കേരള തീരത്ത് ചൊവ്വാഴ്ച (ഏപ്രില്‍ 11) രാത്രി 11.30 വരെ 0.5 മീറ്റര്‍ മുതല്‍ 1.0 മീറ്റര്‍ വരെ ഉയര്‍ന്ന തിരമാലയ്ക്കും കടലാക്രമണത്തിനും സാധ്യതയുള്ളതായി ദേശീയ സമുദ്രസ്ഥിതിപഠന ഗവേഷണ കേന്ദ്രം. ഈ സാഹചര്യത്തില്‍ മത്സ്യത്തൊഴിലാളികള്‍ക്കും തീരദേശവാസികള്‍ക്കും സംസ്ഥാന ദുരന്തനിവാരണ അതോറിറ്റി ജാഗ്രതാ നിര്‍ദേശം നല്‍കി. മത്സ്യബന്ധനയാനങ്ങളുടെയും ഉപകരണങ്ങളുടെയും സുരക്ഷ ഉറപ്പാക്കണമെന്നും ബീച്ചിലേയ്ക്കുള്ള യാത്രകളും കടലില്‍ ഇറങ്ങിയുള്ള വിനോദങ്ങളും പൂര്‍ണമായും ഒഴിവാക്കണമെന്നും മുന്നറിയിപ്പുണ്ട്. അതേസമയം കേരള-കര്‍ണാടക-ലക്ഷദ്വീപ് തീരങ്ങളില്‍ മത്സ്യബന്ധനത്തിന് തടസമില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു.

കേരള എക്‌സൈസ് മൊബൈല്‍ ഇന്റര്‍വെന്‍ഷന്‍ യൂണിറ്റിന്റെ സംസ്ഥാനതല ഉദ്ഘാടനം മന്ത്രി നിര്‍വഹിച്ചു

കേരളത്തിലെ എക്‌സൈസ് വകുപ്പ് നവീകരണത്തിന്റെ പാതയിലാണെന്നും അതിനെ ശക്തിപെടുത്താന്‍ ഉതകുന്ന പദ്ധതിയാണ് 'കെമു'വെന്നും (കേരള എക്‌സൈസ് മൊബൈല്‍ ഇന്റര്‍വെന്‍ഷന്‍ യൂണിറ്റ്) എക്‌സൈസ് വകുപ്പ് മന്ത്രി എം ബി രാജേഷ്. കെമുവിന്റെ സംസ്ഥാനതല ഉദ്ഘാടനം നിര്‍വഹിച്ചു സംസാരിക്കുകയായിരുന്നു മന്ത്രി.

ദേശീയ ബാലാവകാശ സംരക്ഷണ കമ്മീഷന്‍ അംഗം ഡോ ആര്‍ ജി ആനന്ദ് പൂജപ്പുരയിലെ ഗവണ്‍മെന്റ് ഒബ്സര്‍വേഷന്‍ ഹോം സന്ദര്‍ശിച്ചു. രേഖകളും സൗകര്യങ്ങളും പരിശോധിച്ച അദ്ദേഹം കുട്ടികള്‍ക്ക് നല്‍കുന്ന ഭക്ഷണത്തെക്കുറിച്ചും മെഡിക്കല്‍ സേവനങ്ങളെക്കുറിച്ചും ചോദിച്ചറിഞ്ഞു. ജില്ലയിലെ ഒബ്സര്‍വേഷന്‍ ഹോമിന്റെ പ്രവര്‍ത്തനം തൃപ്തികരമാണെന്നും മറ്റ് സംസ്ഥാനങ്ങളെ അപേക്ഷിച്ച് കുട്ടികള്‍ക്കായി കൂടുതല്‍ പ്രവര്‍ത്തനങ്ങള്‍ ഇവിടെ നടക്കുന്നുണ്ടെന്നും അദ്ദേഹം പറഞ്ഞു.

ജില്ലയില്‍ ഉപതെരഞ്ഞെടുപ്പ് നടക്കുന്ന രണ്ടു വാര്‍ഡുകളിലെ കരട് വോട്ടര്‍ പട്ടിക സംബന്ധിച്ച പരാതികള്‍ അറിയിക്കാം. തിരുവനന്തപുരം കോര്‍പ്പറേഷനിലെ മുട്ടട, പഴയകുന്നുമ്മല്‍ ഗ്രാമപഞ്ചായത്തിലെ കാനാറ എന്നീ വാര്‍ഡുകളില്‍ നടക്കുന്ന ഉപതെരഞ്ഞെടുപ്പുമായി ബന്ധപ്പെട്ട കരട് വോട്ടര്‍ പട്ടിക ഏപ്രില്‍ അഞ്ചിന് പ്രസിദ്ധീകരിച്ചിരുന്നു. ഈ കരട് വോട്ടര്‍ പട്ടികയുമായി ബന്ധപ്പെട്ട പരാതികള്‍ ഏപ്രില്‍ 20 വ്യാഴാഴ്ച അഞ്ച് മണി വരെ സമര്‍പ്പിക്കാം. നഗരസഭാ പരിധിയിലെ വോട്ടര്‍മാര്‍ കോര്‍പ്പറേഷന്‍ സെക്രട്ടറിക്കും ഗ്രാമപഞ്ചായത്ത് പരിധിയിലെ വോട്ടര്‍മാര്‍ പഞ്ചായത്ത് സെക്രട്ടറിക്കുമാണ് പരാതി സംബന്ധിച്ച അപേക്ഷ നല്‍കേണ്ടത്.

തൃപ്പൂണിത്തുറ സർക്കാർ സംസ്കൃത കോളേജിൽ നിർമാണം പൂർത്തീകരിച്ച കെട്ടിട സമുച്ചയം ഉദ്ഘാടനം ചെയ്തു

കേരളത്തിലെ ഉന്നത വിദ്യാഭ്യാസ മേഖല മാറ്റത്തിന്റെയും മുന്നേറ്റത്തിന്റെയും പാതയിലൂടെയാണ് സഞ്ചരിക്കുന്നതെന്ന് ഉന്നത വിദ്യാഭ്യാസ, സാമൂഹ്യനീതി വകുപ്പ് മന്ത്രി ഡോ. ആർ ബിന്ദു. തൃപ്പൂണിത്തുറ സർക്കാർ സംസ്കൃത കോളേജിൽ കിഫ്ബി, റൂസ ഫണ്ടുകൾ ഉപയോഗിച്ച് നിർമാണം പൂർത്തീകരിച്ച കെട്ടിട സമുച്ചയത്തിന്റെ ഉദ്ഘാടനം നിർവഹിച്ചുകൊണ്ട് സംസാരിക്കുകയായിരുന്നു മന്ത്രി. 

കോട്ടയം: പനയ്ക്കച്ചിറ ഗവൺമെന്റ് ഹൈസ്‌കൂളിൽ സംസ്ഥാന സർക്കാർ പ്ലാൻ ഫണ്ടിൽ നിന്ന് രണ്ടു കോടി രൂപ ഉപയോഗിച്ചു നിർമിച്ച ഹൈടെക് സ്‌കൂൾ മന്ദിരത്തിന്റെ ഉദ്ഘാടനം ഏപ്രിൽ 13ന് ഉച്ച കഴിഞ്ഞു മൂന്നുമണിക്ക് വിദ്യാഭ്യാസ തൊഴിൽ വകുപ്പു മന്ത്രി വി. ശിവൻകുട്ടി നിർവഹിക്കും. അഡ്വ. സെബാസ്റ്റിയൻ കുളത്തുങ്കൽ എം.എൽ.എ. അധ്യക്ഷനായിരിക്കും. ആന്റോ ആന്റണി എം.പി. മുഖ്യപ്രഭാഷണം നയിക്കും. പൊതുമരാമത്ത് കെട്ടിട വിഭാഗം സൂപ്രണ്ടിംഗ് എൻജിനീയർ എം.ജി. ലൈജു റിപ്പോർട്ട് അവതരിപ്പിക്കും.

കോട്ടയം: സംസ്ഥാന മന്ത്രിസഭയുടെ രണ്ടാം വാർഷികാഘോഷത്തിന്റെ ഭാഗമായി സംഘടിപ്പിക്കുന്ന 'എന്റെ കേരളം' പ്രദർശന-വിപണന മേളയുടെ ജില്ലാതല സംഘാടക സമിതി രൂപീകരണയോഗം ഇന്ന്  വൈകിട്ട് അഞ്ചുമണിക്ക് കോട്ടയം കെ.പി.എസ്. മേനോൻ ഹാളിൽ നടക്കും. സഹകരണ-രജിസ്‌ട്രേഷൻ വകുപ്പുമന്ത്രി വി.എൻ. വാസവൻ അധ്യക്ഷത വഹിക്കും.

കോട്ടയം: സംസ്ഥാനത്ത് അക്ഷയ ഊർജ്ജ രംഗത്ത് മികച്ച പ്രവർത്തനങ്ങൾ നടത്തിയവർക്ക് പുരസ്‌കാരം നൽകുന്നതിന് അപേക്ഷ ക്ഷണിച്ചു. പൊതു സ്ഥാപനങ്ങൾ, വിദ്യാഭ്യാസ സ്ഥാപനങ്ങൾ, തദ്ദേശസ്വയംഭരണ സ്ഥാപനങ്ങൾ, സർക്കാർ ഇതര സംഘടനകൾ, ഗവേഷണസ്ഥാപനങ്ങൾ, യുവസംരംഭകർ, വാണിജ്യ സംരംഭകർ, ചെറുകിട വ്യവസായ സ്ഥാപനങ്ങൾ തുടങ്ങിയ മേഖലയിലുള്ളവർക്കാണ് പുരസ്‌കാരം. 2021 ഏപ്രിൽ ഒന്നുമുതൽ 2022 മാർച്ച് 31 വരെയുള്ള പ്രവർത്തനങ്ങൾ പരിഗണിക്കും. ഓരോ മേഖലയിലും പുരസ്‌കാരത്തിനർഹരാകുന്നവർക്ക് ഒരു ലക്ഷം രൂപയും ഫലകവും പ്രശസ്തി പത്രവും നൽകും. ഏപ്രിൽ 20നകം അപേക്ഷിക്കണം.

കോട്ടയം: പാലാ ഗവൺമെന്റ് കൊമേഴ്‌സ്യൽ ഇൻസ്റ്റിറ്റ്യൂട്ട് വളപ്പിൽ നിൽക്കുന്ന പ്ലാവ്, മരുത് എന്നീ മരങ്ങളും കാട്ടുവേപ്പ്, തേരകം, മരുത് എന്നിവയുടെ ശിഖരങ്ങളും ഏപ്രിൽ 13ന് രാവിലെ 11 ന് ലേലം ചെയ്യും. വിശദവിവരത്തിന് ഫോൺ: 04822 201650