ഊരും പേരും തിരിച്ചറിയാത്ത 60 വയസ് പ്രായം തോന്നിക്കുന്ന പുരുഷനെ ഏപ്രിൽ ഒമ്പതിന് വൈകീട്ട് ഏഴ് മണിക്കും ഏപ്രിൽ 10ന് രാവിലെ 6.30 മണിക്കും ഇടയിൽ തൃശ്ശൂർ എംജി റോഡ് അമ്മൻ കോവിൽ സ്ട്രീറ്റിലുള്ള വീടിന് മുൻ വശം പോർച്ചിൽ കെട്ടിത്തൂങ്ങി മരിച്ചനിലയിൽ കണ്ടെത്തിയിട്ടുണ്ട്. മരണസമയം നീല നിറത്തിലുള്ള ലുങ്കിയും ഇടത് കൈയിലെ മോതിരവിരലിൽ ഒരു കൊന്ത മോതിരവും ധരിച്ചിട്ടുണ്ട്. ഫോട്ടോയിൽ കാണുന്നയാളെക്കുറിച്ച് വിവരം ലഭിക്കുന്നവർ ടൗൺ വെസ്റ്റ് പൊലീസ് സ്റ്റേഷനുമായോ താഴെ കൊടുത്ത ഫോൺ നമ്പറുകളിലോ ബന്ധപ്പെടണം. ടൗൺ വെസ്റ്റ് പൊലീസ് സ്റ്റേഷൻ: 0487 2363608, എസ് ഐ 9497980560, ഇൻസ്പെക്ടർ 9497987131.

തൃശൂർ പൂരം നടത്തിപ്പിനായി ദേവസ്വം ജീവനക്കാരുടെയും ബന്ധപ്പെട്ട ഉദ്യോഗസ്ഥരെയും യോഗം ഏപ്രിൽ 14ന് ഉച്ചക്കു ശേഷം 3ന് തൃശൂർ കളക്ടറേറ്റ് കോൺഫറൻസ് ഹാളിൽ ചേരും.

ചൊവ്വന്നൂർ പഞ്ചായത്തിൽ സ്ഥിരതാമസമുള്ള വനിതകളിൽ നിന്ന് പഞ്ചായത്തിലെ അങ്കണവാടി വർക്കർ/ഹെൽപ്പർ തസ്തികയിലേക്ക് സ്ഥിരനിയമനത്തിന് അപേക്ഷ ക്ഷണിച്ചു.

2023 ജനുവരി ഒന്നിന് 18 വയസ്സിനും 46 വയസ്സിനും ഇടയിൽ പ്രായപരിധി ഉള്ളവരാകണം. എസ് സി/ എസ് ടി വിഭാഗത്തിന് മൂന്നുവർഷം വരെയും മുൻപരിചയം ഉള്ളവർക്ക് സേവന കാലയളവിന്റെ അടിസ്ഥാനത്തിൽ പരമാവധി മൂന്ന് വർഷം വരെയും ഉയർന്ന പ്രായപരിധിയിൽ ഇളവ് ലഭിക്കും.

പാറശാല താലൂക്ക്് ആശുപത്രിയിലെ ചൈതന്യം പദ്ധതിയുടെ ഉദ്ഘാടനം സി കെ ഹരീന്ദ്രന്‍ എംഎല്‍എ നിര്‍വഹിച്ചു. സംസ്ഥാന ഊര്‍ജ്ജ വകുപ്പിന്റെ കീഴില്‍ പ്രവര്‍ത്തിക്കുന്ന എനര്‍ജി മാനേജ്‌മെന്റ് സെന്റര്‍ മുഖാന്തിരം കാര്‍ബണ്‍ ബഹിര്‍ഗമനവും വൈദ്യുതി ഉപയോഗവും ഗണ്യമായി കുറയ്ക്കാനും സാധിക്കുന്ന പദ്ധതിയാണ് ചൈതന്യം. പ്രകൃതിയോട് ചേര്‍ന്ന് നില്‍ക്കുന്ന ആശുപത്രി, ഊര്‍ജ്ജ സംരക്ഷണത്തിലും മാതൃകയാവുകയാണെന്ന് സി.കെ ഹരീന്ദ്രന്‍ എം.എല്‍.എ പറഞ്ഞു. ഇത് വഴി പ്രതിമാസം വരുന്ന വൈദ്യുത ബില്ല് ഗണ്യമായി കുറയ്ക്കാനും, ഫൈവ് സ്റ്റാര്‍ റേറ്റിംഗ് വൈദ്യുതി ഉപകരണങ്ങള്‍ വഴി കാര്‍ബണ്‍ ബഹിര്‍ഗമനം ഒഴിവാക്കാനും സാധിക്കും.

നെടുമങ്ങാട് ജില്ലാ ആശുപത്രിയിൽ പുതുതായി നിർമ്മിക്കാൻ ഉദ്ദേശിക്കുന്ന കെട്ടിടത്തിനായി സ്ഥലം ഡിജിറ്റൽ സർവേയിംഗ് സംവിധാനം ഉപയോഗിച്ച് അളന്നു നൽകുന്നതിന് ഏജൻസികളിൽ നിന്നും താല്പര്യ പത്രം ക്ഷണിച്ചു. അപേക്ഷ ലഭിക്കേണ്ട വിലാസം: സൂപ്രണ്ട്, ജില്ലാ ആശുപത്രി, നെടുമങ്ങാട്. ഏപ്രിൽ 13 ഉച്ചയ്ക്ക് 12 മണി വരെയാണ് അപേക്ഷ സ്വീകരിക്കുന്ന അവസാന തീയതി. ഏപ്രിൽ 13 ഉച്ചയ്ക്ക് രണ്ടു മണിക്ക് അപേക്ഷ തുറക്കും. 4.51 ഏക്കർ ആണ് സ്ഥലത്തിന്റെ വിസ്തീർണ്ണം.

പട്ടികവർഗ്ഗ വികസന വകുപ്പിന് കീഴിൽ ശ്രീകാര്യം കട്ടേലയിൽ പ്രവർത്തിക്കുന്ന ഡോക്ടർ അംബേദ്കർ മെമ്മോറിയൽ മോഡൽ റസിഡൻഷ്യൽ ഹയർ സെക്കൻഡറി സ്കൂളിൽ 2023-24 അധ്യയന വർഷത്തേക്ക്  6, 7 എന്നീ ക്ലാസുകളിലേക്ക് ഒഴിവുള്ള സീറ്റുകളിലേക്ക് പ്രവേശനം നേടാൻ ആഗ്രഹിക്കുന്ന പട്ടികവർഗ്ഗ/പട്ടികജാതി വിഭാഗത്തിലെ അർഹരായ പെൺകുട്ടികൾ ഏപ്രിൽ 25ന് രാവിലെ 10 മണിക്ക് സ്കൂളിൽ വച്ച് നടക്കുന്ന പ്രവേശന പരീക്ഷയിൽ പങ്കെടുക്കണം. ജാതി, വരുമാന സർട്ടിഫിക്കറ്റുകളുടെ പകർപ്പുകൾ സഹിതം ഉള്ള അപേക്ഷ പ്രവേശന പരീക്ഷാ സമയത്ത് ഹാജരാക്കേണ്ടതാണ്. രക്ഷാകർത്താക്കളുടെ വാർഷിക വരുമാന പരിധി രണ്ട് ലക്ഷം രൂപ ആയിരിക്കും.

കൊടകര അഡീഷണൽ ഐസിഡിഎസ് പ്രോജക്ടിൽ വരുന്ന വരന്തരപ്പിള്ളി പഞ്ചായത്തിലെ അങ്കണവാടി വർക്കർ, ഹെൽപ്പർ തസ്തികകളിലേക്ക് സ്ഥിര - താത്കാലിക നിയമനത്തിന് അപേക്ഷ ക്ഷണിച്ചു. അപേക്ഷിക്കേണ്ട അവസാന തിയ്യതി ഏപ്രിൽ 29. ഫോൺ: 0480 2727990

പെരിഞ്ഞനം ഗ്രാമപഞ്ചായത്തിൽ കുടുംബശ്രീയുടെ നേതൃത്വത്തിൽ വിഷുച്ചന്തയ്ക്ക് തുടക്കമായി. വിപണിയിലെ വിലക്കയറ്റം പിടിച്ച് നിർത്തുക, കാർഷിക ഉൽപ്പന്നങ്ങളും മായമില്ലാത്ത ഭക്ഷണ സാധനങ്ങളും മിതമായ നിരക്കിൽ പൊതുജനങ്ങൾക്കെത്തിക്കുക എന്ന ലക്ഷ്യത്തോടെയാണ് വിഷുച്ചന്ത ആരംഭിച്ചത്.  വിഷുച്ചന്തയുടെ ഉദ്ഘാടനം ഇ ടി ടൈസൺ മാസ്റ്റർ എംഎൽഎ നിർവ്വഹിച്ചു.

മാർച്ച് 9ന് കൊടൈക്കനാലിലേക്ക് കൂട്ടുകാരോടൊപ്പം യാത്ര പോയ കാരമുക്ക് പൊറ്റേക്കാട്  വീട്ടിൽ അനന്തു (19) എന്നയാളെ കാണാതായതായി അന്തിക്കാട് പോലീസിൽ പരാതി ലഭിച്ചിട്ടുണ്ട്. കൊടൈക്കനാലിൽ വച്ചാണ്  കാണാതാവുന്നത്. എന്തെങ്കിലും വിവരം ലഭിക്കുന്നവർ  അന്തിക്കാട് പോലീസ് സ്റ്റേഷനിൽ അറിയിക്കണം. ഫോൺ: 9497987140, 9497980522, 0487 2626042.

മറ്റത്തൂർ ഗ്രാമപഞ്ചായത്തിലെ അനേകായിരങ്ങളുടെ കുടിവെള്ള സ്രോതസ്സും കൃഷി ആശ്രയവുമായ വലിയതോട് നവീകരിക്കുന്നു. തുമ്പൂർമുഴിയിൽ നിന്നും ആരംഭിക്കുന്ന 18 കിലോമീറ്റർ നീളമുള്ള വലിയ തോടിന്റെ ഒന്നര കിലോമീറ്റർ ഭാഗമാണ് ആദ്യഘട്ടത്തിൽ നവീകരിക്കുക. ഇതിൽ 600 മീറ്റർ പൂർത്തീകരിച്ചു. മറ്റത്തൂർ പഞ്ചായത്ത് 50 ലക്ഷം രൂപയാണ് തോട് ശുചീകരണത്തിനായി വകയിരുത്തിയത്. നാലിടങ്ങളിൽ ബണ്ട് കെട്ടുന്നതിനായി വകയിരുത്തിയ തുകയിൽ ഉൾക്കൊള്ളിച്ചാണ് ഇപ്പോൾ ശുചീകരണം പുരോഗമിക്കുന്നത്.