ്രോഗ്രാം, ഫോർ സ്റ്റാർ കാറ്റഗറി ബുഫെ ഡിന്നർ, പ്ലേ തിയേറ്റർ, മറ്റ് പരിപാടികൾ എന്നിവയടങ്ങുന്നതാണ് പാക്കേജ്.

മൂന്ന് ദിവസങ്ങളിലായി ധർമശാല കണ്ണൂർ എഞ്ചിനീയറിംഗ് കോളേജിൽ നടന്ന അഖില കേരള വയനോത്സവത്തിന്റെ സമാപന സമ്മേളനം രജിസ്ട്രേഷൻ വകുപ്പ് മന്ത്രി രാമചന്ദ്രൻ കടന്നപ്പള്ളി ഉദ്ഘാടനം ചെയ്തു. വായന എന്നത് പൂർണമായും നിരാകരിക്കപ്പെട്ടിട്ടില്ലെങ്കിലും അത് നന്നായി കുറഞ്ഞു വന്നിട്ടുണ്ടെന്നും അക്ഷരങ്ങളിലേക്കും വായനയിലേക്കും നമ്മൾ തിരിച്ചു പോകണമെന്നും മന്ത്രി പറഞ്ഞു.

പശ്ചാത്തല വികസന മേഖലയിൽ ആവശ്യമായ മുഴുവൻ പ്രവർത്തനങ്ങളും ഏറ്റെടു നടപ്പിലാക്കിയാണ് കഴിഞ്ഞ ഒൻപത് വർഷം സർക്കാർ മുൻപോട്ട് പോയതെന്ന് പൊതുമരാമത്ത്, ടൂറിസം വകുപ്പ് മന്ത്രി പി എ മുഹമ്മദ്‌ റിയാസ് പറഞ്ഞു. നവീകരിച്ച ഈങ്ങാപ്പുഴ കാക്കവയൽ റോഡ്‌ ഉദ്ഘാടനം ചെയ്യുകയായിരുന്നു മന്ത്രി.

എച്ച്ടി ലൈനിലേക്ക് ചാഞ്ഞുനില്‍ക്കുന്ന മരച്ചില്ലകള്‍ വെട്ടിമാറ്റുന്ന പ്രവൃത്തി നടക്കുന്നതിനാല്‍ മതുക്കോത്, പാട്യം റോഡ് ട്രാന്‍സ്‌ഫോര്‍മര്‍ പരിധിയില്‍ ഏപ്രില്‍ 27 ന് രാവിലെ പത്ത് മുതല്‍ ഉച്ചയ്ക്ക് ഒന്നുവരെ വൈദ്യുതി മുടങ്ങും.

തിരൂര്‍ കുടുംബകോടതിയുടെ വാറണ്ടുപ്രകാരം ഇരിട്ടി താലൂക്ക്, വയത്തൂര്‍ അംശം ദേശത്ത് റീ സര്‍വെ നമ്പര്‍ 28/13692 ല്‍പ്പെട്ട 0.0202 ഹെക്ടര്‍ വസ്തുവിന്റെയും അതില്‍ ഉള്‍പ്പെട്ട ഭവനത്തിന്റെയും ഭാഗിക്കാത്ത നേര്‍പകുതി അവകാശം ഏപ്രില്‍ 30 ന് രാവിലെ 11 ന് വയത്തൂര്‍ വില്ലേജ് ഓഫീസില്‍ ലേലം ചെയ്യും. കൂടുതല്‍ വിവരങ്ങള്‍ ഇരിട്ടി താലൂക്ക് ഓഫീസില്‍ നിന്നോ വയത്തൂര്‍ വില്ലേജ് ഓഫീസില്‍ നിന്നോ ലഭിക്കും.

കേരള സോളിഡ് വേസ്റ്റ് മാനേജ്മെന്റ് പ്രൊജക്റ്റ് ജില്ലാ യൂണിറ്റിന്റെ ഔദ്യോഗിക ആവശ്യത്തിനായി (ഡ്രൈവറടക്കം) 1200 സി സി 7 സീറ്റര്‍ വാഹനം (2022 മുതലുള്ള മോഡല്‍) വാടകയ്ക്ക് നല്‍കുന്നതിന് ക്വട്ടേഷനുകള്‍ ക്ഷണിച്ചു. അപേക്ഷകള്‍ മെയ് 15നകം കെ എസ് ഡബ്ല്യു എം പി പ്രോജക്ട് ഡയറക്ടറുടെ ജില്ലാ ഓഫീസില്‍ ലഭിക്കണം. ഇ മെയില്‍: dpmukswmpkannur@gmail.com ഫോണ്‍: 9947125079, 9447024236