മറ്റത്തൂർ ഗ്രാമപഞ്ചായത്തിലെ അനേകായിരങ്ങളുടെ കുടിവെള്ള സ്രോതസ്സും കൃഷി ആശ്രയവുമായ വലിയതോട് നവീകരിക്കുന്നു. തുമ്പൂർമുഴിയിൽ നിന്നും ആരംഭിക്കുന്ന 18 കിലോമീറ്റർ നീളമുള്ള വലിയ തോടിന്റെ ഒന്നര കിലോമീറ്റർ ഭാഗമാണ് ആദ്യഘട്ടത്തിൽ നവീകരിക്കുക. ഇതിൽ 600 മീറ്റർ പൂർത്തീകരിച്ചു. മറ്റത്തൂർ പഞ്ചായത്ത് 50 ലക്ഷം രൂപയാണ് തോട് ശുചീകരണത്തിനായി വകയിരുത്തിയത്. നാലിടങ്ങളിൽ ബണ്ട് കെട്ടുന്നതിനായി വകയിരുത്തിയ തുകയിൽ ഉൾക്കൊള്ളിച്ചാണ് ഇപ്പോൾ ശുചീകരണം പുരോഗമിക്കുന്നത്.

കൊടകര ഗ്രാമപഞ്ചായത്ത് മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി ഓഫീസിലേക്ക് അക്കൗണ്ടന്റ് തസ്തികയിൽ നിയമനത്തിന് എസ് സി ഉദ്യോഗാർത്ഥികളിൽ നിന്നും അപേക്ഷ ക്ഷണിക്കുന്നു. കരാറടിസ്ഥാനത്തിലാണ് നിയമനം. യോഗ്യത: സർക്കാർ അംഗീകൃതസ്ഥാപനത്തിൽ നിന്നുള്ള ബികോം, പിജിഡിസിഎ. അപേക്ഷ സ്വീകരിക്കുന്ന അവസാന തിയ്യതി ഏപ്രിൽ 20.

വിഷു പ്രമാണിച്ച് കുടുംബശ്രീ സംരംഭകർക്ക് കൂടുതൽ സംരംഭ സാധ്യതകൾ ഒരുക്കുന്നതിനായി സംഘടിപ്പിക്കുന്ന വിപണന മേളയ്ക്ക് കലക്ട്രേറ്റ് അങ്കണത്തിൽ തുടക്കമായി. കുടുംബശ്രീ ജില്ലാ മിഷന്റെ നേതൃതത്തിൽ ഒരുക്കിയ ജില്ലാതല വിഷു വിപണന മേള കലക്ടർ വി ആർ കൃഷ്ണ തേജ ഉദ്ഘാടനം ചെയ്തു.

"വിഷു ആഘോഷിക്കാം കുടുംബശ്രീക്കൊപ്പം" എന്ന ആശയവുമായി വിവിധ മേഖലകളിലെ 14 സ്വയംപര്യാപ്ത സംരഭക യൂണിറ്റുകളെ സംഘടിപ്പിച്ചാണ് കുടുംബശ്രീ മേള ഒരുക്കിയിരിക്കുന്നത്. വിപണന മേള ഏപ്രിൽ 13 വരെ രാവിലെ 9.30 മുതൽ 5.30 വരെയുണ്ടാകും.

സമൂഹത്തിന്റെ മുൻനിരയിലേക്ക് ഉയർന്നുവരാൻ ആഗ്രഹിക്കുന്ന ഭിന്നശേഷി വിഭാഗത്തെ ചേർത്തുപിടിച്ച് സാമൂഹ്യനീതി വകുപ്പ്. മറൈൻ ഡ്രൈവിൽ നടക്കുന്ന എന്റെ കേരളം മെഗാ പ്രദർശന വിപണന മേളയിലാണ് ഭിന്നശേഷി വിദ്യാർത്ഥികൾക്ക് തൊഴിലും വരുമാനവും നൽകുന്ന സംരംഭങ്ങളിലെ വിവിധ ഉത്പന്നങ്ങൾ സന്ദർശകർക്കായി പരിചയപ്പെടുത്തുന്നത്. 

എന്റെ കേരളം വിപണനമേളയെ 'ഗെറ്റ് റ്റുഗെതർ' വേദിയാക്കി 12 സ്ത്രീകൾ. അമ്പലമുകൾ ഗവൺമെന്റ് ഹയർ സെക്കന്ററി സ്കൂളിലെ 1991 എസ്.എസ്.എൽ.സി ബാച്ചിലെ വിദ്യാർത്ഥികളാണ് മറൈൻ ഡ്രൈവിൽ നടന്നു വരുന്ന എന്റെ കേരളം വിപണന മേളയിൽ ഒത്തുകൂടിയത്.

വികസന, ക്ഷേമ പ്രവര്‍ത്തനങ്ങളില്‍ സംസ്ഥാന സര്‍ക്കാര്‍ കൈവരിച്ച മികവും നേട്ടങ്ങളും അവതരിപ്പിക്കുന്ന എന്റെ കേരളം പ്രദര്‍ശന വിപണന മേളയിലെ തൊഴിൽ വകുപ്പിന്റെ സ്റ്റാൾ ഏഴാം ദിവസവും നിറഞ്ഞ പങ്കാളിത്തത്തോടെ തുടരുന്നു. വിവിധ തൊഴിൽ നിയമങ്ങളെക്കുറിച്ചും, വിവിധ ക്ഷേമനിധി ബോർഡുകളിൽ നിന്ന് ലഭ്യമാകുന്ന സേവനങ്ങളെക്കുറിച്ചുമുള്ള വിജ്ഞാന കേന്ദ്രമായി മാറിയിരിക്കുകയാണ് തൊഴിൽ വകുപ്പിന്റെ സ്റ്റാൾ.

സഹജ കോൾ സെന്റർ, തൊഴിൽ സേവ ആപ്പ്, കേരള സവാരി എന്നിവയെക്കുറിച്ച് അറിയുന്നതിനാണ് കൂടുതൽ പേർ സ്റ്റാൾ സന്ദർശിച്ചത്.

വിവിധ ക്ഷേമ പദ്ധതികളിലൂടെ പട്ടികജാതി വിഭാഗത്തിന്റെ സമഗ്ര വികസനത്തിന് ഒരുങ്ങുകയാണ് പട്ടികജാതി വികസന വകുപ്പ്. പട്ടികജാതി കോളനികളുടെ നവീകരണം ലക്ഷ്യമിട്ട്  സർക്കാർ നടപ്പിലാക്കുന്ന അംബേദ്കർ ഗ്രാമ പദ്ധതിയുടെ മാതൃകയാണ് സ്റ്റാളിലെ മുഖ്യ ആകർഷണം.

അംബേദ്കർ ഗ്രാമ പദ്ധതി വഴി നടപ്പിലാക്കുന്ന പദ്ധതികളുടെ വിവരണങ്ങൾ വ്യക്തമായി മനസ്സിലാക്കുന്ന രീതിയിലാണ് മാതൃക തയ്യാറാക്കിയിരിക്കുന്നത്. പദ്ധതിയിലൂടെ നവീകരിക്കുന്ന വീടുകൾ, കിണർ, കമ്മ്യൂണിറ്റി ഹാൾ, ഓപ്പൺ കളിസ്ഥലം എന്നിവ വളരെ ആകർഷണീയമായ രീതിയിൽ മാതൃകയിൽ ഒരുക്കിയിട്ടുണ്ട്.

യൂട്യൂബ് വീഡിയോകളുടെ സ്വാധീനത്തിൽ ഡ്രോൺ നിര്‍മ്മിച്ച് എന്റെ കേരളം മെഗാ പ്രദര്‍ശന വിപണനമേളയില്‍ താരമായി പോളിടെക്‌നിക്ക് വിദ്യാര്‍ത്ഥി. ടെക്‌നിക്കല്‍ എഡ്യൂക്കേഷൻ ഡിപ്പാര്‍ട്ട്‌മെന്റിന്റെ സ്റ്റാളിലാണ്, കോതമംഗലം ഗവണ്‍മെന്റ് പോളിടെക്‌നിക്ക് കോളേജിലെ രണ്ടാംവര്‍ഷ ഇലക്ട്രോണിക്‌സ് വിദ്യാര്‍ത്ഥിയായ എം. കാര്‍ത്തിക് നിര്‍മ്മിച്ച ഡ്രോണുകള്‍ സന്ദർശകർക്ക് കൗതുകമായി മാറിയത്. 

നിങ്ങൾ ഒരു കായികതാരമാണോ? നിങ്ങളുടെ ആരോഗ്യത്തിനായി സംസ്ഥാന സർക്കാർ ഭാരതീയ ചികിത്സ വകുപ്പ് മുഖേന നടപ്പിലാക്കുന്ന പദ്ധതികളെക്കുറിച്ച് നിങ്ങൾക്ക് അറിവുണ്ടോ? ഇല്ലെങ്കിൽ സ്പോർട്സ് ആയുർവേദ എന്ന പദ്ധതിയെക്കുറിച്ച് കൂടുതൽ അറിയാം എൻ്റെ കേരളം മെഗാ പ്രദർശന മേളയിൽ ഭാരതീയ ചികിത്സ വകുപ്പിന്റെ സ്റ്റാളിൽ.