കയ്പമംഗലം മണ്ഡലത്തിലെ വില്ലേജ് ഓഫീസുകൾ സമ്പൂർണ്ണ ഹൈടെക്കിലേക്ക് മാറുന്നു. മണ്ഡലത്തിൽ ഇ-ഓഫീസ് സംവിധാനം നടപ്പിലായി.

ഇ ടി ടൈസൺ മാസ്റ്റർ എംഎൽഎയുടെ ആസ്തി വികസന ഫണ്ടിൽ നിന്നും 14,98,000 രൂപ അനുവദിച്ച്  മണ്ഡലത്തിലെ വില്ലേജ് ഓഫീസുകളിലും കൊടുങ്ങല്ലൂർ താലൂക്ക് ഓഫീസിലേക്കും 24 ലാപ്ടോപ്പുകളുടേയും 13 പ്രിന്ററുകളുടേയും ലഭ്യമാക്കി. ഇവയുടെ വിതരണ ഉദ്ഘാടനം ഇ ടി ടൈസൺ മാസ്റ്റർ എംഎൽഎ നിർവ്വഹിച്ചു.

കൊല്ലം ജില്ലയിൽ മാനേജ്മെന്റ് സ്ഥാപനത്തിൽ ഹയർ സെക്കൻഡറി ഫിസിക്സ്  സീനിയർ അധ്യാപക തസ്തികയിലേക്ക് കേൾവിവൈകല്യം ഉള്ളവർക്കായി സംവരണം ചെയ്ത ഒഴിവിലേക്ക് അപേക്ഷ ക്ഷണിച്ചു. സ്ഥിര നിയമനമുള്ള ജോലിക്ക് ഒരു ഒഴിവാണുള്ളത്. അപേക്ഷകർ തങ്ങളുടെ വിദ്യാഭ്യാസ യോഗ്യത,
ഭിന്നശേഷിത്വം എന്നിവ തെളിയിക്കുന്ന സർട്ടിഫിക്കറ്റുകളുമായി മെയ് 8ന് മുൻപായി ബന്ധപ്പെട്ട പ്രൊഫഷണൽ ആൻഡ് എക്സിക്യുട്ടിവ് എംപ്ലോയ്മെന്റ് എക്സ്ചേഞ്ചിൽ രജിസ്റ്റർ ചെയ്യേണ്ടതാണ്. ഫോൺ: 0484 - 2312944.

നന്ദിക്കര ഗവൺമെന്റ് ഹൈസ്കൂളിൽ യു പി വിഭാഗത്തിനായി സർവ്വ ശിക്ഷ കേരള ഫണ്ട് ഉപയോഗിച്ച് നിർമ്മിക്കുന്ന കെട്ടിടത്തിന്റെ നിർമ്മാണ ഉദ്ഘാടനം പുതുക്കാട് എംഎൽഎ കെ കെ രാമചന്ദ്രൻ നിർവഹിച്ചു. 46 ലക്ഷം രൂപയാണ് ഇതിനായി വകയിരുത്തിയിട്ടുള്ളത്. ആധുനിക സൗകര്യങ്ങളോടു കൂടിയ   കെട്ടിടം ആണ് നിർമിക്കുന്നത്.

കൊച്ചിൻ ദേവസ്വം ബോർഡ് കമ്മീഷണറായി പൊതുഭരണവകുപ്പിലെ അഡീഷണൽ സെക്രട്ടറിയായ സി അനിൽകുമാർ ചുമതലയേറ്റു. കൊച്ചിൻ ദേവസ്വം ബോർഡ് പ്രസിഡൻറ് ഡോ. എം കെ സുദർശൻ, അംഗങ്ങളായ എം പി മുരളീധരൻ, പ്രേംരാജ് ചൂണ്ടാലത്ത്, ദേവസ്വം സെക്രട്ടറി പി ഡി ശോഭന, മറ്റു ദേവസ്വം ഉദ്യോഗസ്ഥർ, തൃശ്ശൂർ പൂരത്തിലെ ഘടക പൂരസമിതി ഭാരവാഹികൾ തുടങ്ങിയവർ പങ്കെടുത്തു.

സുരക്ഷാ ക്രമീകരണങ്ങൾ  വിലയിരുത്തി മന്ത്രി കെ രാജൻ

തൃശൂർ പൂരത്തിൽ എഴുന്നള്ളിക്കുന്ന ആനകളുടെ സുരക്ഷിതത്വം ഉറപ്പാക്കാൻ  മൃഗസംരക്ഷണ വകുപ്പും ആന സ്ക്വാഡും സജ്ജമായി. കൊച്ചിൻ ദേവസ്വം ബോർഡ് വടക്കുംനാഥൻ കൊക്കൂർണിപ്പറമ്പിൽ
പൂരത്തോടനുബന്ധിച്ച് എത്തുന്ന ആനകളുടെ പരിശോധന റവന്യു മന്ത്രി കെ രാജൻ വിലയിരുത്തി. കൊച്ചിൻ ദേവസ്വം ബോർഡിന്റെ എറണാകുളം ശിവകുമാർ എന്ന ആനയെയാണ് മൃഗസംരക്ഷണ വകുപ്പ് ആദ്യം പരിശോധിച്ചത്. കടുത്ത വേനലിൽ ആനകളുടെ പരിപാലനത്തിൽ ഏറെ ശ്രദ്ധവേണമെന്ന് മന്ത്രി കെ രാജൻ നിർദേശിച്ചു.

മാലിന്യമുക്ത ജില്ലയാവാനൊരുങ്ങി തൃശൂർ

സംസ്ഥാന സർക്കാരിന്റെ "നവകേരളം വൃത്തിയുള്ള കേരളം " ക്യാമ്പയിന്റെ ഭാഗമായി മാലിന്യമുക്ത ജില്ലയ്ക്കായി ശുചിത്വ പൂരം പദ്ധതി നടപ്പാക്കുന്നു. മെയ് 19, 20, 21 തിയതികളിലായി ഘട്ടം ഘട്ടമായി ജില്ലയിൽ ശുചീകരണം  നടത്തി  ശുചിത്വ പൂരം ആചരിക്കും. 2024 മാർച്ച് 31 ന് മുമ്പായി മാലിന്യമുക്ത ജില്ലയായി തൃശൂരിനെ മാറ്റുമെന്ന് ജില്ലാ പഞ്ചായത്ത് പ്രസിഡന്റ് പി കെ ഡേവീസ് മാസ്റ്റർ പറഞ്ഞു. ജില്ലാ ആസൂത്രണ ഭവൻ ഹാളിൽ സംഘടിപ്പിച്ച പ്രത്യേക ആസൂത്രണ സമിതി യോഗത്തിൽ അദ്ധ്യക്ഷത വഹിച്ച് സംസാരിക്കുകയായിരുന്നു അദ്ദേഹം.

തോളൂർ സാമൂഹിക ആരോഗ്യ കേന്ദ്രത്തിന് കീഴിൽ പ്രവർത്തിക്കുന്ന ഡയാലിസിസ് യൂണിറ്റിലേക്ക് കരാർ വ്യവസ്ഥയിൽ ഡയാലിസിസ് ടെക്നീഷ്യനെയും (ഈസിജിയിൽ പരിശീലീനമുള്ളർ) ആശുപത്രി ലാബിലേക്ക് പാർട്ട് ടൈം ലാബ് ടെക്നിഷ്യനെയും നിയമിക്കുന്നു. അഭിമുഖം മെയ് 10ന് രാവിലെ 11 മണിക്ക് സൂപ്രണ്ട് ഓഫീസിൽ നടക്കും. ഉദ്യോഗാർത്ഥികൾ  അസൽ സർട്ടിഫിക്കറ്റുകളും ബയോഡാറ്റയും പാസ്പോർട്ട് സൈസ് ഫോട്ടോയും സഹിതം ഹാജരാവണം. ഫോൺ: 0487 2285746

തൃശൂർ വനിതാ പ്രൊട്ടക്ഷൻ ഓഫീസറുടെ ഓഫീസിലേക്ക് ഈ വർഷത്തേക്ക് വാഹനം വാടകക്ക് കരാർ നൽകുന്നതിന് താല്പര്യമുള്ളവരിൽ നിന്നും അപേക്ഷ ക്ഷണിച്ചു. മെയ് 12 ന് മുൻപായി അപേക്ഷകൾ നൽകേണ്ടതാണ്. ഫോൺ: 8081999058.

ടൂറിസം വകുപ്പിന് കീഴിൽ പ്രവർത്തിക്കുന്ന ഫുഡ് ക്രാഫ്റ്റ് ഇൻസ്റ്റിറ്റ്യൂട്ടിൽ ഹ്രസ്വകാല ഹോട്ടൽ മാനേജ്മെന്റ് സൗജന്യ കോഴ്സുകളിലേക്ക് അപേക്ഷ ക്ഷണിച്ചു. കുക്കറി, ബേക്കറി, ഫുഡ് ആന്റ് ബീവറേജ് സർവ്വീസ്, ഹൗസ് കീപ്പിംഗ്, ഫ്രണ്ട് ഓഫീസ് ഓപ്പറേഷൻ തുടങ്ങിയ കോഴ്സുകളിലാണ് പരിശീലനം. പത്താം ക്ലാസ് യോഗ്യതയുള്ള 18 വയസ്സ് തികഞ്ഞ സ്ത്രീകൾക്ക് അപേക്ഷിക്കാം. അപേക്ഷകൾ അതത് ഇൻസ്റ്റിറ്റ്യൂട്ടുകൾ വഴി നേരിട്ട് ലഭ്യമാകുന്നതാണ്. അപേക്ഷകൾ സമർപ്പിക്കേണ്ട അവസാന തീയതി മെയ് 5ന് വൈകീട്ട് 5 മണിവരെ. ഫോൺ 0487 2384253

പ്രൗഢി വിളിച്ചോതുന്ന പാറമേക്കാവ് ഭഗവതിയുടെ തിടമ്പ്, വർണ്ണാഭമായ നെറ്റിപ്പട്ടം, മനോഹരമായ വെഞ്ചാമരങ്ങൾ, പല നിറമാർന്ന കുടകൾ എന്നിങ്ങനെ മാറ്റുകൂട്ടുന്ന നിരവധി കാഴ്ചകളാണ് പാറമേക്കാവ് വിഭാഗം ക്ഷേത്രത്തിനടുത്ത കെട്ടിടത്തിൽ സജ്ജമാക്കിയ പൂരച്ചമയ പ്രദർശനത്തിലുള്ളത്.